ALA NU 3 - WE NU GALE 1995

NWA a wi hã ngamɔ do wi kpasa lɛ

¹ Mi kpa etumbu ti kɔ̃ nwa gbaa, nɛ mi ĩ ti tɛlɛ tɛ kɛ etumbu ɔ nɛ ni.

² A ili mi, nɛ a fi mi kɔ gba tũ, nɛ mbé wala kpasi we mi bina.

³ A ia li a ngɔ mi, nɛ a tɛ zɛ mi tũ kpo kpo fai.

⁴ A ia dani tɛ mi furr, nɛ a gbini gbãlã tɛ mi vɛ̃.

⁵ A zĩ gba ngbo dɛ tɛ mi, nɛ mɛ a gba ngbo ngamɔ do zɛlɛ tɛ.

⁶ A ili mi, nɛ a fi mi kɔ gba tũ, ɔ nɛ kɛ wa mi mi kɔ le 'da ofionɔ i ni.

⁷ A fi mi bɔlɔkɔ, nɛ a ɛnzɛ nyanga mi do dɔkpɔ na, da dɛ kɔ mi yú gɔ.

⁸ Gɛnɛ kɔ mi ala nu mi hã a gbaa, nɛ nde a kɔ̃̀ we zele mi gɔ.

⁹ A ia kpangba ta, nɛ ma kila wala ti mi, nɛ fo 'bɔ wala gbili ma bina.

¹⁰ A ɔ nɛ gɔ̃̀ tabi gbɔgbɔ kɛ a hala mi, nɛ a nɔsɔ tɛ̃ a, we bũlũ we tisi mi ni.

¹¹ A ndaka mi ngɔ li wala, nɛ a ɛ̃a sanga mi wisi wisi, nɛ a la mi dɛ di ni.

¹² A gbɔta nzabele 'da a we da hã mi.

¹³ Nɛ Okpilinɔ 'da a, ma gbua zã mi foe foe.

¹⁴ Owinɔ 'da mi vɛ̃ wa tɛ mɔmɔ mi, nɛ mi hɔa mɔ gbɔlɔ mɔmu li wa.

¹⁵ A hã ngamɔ do zɛlɛ tɛ hã mi, olo li nyɔngɔmɔ do dɔ̃.

¹⁶ A lingi mi, nɛ a ma mi dɛ zã fumbɛlɛ, nɛ gogo mi ala tɛ nyɔngɔ gbãlã ta.

¹⁷ Mɔ NWA, mɔ dɛa na, gɛ̃a dungu do yangga nyɛlɛ do mi ndũu, nɛ ta mi 'bɔ ngɔ nɛ bina.

¹⁸ Nɛ mi lingga na: Mi wè 'bɔ tɛ gbini zã mi do mɔ NWA gɔ, fo 'bɔ mbé wala kpasi we duzu mi bina.

¹⁹ Mi kpa sape, nɛ fo 'bɔ fala ti mi bina. Kɔ mi lengge ma, nɛ kɔ nu mi fanga kɛrr, ɔ nɛ kɛ mi nɔa sambe ni.

²⁰ Mi tɛ lengge ma 'da fala fai, nɛ ma fi bɔ zu mi.

²¹ Gɛnɛ kɔ na mɛ ni, nɛ nde mi 'bana do be ngawi sĩ we duzu kɛ ta zu mi gba ngɔ we kpo:

²² NWA lá fala ĩ 'bako hã winɔ gɔ. A 'bana fala be kɔ̃a zã 'da a hã wa fai.

²³ Nɛ kɔ̃a zã 'da a ma gã wena, a be ma hã winɔ titole kpo kpo ɔ nɛ wese ni.

²⁴ Nɛ mi tɔ̃a na: Gã kpamɛ 'da mi wi a NWA, gulu nɛ a mi gbini zã mi do a fai ni.

