AMƆSI 7 - WE NU GALE 1995

MƐNƆ KƐ GALE BIA LI AMƆSI NWA bia odɔla li Amɔsi

¹ Nɛ zɔ́ mɛ kɛ NWA Gale bia zi ma hã mi gɛ: Olo kɛ wa 'bili nwánɔ hã osa'denɔ 'da nwa, nɛ mbé bɔlɔ nɛ ma ngɔ hɔ nɛ ni, nɛ mi zɔ na, NWA Gale tumba ogili dɔla, nɛ wa te zu nɛ.

² Nɛ mi zɔa odɔlanɔ ni tɛ nyɔngɔ Okpalɛnɔ, do otɔlɔ nwánɔ ngɔ nùi vɛ̃. Nɛ mi ala nu mi hã NWA Gale na: “Aa NWA, mɔ mbɔ́kɔ́ winɔ 'da mɔ! Ní gɔ, nɛ kɛ wa dɔ̃ gɔɛ gɛ, nɛ wa 'bana sɛ nde?”

³ NWA nɛa we zele ni, nɛ a kpolo linggamɛ 'da a, nɛ a na: “Mɛ mɔ zɔa ni, ma dɛ́ sɛ tɛ̃ ɛ gɔ.”

NWA bia nyɛa we li Amɔsi

⁴ Nɛ NWA Gale bia 'bɔ mbé mɔ hã mi. Mi zɔa, nɛ nde a tumba gba nyɛa we dɛ ngɔ owinɔ 'da a, we hã do etumbu hã wa. We ni ma ɔ̃sã ogba lìnɔ ti nù i, nɛ ma ma ngɔ bɛlɛ nù Israɛlɛ.

⁵ Mi nɛa we zɔ ní, nɛ mi ala nu mi hã NWA Gale na: “Aa NWA, mɔ tɛ dɛ̃ ma gɔ. Ní gɔ, nɛ kɛ winɔ 'da mɔ wa dɔ̀ gɔɛ gɛ, nɛ wa 'bana sɛ nde?”

⁶ NWA nɛa we zele ni, nɛ a kpolo linggamɛ 'da a, nɛ a na: “Mɛ mɔ zɔa ni, ma dɛ́ sɛ tɛ́ ɛ gɔ.”

NWA bia fɛlɛ zɔ do bɔlɔ dɛlɛ tɔa li Amɔsi

⁷ Nɛ nwa bia 'bɔ mbé mɔ hã mi. A yula zi do nyanga a dɛ kɛ zã dɛlɛ tɔa, nɛ a 'bia fɛlɛ wa zɔ do bɔlɔ dɛlɛ tɔa ni dɛ kɔ̃ a.

⁸ Nɛ a aka mi na: “Amɔsi, mɛ mɔ zɔ kɔ mi gɛ a ge nde?” Nɛ mi gese hã a na: “Mɛ a fɛlɛ wa zɔ do bɔlɔ dɛlɛ tɔa ni.” Nɛ NWA tɔ̃ 'bɔ na: “Mi tɛa do fɛlɛ gɛ we zɔ do dɛa to tɛ owinɔ 'da mi, tabi ma a bɔlɔ nde? Mba gɔ, mi ùmù sɛ li mi ngɔ 'dã mɛnɔ 'da wa gɔ.

⁹ Mi 'danga sɛ falanɔ kɛ obe zã Izaka wa dɔnggɔ do mi ni. Otɔa sambalanɔ 'da Oisraɛlɛ ma kifi sɛ olo tɔa. Mi bi sɛ nu fɛlɛ nwa Yeroboamɛ, nɛ mi yulu nu mɔ mbati 'da a nu.”

Wa ndi Amɔsi kɔ le Betɛlɛ do'do

¹⁰ Amasia, nganga kɔ le Betɛlɛ, zila wenɔ kɛ Amɔsi tɔ̃a ni, nɛ a tombo to nɛ hã Yeroboamɛ, nwa ngɔ nù Israɛlɛ na: “Amɔsi fa we 'danga to nwa 'da mɔ tɛ ngɔ nù Israɛlɛ gɛ 'danga. Nɛ wenɔ a tɔ̃ gɛ, ma 'danga sɛ linggamɔ zu winɔ.

¹¹ Mba gɔ, a na: Mɔ Yeroboamɛ, mɔ fe sɛ fio bolo, nɛ wa 'dɔlɔ sɛ Oisraɛlɛ nyɛlɛ ndũu do le 'da wa.”

¹² Nɛ Amasia tɔ̃ hã Amɔsi na: “Aa mɔ, wi gba olo nu Gale gɛ, mɔ yú tɛ mɔ do'do! Mɔ sí dɛ ngɔ nù Yuda, nɛ mɔ gba olo nu Gale hã owinɔ tɛ le 'da mɔ i, nɛ mɔ nyɔngɔ sɛ mɔ olo nɛ.

¹³ Nɛ mɔ tɛ kpòlò 'bɔ tɛ mɔ we gba olo nu Gale tɛ Betɛlɛ gɛ gɔ, we duzu kɛ mɛ a fala kɛ nwa ngɔ nù Israɛlɛ dɔnggɔ do Gale.”

¹⁴ Nɛ Amɔsi gese hã Amasia na: “Mi a wi gba olo nu Gale gɔ, nɛ mi kɔ mba li ngba wi 'da Owi gba olo nu Gale bina. Mi a wi dala nadalamɔ, nɛ mi mi 'bɔ te sikɔmɔrɛ, nɛ mi kpasa do ma.

¹⁵ Nɛ nde wi a Gale hã a sa mɔ hã mi 'do onadalamɛnɔ 'da mi, nɛ a tombo mi na, mi nɛ́, hã mi tɔ̃́ we 'da ɛ hã owinɔ 'da ɛ ngɔ nù Israɛlɛ.

¹⁶ Nɛ mɔ Amasia, mɔ bɛ̃a na, mi tɛ gbà 'bɔ olo nu Gale gɔ nde? Mɔ kɔ̃̀ na, mi tɔ̃ 'dã mɛnɔ 'da obe zã Izaka gɔ nde? Kɔ mɔ zélé toe 'da NWA.

¹⁷ A tɔ̃ hã mɔ Amasia na: ‘Kɛnɛ mɔ a hɔ sɛ ndumba kɔ le Yeruzalɛmɛ, nɛ obulu benɔ do boko benɔ 'da mɔ, wa fe sɛ fio bolo. Wa kɛ̃ sɛ sanga kpamɛnɔ do nùi 'da mɔ dɛ kɔ̃ ogele wi. Mɔ do tɛ mɔ ngboo, mɔ fe sɛ gele fala, nɛ wa 'dɔlɔ sɛ Oisraɛlɛ nyɛlɛ ndũu do nùi 'da wa.’ ”