Owi Nɛ Tonɔ 8 - WE NU GALE 1995

Saulo zɛlɛ tɛ Owi kɔ̃a wenɔ

^1-2 Nɛ ombe wi dɔnggɔ Gale, wa mi wɔlɔ Etiɛnɛ, nɛ wa he kɔ̃a a wena. Nɛ yolo do ngba soe ni, winɔ wa ma ngɔ zɛlɛ tɛ owi kɔ̃a wenɔ tɛ Yeruzalɛmɛ. Nɛ owi kɔ̃a wenɔ wa pɛsɛ ndã ndã dɛ ngɔ nù Yude, do Samaria vɛ. Nɛ tati a owi nɛ tonɔ hã wa 'bana zi dɛ Yeruzalɛmɛ ni.

³ Nɛ Saulo dɛa vɛ́ na, a kumu owi kɔ̃a wenɔ. A le kɔ tɔa kpo do kpo tɛ kala Owi kɔ̃a wenɔ, owi wili do wuko, nɛ a a wa bɔlɔkɔ.

Filipɛ bia Dia Sakoe tɛ ngɔ nù Samaria

⁴ Nɛ owi kɔ̃a wenɔ kɛ wa pɛsa zi ndã ndã ni, wa ma ngɔ yɛnggɛ do ngɔ nùnɔ vɛ̃ tɛ be Dia Sakoe hã winɔ.

⁵ Nɛ Filipɛ nɛa kɔ le Samaria, nɛ a be hã owinɔ vɛ̃ na, Mɛsiya hɔa ia.

⁶ Nɛ a dɛa ogba sɔ̃ mɔ do ɔngba mɔ wena. Kɔ winɔ wa nɛa we zɔ ní, nɛ wa ma ngɔ zele wenɔ a be ma hã wa ni.

⁷ Nɛ ogba gili o'dã hi wi wa hɔa nza kɔ winɔ, nɛ wa he mɔ do nga gɛlɛ. Nɛ gili owi kunda, kɛ mbee tɛ wa fe fia ni, do owi mbi kũ wa kpasa zi 'bɔ.

⁸ Nɛ owinɔ kɔ le ni, wa dɛ yangga wena.

⁹ Mbe wi dɛ sɔ̃ zi kɔ le Samaria ni, li a a Simɔ, a dɛ zi ogba sɔ̃ mɔ wena, nɛ owinɔ wa ɔngbɔ zi do ma wena. Nɛ a zɔ zi tɛ a na, ɛ la owinɔ vɛ.

¹⁰ Nɛ winɔ vɛ, yolo ngɔ benɔ we hɔ ngɔ okpasa winɔ wa zele zi a wena. Wa tɔ̃ zi na: “Gale, kɛ wa sa li a na: ‘Gã ngawi’ ni, a a kɔ wi gɛ.”

¹¹ Nɛ wa zele zi a wena, we duzu kɛ a ndua zi dɛ ogba mɛnɔ belee, nɛ owinɔ wa ɔngbɔ do ma wena.

¹² Nɛ nde 'da fala kɛ Filipɛ ndua be Dia Sakoe ngɔ dɛa to nwa 'da Gale, do Yezu Kristo ni, nɛ owinɔ tɛ Samaria wa kɔ̃a zu li Yezu, nɛ Filipɛ batisa owi wili do owuko.

¹³ Nɛ Simɔ kɔ̃a tɛ mɛ 'bɔ zu li Yezu, nɛ Filipɛ batisa a. Nɛ a 'bana fala nɛ kpo do Filipɛ, tɛ zɔ oɔngbamɛnɔ do ogba sɔ̃ mɛnɔ kɛ Filipɛ dɛ ni, nɛ a ɔngbɔ do ma wena.

¹⁴ Kɔ owi nɛ tonɔ kɛ wa 'bana dɛ Yeruzalɛmɛ nga ni, wa nɛa we zele na, owi Samaria wa kɔ̃a we nu Gale i mɔ wena ni, nɛ wa tombo Petro do Yoanɛ hã wa.

