ALA NU 1 - WE NU GALE 1995

Le Yeruzalɛmɛ ma 'danga putu putu

¹ Ki a ge nde? Ngɔ tɛ le gɛ gɛ̃a nzioo ni we ge nde? Le gɛ dunu zi do owele, nɛ li nɛ dɔ̃lɔ̃ zi ngɔ nù gɛ wena. Kɔ ngangga ni, ngɔ tɛ nɛ gɛ̃a nzioo, ɔ nɛ wi fio wili ni. Ma zi a le nwa sanga lenɔ vɛ̃, kɔ sɔɛ gɛ, ma hɔa le ngbá ti gele lenɔ.

² Owi Yeruzalɛmɛ wa he do tũ gbaa, nɛ fala sa wa dɛ ngɔ gɛ, nɛ li wa 'bɔ do mili kɔ̃a. Nɛ wele kpo sanga oyali ngba wa zi ni, tɛ́ mbe we mbɔkɔ zã wa gɔ. Wanɔ wa kɔ̃a zi gɛnɛ owi Yeruzalɛmɛ wena ni, wa yu wa vɛ̃, nɛ wa hɔa owi sɛnɛ wa.

³ Oyuda wa dunu do 'bako, owi sɛnɛ wa wa si do wa kɔlɔ 'duli, nɛ wa hɔa ongbá ti kɔ̃ wa. Wa ɔ tɛ sanga ogele winɔ, nɛ fo fala mɔ wa yɔlɔ wa ni bina. Owi sɛnɛ wa wa ndaka 'do wa, nɛ wa kpa wa li wala, nɛ wa kele ti wa.

⁴ Owala Sioni ma kpia vɛ̃ do'do, we kɛ fo 'bɔ wi ba do di ni, we nɛ ɛngga kɔ Tɛmpɛloe bina. Obe zɔnganɔ kɛ wa ga zi zumanɔ ni, wa mbɔka do'do, nɛ onganganɔ wa ala nu wa, nɛ wa he tɛ wa iko. Winɔ wa pɛsa ngɔ zandonɔ vɛ̃, nɛ le Sioni ma kifi olo tɔa do'do.

⁵ Owi sɛnɛ Oyuda, wa nɛa ngɔ wa li bolo, nɛ wa ia mbula ngɔ wa. NWA dɛa na wa kpa ngamɔ we duzu gba gili 'dã mɛnɔ wa dɛa ni. Owi sɛnɛ wa wa kala obenɔ 'da wa, nɛ wa kpe wa dɛ dati wa, nɛ wa la do wa kɔlɔ 'duli.

⁶ Mɛnɔ ma hã zi dɔ̃lɔ̃ li hã le Sioni ni, ma 'danga vɛ̃ do'do. Ogã winɔ 'da wa, wa ɔ nɛ ozugbãgua kɛ wa mbɔkɔ tɛ wɔ, nɛ wa 'bɔ do mbé ngawi we yu wi gbɛ wa bina ni.

⁷ Le Yeruzalɛmɛ kifi olo tɔa, nɛ ta zu owi kɔ nɛ gba ngɔ kpamɛnɔ kɛ wa zi do ma dati belee ni. Le 'da wa tia dɛ kɔ̃ Owi sɛnɛ wa, nɛ wele kpo tɛ̀ we gala wa gɔ. Owi sɛnɛ wa, wa nɛa ngɔ wa, nɛ wa fi gbɛlɛgbɛsɛ zu wa.

⁸ Owi Yeruzalɛmɛ wa dɛa 'dã mɔ, nɛ wa hɔa Owi gbɔlɔ mɔmu li owinɔ. Winɔ kɛ wa dɛ zi kili wa ni, wa zɔ wa ngangga ni li wa yala, we kɛ wa 'bana do kũlĩ tɛ wa iko. Wa gafa, nɛ wa gu kɔ̃ wa li wa, we kɛ sape nɛa ngɔ wa do'do.

⁹ Wa hɔa Owi ndi li Gale, nɛ ndi ni, ma 'danga tɛ tulunɔ 'da wa vɛ̃. Wa lengge zi na, mɔ ɔ ni hɔ sɛ hã lo gɔ. Nɛ nde ngangga ni, wa tia kɔ gba 'du kɔ̃, nɛ fo wi ɛfɛ kɔ̃ ɛ hã wa, we ba wa dɛ nza bina. Wa tɛ he mɔ na: “Aa nwa, mɔ zɔ́ 'bakoe 'da lɛ, owi sɛnɛ lɛ wa tɛ dɛ wali ngɔ lɛ!”

¹⁰ Wa zɔa owi sɛnɛ wa tɛ zũ kpamɛnɔ 'da wa, do le kɔ Tɛmpɛloe 'da wa, kɛ nwa bɛ̃a zi na, gele wi tɛ lè kɔ nɛ gɔ ni.