²⁵ NWA dɛ de mɔ hã wi kɛ a siki li a dɛ 'da a, nɛ a fa a do sila a vɛ̃ ni.

²⁶ Ma dia fɛ̃ na, lɛ ɔ do du sila, nɛ lɛ 'bɔ 'da NWA na, a tɛ we kpasa lɛ.

²⁷ Ma dia fɛ̃ na, wele 'bana zagbãlã, nɛ a yambala kunu sila a 'da fala ngamɔ.

²⁸ Fala kɛ NWA hã ngamɔ hã lɛ, nɛ lɛ dungu zu lɛ kpo, nɛ lɛ tɛ wèlè we gɔ,

²⁹ kɔ lɛ gu nù ti a, nɛ mbe gɔ, nɛ a siki sɛ li a dɛ 'da lɛ.

³⁰ Kɔ fala kɛ wele zɛ li lɛ, tabi a dã lɛ do dɛla, nɛ lɛ kɔ̃ iko.

³¹ Mba gɔ, NWA do 'bako li a wena, nɛ a bɛ̃́ sɛ gɛnɛ lɛ fai gɔ.

³² Gɛnɛ kɔ a zɛlɛ tɛ lɛ, nɛ nde we bina, a be sɛ 'bɔ kɔ̃a zã 'da a hã lɛ, we kɛ kɔ̃a zã 'da a, ma do ndɔti nɛ bina.

³³ Fala kɛ a zɛlɛ tɛ lɛ, hã a hã etumbu hã lɛ, nɛ nde a dɛ́ yangga ma gɔ.

³⁴ Owi bɔlɔkɔnɔ ngɔ nùi 'da lɛ vɛ̃, wa tɛ kpa zɛlɛ tɛ.

³⁵ Owele wa tɛ 'danga wala mɛnɔ kɛ ma yɔlɔ lɛ ni dɛ gbali Gale kɛ a nɛa ngɔ mɔ vɛ̃ ni.

³⁶ Owi 'bili wenɔ, wa 'bílí wenɔ 'da winɔ do bɔlɔ nɛ gɔ, nɛ nde NWA ĩ ti mɛnɔ ni vɛ̃.

³⁷ Wi wia we ba nu ɛ, nɛ olo nu a dɛ tɛ̃ ɛ a wio nde? Wi a Gale zu a kpo.

³⁸ Mɛnɔ vɛ̃, 'bako tabi yangga, ma dɛ tɛ̃ ɛ do olo nu Gale kɛ a nɛa ngɔ mɔ vɛ̃ ni.

³⁹ Gɛnɛ kɔ lɛ dɛa 'dã mɔ, nɛ nde lɛ 'bana nza. Kɔ gulu kɛ lɛ he tɛ lɛ we ge nde?

⁴⁰ Lɛ lengge ngɔ dɛa mɔ tɛ lɛ, do wala lɛ ba ma ni, nɛ lɛ kpóló tɛ lɛ dɛ 'da NWA.

⁴¹ Lɛ kálá kɔ̃ lɛ dɛ 'da Gale kɛ a tɛ li nza i ni, nɛ lɛ sambala a do sila lɛ vɛ̃ na:

⁴² “Aa NWA, lɛ dɛa zi 'dã mɔ, nɛ lɛ bɛ̃a gɛnɛ mɔ, nɛ ta zu mɔ 'bana ngɔ nɛ fai.

⁴³ “Nɔ̃lɔ̃ zã 'da mɔ ma bùsù dɛ tɛ lɛ gɔ, mɔ ndaka 'do lɛ, nɛ mɔ gbɛ lɛ, nɛ mɔ dɛ̀ mbe 'bako hã lɛ gɔ.

⁴⁴ Mɔ lia kɔ gba kutu, nɛ mɔ usu tɛ mɔ na, dɔ mɔ zélé sambala 'da lɛ gɔ.

