Owi Nɛ Tonɔ 4 - WE NU GALE 1995

Onwa nganganɔ wa kala Petro do Yoanɛ

¹ Kɔ Petro do Yoanɛ wa 'bana tɛ wele we do owinɔ ni, nɛ onganganɔ, fala nɛ kpo do nwa ngɔ Owi zɔ mɔ nu tɔa Tɛmpɛloe, do Osadisiɛnɔ wa hɔ.

² Nɛ wa zele we kɛ owi nɛ tonɔ 'da Yezu wa be hã owinɔ na, Yezu za'da nza kɔ fio ni, nɛ zã wa nɔ̃lɔ̃ wena. Mba gɔ, fala kɛ Yezu za'da nza kɔ fio, ní a ma be na, ofionɔ wa za'da nza kɔ fio za'da.

³ Nɛ wa kala Petro do Yoanɛ, nɛ wa a wa bɔlɔkɔ, gbaa we 'bɔ 'da sa fala, we kɛ wese gɛ̃a zi ia.

⁴ Nɛ nde ombe gba gili winɔ kɛ wa zila bia we ni, wa kɔ̃a zu li Yezu. Nɛ do ngba soe ni, Owi kɔ̃a wenɔ wa dɛlɛ dɛ dati, nɛ wa hɔa zi nɛ́ koto mɔlɔ ni.

⁵ Kɔ fala nɛa we sa nɛ, nɛ onwa Yudanɔ, do okumunɔ, do Owi be mbulanɔ vɛ, wa mba li ngba wa dɛ Yeruzalɛmɛ ni,

⁶ mba do gã nwa nganga Anɛ, do Kaifɛ, Yoanɛ, Alɛkzandrɛ, do owi nu fɛlɛ gã nwa nganga vɛ̃.

⁷ Nɛ wa tumba, nɛ wa tɛ do Petro do Yoanɛ hã wa. Nɛ wa aka wa na: “Nɛ kpasa wi gɛ do ngawi 'da wio nde? Nɛ dɛa ma do zu li wio nde?”

⁸ Nɛ ngawi 'da Hi Wi Santo dunu kɔ Petro, nɛ a tɔ̃ hã wa na: “Nɛ, onwanɔ, do okumunɔ,

⁹ nɛ áká lɛ sɔɛ gɛ we de dɛa mɛ kɛ Gale dɛa we wi kunda gɛ, do tɛlɛ tɛ kɛ a kpasa nɛ ni gɔ nde?

¹⁰ Kɔ ma wia na, nɛ, do obe Israɛlɛ vɛ̃ nɛ ĩ na, wi kɛ zɛlɛ 'da a ia, kɔ a yolo dɛ dati nɛ gɛ, a kpasa do ngawi 'da li Yezu Kristo, wi Nazarɛtɛ, kɛ nɛ bɛ̃lɛ̃ zi a ngɔ finda te, nɛ Gale tunu a kɔ fie ni.

¹¹ Yezu ni a wi kɛ wa kɔma zɛ́ we ngɔ a kɔ 'Buki na: ‘Ta kɛ nɛ, owi dɛ tɔanɔ nɛ da zi ma nù ni, ma hɔa ta bɛlɛduma tɔa.’

¹² Nɛ ĩ́ na, ngɔ nù gɛ vɛ̃, Gale kpásá wele do wala 'da mbé gele wele gɔ. A kpasa wa tati a do wala 'da Yezu zu a kpo.”

¹³ Owi 'bili wenɔ wa nɛa we zɔ kpã sila 'da Petro do Yoanɛ, nɛ wa ɔngbɔ do ma wena. We kɛ wa ĩ na, wa yàmbàlà mbɛti ngboo gɔ. Nɛ wa ĩ ti wa na, wa yɛnggɛ zi fala nɛ kpo do Yezu.

¹⁴ Nɛ wa zi 'bɔ do mbé we nu wa kpo we tɔ̃ hã Petro do Yoanɛ bina, we kɛ wa zɔa wi kunda kɛ a kpasa ni tɛ yolo dɛ kɛ zã wa ni.

¹⁵ Nɛ wa tɔ̃ hã Petro do Yoanɛ na, wa hɔ nza kɔ tɔa 'bili we do'do. 'Do nɛ, nɛ wa ma ngɔ fa gulu we ni dɛ sanga ngba wa ni na:

¹⁶ “Lɛ nɛ dɛ do winɔ gɛ nɛ nde? Mba gɔ, Owi Yeruzalɛmɛ vɛ̃ wa ĩ na, winɔ gɛ wa dɛa gba sɔ̃ mɔ, kɔ lɛ wè tɛ kafa ma gɔ.

¹⁷ Kɔ na, dɔ sakoe gɛ yɛ́'bɛ́ 'bɔ dɛ dati gɔ ni, ma wia na, lɛ yaka zala wa na, da dɛ kɔ wa bé 'bɔ mbé we do zu li Yezu gɔ.”

¹⁸ Nɛ wa sa 'bɔ mɔ hã Petro do Yoanɛ, nɛ wa bɛ̃ hã wa na, dɔ wa sá 'bɔ li Yezu, tabi wa be 'bɔ we do zu li a gɔ.

¹⁹ Nɛ Petro do Yoanɛ wa gisa hã wa na: “Nɛ ngboo, nɛ 'bílí we gɛ dati Gale do bɔlɔ nɛ! Ma wia na lɛ zele nu nɛ dati zele nu Gale nde?

