AMƆSI 3 - WE NU GALE 1995

Gale hã etumbu hã winɔ 'da a

¹ Aa nɛ, obe Israɛlɛ, NWA kala zi nu kpala nɛ ngɔ nù Ezipeto vɛ̃, nɛ a si do nɛ. Kɔ nɛ zélé we a tɔ̃ hã nɛ gɛ.

² A na: “Tɛ kɔ nu kpala owinɔ ngɔ nyanga nza gɛ vɛ̃, owinɔ kɛ mi saka wa ni, wi tati a nɛ. Ma kɛ mi hã sɛ etumbu hã nɛ, we o'dã mɛnɔ vɛ̃ nɛ dɛa dɛ 'da mi ni.”

Toe 'da wi gba olo nu Gale

³ Nɛ zɔa mbe na, Owele bɔa wa gɔnɔ wala fala nɛ kpo, nɛ nde wa bà zã zu we nɛ dati gɔ nde?

⁴ Nɛ zila mbe gɛlɛ gbɔgbɔ tɛ o dã iko, nɛ nde a kpà sa'de nyɔ nyɔnga gɔ nde? Tabi nɛ zɔa be gbɔgbɔ tɛ dɛ dã kɔ ta a ɔ nɛ ni, nɛ nde a bà sa'de nyɔ nyɔnga gɔ nde?

⁵ Nɛ zɔa mbe na nɔɛ tia, nɛ a ba bili iko, nɛ nde a zɔ̃ nyɔngɔmɔ li bili ni gɔ nde? Tabi bili kpɔa mbe iko, nɛ nde sa'de fì nyanga a li nɛ gɔ nde?

⁶ Hiamɔ mbisa bolo wele kɔ le, hã winɔ wa zele, nɛ nde wa dɛ́ sɛ kili gɔ nde? Ngamɔ hɔa mbe kɔ le iko, nɛ nde NWA Gale a dɛ ma gɔ nde?

⁷ Na mɛ ni, NWA Gale dɛ́ mɔ iko gɔ. A be linggamɛ 'da a hã Owi gba olo nu a dati sɛ nɛ de.

⁸ Gbɔgbɔ o dã, nɛ wi dɛ́ sɛ kili gɔ a wi o nde? NWA Gale wele we, nɛ wi gbá sɛ olo nu a gɔ a wio nde?

Gale gɔnɔ we 'da Owi Samaria

⁹ NWA tɔ̃a na: “Nɛ nɛ́, hã nɛ sa mbula hã wanɔ kɛ wa ɔ kɔ tɔa nwanɔ tɛ le Asdɔdɛ do ngɔ nù Ezipeto ni, nɛ nɛ mbésé wa na, wa ngbolo li ngba wa dɛ ngɔ kala kɛ zã le Samaria, kɔ wa zɔ ogili 'dã mɛnɔ owi Samaria wa dɛ, do tɛlɛ tɛ kɛ wa zɛlɛ tɛ ngba wa ni.

¹⁰ Owi Samaria wa ĩ̀ ti bɔlɔ zu dɛa mɔ gɔ. Wa zũ mɔ kɔ̃ winɔ, tabi wa kala ma kɔ̃ wa do nga nɛ, nɛ wa ngɛmɛ ma vɛ̃ dɛ kɔ ogã tɔanɔ 'da wa.

¹¹ We duzu ma, mi nwa, mi tɔ̃ hã wa na, owi sɛnɛ wa, wa linggi sɛ nùi 'da wa, nɛ wa gbini sɛ fala usu tɛ wi 'da wa. Nɛ wa kala sɛ mɛnɔ kɔ otɔanɔ 'da wa vɛ̃.”

¹² NWA tɔ̃a na: “Fala kɛ gbɔgbɔ ba bata, nɛ wi dala bata wia we kala tati a onyanga bata bɔa, tabi zala a kɔ nu gbɔgbɛ ni. Ma ɔ sɛ ni we Oisraɛlɛ, tɛ kɔ le Samaria. Wa ɔ nù ngɔ odia bunggu do odia mɔ ɔi. Nɛ nde mɛ ma 'bana sɛ olo wa, tati a o'bulu mɛnɔ 'da wa iko.”

¹³ Gale kɛ a a NWA ngɔ mɔ nyanga nza vɛ̃ ni, a tɔ̃a na: “Nɛ zélé we gɛ, nɛ nɛ mbésé do Oisraɛlɛ.

¹⁴ Ngba soe mi tɛ sɛ we hã etumbu hã Oisraɛlɛ olo 'dã mɛnɔ 'da wa ni, nɛ mi 'danga sɛ gbagalanɔ wa dɔ do sa'denɔ hã mi Gale tɛ Betɛlɛ ni. Nɛ okonggolo nu gbagalanɔ ni ma gbini sɛ, nɛ ma ala dɛ nù.

¹⁵ Mi gbɛsɛ sɛ ogã tɔanɔ, do obe kɛnɔ. Nɛ odia tɔanɔ kɛ wa gɛzɛ tɛ nɛ do gogo fɔlɔnɔ ni, ma 'báná sɛ 'bɔ gɔ. Mi 'danga sɛ tɔanɔ vɛ̃. Mi NWA, mi tɔ̃a ni.”