⁴⁵ Mɔ dɛa na, lɛ ɔ nɛ wɔkɔsɔ tabi zubu sanga ogele winɔ.

⁴⁶ “Owi sɛnɛ lɛ vɛ̃ wa fele li wa dɛ tɛ lɛ we tulu lɛ.

⁴⁷ Mɛ ma kpa lɛ ngɔ nù gɛ, mɛ a mɔ hã kili do zɛlɛ tɛ, mɛ a mɔ hã ngamɔ do fɛna fio.

⁴⁸ Mi zɔa owinɔ 'da mi tɛ fe nɛ, nɛ li mi dunu do mili kɔ̃a.

⁴⁹ “Mili kɔ̃a li mi ma kóló sɛ gɔ, ma fo sɛ fua fai,

⁵⁰ gbaa na, yolo do li nza i, NWA ka mɔ, kɔ a zɔ ma.

⁵¹ Mba gɔ, fala kɛ mi ka mɔ, kɔ mi zɔ mɛ ma dɛ obe zɔnganɔ kɔ le gɛ, nɛ ma zɛlɛ sila mi wena.

⁵² “Owinɔ kɛ wa sɛnɛ mi gulu nɛ bina ni, wa wɛ mi we gbɛ mi, ɔ nɛ kɛ wa wɛ do sa'de ni.

⁵³ Wa ba mi do tunu li mi, nɛ wa da mi kɔ gba 'du kɔ̃, nɛ wa kpe nu nɛ do ta.

⁵⁴ Nɛ lì ma ngɔ hana we gulu zu mi, nɛ mi lingga na, mi fia wá ia.

⁵⁵ “Nɛ yolo do go'do gba 'du kɔ̃ɛ ni, mi sa mɔ hã mɔ NWA.

⁵⁶ Nɛ mɔ zila gɛlɛ mi tɛ he mɔ. Kɔ mɔ tɛ kpè zala mɔ tɛ ala nui 'da mi gɔ, mɔ gálá mi!

⁵⁷ 'Da fala kɛ mi sa mɔ hã mɔ, nɛ mɔ tɛa, nɛ mɔ kɔlɔ do mi, nɛ mɔ tɔ̃ hã mi na, mi tɛ dɛ̃ kili gɔ.

⁵⁸ “Aa NWA, mɔ tɔ̃a ngbangga ngɔ mi, nɛ mɔ kpasa mi.

⁵⁹ Mɔ 'bili dia gulu we hã mi, we kɛ mɔ zɔa 'dã mɛnɔ vɛ̃ kɛ wa dɛa do mi ni.

⁶⁰ Mɔ ĩ ti tɛlɛ tɛ kɛ owi sɛnɛ mi wa bili do nu gbã hã mi ni. Nɛ mɔ ĩ 'bɔ ti wenɔ vɛ̃ kɛ wa ba zã zu nɛ dɛ ngɔ mi ni.

⁶¹ “Aa NWA, mɔ zila dɛlanɔ vɛ̃ kɛ wa dã do mi ni. Nɛ mɔ ĩ 'bɔ ti wenɔ vɛ̃ kɛ wa ba zã zu nɛ dɛ ngɔ mi ni.

⁶² Yolo do titole gbaa we hɔ tũ, owi sɛnɛ mi wa dungu tɛ tɔ̃ tɛ mi, do ba zã zu we dɛ ngɔ mi.

⁶³ Mɔ zɔ́ mɛnɔ wa dɛ gɛ, falanɔ vɛ̃, wa dungu tati a we mɔmɔ mi iko.

⁶⁴ “Aa NWA, mɔ hã etumbu hã wa olo mɛnɔ kɛ wa dɛa do mi ni.

⁶⁵ Mɔ fɔ́mbɔ́ wa, nɛ mɔ vĩ́ zu wa.

⁶⁶ Mɔ bé nɔ̃lɔ̃ zã 'da mɔ hã wa, nɛ mɔ ndáká 'do wa.”