²⁰ We duzu lɛ, lɛ wè tɛ kpe nu lɛ dɛ ngɔ mɛ kɛ lɛ zɔa, nɛ lɛ zila do zala lɛ ni gɔ.”

²¹ Owi 'bili wenɔ wa nɛa we zele ni, nɛ wa dãlã 'bɔ dɛ tɛ wa nganda wena, nɛ wa da kɔ̃ wa tɛ wa. Wa kpà zi wala we 'bili we dɛ zu wa gɔ, we kɛ winɔ vɛ̃ wa dɔnggɔ Gale we mɛ kɛ ma dɛa tɛ̃ ɛ ni.

²² Wi kunda kɛ Gale kpasa a do wala ɔngbamɛ ni, a nɛa zi ngɔ 'bu sabɛlɛ nalɛ nɛa.

Owi kɔ̃a wenɔ wa aka Gale na a hã kpã sila hã lo

²³ Wa nɛa we da kɔ̃ wa tɛ Petro do Yoanɛ, nɛ wa la dɛ 'da ongba wa wi kɔ̃a wenɔ i. Nɛ wa tɔ̃a wenɔ vɛ̃ kɛ onwa nganganɔ, do okumunɔ wa tɔ̃a ni hã wa.

²⁴ Kɔ Owi kɔ̃a wenɔ wa nɛa we zele ni, nɛ wa dɔnggɔ Gale do sila wa kpo na: “Nwa, mɔ a mɔ dɛa li nza do nù, do gba lì, do mɛnɔ 'dɔ nɛ ni vɛ.

²⁵ Mɔ a mɔ tumba zɛ́ Hi Wi Santo dɛ ngɔ yaa lɛ Davidi, wi toe 'da mɔ, nɛ a gba olo nu mɔ na: ‘Ogele winɔ wa dɛ dã, nɛ wa ba zã zu we mba mba do zu li Nwa, gulu kɛ wa dɛ ni we ge nde?

²⁶ Onwanɔ nù gɛ wa mba li ngba wa, nɛ wa 'dafa tɛ wa, we bi bolo do Nwa Gale, we bi 'bɔ do wi kɛ Gale ia a do nwa ni.’ ”

²⁷ Nɛ Owi kɔ̃a wenɔ ni wa tɔ̃ 'bɔ hã Gale na: “Gbãlã we, Herodɛ do obe Israɛlɛ, do Pɔnsɛ Pilatɛ, do ogele nu kɔnggɔnɔ, wa mba ngba wa dɛ kɔ le gɛ, we gbɛ wi dɛa toe 'da mɔ Yezu, kɛ a santo, nɛ mɔ saka zɛ́ a ni.

²⁸ Na mɛ ni, wa dɛa vɛ̃ a kɛ mɔ 'dafa zɛ́ do kɔ sila mɔ, do ngawi 'da mɔ ia ni.

²⁹ Kɔ aa Nwa, ngangga ni, mɔ zɔ́ tɛlɛ tɛ kɛ wa tɛ tulu do lɛ gɛ! Kɔ mɔ hã̀ ngawi hã lɛ Owi tonɔ 'da mɔ, takɔ lɛ be we 'da mɔ do kpã sila vɛ.

³⁰ Mɔ ha 'bɔ ngawi hã lɛ, takɔ lɛ kpasa Owi zɛlɛnɔ, nɛ lɛ dɛ ogba sɔ̃ mɔ, do oɔngbamɔ do zu li wi toe 'da mɔ Yezu, kɛ a santo ni.”

³¹ Sambala 'da wa nɛa we e nɛ, nɛ fala wa dungu nɛ ni, tana gbirr. Nɛ wa vɛ̃ wa dunu do ngawi 'da Hi Wi Santo, nɛ wa ma ngɔ be we nu Gale do kpã sila.

Owi kɔ̃a wenɔ wa kɛ̃a mɛnɔ 'da wa dɛ sanga wa

³² Ngɔ gili owinɔ kɛ wa kɔ̃a zu li Yezu ni, wa zi do sila wa kpo, do linggamɔ kpo. Nɛ wa mba zi li mɛnɔ 'da wa vɛ kpo, nɛ wele kpo zɔ́ zi 'bɔ mɛnɔ 'dɛ ɛ na, mɛ a kɛ 'dɛ ɛ zu ɛ kpo gɔ.

³³ Nɛ Owi nɛ tonɔ wa tɛ tɔ̃ gulu za'da nza kɔ fie 'da Nwa Yezu do ngawi vɛ, nɛ Gale wila nu ɛ tɛ wa wena.

³⁴ Nɛ wele kpo zi 'bɔ do sã mɔ kɛ ma wia do gala a ni bina. We kɛ owinɔ kɛ wa do ofɔ tabi otɔa ni, wa bia gole nɛ, nɛ wa kala mbili nɛ,

³⁵ nɛ wa a ma ti Owi nɛ tonɔ. Nɛ wa kɛa mbili ni hã wele do wele ɔ nɛ kɛ ma wia do a ni.

³⁶ Mbe wi kɛ a dɛa ní ni, wi a Yozɛfu kɛ wi nɛ tonɔ wa sa zi 'bɔ li a na Barnabasi (gulu nɛ na: “Wi hã kpã sila.”) A zi a wi nu fɛlɛ Levi, nɛ wa kua a ngɔ nù Siprɛ.

³⁷ A fi nu gole fɔɛ 'da a, nɛ wa usa, nɛ a kala mbili nɛ, nɛ a a ma ti Owi nɛ tonɔ.