Owi Nɛ Tonɔ 5 - WE NU GALE 1995

Fie 'da Ananiasi do wuke 'da a Safira

¹ Nɛ nde mbe wi wili zi kpo li a a Ananiasi, nɛ li wuke 'da a a Safira, a bia gole fɔɛ 'da a.

² Nɛ wa ɔ ngɔ we nɛ do wuke 'da a, nɛ a kala mbili, nɛ a gɔnɔ sanga nɛ bɔa, nɛ a usu mbee nɛ dɛ kɔ tɔa 'da wa i, nɛ a hã tala nɛ hã Owi nɛ tonɔ.

³ Nɛ Petro tɔ̃ hã Ananiasi na: “Ananiasi, gulu kɛ Satana 'danga sila mɔ, nɛ mɔ 'bili bɛlɛ hã Hi Wi Santo, nɛ mɔ usu mbe nu mbili fɔɛ kɔ tɔa 'da mɔ i, nɛ mɔ tɔ̃ na, mbili fɔɛ 'da mɔ vɛ hã ni we ge nde?

⁴ Dati kɛ wa tɛ òsò zi fɔɛ 'da mɔ gɔ ni, nɛ nde mɛ zi a kɛ 'da mɔ. Nɛ 'do kɛ wa usa ni, nɛ nde wele mbili nɛ 'bɔ a mɔ́ mɔ. Kɔ mɛ dɛa mɔ ngboo na, mɔ 'bili do kɔ sila mɔ, we dɛ mɔ ɔ nɛ mɛ gɛ ni a ge nde? Mɔ 'bìlì bɛlɛ hã wele gɔ, nɛ nde mɔ 'bili bɛlɛ hã Gale.”

⁵ Kɔ Ananiasi nɛa we zele wenɔ ni, nɛ a te kpingbi, nɛ a fe. Nɛ winɔ vɛ̃ kɛ wa zila we nɛ ni, kili ba wa nɛ ge nde ni.

⁶ Nɛ ozagbãlã wa tɛa, nɛ wa ba wɔlɔ a, nɛ wa lɔmbɔ do tulu, nɛ wa la do a, nɛ wa mi a.

⁷ Nɛ 'do nɛ nɛa we la sa talɛ, nɛ wuke 'da Ananiasi hɔ. Nɛ a le 'da Petro i, nɛ nde a ĩ̀ fala kɛ wili a fia ni gɔ.

⁸ Nɛ Petro aka a na: “Mɔ tɔ̃̀ hã mi sɛ, sɔkpɔ mbili fɔɛ 'da nɛ vɛ̃ kɛ nde?” Nɛ wuke tɔ̃ 'bɔ hã a na: “Sɔkpɔ nɛ vɛ hã ni.”

⁹ Nɛ Petro aka a na: “Mɛ ma dɛa nɛ ngboo na, nɛ do wili mɔ, nɛ 'bili do kɔ sila nɛ we tɔ̃ bɛlɛ hã Hi Wi 'da Nwa Gale ni a ge nde? Kɔ mɔ zélé, winɔ kɛ wa mi wili mɔ ni, wa hɔa 'do nu tɔa gɛ ia. Wa ba sɛ 'bɔ mɔ la do mɔ.”

¹⁰ We ni 'bana dɛ nu a ni iko, nɛ wuke te kpingbi, nɛ a fe dɛ dati a ni. Nɛ ozagbãlãnɔ ni wa le dɛ tɔa i, nɛ nde a fia ia. Nɛ wa ba a, nɛ wa la do a, nɛ wa mi a dɛ kɛ zã wili a ni.

¹¹ Nɛ kili ba Owi kɔ̃a wenɔ, do owinɔ vɛ kɛ wa zila we ni wena.

Owi nɛ tonɔ wa dɛa ogba sɔ̃ mɔ

¹² Nɛ do wala 'da Owi nɛ tonɔ, nɛ Gale dɛa ogba sɔ̃ mɔ, do oɔngbamɔ tɛ sanga owinɔ wena. Nɛ Owi kɔ̃a wenɔ vɛ, wa mba zi li ngba wa fai dɛ ti da kɛ li nɛ a: “Mɔnggɔlɔ Tɔa 'da Salɔmɔ” ni, nɛ wa do linggamɔ kpo.

¹³ Nɛ ogele winɔ wa dɛ zi kili le sanga wa, nɛ nde winɔ vɛ wa dɔnggɔ zi wa wena.

