AMƆSI 6 - WE NU GALE 1995

Ogã winɔ wa kpa sɛ ngamɔ

¹ 'Bako do nɛ, ogã wi ngɔ kala Sioni, kɛ nɛ ɔ do ta zu nɛ iko, nɛ nɛ lénggé mɔ gɔɛ ni. 'Bako do nɛ, ogã wi ngɔ kala Samaria, kɛ nɛ lengge na, 'dã mɔ dɛ́ sɛ nɛ kpo gɔ ni. Nɛ a ogã wi ngɔ nù Israɛlɛ, nɛ Oisraɛlɛ vɛ̃ wa yu dɛ 'da nɛ, we fa gala wi kɔ̃ nɛ.

² Nɛ nɛ́ ngɔ nù Siri hã nɛ zɔ́ le Kalne. Nɛ nɛ lá 'bɔ dɛ dati dɛ kɔ gã le Hamatɛ, nɛ nɛ zĩlĩ tɛ Gatɛ, le 'da Ofilisti, kɔ nɛ zɔ tɛlɛ tɛ kɛ owinɔ wa dungu nɛ i mɔ ni. Nùi 'da wa gã, nɛ ma dia la kɛ 'da Yuda do Israɛlɛ nde? Ma là gɔ!

³ Nɛ fa we tili kɔ̃ tũ 'bakoe 'da nɛ dɛ 'do. Nɛ nde nɛ ĩ́ na, kɔ tũi nɛ tili ni, ma kɔla dɔ̃.

⁴ 'Bako do nɛ, kɛ nɛ ɔ nù ngɔ dia mɔ ɔi, do obunggu olo gã gole, nɛ nɛ nyɔngɔ sa'de obata do obe ngɔmbɔ kɛ wa dɛ nɔ wena ni.

⁵ Nɛ tɛ zɛ kundu do ga zuma, nɛ nɛ lengge na, nɛ ĩ ti 'dafa zuma ɔ nɛ nwa Davidi ni.

⁶ Nɛ nɔ dɔ̃ do gã bila, nɛ nɛ fɛlɛ tɛ nɛ do dia nɔ yɔmbɔ. Nɛ nde sila nɛ zɛ́lɛ́ mbe bi sĩ, we zɔ na, nù Israɛlɛ nɛ 'da 'danga ni gɔ.

⁷ Ma kɛ mi mbese nɛ na, nɛ kpe sɛ dati Owi la kɔlɔ 'dulinɔ. Nɛ nɛ, owi dɛ nga'banɔ gɛ, nɛ dɛ́ sɛ 'bɔ mbé gbalimɔ gɔ.

Le Samaria ma 'danga sɛ

⁸ Gale, NWA ngɔ mɔ nyanga nza vɛ̃ kana tɛ̃ a na: “Mi sɛnɛ ngatɛ 'da Oisraɛlɛ wena. Nɛ mi bɛ̃a gɛnɛ odia tɔanɔ 'da wa. Nɛ mi 'dɔlɔ sɛ gã le Samaria, do odia mɛnɔ kɔ nɛ ni vɛ̃ hã owi sɛnɛ wa.”

⁹ Kɔ nu fɛlɛ kula kpo, kɔ tala Owele wa 'bana 'bu, nɛ wa fe sɛ vɛ̃.

¹⁰ Nɛ fala kɛ mbe wele ba wɔlɔ wi na mɔ́ a kɔ tɔa i dɛ nza, we mi ma, nɛ a aka sɛ mbe wele kɛ a 'bana kɔlɔ'du tɔa i ni na: “Mbe wele 'bɔ kɛ zã mɔ ni boe nde?” Kɔ fala wi ni gese hã a na: “Ɔ̃ ɔ́, wele bina”, nɛ wi aka we ni a tɔ̃ sɛ na: “Dúngú fioo! Mɔ hámá, dɔ mɔ sá li NWA, hã ta zu a gba ngɔ mɔ gɔ.”

¹¹ Li nɛ sɔ! We kɛ nwa ba nu a kpo, nɛ ogã tɔanɔ do obe kɛnɔ, ma gbɛsɛ sɛ vɛ̃.

¹² Ombalata wa wia tɛ yu yu do ngɔ ogã ta nde? Nɛ winɔ wa wia tɛ zã kpangba dɛ ngɔ, takɔ wa mi do kpalɛ nde? Fala kpo gɔ. Kɔ gulu kɛ nɛ kpolo bɔlɔ zu dɛa mɔ do 'dã mɔ, nɛ nɛ kpolo gbãlã we do bɛlɛ ni we ge nde?

¹³ Nɛ dɔnggɔ tɛ nɛ na, lo ba le Lodabarɛ, nɛ nde ma a be le iko, nɛ nɛ tɔ̃ 'bɔ na, lo nganda wena, we kɛ lo ba 'bɔ le Karnaimɛ, kɛ ma nganda wena ni.

¹⁴ Ma kɛ Gale, NWA ngɔ mɔ nyanga nza vɛ̃ tɔ́a na: “Mi tombo sɛ ogba dɔa wele kɔ gele nu kɔnggɔ we kala nɛ. Wa zɛlɛ sɛ tɛ nɛ, nɛ wa e mbula ngɔ nùi 'da nɛ vɛ̃, yolo tɛ Lɛbo-Hamatɛ si gbãlã ngɔ, we hɔ tɛ sulu lì Araba si ba gɔtɔ.”