Owi Nɛ Tonɔ 9 - WE NU GALE 1995

Tɛlɛ tɛ kɛ Saulo kifi do sila ɛ

¹ Do 'da fala ni, nɛ nde Saulo zi tɛ handa Owi kɔ̃ zu li Nwa Yezu na, a gbɛ wa. Nɛ mbe ngba soe kpo, nɛ a nɛa 'da gã nwa nganga,

² nɛ a aka a na, a hã mbɛti hã ɛ, kɔ ɛ be ma hã onwa ngɔ tɔa mbulanɔ tɛ Damasi i, kɔ wa ba wala hã ɛ na, fala kɛ ɛ kpa Owele di ni, wi wili tabi wuko, kɛ wa ba wala 'da Nwa Yezu ni, nɛ ɛ kala wa, nɛ ɛ ɛnzɛ wa si do wa dɛ Yeruzalɛmɛ nga.

³ Nɛ Saulo lia wala we nɛ Damasi. Kɔ a nɛa we kɔlɔ do le ni dɔ̃ɔ, hã a nɛ gbanga nɛ, nɛ a zɔ gã yele ngbala, ma yula li nza i, nɛ ma yele zĩ a takpa.

⁴ Nɛ a zɔlɔ, nɛ a te. Nɛ a zele gɛlɛ wele tɛ sa mɔ hã a na: “Saulo! Saulo! Gulu kɛ mɔ zɛlɛ tɛ mi we ge nde?”

⁵ Nɛ Saulo aka na: “Nwa, mɔ a wio nde?” Nɛ wi ni gese hã a na: “Wi a mi Yezu, kɛ mɔ zɛlɛ tɛ̃ a ni.

⁶ Kɔ mɔ kúlú ngɔ, hã mɔ lé dɛ kɔ le i, nɛ wa tɔ̃ sɛ we mɛ mɔ wia tɛ dɛ ma ni hã mɔ.”

⁷ Nɛ owinɔ kɛ wa do a ni, wa yula nù, nɛ ma ba we nu wa do'do. Wa zila wala gɛlɛ wi ni, nɛ nde wa zɔ̀ wele gɔ.

⁸ Nɛ Saulo kulu ngɔ, nɛ a 'bã li a, nɛ nde a zɔ́ mɔ gɔ. Nɛ owinɔ ni wa 'bia nu kɔ̃ a, nɛ wa kã a dɛ Damasi i.

⁹ Nɛ a ɔa tũ talɛ, nɛ nde a zɔ́ mɔ gɔ, a nyɔ́ngɔ́ mɔ gɔ, nɛ a nɔ́ 'bɔ mbamba lì gɔ.

¹⁰ Ĩ na, mbe wi kɔ̃ zu li Yezu kpo zi dɛ Damasi ni, li a a Ananiasi. Nɛ Nwa Yezu sa mɔ hã a kɔ yalɛ na: “Ananiasi!” Nɛ Ananiasi na: “Nwa, mi kɛ!”

¹¹ Nɛ Nwa tɔ̃ hã a na: “Mɔ kúlú ngɔ dɔ̃, kɔ mɔ la dɛ li wala kɛ wa sa li nɛ na, Bɔlɔ Wala ni. Kɔ mɔ hɔ nu tɔa 'da Yudasi, nɛ mɔ áká we mbe wele kpo, li a a Saulo, wi Tarsɛ. A tɛ sambala nɛ,

¹² nɛ mɔ dɛa li a nɛ́ yalɛ ni, nɛ a zɔa mbe wi wili kpo li a a Ananiasi, a tɛa, nɛ a e kɔ̃ a zu a, takɔ a zɔ 'bɔ mɔ.”

¹³ Nɛ Ananiasi gese na: “Aa Nwa, mi zila Owele wena tɛ tɔ̃ we 'da wi ni, do tɔ̃ we 'dã mɛnɔ vɛ kɛ a dɛ do owinɔ 'da mɔ, tɛ Yeruzalɛmɛ i ni.

¹⁴ Nɛ onwa nganganɔ wa hã wala hã a, nɛ a tɛa kɔ le gɛ, takɔ a kala owinɔ kɛ wa kɔ̃a zu li mɔ ni vɛ, nɛ a si do wa dɛ Yeruzalɛmɛ i.”

¹⁵ Nɛ Nwa tɔ̃ hã a na: “Mɔ nɛ́, we kɛ mi saka a do wi toe 'da mi, takɔ a yɛnggɛ we be zu li mi hã obe Israɛlɛ, do ogele nu kɔnggɔnɔ, do Onwanɔ 'da wa.

