ALA NU 2 - WE NU GALE 1995

NWA hã etumbu hã Owi Yeruzalɛmɛ

¹ Ki a ge nde? Zã nwa nɔ̃lɔ̃, nɛ a fi gba kutu ngɔ le Sioni! A tafa dɔ̃lɔ̃ li 'da obe Israɛlɛ li nza i do'do, nɛ a da ma zã 'bɛ̃tɛ̃. Nɛ do kɔ̃ tũi dã ba a ni, nɛ a fɛa kɔ̃ a tɛ Tɛmpɛloe 'da a.

² NWA 'danga lenɔ 'da Oyuda vɛ̃, nɛ a dɛ̀ mbe 'bako hã wa gɔ. Zã a nɔ̃lã, nɛ a gbini ogba ngbo nu lenɔ tɛ ngɔ nù Yuda vɛ̃. A bɛ̃a gɛnɛ owi nu kpala Yuda do ogã winɔ 'da wa, nɛ a fua dɔ̃lɔ̃ li 'da wa do'do.

³ Do kɔ̃ tũi dã ba a ni, nɛ a fua ngawi 'da lɛ obe Israɛlɛ do'do, nɛ a àmbà zu lɛ ti kɔ̃ Owi sɛnɛ lɛ gɔ. A tumba nyɛa we dɛ ngɔ lɛ winɔ 'da a, nɛ ma bɛlɛ mɛnɔ kɛ zã lɛ ni vɛ̃.

⁴ NWA gbɔtɔ nzabele 'da a dɛ tɛ lɛ, nɛ a e ngawili kɔ̃ a ngɔ kpili, kɔ a 'bɔ we ndɔlɔ lɛ, ɔ nɛ a a wi sɛnɛ lɛ ngboo ni. A gbɛa owinɔ kɛ lɛ kɔ̃ zi gɛnɛ wa wena ni vɛ̃ do'do, nɛ a fũlũ nɔ̃lɔ̃ zã 'da a dɛ ngɔ Tɛmpɛloe tɛ Yeruzalɛmɛ, nɛ nɔ̃lɔ̃ zã 'da a bɛlɛ ma ɔ nɛ we ni.

⁵ NWA hɔa ngbongbo wi sɛnɛ lɛ, a 'danga lenɔ ngɔ nù Israɛlɛ vɛ̃. A dɛa na, ogba ngbonɔ do dia tɔanɔ ma te, nɛ le ma kifi olo tɔa do'do. A yulu gã 'bako kɔ obe Yuda.

⁶ A siki li a dɛ tɛ Tɛmpɛloe kɛ lɛ dɔnggɔ zi a kɔ nɛ ni, nɛ a gbini ma kisi kisi. A gbɛa okɔ̃ tũ ɛngganɔ, do okɔ̃ tũ ɔmɔ tɛ winɔ vɛ̃. Nɛ gã nɔ̃lɔ̃ zã 'da a zĩlĩ 'bɔ dɛ ngɔ nwa 'da lɛ, do onganganɔ.

⁷ NWA bɛ̃a gɛnɛ gbagala 'da a, nɛ a la fala Tɛmpɛloe 'da a do'do. A dɛa na, odia tɔanɔ 'da Owi Yeruzalɛmɛ, ma te dɛ kɔ̃ Owi sɛnɛ wa. Nɛ winɔ ni wa hia mɔ kɔ Tɛmpɛloe 'da NWA, nɛ ma wila ɔ nɛ ngba soe ɛngga ni.

⁸ NWA handa zi we 'danga le Sioni, do ongbonɔ, do ongala tɔanɔ kɔ nɛ vɛ̃. A kɔ̃̀ zi na, mɔ kpo 'bana ngɔ gɔ.

⁹ Ofungula nu ngbonɔ ma gbini kisi kisi, nɛ gbangganɔ tia vɛ̃. Nwa 'da lɛ do Owi olo li a wa la kɔlɔ 'duli. Fo 'bɔ wi be mbulanɔ 'da Gale hã lɛ bina, nɛ NWA Gale wélé 'bɔ we hã Owi gba olo nu a gɔ.

¹⁰ Okumu Yeruzalɛmɛ wa fɛkɛ go'do wa do nù, nɛ fo 'bɔ mbé lɛnggɛ nu wa bina. Wa sua bũ dɛ zu wa, nɛ wa he'de tulu gɛla. Obe zɔnga Yeruzalɛmɛ wa bili zu wa nù.

¹¹ Kili ba mi Yeremi, nɛ mi hia kɔ̃a gbaa, nɛ gbali mi zɛlɛ. 'Bako ba li mi la li ngele, we zɔ zɛlɛ tɛ 'da owinɔ 'da lɛ, do obe nzɔ benɔ kɛ wa fe wɔ lì dɛ li walanɔ ni.

¹² Obenɔ wa he kɔ̃a wɔ dɛ tɛ naa wa na: “Aa naa e, wɛ wena!” Wa ala wɔ dɛ li walanɔ, nɛ wa e sila wa nù dɛ kɔ̃ naa wa, ɔ nɛ wele ia dani tɛ wa ia ni.

