ALA NU 4 - WE NU GALE 1995

Le Yeruzalɛmɛ hɔa olo tɔa

¹ Ki a ge nde? Kɔdɛ kɛ mɔ mbali kutu, nɛ fɛ̃a mɔ bolo tu ngangge ni nɛ nde? Kɔdɛ kɛ odia tanɔ kɔ Tɛmpɛloe, ma pɛsɛ do li walanɔ vɛ̃ ni nɛ nde?

² Obe Yeruzalɛmɛ wa ɔ zi li lɛ nɛ mɔ mbali ni. Kɔ kɔdɛ kɛ ngangga ni, owele wa zɔ wa ɔ nɛ kpana, kɛ wa 'bua ma do gili iko ni nɛ nde?

³ Gɛnɛ kɔ naa 'banggo, nɛ nde a do linggamɔ dala benɔ 'da a boe. A e bele a hã wa na, wa ama. Nɛ nde owinɔ 'da lɛ wa ɔ nɛ wuko kɛ a do linggamɔ dala benɔ 'da a bina ni. Wa ɔ 'bɔ nɛ gba nɔɛ li go, kɛ a hɔnɔ kuli a gɔ, nɛ wese 'bɛ̃lɛ̃ ma iko ni.

⁴ Obe nzɔ benɔ wa fe wɔ lì, nɛ lɛfɛ wa nãlã dɛ kɔ gɛlɛ wa. Obenɔ wa aka we nyɔngɔmɔ, nɛ nde fo wi hã ma hã wa bina.

⁵ Wanɔ kɛ wa nyɔngɔ zi mɔ sɔkpã ni, wa tɛ ala wɔ dɛ li walanɔ. Nɛ wanɔ kɛ wa gã zi dɛ kɔ kpamɔ ni, wa tɛ dɔlɔ 'bulu nyɔngɔmɔ ngɔ zubunɔ.

⁶ 'Dã mɛnɔ 'da owinɔ 'da lɛ, ma nɛa ngɔ kɛnɔ 'da Owi Sodɔmɛ. Le 'da wa ma mbiti zi fala kpo, nɛ nde kɔ̃ wele gbò zi tɛ nɛ gɔ.

⁷ Kɔ sila obe zagbãlãnɔ 'da lɛ kɛ wa hã zi tɛ wa hã Gale ni, ma fɛngɛ zi turr. Ma fɛnga zi nɛa ngɔ kolo gbãlã mũlũ do lì bele. Ndala tɛ wa fila zi ngoo ɔ nɛ kula ni, nɛ bula li wa ndele zi ɔ nɛ ta safirɛ ni.

⁸ Kɔ ngangga gɛ, bula li wa tũ kpã kpã ɔ nɛ mbito ni, nɛ fo 'bɔ wi ĩ ti wa 'da le gɛ bina. Mbé mulu 'bànà 'bɔ tɛ wa gɔ, nɛ wa kula dɛ li ngɔ gɛ ɔ nɛ kula gua ni.

⁹ Owinɔ kɛ wa fia zi li bole ni, 'dɔkɔlɔ wa dia nɛa ngɔ wanɔ wa fia do wɛ ni. We kɛ wanɔ wa fia do wɛ ni, wa zɔlɔ nyɔngɔmɔ, nɛ wa ala wɔ, nɛ wa mbɔkɔ, nɛ wa fe.

¹⁰ Ngamɛ ma kpa owinɔ 'da lɛ gɛ, ma gã la li ngele. Gɛnɛ kɔ onaa benɔ kɛ wa kɔ̃a gɛnɛ benɔ 'da wa nɛ ge nde ni, wa gbɛa benɔ 'da wa ngboo, nɛ wa gi wa, nɛ wa nyɔngɔ.

¹¹ NWA sulu gã nɔ̃lɔ̃ zã 'da a dɛ ngɔ owinɔ 'da a. A fi we tɛ le Yeruzalɛmɛ, nɛ ma bɛlɛ gbaa dɛ zã nù i.