¹⁶ Nɛ mi be sɛ tɛlɛ tɛ ngamɛnɔ kɛ a kpa sɛ we duzu mi ni hã a.”

¹⁷ Nɛ Ananiasi nɛa, nɛ a hɔ nu tɔa 'da Yudasi i, nɛ a le, nɛ a e kɔ̃ a zu Saulo, nɛ a tɔ̃ hã a na: “Nyae Saulo, Nwa Yezu kɛ a hɔa zi dati mɔ li wala i, tɛ tɛ mɔ́ mɔ ni, a tumba mi hã mɔ. A kɔ̃a na, mɔ zɔ 'bɔ mɔ, nɛ ngawi 'da Hi Wi Santo dunu kɔ mɔ.”

¹⁸ A nɛa we tɔ̃ ni, nɛ mɔ ɔ nɛ kɔa tɛ kɔyɔ ni ala ngɔ li Saulo, nɛ a ndo zɔ mɔ. Nɛ a kulu ngɔ, nɛ Ananiasi hã batisimɔ hã a.

¹⁹ Nɛ 'do nɛ, nɛ a ma ngɔ nyɔngɔ mɔ, nɛ a kpa ngawi. Nɛ Saulo ɔa dɛ 'da owi kɔ̃ zu li Yezu tɛ Damasi ni 'do be tũ sĩ.

Saulo bia we tɛ Damasi

²⁰ Do 'da fala ni, nɛ a ndo nyanga be we kɔ tɔa mbulanɔ 'da wa do ti. Nɛ a tɔ̃ hã owinɔ na, Yezu a Be 'da Gale.

²¹ Nɛ owinɔ vɛ kɛ wa zele a ni, wa ɔngbɔ do ma wena. Nɛ wa ma ngɔ tɔ̃ dɛ sanga ngba wa na: “Wi gɛ a wele kɛ a handa zi we kumu owi kɔ̃ zu li Yezu tɛ Yeruzalɛmɛ i gɛ gɔ nde? Kɔ a tɛa gɛ we kala Owi kɔ̃a wenɔ, we si do wa hã onwa nganganɔ tɛ Yeruzalɛmɛ i gɔ nde?”

²² Nɛ nde Gale hã ngawi hã Saulo dɛ dati fai. Nɛ 'da fala kɛ a tɛ be gulu we 'da Yezu hã Oyudanɔ tɛ Damasi i na, a a Mɛsiya ni, nɛ ma ba we nu wa do'do.

^23-24 Nɛ ma là 'do nɛ tũ dɛlɛ gɔ, nɛ Oyudanɔ wa mba ngba wa, nɛ wa 'bili na, lo gbɛ Saulo. Nɛ tũ do gba wese, wa tɛ 'bɔ 'da a tɛ nu ngba le, takɔ wa ba a, hã wa gbɛ a. Nɛ ombe wele wa tɔ̃a we nɛ hã a.

²⁵ Nɛ mbe ngba soe kpo do tũ, nɛ owinɔ 'da Saulo wa fi a kɔ fã, nɛ wa zumu a do gbogbo zu ngbo nu le dɛ tɛ 'do nɛ nù nga, nɛ a la.

Saulo kpolo tɛ̃ a dɛ Yeruzalɛmɛ

²⁶ Nɛ Saulo kpolo tɛ̃ a dɛ Yeruzalɛmɛ, nɛ a fa we le kɔ Owi kɔ̃a wenɔ di ni ni, nɛ ma wè gɔ. Kili a ba wa wena, we kɛ wa zi do kafi. Wa kɔ̃̀ zi ngboo na, Saulo kifi sila ɛ, nɛ a hɔa wi 'da Yezu ni gɔ.

²⁷ Nɛ Barnabasi kpa a dɛ 'da ɛ, nɛ a nɛ do a 'da Owi nɛ tonɔ, nɛ a be gulu we 'da a hã wa, ɔ nɛ kɛ Saulo zɔa zi do Nwa Yezu tɛ li wala i, nɛ Nwa wila we hã a ni. Nɛ Barnabasi tɔ̃a 'bɔ we kpã sila kɛ Saulo be zi do wenɔ do zu li Yezu hã winɔ tɛ Damasi i ni.

²⁸ Nɛ yolo do ngba soe ni, nɛ Saulo mba ngbɛ ɛ do wa. Nɛ a ma ngɔ yɛnggɛ kɔ Yeruzalɛmɛ tɛ be we do li Yezu do kpã sila vɛ̃.

²⁹ Nɛ a wele we do Oyudanɔ kɛ wa tɔ̃ Grɛkɛ ni, tɛ ba kafi nu ngba a do wa, nɛ wa fa we gbɛ a.

