AMƆSI 5 - WE NU GALE 1995

Amɔsi ga zuma 'bako we Oisraɛlɛ

¹ Aa nɛ Oisraɛlɛ, nɛ zélé zuma 'bakoe mi nɛ ga hã nɛ gɛ:

² Oisraɛlɛ wa tia nù dɛ ngɔ nùi 'da wa ngboo. Wa ɔ nɛ dia be zɔnga kɛ a tia nù, nɛ a kúlú sɛ 'bɔ mbé ngɔ gɔ ni. Fo wi lengge do a bina, nɛ fo wi ba a dɛ ngɔ bina.

³ Mba gɔ, NWA Gale tɔ̃a na: “Kɔ le Israɛlɛ kpo, nɛ owi wili koto kpo wa nɛ sɛ bolo, nɛ wa si sɛ tati a Owele kama kpo. Nɛ kɔ be le, wa nɛ sɛ kama kpo, nɛ wa si sɛ 'bu.”

Nɛ kpóló tɛ nɛ dɛ 'da Gale

⁴ NWA tɔ̃a hã Oisraɛlɛ na: “Nɛ kpóló tɛ nɛ dɛ 'da mi, nɛ nɛ 'bana sɛ do kpasi.

⁵ Nɛ tɛ nɛ̀ tɛ Betɛlɛ i we dɔnggɔ mi gɔ. Nɛ nɛ tɛ fà 'bɔ mi tɛ Gilgalɛ tabi Bɛrseba gɔ. We kɛ wa kala sɛ owi Gilgalɛ, nɛ wa 'dɔlɔ wa. Nɛ Betɛlɛ ma 'danga sɛ vɛ̃.”

⁶ Kɔ nɛ kɔ̃ we 'bana do kpasi, nɛ nɛ kpolo tɛ nɛ dɛ 'da NWA. Ní gɔ, nɛ NWA a tɛ sɛ ɔ nɛ we ni, nɛ a bɛlɛ sɛ nɛ Oisraɛlɛ vɛ̃. We ni ma ndo sɛ bɛlɛ owinɔ tɛ le Betɛlɛ, nɛ wele kpo wé sɛ we bi ma gɔ.

⁷ 'Bako do nɛ wena, we kɛ nɛ 'danga dia 'bili wenɔ, nɛ nɛ 'danga 'bɔ we 'da winɔ kɛ wa dɛ mɔ do wala olo nɛ ni.

⁸ NWA dɛa osɔlanɔ tɛ li nza i. A dɛa Takula, do Sɛto do be zɔnga benɔ 'da a. A kifi tũ do gba wese, nɛ a dɛ na, wese le nù, nɛ tũ tũ. A kifi gba lì do gba kutu, nɛ ma kũ dɛ li nza i, nɛ ma sulu dɛ nù nga do kolo. Li a a NWA.

⁹ A ma sɛ Owi ngawinɔ dɛ nù, nɛ a 'danga sɛ olenɔ kɛ wa zĩ ngbo dɛ tɛ nɛ ni.

¹⁰ Nɛ, owinɔ gɛ, nɛ sɛnɛ ongba nɛ kɛ wa kɔ̃̀ we ɔkɔlɔ wele gɔ, nɛ wa tɔ̃ gbãlã we tɛ fala 'bili we ni.

^11-12 Nɛ nde Gale tɔ̃a na: “Mi ĩ ti ogili yɔa ti dɛa mɛnɔ 'da nɛ, nɛ mi ĩ 'bɔ ti o'dã mɛnɔ kɛ nɛ dɛa ni. Nɛ hã ngamɔ hã Owi bɔlɔ zu, nɛ nɛ zɛlɛ tɛ Owi sã, nɛ nɛ zũ 'bɔ kpalɛ 'da wa. Nɛ hã mbili tɛ fala 'bili we na, dɔ wa gbɛ́ gbãlã we hã Owi sã gɔ. We duzu ma, nɛ ɔ̃ sɛ kɔ odia tɔanɔ kɛ nɛ dɛa ni gɔ. Nɛ dɔ̃ vinɔnɔ kɛ nɛ mi ni, ma gbó sɛ nu nɛ gɔ.

¹³ 'Da fala ni, mɛ sɛ a fala 'bako. Kɔ ma wia na, wi kɛ a a wi hã, nɛ a dungu fio.”