¹⁵ Kɔ wa nɛa we hɔ Samaria i, nɛ wa sambala Gale we owi kɔ̃a wenɔ na, a hã Hi Wi Santo hã wa.

¹⁶ Mba gɔ, sanga wa ni vɛ̃, wele kpo kpà zi Hi Wi Santo gɔ, we kɛ Filipɛ batisa wa do zu li Nwa Yezu iko.

¹⁷ Nɛ Petro do Yoanɛ wa a kɔ̃ wa zu wa, nɛ Gale hã Hi Wi Santo hã wa.

¹⁸ Simɔ nɛa we zɔ na, Petro do Yoanɛ wa a kɔ̃ wa zu winɔ, kɔ wa kpa Hi Wi Santo ni, nɛ a nɛ do mbili hã wa.

¹⁹ Nɛ a tɔ̃ hã wa na: “Nɛ ha mbe ngawi gɛ hã mi, kɔ fala kɛ mi a kɔ̃ mi zu wele nde, nɛ a kpa tɛ mɛ 'bɔ Hi Wi Santo.”

²⁰ Nɛ Petro gese hã a na: “E kɔ mbili 'da mɔ 'danga fala nɛ kpo do mɔ! We kɛ mɔ lingga na, wele wia we oso de mɔ kɔ̃ Gale do mbili.

²¹ Mɔ wè we mba do lɛ kɔ toe gɛ gɔ, we kɛ sila mɔ a sa li Gale gɔ.

²² Kɔ mɔ kífí sila mɔ, nɛ mɔ la fala 'dã mɛnɔ 'da mɔ, nɛ mɔ sambala Gale, kɔ a kɔ̃, nɛ a mbɔkɔ mɔ, nɛ a fo 'dã linggamɛ ni kɔ mɔ do'do.

²³ Mba gɔ, mi zɔa na, sila mɔ dunu do sɛnɛmɔ, nɛ 'dã mɔ ɛnzɛ mɔ ɛnza.”

²⁴ Nɛ Simɔ tɔ̃a hã Petro do Yoanɛ na: “Nɛ kɔ̃́, nɛ nɛ sámbálá Nwa Gale we mi na, dɔ mɛ nɛ tɔ̃a nɛ ni, ma dɛ́ mi gɔ.”

²⁵ Nɛ Petro do Yoanɛ wa bia Dia Sakoe, nɛ wa tɔ̃a gulu mɛnɔ kɛ wa zɔa zi 'da fala wa yɛnggɛ do Nwa Yezu ni do'do, nɛ wa kpolo tɛ wa dɛ Yeruzalɛmɛ i. Nɛ tɛ si mɔ́ wa, wa ɛlɛ kɔ ogba gili lenɔ ngɔ nù Samaria ni, tɛ be Dia Sakoe do li wala gɛ.

Filipɛ bia we hã wi Etiopi

²⁶ Nɛ anzɛ 'da Nwa Gale tɔ̃ hã Filipɛ na: “Mɔ kúlú ngɔ, kɔ mɔ la si ba gɔtɔ, nɛ mɔ ba do li wala kɛ ma yula Yeruzalɛmɛ, nɛ ma zĩlĩ dɛ Gaza ni. Mɛ a li wala kɛ ma sí ngboo gɔ.”

²⁷ Nɛ Filipɛ kulu ngɔ, nɛ a la. Kɔ a ma ngɔ la do li wala ni, nɛ a zɔ mbe wi Etiopi kpo, a a gã wi dɛa to kɛ a fɔmɔ kpamɛnɔ 'da nwa wuke ngɔ nù Etiopi ni. Wi wili ni tɛa zi we dɔnggɔ Gale tɛ Yeruzalɛmɛ,

²⁸ kɔ a si dɛ kɔ le 'da a. A dungu kɔ ngilingili 'da a, nɛ sa'denɔ wa mana ma. Nɛ a tɛ tɔlɔ 'bulu kɛ Ezai, wi gba olo nu Gale kɔmɔ zɛ́ ma ni.