¹³ Aa Yeruzalɛmɛ, le kua mi gɛ, mi 'bɔ do mbé lɛnggɛ we tɔ̃ hã mɔ bina. Mi nɛ dɛ fala mbɔkɔ zã mɔ nɛ nde? Wele kpo zɔ̃ mbe ngamɔ ɔ nɛ mɛ ni gɔ. 'Bako 'da mɔ gã wena ɔ nɛ gba lì ni, nɛ wele kpo wè we gala mɔ kɔ nɛ gɔ.

¹⁴ Aa nɛ, owi Yeruzalɛmɛ, owi gba olo nu Gale wa bé zi 'dã mɛnɔ 'da nɛ dɛ nza gɔ. Wa 'bili zi a bɛlɛ hã nɛ iko. Ɔ do kɛ wa be zi 'dã mɛnɔ 'da nɛ dɛ nza, nɛ mbe gɔ, nɛ nɛ kpasa sɔ. Nɛ nde wa tɔ̃ zi lɛnggɛ bɛlɛ hã nɛ we ɔkɔlɔ do sila nɛ iko.

¹⁵ Winɔ vɛ̃ kɛ wa la wala do kɔ le gɛ ni, wa 'bu kɔ̃ wa, nɛ wa gɔmɔ zu wa, nɛ wa mɔmɔ na: “Le Yeruzalɛmɛ kɛ wa sa zi li nɛ na, dia le ngboo, nɛ ma hã zi yangga hã winɔ ngɔ nù gɛ vɛ̃ gɛ, ma hã ma ɔ nɛ gɛ nde?”

¹⁶ Owi sɛnɛ mɔ vɛ̃, wa fele li wa dɛ tɛ mɔ, wa dama fãlĩ, nɛ wa nyɛ nu wa hã mɔ. Nɛ wa na: “Lɛ 'danga wá le gɛ ia. Ngba soe dɛ mɛ lɛ kɔ̃a zi ni, ma hã ma hɔa gɛ. Ma wia wá ia!”

¹⁷ Mɛ kɛ NWA handa zi we dɛ ma, nɛ a tɔ̃a zi we nɛ belee ni, ma hã a dɛa ni. A 'danga le 'da lɛ putu putu, nɛ a dɛ̃ mbe 'bako gɔ. A hã ngawi hã Owi sɛnɛ lɛ, nɛ wa nɛa ngɔ lɛ, nɛ ngamɛ 'da lɛ hã yangga hã wa, nɛ wa dɛa wali ngɔ lɛ.

¹⁸ Aa nɛ, owi Yeruzalɛmɛ, nɛ álá nu nɛ hã NWA wena! E kɔ mili kɔ̃a li nɛ gbala tũ do gba wese! Nɛ tɛ ɔ̀mɔ̀ tɛ nɛ gɔ, nɛ mili kɔ̃a li nɛ tɛ kòlò gɔ.

¹⁹ Tũi tũ, nɛ nɛ kúlú ngɔ, nɛ nɛ álá nu nɛ hã NWA gbaa, nɛ fala sa nɛ dɛ tɛ nɛ. Nɛ tɔ̃́ kɔ sila nɛ vɛ̃ hã a. Nɛ kálá kɔ̃ nɛ dɛ ngɔ, nɛ nɛ álá nu nɛ hã a, takɔ a kpasa obenɔ 'da nɛ kɛ wa tɛ fe wɛ do li walanɔ vɛ̃ ni.

²⁰ Aa NWA, mɔ ká mɔ hã mɔ zɔ́ owinɔ kɛ mɔ zɛlɛ tɛ wa gɛ! Mɔ kɔ̃a na, onaa benɔ wa nyɔngɔ sa'de obe kala zã wa, kɛ wa kɔ̃a gɛnɛ wa wena ni nde? Mɔ kɔ̃a na, wa gbɛ onganganɔ, do Owi gba olo nu mɔ dɛ kɔ Tɛmpɛlo i nde?

²¹ Mɔ zɔ́, wɔlɔ be zagbãlãnɔ do okpasa winɔ ma pɛsɛ do li walanɔ fatata. Owi sɛnɛ lɛ wa gbɛa oboko benɔ, do obulu benɔ 'da lɛ li bole. Mɔ a mɔ gbɛa wa do gã nɔ̃lɔ̃ zã 'da mɔ, nɛ mɔ dɛ̀ mbe 'bako hã wa gɔ.

²² Owi sɛnɛ lɛ wa yula falanɔ vɛ̃, nɛ wa tingbi gbululu, ɔ nɛ kɛ wele sa mɔ hã wa tɛ gbalimɔ ni. Aa NWA, do ngba soe nɔ̃lɔ̃ zã 'da mɔ ni, wele kpo yù zi ti kɔ̃ mɔ gɔ, nɛ wele kpo kpàsà zi 'bɔ gɔ. Nɛ obenɔ kɛ lɛ kala zi wa dɛ ngɔ ku lɛ, nɛ lɛ dala wa ni, Owi sɛnɛ lɛ wa kumu wa vɛ̃.