¹⁴ Nɛ fá we dɛ dia mɔ. Nɛ lá fala dɛ 'dã mɔ, nɛ nɛ kpasa sɛ. Nɛ Gale, nwa ngɔ mɔ nyanga nza vɛ̃, a sɛ do nɛ, ɔ nɛ kɛ nɛ tɔ̃ ni.

¹⁵ Nɛ bɛ gɛnɛ 'dã mɔ, nɛ nɛ kɔ̃ gɛnɛ dia mɔ. Nɛ fá gbãlã we 'da fala 'bili we. Nɛ dɛ ní, nɛ Gale, NWA ngɔ nyanga nza vɛ̃, a wia sɛ we be dia zã 'da a we tala nu kpala obe Israɛlɛ.

¹⁶ Ma hã Gale, NWA ngɔ mɔ nyanga nza vɛ̃ tɔ̃a na: “Zuma 'bako ma wele sɛ li fandanɔ, nɛ wa ala sɛ nu wa tɛ li walanɔ vɛ̃. Wa tombo sɛ hã Owi wa fɔnɔ na, wa tɛ ngɔ fio. Nɛ wa he sɛ kɔ̃a fala nɛ kpo do owinɔ wa futa wa we he kɔ̃a ni.

¹⁷ 'Da fala mi la sɛ do sanga nɛ, do kɔ ofɔ vinɔnɔ 'da nɛ ni, nɛ hia kɔ̃a sɛ boe.” NWA tɔ̃a ní.

¹⁸ 'Bako do winɔ kɛ wa 'bɔ 'da kɔ̃ tũi kɛ NWA a hɔ sɛ nɛ ni. Tũi ni, ma ɔ sɛ nɛ nde? Mɛ sɛ a tũ yangga nde? Ɔ̃ ɔ̃, mɛ sɛ a tũ 'bako.

¹⁹ Ma ɔ sɛ nɛ wele kɛ a yu gbɔgbɔ, nɛ a kpa ngba a do gɔ̃̀, tabi nɛ́ wi kɛ a le kɔ tɔa 'da a, nɛ a 'be tɛ dɛlɛ tɔa, nɛ gɔ̃ gɔmɔ kɔ̃ a ni.

²⁰ Mɛ sɛ a tũ yangga nde? Ɔ̃ ɔ̃, tũi ni sɛ do ngamɔ wena, nɛ yangga sɛ bi sĩ bina.

²¹ NWA tɔ̃a na: “Mi kɔ̃̀ gɛnɛ ɛngganɔ kɛ nɛ dungu we dɔnggɔ do mi ni gɔ. Mi kɔ̃̀ 'bɔ gɛnɛ sambalanɔ 'da nɛ gɔ.

²² Nɛ mi dɛ́ yangga sa'denɔ kɛ nɛ dɔ wa we dɔnggɔ do mi ni gɔ. Gɛnɛ kɔ nɛ tɛ do ogã ngɔmbɛ we gbɛ hã mi, we be dɛa na, nɛ nde mi ká sɛ mbamba mɔ tɛ nɛ gɔ.

²³ Nɛ ɔmɔ tɛ sa zala mi do zumanɔ 'da nɛ. Mi kɔ̃̀ we zele giti kundunɔ 'da nɛ gɔ.

²⁴ Olo li mɛnɔ ni, nɛ dɛ́ na, bɔlɔ zu kpa falanɔ vɛ̃, nɛ ma fo ɔ nɛ hɛ̃a lì kɛ ma ɔ̃́sɔ̃́ gɔ ni.

²⁵ “Nɛ, Oisraɛlɛ, kɔ 'bu sabɛlɛ nalɛ kɛ nɛ ɔa zi li gba zɔ̃ i ni, nɛ nɛ gbɛa zi mbe sa'de we dɔnggɔ do mi nde? Fala kpo gɔ.

^26-27 Nɛ nde da dɔ̃ gɛ, nɛ tɛ dɔnggɔ mbe osɛa tenɔ. Nɛ dɛa ma do kɔ̃ nɛ, nɛ nɛ sa li nɛ na Sakutɛ do Kewanɛ. Ma kɛ mi nɛ 'dɔlɔ sɛ nɛ gbaa tɛ le Damasi, nɛ nɛ kala sɛ sɛa tenɔ ni la do ma.”