²⁹ Nɛ Hi Wi Santo tɔ̃ hã Filipɛ na: “Mɔ wɛ́lɛ́ tɛ mɔ do kɛ zã ngilingili 'da a ni.”

³⁰ Nɛ Filipɛ yu, nɛ a kɔlɔ do ngilingili, nɛ a zele wenɔ kɛ wi ni tɔlɔ kɔ 'buki 'da Ezai, wi gba olo nu Gale ni. Nɛ Filipɛ aka a na: “Mɔ ĩ́ gulu kɛ mɔ tɔlɔ ni ĩ nde?”

³¹ Nɛ wi ni gese hã a na: “Kɛ wi be gulu nɛ hã mi bina gɛ, nɛ mi nɛ dɛ fala ĩ gulu nɛ nɛ nde?” Nɛ a sa mɔ hã Filipɛ, nɛ a kũ dɛ 'da a kɔ ngilingili i, nɛ a dungu kɛ zã a.

³² Nɛ nde fala kɔ 'buki kɛ a tɔlɔ zi ni, mɛ a kɛ ma tɔ̃ na: “A ɔ zi nɛ bata kɛ wa nɛ do a we gbɛ a, tabi kɛ wa kɛlɛ sala tɛ́ a, nɛ nde a bí gɔ ni.

³³ Wa hã zi sape hã a, nɛ wa 'bìlì we 'da a do bɔlɔ nɛ gɔ. Wi nɛ anga sɛ li a dɛ nza, takɔ wa tɔ̃ lɛnggɛ 'da a a wio nde? Mba gɔ, wa gbɛa a ngɔ nùi gɛ ia.”

³⁴ Nɛ gã wi ni aka Filipɛ na: “Mɔ tɔ̃́ hã mi sɛ! Wi gba do nu Gale tɔ̃a we gɛ ngɔ wio nde? A tɔ̃ a we 'da a wele nɛ, tabi a tɔ̃ we mɔ́ gele wele nde?”

³⁵ Nɛ Filipɛ ma ngɔ wele we, nɛ a yula dɛ ngɔ we ni, nɛ a be Dia Sakoe 'da Yezu hã wi ni.

³⁶ Nɛ wa la ní gbaa, nɛ wa kpa lì. Nɛ gã wi ni tɔ̃ na: “Mɔ zɔ́ lì hã! Mɛ ma wia we amba mi na, mi tɛ kpà batisimɔ gɔ ni a ge nde?” [

³⁷ Nɛ Filipɛ tɔ̃ hã a na: “Fala kɛ mɔ kɔ̃ zu li Yezu do sila mɔ vɛ̃, nɛ mi wia we hã batisimɔ hã mɔ.” Nɛ gã wi ni gese na: “Mi kɔ̃a zu li Yezu Kristo na, a a Be 'da Gale.”]

³⁸ Nɛ gã wi ni tɔ̃ hã wi ba ngilingili, nɛ wa yolo nù. Nɛ wa zĩlĩ do Filipɛ dɛ 'dɔ lì i, nɛ Filipɛ batisa a.

³⁹ Kɔ wa nɛa we hɔ nza 'dɔ lì, nɛ Hi Wi 'da Nwa Gale ba Filipɛ la do a do'do, nɛ gã wi ni zɔ̀ 'bɔ a gɔ. Nɛ a si do yangga.

⁴⁰ Kɔ Filipɛ nɛ gbanga nɛ, nɛ nde a a tɛ Azɔtɛ i. Nɛ a yɛnggɛ kɔ lenɔ kpo do kpo tɛ be Dia Sakoe 'da Yezu gbaa, nɛ a hɔ tɛ Sezare.