AMƆSI 1 - WE NU GALE 1995

¹ 'Buki gɛ tɔ̃ wenɔ kɛ Amɔsi tɔ̃a zi ni. Amɔsi a be Tekoa, nɛ a zi a wi dala nadalamɔ. NWA tumba zi a na, a tɔ̃ wenɔ gɛ hã owinɔ ngɔ nù Israɛlɛ. Nɛ a tɔ̃a ma do 'da fala kɛ Oziasi zi a nwa ngɔ nù Yuda, nɛ Yeroboamɛ, be 'da Yoasi, zi a nwa ngɔ nù Israɛlɛ ni. A tɔ̃a ma sabɛlɛ bɔa dati kɛ nùi tana zi ni.

² Amɔsi na: “NWA o dã ngɔ kala Sioni, wala gɛlɛ a dɔ̃lɔ̃ kɔ le Yeruzalɛmɛ. Fala batanɔ wa nyɔngɔ do mɛ ni, ma kula vɛ̃, nɛ otenɔ ngɔ kala Karmɛlɛ ma kula ngaɔɔ.”

NWA DÃLÃ DƐ TƐ OWINƆ KƐ ZÃ NU ISRAƐLƐ Osiri

³ Nɛ zélé we kɛ NWA tɔ̃a gɛ: “Osiri tɛ kɔ le Damasi, wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa, we duzu kɛ wa zɛlɛ tɛ owi Galadɛ wena.

⁴ Mi tombo sɛ nyɛa we, nɛ ma bɛlɛ gã tɔa 'da nwa Hazaɛlɛ, do gba ngbo nu le 'da nwa Bɛnɛ-Hadadɛ.

⁵ Nɛ mi gbini sɛ tenɔ kɛ wa kpe do nu ngbo le Damasi ni. Nɛ mi kumu sɛ Owi kɔ le Bikatɛ-Avɛnɛ, do nwa ngɔ le Bɛtɛ-Ɛdɛnɛ. Owele wa kala sɛ Owi ngɔ nù Siri vɛ̃, nɛ wa 'dɔlɔ wa dɛ ngɔ nù Kirɛ. Mi NWA, mi tɔ̃a ni.”

Ofilisti

⁶ Nɛ zélé we kɛ NWA tɔ̃a gɛ: “Ofilisti tɛ kɔ le Gaza, wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa, we kɛ wa kala ogba gili winɔ, nɛ wa 'dɔlɔ wa hã Oedɔmɛ.

⁷ Mi tombo sɛ nyɛa we, nɛ ma bɛlɛ ongbo nu le Gaza, nɛ gã tɔanɔ di ni ni, ma ngutu sɛ vɛ̃.

⁸ Mi kumu sɛ Owi Asdɔdɛ, do nwa kɔ le Askaloni, nɛ mi siki sɛ li mi dɛ tɛ owi Ekroni. Nɛ tala Ofilisti kɛ wa 'bana kɔ lenɔ ni, wa kumu sɛ vɛ̃. Mi NWA, mi tɔ̃a ni.”

Ofenisi

⁹ Nɛ zélé we kɛ NWA tɔ̃a gɛ: “Ofenisi tɛ kɔ le Tirɛ, wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa. Wa dɛ̀ mbula gba tɔkɛ wa gba zi do obe Israɛlɛ ni gɔ. Wa kala ogba gili winɔ, nɛ wa 'dɔlɔ wa hã Oedɔmɛ.

¹⁰ We duzu ma, mi tombo sɛ nyɛa we tɛ kɔ le Tirɛ, nɛ ma bɛlɛ sɛ odia tɔanɔ 'da wa.”

Oedɔmɛ

¹¹ Nɛ zélé we NWA tɔ̃a gɛ: “Oedɔmɛ wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa. Wa kala omɔ bi bolo dɛ kɔ̃ wa, nɛ wa ndaka do onya wa obe Israɛlɛ. Wa mbe do 'bako li wa be sĩ bina. Wa usu mãlã dɛ zã wa, nɛ wa kɔ̃̀ we la fala nɛ gɔ.

¹² We duzu ma, mi tombo sɛ nyɛa we, nɛ ma bɛlɛ le 'da wa Temanɛ, do odia tɔanɔ kɔ le Bɔsra vɛ.”

Oamoni

¹³ Nɛ zélé we NWA tɔ̃a gɛ: “Oamoni wa tɛ dɛ 'dã mɔ 'do ngbɛ ɛ do 'do ngbɛ ɛ. Ma kɛ mi 'bili ia, mi kpóló sɛ 'bɔ nu mi gɔ. Mi nɛ gese olo 'dã mɛnɔ 'da wa hã wa. Wa bi zi nù Galadɛ we e nu kɛ 'da wa. Nɛ li bole ni, wa gba zã owuko zãnɔ do nga nɛ.

¹⁴ We duzu ma, mi tombo sɛ nyɛa we, nɛ ma bɛlɛ le 'da wa Raba, do odia tɔanɔ 'da wa vɛ̃. Do 'da fala ni, ohiamɔ bolo ma wele sɛ ɔ nɛ giti gba bũ kamba ni.

¹⁵ Owi sɛnɛ wa, wa kala sɛ nwa 'da wa do ogã winɔ 'da a, nɛ wa 'dɔlɔ sɛ wa. Mi nwa, mi tɔ̃a ni.”