¹² Onwanɔ ngɔ nù gɛ do owinɔ vɛ̃, wa lengge zi na, owi sɛnɛ obe Yuda wa lé sɛ kɔ le Yeruzalɛmɛ do nu ngbonɔ fala kpo gɔ.

¹³ Nɛ nde ma dɛa tɛ̃ ɛ ní, we duzu yɔa ti dɛa mɛ 'da Owi gba olo nu Gale, do 'dã mɛnɔ 'da onganganɔ kɛ wa gbɛa zi Owi bɔlɔ zunɔ ni.

¹⁴ Wa yɛnggɛ tu tu do 'da le, ɔ nɛ owi tandu ni. Tulunɔ 'da wa 'danga vɛ̃ do tɔkɔ, nɛ fo wi kɔ̃ we 'be tɛ nɛ bina.

¹⁵ Winɔ wa zɔ wa tɛ tɛ nɛ, nɛ wa he mɔ na: “Nɛ ɛ́lɛ́ tɛ nɛ! Nɛ a Owi ndi li Gale, nɛ tɛ 'bè tɛ lɛ gɔ!” Ma kɛ onganganɔ wa zɔ ní, nɛ wa yu, nɛ wa kulu dɛ ngɔ gele nù mba mba, nɛ nde fo wi dɛ gɛnɛ wa bina.

¹⁶ NWA do tɛ̃ a pɛsɛ wa do'do, nɛ a kɔ̃̀ 'bɔ we zɔ wa dɛ ngɔ li a gɔ. Nɛ fo 'bɔ wi dɛ kili onganganɔ do okpasa winɔ bina.

¹⁷ Lɛ ka mɔ wala we 'bɔ 'da wi kɛ a wia we gala lɛ ni zãa, nɛ gbali lɛ mbɔkɔ. Lɛ 'bɔa 'da mbe nu kɔnggɔ Owele na, wa tɛ, hã wa kpasa lɛ, nɛ nde wa tɛ̀ we kpasa lɛ gɔ.

¹⁸ Owi sɛnɛ lɛ wa tɛ ngɛ'dɛ lɛ, nɛ fo wala yɛnggɛ yali ti lɛ bina. Kɔ̃ tũ fie 'da lɛ kɔla ia, tũ dungu nza 'da lɛ ia ia.

¹⁹ Tɛ owi sɛnɛ lɛ gbɛngɛ wena, tɛ wa gbɛngɛ nɛa ngɔ ozikinɔ li ngɔ gɛ. Wa ndaka 'do lɛ tɛ ngɔ kalanɔ i, nɛ wa nɛ li gba zɔ̃ i, nɛ wa ndɔ bili olo nyanga lɛ.

²⁰ Wa ba nwa 'da lɛ kɛ Gale saka a ni, nɛ wa si do a kɔlɔ 'duli. Ĩ na, dungu nza 'da lɛ dɛ tambala kɔ̃ a, nɛ lɛ lengge zi we 'da a na: “A a wi kɛ a gala sɛ lɛ na, lɛ kpasa sanga ogele winɔ.”

²¹ Aa nɛ, Oedɔmɛ do Owi ngɔ nù Usi, nɛ dɛ́ yangga kpa! Nɛ nde nɛ ĩ́ na bila dɔ̃ɛ kɛ ma dunu do nɔ̃lɔ̃ zã 'da NWA ni, ma gbo sɛ tɛ mɛ 'bɔ nu nɛ! Nɛ nɔ sɛ ma, nɛ ma ba nɛ, nɛ nɛ hɔlɔ sɛ tulu tɛ nɛ, nɛ nɛ 'bana do kũlĩ tɛ nɛ!

²² Aa nɛ, owi Yeruzalɛmɛ, nɛ kpa si olo 'dã mɛnɔ 'da nɛ, nɛ ma ia. NWA tómbó sɛ 'bɔ nɛ kɔlɔ 'duli gɔ. Nɛ nde nɛ, Oedɔmɛ, NWA a hã sɛ etumbu hã nɛ, nɛ a be sɛ 'dã mɛnɔ 'da nɛ dɛ nza.