AMƆSI 2 - WE NU GALE 1995

Omoabɛ

¹ Nɛ zélé we NWA tɔ̃a gɛ: “Omoabɛ wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa. Wa dɔa gbãlã nwa 'da Oedɔmɛ, nɛ ma ngutu vɛ̃, nɛ ma dɛ bũ.

² Mi tombo sɛ nyɛa we ngɔ nù Moabɛ, nɛ ma bɛlɛ tɔanɔ kɔ le Keriɔtɛ vɛ̃. Giti nguma bolo ma wele sɛ, nɛ osodanɔ wa he mɔ, nɛ wa dama mɔtũlũ, nɛ Omoabɛ wa fe sɛ li bole ni.

³ Nɛ mi kumu sɛ nwa ngɔ nùi ni mba do ogã wi ngɔ lenɔ 'da a vɛ̃. Mi nwa, mi tɔ̃a ni.”

Oyuda

⁴ Nɛ zélé we NWA tɔ̃a gɛ: “Oyuda wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa. Wa bɛ̃a mbula 'da mi NWA, nɛ wa dɛ̀ olo nu mi gɔ. Wa yɔa, nɛ wa dɔnggɔ 'bɔ kpo kpo ogale bɛlɛnɔ, kɛ oyaa wa wa dɔnggɔ zɛ́ wa ni.

⁵ We duzu ma, mi fi sɛ we tɛ nù Yuda, nɛ ma bɛlɛ sɛ tɔanɔ 'da wa tɛ Yeruzalɛmɛ vɛ̃.”

NWA dãlã dɛ tɛ Oisraɛlɛ

⁶ Nɛ zélé we kɛ NWA tɔ̃a gɛ: “Oisraɛlɛ wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa. Wa 'dɔlɔ wi bɔlɔ zu do ngbá, we kɛ a wè we gese ku'danɔ wa ia zu a ni gɔ. Wa bia gole wi sã, we kɛ a wè we futa mbili olo mɔ nyanga wi 'da a gɔ.

⁷ Wa ma zu obe winɔ dɛ nù, nɛ wa 'danga wala ti owi 'bako. Be zagbãlã do baa a, wa kpolo ngba wa dɛ ngɔ wuko ngbá kpo, nɛ wa 'danga zu li mi kɛ ma santo.

⁸ Wa kala tulunɔ kɛ owi sãnɔ wa ia do tikɔɛ kɔ̃ wa ni, nɛ wa na ma kɛ zã ogbagala dɔnggɔ do mi Gale, nɛ wa ɔ nù ngɔ nɛ. Wa dungu nù kɔ Tɛmpɛloe 'da mi, nɛ wa nɔ dɔ̃ kɛ wa kala kɔ̃ owi yonggonɔ 'da wa ni.

⁹ “Nɛ nde we duzu nɛ owinɔ 'da mi, ma kɛ mi kumu zi Oamori, kɛ wa ngala zi ɔ nɛ te sɛdrɛnɔ, nɛ wa nganda ɔ nɛ te ndungbɛ̃nɔ ni. Mi gbɛa wa, ɔ nɛ kɛ wa gbɛ do te ni, yolo tɛ liã nɛ we hɔ tɛ wala nɛ ngɔ i.

¹⁰ Nɛ mi 'bɔ a mi fua zi nɛ ngɔ nù Ezipeto, nɛ mi kã nɛ do wala li gba zɔ̃ gbaa 'bu sabɛlɛ nalɛ, nɛ mi ba nùi olo Oamori ni hã nɛ.

¹¹ Nɛ 'do nɛ, nɛ mi saka owi gba olo nu mi kɔ obenɔ 'da nɛ. Nɛ mi sa 'bɔ mɔ hã ombe be zagbãlãnɔ na, wa zimi tɛ wa, nɛ wa hã tɛ wa hã mi.

Kɔ mi aka nɛ, Oisraɛlɛ na, ma a ni gɔ nde? Mi nwa, mi tɔ̃a ni.

¹² “Nɛ nde nɛ, nɛ yulu dɔ̃ nu obe zagbãlãnɔ, kɛ wa hã zi tɛ wa hã mi, nɛ wa wè zi tɛ nɔ dɔ̃ gɔ ni. Nɛ nɛ bɛ̃a na, owi gba olo nu mi, wa tɛ wèlè we do zu li mi Gale gɔ.

¹³ Nɛ nde da dɔ̃ gɛ, mi ma sɛ nɛ dɛ nù, nɛ nɛ mãlã sɛ tɛ nɛ, ɔ nɛ yangga kɛ kɔni dunu ma, nɛ ma mãlã tɛ̃ ɛ ni.

¹⁴ Gɛnɛ kɔ wi kɛ tɛ̃ a hãsã wena, nɛ nde a wé sɛ we yu nɛ gɔ. Nɛ owi sɔ̃a gbãlã tɛnɔ, wa sɛ 'bɔ do ngawi bina. Gɛnɛ kɔ osodanɔ, nɛ nde wa wé sɛ 'bɔ tɛ kpasa tɛ wa wele nɛ gɔ.

¹⁵ Wi da kpili yóló sɛ ngɔ gɔ. Nɛ wi kɛ a yu yu wena ni, a wé sɛ 'bɔ tɛ yu yu gɔ. Nɛ gɛnɛ kɔ wi kù mbalata, nɛ nde a wé sɛ tɛ kpasa tɛ̃ a gɔ.

¹⁶ Do ngba soe ni, nwa bolo ngboo, a da sɛ mɔ bi bolonɔ 'da a nù, nɛ a yu. Mi NWA, mi tɔ̃a ni.”