¹⁴ Nɛ gba gili Owi wili do owuko wa kɔ̃a zu li Nwa Yezu, nɛ wa dɛlɛ dɛ dati fai.

¹⁵ Nɛ ombe winɔ wa kala Owi zɛlɛ, nɛ wa a wa ngɔ tangge, tabi ngɔ bunggu dɛ kɛ zã walanɔ, takɔ Petro ma ngɔ la nɛ, kɔ gɔ̃lɔ̃ a te ngɔ ombe sanga wa ni, nɛ wa kpasa.

¹⁶ Nɛ gili wele wa yula kɔ lenɔ kɛ zã Yeruzalɛmɛ ni, nɛ wa kala Owi zɛlɛnɔ 'da wa, do owinɔ kɛ wa do o'dã hi wi ni nɛ wa tɛ do wa, nɛ wa kpasa vɛ.

Wa hã ngamɔ hã owi nɛ tonɔ

¹⁷ Nɛ gã nwa nganga do winɔ 'da a vɛ, kɛ wa sa li wa na, Osadisiɛnɔ ni, wa zɔa ni, nɛ wa dunu do bɔnɛ dɛ tɛ owi nɛ tonɔ.

¹⁸ Nɛ wa kala wa dɛ li winɔ vɛ̃, nɛ wa a wa bɔlɔkɔ.

¹⁹ Nɛ do tũi ni, nɛ anzɛ 'da Nwa Gale hũi nu tɔa bɔlɔkɛ, nɛ a fo wa dɛ nza. Nɛ a tɔ̃ hã wa na:

²⁰ “Nɛ nɛ́ kɔ Tɛmpɛlo i, kɔ nɛ tɔ̃́ gulu mbé kpasi gɛ vɛ̃ hã owinɔ.”

²¹ Nɛ Owi nɛ tonɔ wa dɛa olo nu a. Nɛ fala nɛa we sa nɛ, do titole belee, nɛ wa la kɔ Tɛmpɛlo i, nɛ wa ma ngɔ be we 'da Yezu hã owinɔ. Do kpo titole ni, nɛ gã nwa nganga do winɔ 'da a, wa sa mɔ hã ogã wi 'bili wenɔ, do okumu Israɛlɛ vɛ̃, nɛ wa mba li ngba wa we 'bili we. Nɛ wa tombo Owele kɔ tɔa bɔlɔkɔ i na, wa kala Owi nɛ tonɔ tɛ do wa.

²² Kɔ wa nɛa we hɔ i mɔ, nɛ wa kpà Owi nɛ tonɔ gɔ. Nɛ wa gili tɛ wa dɛ 'da Owi 'bili wenɔ nga,

²³ nɛ wa tɔ̃ hã wa na: “Lɛ hɔa i mɔ, nɛ lɛ kpa nu tɔa bɔlɔkɛ do kpia nɛ vɛ̃, nɛ Owi zɔ mɔ tɛ nɛ wa tɛ yolo dɛ nu nɛ ni. Kɔ lɛ nɛa we hũi ma, nɛ nde wele kpo kɔ nɛ bina.”

²⁴ Kɔ nwa ngɔ Owi zɔ mɔ nu tɔa Tɛmpɛloe, do onwa nganganɔ wa nɛa we zele ni, nɛ zu wa vĩ, nɛ wa kɔ̃̀ ngboo gɔ, nɛ wa ma ngɔ aka ngba wa na: “Ki 'bɔ a ge nde?”

²⁵ Nɛ mbe wele kpo hɔ, nɛ a tɔ̃ hã wa na: “Winɔ nɛ a zɛ wa bɔlɔkɛ gɛ, wa tɛ be we hã owinɔ kɔ Tɛmpɛlo i!”

²⁶ Nɛ nwa ngɔ Owi zɔ mɔ nu tɔa Tɛmpɛloe nɛa fala nɛ kpo do owinɔ 'da a, nɛ wa kala Owi nɛ tonɔ. Nɛ nde wa dɛ̀ wa 'danga gɔ, mba gɔ, wa dɛa kili winɔ na, da dɛ kɔ wa ló lo do ta gɔ.

²⁷ Nɛ wa tɛa do Owi nɛ tonɔ dɛ dati ogã wi 'bili wenɔ. Nɛ gã nwa nganga ma ngɔ aka wa na:

²⁸ “Lɛ bɛa zi hã nɛ nganda wena na, nɛ tɛ bè 'bɔ we 'da wi ni gɔ. Kɔ nɛ zɔ́ kɛ nɛ dɛa gɛ! Nɛ yɛ'ba bia we 'da nɛ hã winɔ kɔ le Yeruzalɛmɛ gɛ vɛ! Nɛ kɔ̃a wá na, we fie 'da wi ni si zu lɛ nde?”

