Owi Nɛ Tonɔ 6 - WE NU GALE 1995

Owi kɔ̃a wenɔ wa saka Owele sambo

¹ Do ngba soe ni, nɛ nde owi kɔ̃a wenɔ wa dɛlɛ zi dɛla fai. Nɛ Oyudanɔ kɛ wa tɔ̃ Grɛkɛ ni, wa mɔ̃lã do wanɔ kɛ wa tɔ̃ Hebre, lɛnggɛ kɔ le 'da wa ngboo ni. Nɛ wa na, tũ kpo kpo, 'da fala kɛ̃ nyɔngɔmɛ, nɛ nde wa lénggé do owi fio wilinɔ 'da lo ngboo gɔ.

² Nɛ Owi nɛ tonɔ 'bu ngɔ wa bɔa ni, wa mba li owi kɔ̃a wenɔ vɛ̃, nɛ wa tɔ̃ hã wa na: “Ma wè na, lɛ la fala be we nu Gale we duzu kɛ̃ nyɔngɔmɔ iko gɔ.

³ Kɔ onyae, nɛ sáká Owele sambo sanga nɛ, kɛ nɛ ĩ na, wa dunu do ngawi 'da Hi Wi Santo, nɛ wa a ogbãlã wele ni, kɔ lɛ hã toe gɛ hã wa.

⁴ Nɛ lɛ 'bana kɛ 'da lɛ tɛ sambala Gale do be we nu a hã owinɔ iko.”

⁵ Nɛ winɔ vɛ, wa kɔ̃a linggamɛ 'da owi nɛ tonɔ, nɛ wa saka Etiɛnɛ, kɛ a do kɔ̃a we dɛ 'da Gale wena, nɛ ngawi 'da Hi Wi Santo dunu kɔ a ni. Nɛ wa saka 'bɔ Filipɛ, do Prɔkɔrɛ, Nikanɔrɛ, Timɔ, Parmenasi, do Nikola, wi Antiɔsɛ, kɛ a kifi zi sila a dɛ 'da Gale 'da Oyudanɔ ni.

⁶ Nɛ wa nɛ do wa dati owi nɛ tonɔ, we be wa hã wa, nɛ wi nɛ tonɔ wa a kɔ̃ wa zu wa, nɛ wa sambala ngɔ wa.

⁷ Na mɛ ni, we nu Gale yɛ'bɛ zi dɛ dati fai. Nɛ owinɔ tɛ Yeruzalɛmɛ, kɛ wa kɔ̃a zu li Yezu ni, wa dɛlɛ 'bɔ dɛ dati. Nɛ gba gili onganganɔ wa kɔ̃a tɛ mɛ 'bɔ.

Wa ba Etiɛnɛ

⁸ Gale wila nu ɛ tɛ Etiɛnɛ, nɛ a hã ngawi hã a. Nɛ Etiɛnɛ dɛ zi ogba sɔ̃ mɔ do oɔngbamɔ sanga owinɔ wena.

⁹ Nɛ nde ombe wele wa bɛa gɛnɛ Etiɛnɛ. Sanga owinɔ ni, ombe zi a Oyudanɔ kɛ wa yula kɔ le Sirɛnɛ, do Alɛkzandri, nɛ wa mba li ngba wa tɛ kɔ tɔa mbula kɛ wa sa li nɛ na: “Tɔa mbula 'da ongbánɔ kɛ wa da kɔ̃ wa tɛ wa ni.” Wa mba do Oyudanɔ kɛ wa yula ngɔ nù Silisi do Azi, nɛ wa ma ngɔ ba kafi nu Etiɛnɛ.

¹⁰ Nɛ nde wa wè do a gɔ, we kɛ a wele we do hã zã kɛ Hi Wi Santo hã ma hã a ni.

¹¹ Kɔ wa nɛa we zɔ ni, nɛ wa hã mbili hã ombe wele, takɔ wa tɔ̃ bɛlɛ dɛ ngɔ Etiɛnɛ na, a wila 'dã we dɛ ngɔ Mɔizɛ do Gale, nɛ lo zila.

¹² Nɛ wa tɔndɔ go'do winɔ, do okumunɔ, do owi be mbulanɔ dɛ tɛ a. Nɛ wa nɛa, nɛ wa ba a do nga nɛ, nɛ wa la do a dɛ dati owi 'bili wenɔ i.

¹³ Nɛ wa fa 'bɔ otemɔɛ bɛlɛ, nɛ wa a wa tɛ 'bili bɛlɛ dɛ ngɔ a na: “Wi gɛ, a lá fala 'danga dɔ̃lɔ̃ li Tɛmpɛlo 'da Gale, do mbula 'da Mɔizɛ gɔ.

¹⁴ Mba gɔ, lɛ zila a tɛ tɔ̃ na, Yezu, wi Nazarɛtɛ, a 'danga sɛ Tɛmpɛloe, nɛ a kpolo sɛ mbulanɔ kɛ yaa lɛ Mɔizɛ hã zɛ́ ma hã lɛ ni.”

¹⁵ Nɛ owinɔ kɔ tɔa 'bili we ni vɛ, wa kala li wa dɛ tɛ Etiɛnɛ. Kɔ wa nɛ ka mɔ, nɛ nde bula li a kifi, kɔ ma ɔ nɛ bula li anzɛ ni.