AMƆSI 4 - WE NU GALE 1995

NWA dãlã dɛ tɛ okɛnɛ gã winɔ tɛ Samaria

¹ Nɛ, okɛnɛ gã winɔ kɔ le Samaria, nɛ gã wena ɔ nɛ ongɔmbɛnɔ li zɔ̃ Basanɛ ni, nɛ zélé we mi nɛ tɔ̃ hã nɛ gɛ! Nɛ zɛlɛ tɛ owinɔ kɛ wa zɔla ngawi, do Owi sãnɔ. Nɛ nɛ tɔ̃ hã owili nɛ na: “Tɛ́ do dɔ̃ɛ, kɔ lɛ nɔ!”

² Ma kɛ NWA Gale kana tɛ̃ a do zu li a wele nɛ na: “Ngba soe nɛ ma we, nɛ wa gbɔtɔ sɛ nɛ kpo kpo dɛ nza, ɔ nɛ kɛ wa gbɔtɔ kɔyɔ do galĩ dɛ nza ni.

³ Wa gbɔtɔ sɛ nɛ kɔ gã le 'da nɛ do fala ngboe gbini nɛ ni, nɛ wa da nɛ nza. Nɛ nɛ do sɛ li nɛ ngɔ, nɛ nɛ yu si tɛ kala Hɛrmoni. Mi nwa, mi tɔ̃a ni.”

Oisraɛlɛ wa dɛ̀ mbulanɔ 'da Gale gɔ

⁴ NWA tɔ̃a na: “Aa nɛ, Oisraɛlɛ, nɛ nɛ́ Betɛlɛ i, hã nɛ dɔ́nggɔ́ mi, nɛ nɛ dɛ́ 'dã mɛnɔ 'da nɛ dɛ di ni! Tabi nɛ nɛ́ Gilgalɛ, nɛ nɛ dɛ́ 'bɔ gã 'dã mɔ dɛ dati! Mi ĩ na, ma de tɛ nɛ wena! Titole kpo kpo, nɛ nɛ́ we dɔ sa'denɔ we dɔnggɔ do mi, nɛ nɛ dɛ́ 'dã mɔ. Ma hɔ kɔ tũi kɛ talɛ, nɛ nɛ hã kpo mbe 'bu kɔ mɛnɔ 'da nɛ, nɛ nɛ dɛ́ 'dã mɔ.

⁵ Nɛ nɛ dɔ́ 'bɔ mapa we hã iɔ̃nae hã mi, nɛ nɛ dɛ́ tɛ mɛ 'dã mɔ fai. Nɛ nɛ dɔ́nggɔ́ 'bɔ tɛ nɛ ngɔ mɛnɔ kɛ nɛ hã ma do kɔ sila nɛ iko ni. Ki ni ma de tɛ nɛ Oisraɛlɛ wena! Mi NWA, mi tɔ̃a ni.

⁶ “Hã nɛ zélé! Wi a mi hã mi tumba zi gba wɔ dɛ kɔ lenɔ 'da nɛ vɛ̃. Nɛ winɔ vɛ̃ wa ala zi wɔ. Gɛnɛ kɔ na mɛ ni, nɛ nɛ kpòlò tɛ nɛ dɛ 'da mi gɔ.

⁷ Mi kpia zi wala hã kole na, ma tɛ tɛ dɛ ngɔ okpalɛ li fɔnɔ 'da nɛ, kɔ ma de gɔ. Mi tumba kole kɔ mbe le kpo, nɛ mi kpia wala nɛ kɔ mbee nɛ. Fɔ kɛ gɛ, ma kpa lì kolo, nɛ mbee nɛ ma kula kpauu, we kɛ kolo tɛ́ di ni gɔ.

⁸ Owinɔ kɔ le bɔa tabi talɛ wa ala zi wɔ lì, nɛ wa la lenɔ 'da wa we fa lì kɔ mbé gele le kɛ lì kɔ nɛ ni, nɛ nde ma kpà zi zu wa gɔ. Gɛnɛ kɔ na mɛ ni, nɛ nɛ kpòlò tɛ nɛ 'da mi gɔ. Mi nwa, mi tɔ̃a ni.

⁹ “Mi tumba bawe bũ, nɛ ma 'danga okpalɛ li fɔnɔ 'da nɛ. Ogba dɔla do odɔkɔ wa nyɔngɔ ote figɛ, do ote olivɛnɔ 'da nɛ, nɛ wa 'danga fɔnɔ do ovinɔnɔ 'da nɛ vɛ̃. Gɛnɛ kɔ na mɛ ni, nɛ nɛ kpòlò tɛ nɛ 'da mi gɔ. Mi nwa, mi tɔ̃a ni.

¹⁰ “Mi tumba 'dã zɛlɛ dɛ ngɔ nɛ, ɔ nɛ kɛ mi tumba zi ma ngɔ nù Ezipeto i ni. Mi hã wala hã Owi sɛnɛ nɛ na, wa gbɛ obe zagbãlãnɔ 'da nɛ do du kɔya, nɛ wa kala ombalatanɔ 'da nɛ. Nɛ mbulu Owele unu kɔ ngbo ɔi 'da osodanɔ 'da nɛ kpãa. Gɛnɛ kɔ na mɛ ni, nɛ nɛ kpòlò tɛ nɛ 'da mi gɔ. Mi NWA, mi tɔ̃a ni.

¹¹ “Mi 'danga ombe kɔ lenɔ 'da nɛ, ɔ nɛ kɛ mi 'danga zi do le Sodɔmɛ do Gomɔrɛ ni. Nɛ nɛ, owinɔ nɛ kpasa kɔ nɛ ni, nɛ ɔ nɛ gbulu gua kɛ wa tili ma nu we dɛ 'do ni. Gɛnɛ kɔ na mɛ ni, nɛ nɛ kpòlò tɛ nɛ 'da mi gɔ. Mi NWA, mi tɔ̃a ni.

¹² Hã nɛ, Oisraɛlɛ, nɛ zɔ sɛ mɛ mi nɛ dɛ do nɛ ni. Kɔ we duzu ma, nɛ 'dáfá tɛ nɛ, we kpa ngba nɛ do mi Gale, hã mi gɔnɔ ngbangga 'da nɛ.”

¹³ Gale a wele kɛ a zĩ okalanɔ, nɛ a dɛa gba bũ. Nɛ a be linggamɛnɔ 'da a hã owinɔ. A kpolo gba wese do tũ, nɛ a dungu nwa ngɔ nyanga nza vɛ̃. Li a a NWA Gale kɛ a do nganda vɛ̃.