²⁹ Nɛ Petro, do tala Owi nɛ tonɔ wa gese na: “Ma wia na, lɛ zele nu Gale nɛ ngɔ zele nu owele.

³⁰ Nɛ bɛlɛ zi Yezu ngɔ finda te, nɛ nde Gale 'da oyaa lɛ tunu a kɔ fio.

³¹ Nɛ a dungu ngɔ ngawili kɔ̃ Gale. Nɛ Gale ia a do nwa, do wi kpasa wi, takɔ ma hã wala hã obe Israɛlɛ na, wa kifi sila wa, hã Gale fo 'dã mɛnɔ zu wa.

³² Kɔ lɛ a otemɔɛ nɛ, fala nɛ kpo do Hi Wi Santo kɛ Gale hã a hã owinɔ 'da a ni.”

³³ Owi 'bili wenɔ wa nɛa we zele we ni, nɛ ma ngbɛnzɛ wa wena, nɛ wa handa we gbɛ Owi nɛ tonɔ.

³⁴ Ĩ na, mbe Fariziɛ̃ kpo, li a a Gamaliɛlɛ zi dɛ sanga wa ni. Gamaliɛlɛ a wi be mbula, nɛ winɔ vɛ̃ wa dɔnggɔ zi a wena. Nɛ a kulu ngɔ, nɛ a tɔ̃ na, wa fó Owi nɛ tonɔ dɛ nza sɛ.

³⁵ 'Do nɛ, nɛ a tɔ̃ hã owinɔ wa mba li ngba wa ni na: “Nɛ, obe Israɛlɛ, mɛ nɛ nɛ dɛ do owinɔ gɛ, nɛ lénggé ma ngboo sɛ!

³⁶ Mba gɔ, zi dɛ, nɛ mbe wele kpo li a a Tedasi, a lengge zi na ɛ a gã wi, nɛ owele kama nalɛ wa mba do a kɔ mɛnɔ a dɛ zi ni. Nɛ wa gbɛa a, nɛ owinɔ 'da a wa pɛsa vɛ̃, nɛ mɛnɔ wa dɛ zi ni ma sɔkpa.

³⁷ Nɛ 'do wele ki ni, do ngba soe wa tɔlɔ zi do winɔ ni, nɛ mbe be Galile kpo, li a a Yudasi kala zi 'bɔ Owele dɛ 'do a. Nɛ wa gbɛa 'bɔ a, nɛ owinɔ ni wa pɛsa 'bɔ vɛ̃ iko.

³⁸ Kɔ mi tɔ̃ hã nɛ na, nɛ tɛ dɛ̀ 'dã mɔ do winɔ gɛ gɔ. Nɛ dá kɔ̃ nɛ tɛ wa hã wa la. Mba gɔ, fala kɛ mɛnɔ wa dɛ gɛ, ma yolo nu Owele nde, nɛ ma sɔkpɔ sɛ iko.

³⁹ Kɔ ma yolo 'da Gale ngboo, nɛ nɛ wé sɛ we 'danga ma gɔ. Kɔ lɛ ĩ̀ gɔ, nɛ lénggé sɛ, dɔ nɛ bí bolo do Gale gɔ.” Nɛ owi 'bili wenɔ wa kɔ̃a gɛnɛ we a tɔ̃a ni.

⁴⁰ Nɛ wa sa mɔ hã Owi nɛ tonɔ, nɛ wa zɛ wa do zufa ndala. Nɛ wa tɔ̃ hã wa na, da dɛ kɔ wa bé 'bɔ mbé we do zu li Yezu gɔ, nɛ wa da kɔ̃ wa tɛ wa.

⁴¹ Nɛ Owi nɛ tonɔ wa hɔa nza sanga Owi 'bili wenɔ, nɛ wa si do yangga vɛ̃, we kɛ wa zɔa ngamɔ we duzu li Yezu ni.

⁴² Nɛ tũ kpo kpo, wa nɛ zi kɔ Tɛmpɛlo i, do tɛ nu tɔanɔ 'da winɔ, tɛ be we hã wa, do tɔ̃ Dia Sakoe 'da Yezu na, a a Mɛsiya.