AMƆSI 8 - WE NU GALE 1995

Gale bia yele kɛ ma dunu do owala te li Amɔsi

¹ Nɛ NWA Gale bia zi 'bɔ mɔ hã mi. Mi zɔa zi yele, nɛ nde ma dunu do ofila wala te,

² nɛ a aka mi na: “Amɔsi, mɛ mɔ zɔ ni a ge nde?” Nɛ mi gese hã a na: “Mi zɔ yele ofila wala te.” Nɛ NWA tɔ̃ hã mi na: “Oisraɛlɛ wa fila ɔ nɛ owala tenɔ gɛ, nɛ wa hɔa ndɔti dungu 'da wa ia, wa 'báná sɛ 'bɔ gɔ. Mi kpóló sɛ linggamɛ 'da mi gɔ, mi hã sɛ etumbu hã wa.

³ Do ngba soe etumbui ni, nɛ owuko ga zumanɔ kɔ tɔa 'da nwa, wa ga sɛ zuma kɔ̃a. Nɛ owɔlɔ wele, ma kpa sɛ falanɔ vɛ̃, nɛ ngɔ nùi ma gɛ̃ sɛ kpi kpi kpi.”

Gale a hã sɛ etumbu hã obe Israɛlɛ

⁴ Aa nɛ, owinɔ kɛ nɛ hã ngamɔ hã owi sãnɔ, nɛ nɛ fa we kumu obe winɔ ni, nɛ zélé!

⁵ Nɛ tɔ̃ do kɔ sila nɛ na: “Ɛngga mbé zɛkɛ ma e dɔ̃, takɔ lɛ be gole blenɔ 'da lɛ.” Nɛ nɛ kɔ̃a 'bɔ na, kɔ̃ tũ ɔmɔ tɛ wi ma la do'do, takɔ nɛ hũi nu kpalɛnɔ 'da nɛ, kɔ nɛ be gole nɛ. Nɛ ngba'bala tɛ mɔ we do mɔ golenɔ 'da nɛ hã owinɔ, nɛ nɛ zũ 'bɔ nu kiloe 'da wa.

⁶ Gɛnɛ kɔ Sili gbãlã blenɔ 'da nɛ, nɛ nɛ be gole nɛ bia iko. Nɛ kala owi sã do owi 'bako do ngbá, we kɛ wa wè tɛ si olo ku'danɔ nɛ ia zu wa ni gɔ. Gɛnɛ kɔ wanɔ kɛ wa wè we futa mbili olo mɔ nyanga wi 'da wa gɔ ni, nɛ nde nɛ mbɔkɔ wa gɔ.

⁷ NWA, wele kɛ obe Israɛlɛ wa dɔnggɔ tɛ wa do a ni, a zungga tɛ̃ a na: “Ta mi élé sɛ ngɔ 'dã dɛa to tɛ obe Israɛlɛ fala kpo gɔ.

⁸ We duzu nɛ, ma kɛ nùi ma tana sɛ, nɛ owinɔ vɛ̃ wa dungu sɛ gɛla. Nùi vɛ̃ ma yaka sɛ. Ma kũ sɛ dɛ ngɔ, nɛ ma bindi, ɔ nɛ kɛ ngele lì Nilɛ tɛ Ezipeto i kũ, nɛ ma bindi ni.”

⁹ NWA Gale tɔ̃a 'bɔ na: “Do ngba soe ni, mi dɛ sɛ na, wese bi tũ do gbo gba wese, nɛ gba tũ ma tũ sɛ ngɔ nùi vɛ̃.

¹⁰ Mi kifi sɛ mɔ dɔnɔ 'da nɛ do mɔ gɛla, nɛ ozuma yangganɔ 'da nɛ ma kifi sɛ zuma 'bako. Mi he'de sɛ tulu gɛla hã nɛ, nɛ wa kɛlɛ sɛ zu nɛ. Nɛ ɔ sɛ nɛ wi kɛ kpo bulu be 'da a fi fia ni. Nɛ ngba soe ni ma Sɔkpɔ sɛ do hia kɔ̃a do 'bako.”

¹¹ NWA tɔ̃a na: “Mbe tũ kpo, nɛ mi tombo sɛ wɔ ngɔ nù Israɛlɛ. Wɛ ni, mɛ sɛ a wɔ nyɔngɔmɔ tabi wɔ lì gɔ, nɛ nde mɛ sɛ a wɔ zele we nu mi.

¹² Owinɔ wa yɛnggɛ sɛ falanɔ vɛ̃, yolo tɛ gba lì kɛ si ba gɔtɔ we hɔ tɛ gba lì kɛ si 'biti gɛ̃a wese, nɛ yolo tɛ si gbãlã ngɔ we hɔ si 'biti gba wese. Wa yɛnggɛ sɛ mba mba we fa we zele we nu mi nwa, nɛ nde wa zélé sɛ gɔ.

¹³ Do ngba soe ni, sã lì ma ba sɛ wena. Nɛ odia be zɔnganɔ do onga zagbãlãnɔ wa fe sɛ wɔ lì.

¹⁴ Owinɔ vɛ̃ kɛ wa gbini zã wa do okpikimanɔ tɛ le Samaria do wanɔ kɛ wa kana tɛ wa do zu li gale bɛlɛ tɛ le Danɛ, tabi gale bɛlɛ tɛ Bɛrseba ni, wa ala sɛ nù vɛ̃, nɛ wele kpo kúlú sɛ 'bɔ ngɔ gɔ.”