³⁰ Kɔ Owi kɔ̃a wenɔ wa nɛa we zele ní, nɛ wa kã a gbaa, nɛ wa e a tɛ Sezare, nɛ wa tɔ̃ hã a na, a la dɛ Tarsɛ.

³¹ Do 'da fala nɛ ni, Owi kɔ̃a wenɔ tɛ ngɔ nù Yude, do Galile, do Samaria wa kpa zi dungu fio. Nɛ Hi Wi Santo hã ngawi hã wa na, wa dɛ kifi Nwa, nɛ wa dɛlɛ dɛ dati fai.

Petro kpasa Ene

³² 'Da fala ni, Petro zi tɛ yɛnggɛ we zɔ Owi kɔ̃a wenɔ kɔ lenɔ kpo do kpo. Nɛ mbe ngba soe kpo, nɛ a hɔ 'da wanɔ kɔ le Lida,

³³ nɛ a kpa mbe wi wili kpo, fi a a Ene. Tɛ̃ a fia zi vɛ̃, nɛ a ɔa ngɔ tangge zɛlɛ sabɛlɛ ngbɛ'dɛ'dɛ.

³⁴ Nɛ Petro tɔ̃ hã a na: “Ene! Yezu Kristo kpasa mɔ ia! Kɔ mɔ kúlú ngɔ, hã mɔ 'dáfá mɔ ɔi 'da mɔ do tɛ mɔ!” Nɛ Ene kulu ngɔ do ti.

³⁵ Kɔ Owi kɔ le Lida, do wanɔ ngɔ mbɛ nù Saroni, wa nɛa we zɔ kɛ wi ni kpasa ni, nɛ wa vɛ wa kifi sila wa, nɛ wa kɔ̃ zu fi Nwa Yezu.

Petro kpasa Dɔrka

³⁶ Mbe wuko kɔ̃a we zi kpo tɛ le Yope, fi a a Tabita. (Tabita do nu Grɛkɛ a Dɔrka, gulu nɛ na Dɛngbɛ.) A gala zi Owi sãnɔ, nɛ a dɛ zi dia mɔ wena.

³⁷ Nɛ ngba soe kpo, nɛ a te do zɛlɛ, nɛ a fe. Nɛ wa fɔlɔ a, nɛ wa e a kɔ mbe tɔa kpo, ma do ngɔ.

³⁸ Le Yope nyɛ̀lɛ̀ zi do Lida gɔ. Kɔ Owi kɔ̃a wenɔ tɛ Yope wa zila na, Petro hɔa tɛ Lida ni, nɛ wa tombo owele bɔa 'do a i, we aka a na, a tɛ́ 'da lo nga dɔ̃, a tɛ dà'bà tɛ́ a gɔ.

³⁹ Nɛ Petro kɔ̃a, nɛ a kulu ngɔ do wa, nɛ wa la do ti. Kɔ wa nɛa we hɔ i mɔ, nɛ wa kũ dɛ kɔ tɔa, tɛ fala wa ia do wɔlɔ Dɔrka ni. Nɛ nde Owi fio wilinɔ vɛ wa ngbula ngba wa dɛ kɛ zã a, kɔ wa tɛ he kɔ̃a a. Nɛ wa be tulunɔ kɛ Dɔrka fulu zi ma ni hã Petro.

⁴⁰ Nɛ Petro tɔ̃ hã wa na, wa hɔ́ nza vɛ sɛ! Wa hɔa, nɛ Petro gu gba zugolo, nɛ a sambala Gale we Dɔrka. Nɛ a siki li a dɛ tɛ fie, nɛ a sa mɔ hã a na: “Tabita, mɔ kúlú ngɔ!” Nɛ wuke 'bã li ɛ, kɔ a nɛ zɔ Petro, nɛ a kulu ngɔ, nɛ a dungu do go'do a.

⁴¹ Nɛ Petro 'bia nu kɔ̃ a, nɛ a ba a dɛ ngɔ. Nɛ a sa mɔ hã Owi kɔ̃a wenɔ, do Owi fio wilinɔ ni, nɛ a gese Dɔrka hã wa do tunu li a.

⁴² Nɛ Owi kɔ le Yope vɛ wa zila we ni, nɛ Owele wena wa kɔ̃a zu li Nwa Yezu.

⁴³ Nɛ Petro 'bana 'bɔ dɛ Yope ni 'do kɔ̃ tũ a dɛla, nɛ a ɔa 'da mbe wele kpo, li a a Simɔ, wi dɛ to ndala.