¹¹ Owi Yeruzalɛmɛ wa zɛ nu wa gboo, tɛ fa nyɔngɔmɔ. Wa kpolo kpamɛnɔ 'da wa do nyɔngɔmɔ, takɔ wa kpa mbé ngawi dɛ olo nɛ. Nɛ wa tɛ sambala na: “Aa NWA, mɔ ká mɔ, hã mɔ zɔ̃ 'bakoe 'da lɛ!”

¹² Wa zɔ wi la wala kpo, nɛ wa he mɔ hã a na: “Mɔ tɛ́, hã mɔ zɔ́ ngamɛ kpa lɛ gɛ! Wi zɔa mbe kuti ngamɔ, ɔ nɛ kɛ lɛ zɔ gɛ a wio nde? NWA hã ngamɛ gɛ hã lɛ, we kɛ zã a nɔ̃lɔ̃ dɛ tɛ lɛ wena.

¹³ “A tumba nyɛa we, nɛ ma yula li nza i, nɛ ma bɛlɛ gbãlã tɛ lɛ vɛ̃. A ndɔa obili hã lɛ, nɛ ma kala lɛ, nɛ ma lo lɛ nù. A fɛa kɔ̃ a tɛ lɛ, nɛ a la lɛ dɛ di ni, nɛ kɔ̃ tũnɔ vɛ̃, lɛ tɛ zɔ ngamɔ iko.

¹⁴ “A tɔlɔ 'dã mɛnɔ 'da lɛ vɛ̃, nɛ a mba li nɛ kpo, nɛ a e tole nɛ ngɔ gɛlɛ lɛ ɔ nɛ ngbangbo ni, nɛ dĩ nɛ gbini gbãlã tɛ lɛ vɛ̃. NWA 'dɔlɔ lɛ hã Owi sɛnɛ lɛ, kɛ lɛ wè tɛ yolo dati wa gɔ ni.

¹⁵ “NWA fɔlɔ kɔ̃ a tɛ onga sodanɔ 'da lɛ vɛ̃. Nɛ a tumba ogele soda na wa tɛ, hã wa gbɛ obe zagbãlãnɔ 'da lɛ. A ma owinɔ 'da lɛ ɔ nɛ kɛ wa ma do wala te vinɔ kɔ kungba nɛ ni.

¹⁶ “Gulu nɛ a hia kɔ̃a 'da lɛ gɔ́nɔ́ gɔ. Wi wia we mbɔkɔ zã lɛ, nɛ a gese ngawi hã lɛ a do nde? A nyɛlɛ do lɛ ndũu. Mɔ tɛ winɔ 'da lɛ yɔa vɛ̃, we kɛ Owi sɛnɛ lɛ wa nganda, nɛ wa nɛa ngɔ lɛ do'do.

¹⁷ “Gɛnɛ kɔ lɛ ala nu lɛ gbaa, nɛ nde fo wi mbɔkɔ zã lɛ bina. NWA dɛa na, owi sɛnɛ lɛ wa linggi lɛ, nɛ wa zɔ lɛ li wa yala iko.

¹⁸ “Nɛ nde NWA dɛa do lɛ ni gbãlã we, we kɛ lɛ bɛ̃a zi nu a. Aa nɛ, owinɔ vɛ̃, nɛ zélé we gɛ, nɛ nɛ zɔ́ ngamɛ 'da lɛ! Wa kala obe zagbãlãnɔ, do obe zɔnga benɔ 'da lɛ, nɛ wa la do wa.

¹⁹ “Lɛ sa mɔ hã oyali ngba lɛ zãa, wa yu lɛ do'do. Onganganɔ, do ogã winɔ 'da lɛ, wa tɛ yɛnggɛ we fa nyɔngɔmɔ, nɛ wa fa zãa, nɛ wa fia dɛ li walanɔ iko.

²⁰ “Aa NWA, mɔ zɔ́ 'bakoe 'da lɛ! Kili gbini gbãlã tɛ lɛ vɛ̃, nɛ lɛ dunu do 'bako kɔ sila lɛ, we kɛ lɛ bɛ̃a we nu mɔ. Wi kɛ a hɔ nza, nɛ a fe fio bolo. Kɔ a 'bana dɛ tɔa, nɛ zɛlɛ gbɛ a.

²¹ “Owele wa zila hia kɔ̃a 'da lɛ, nɛ nde wele kpo tɛ̃ we gala lɛ gɔ. Owi sɛnɛ lɛ wa zila we ngamɛ mɔ tumba dɛ ngɔ lɛ ni, nɛ ma hã yangga hã wa wena. Kɔ mɔ dɛ́ na, kɔ̃ tũ bili nu gbã kɛ mɔ tɔ̃a zi we nɛ ni, ma we, hã wa kpa tɛ mɛ 'bɔ ngamɛ olo lɛ gɛ.

²² “Mɔ tɔ́lɔ́ 'dã mɛnɔ 'da wa vɛ̃, nɛ mɔ dɛ́ do wa ɔ nɛ kɛ mɔ dɛa do lɛ olo nga zunɔ 'da lɛ ni. Lɛ dungu dungu 'bako, nɛ 'bako gulu ngɔ lɛ pilii.”