Owi Nɛ Tonɔ 3 - WE NU GALE 1995

Petro do Yoanɛ wa kpasa wi kunda

¹ Mbe ngba soe kpo, do sa talɛ 'do midi, sa kɛ winɔ wa dɔnggɔ do Gale ni, nɛ Petro do Yoanɛ wa le kɔ Tɛmpɛlo tɛ Yeruzalɛmɛ i we dɔnggɔ Gale.

² Nɛ nde tũ kpo kpo, owele wa tɛ zi do mbe wi kala nyanga kpo, wa kua do a kɔ zã, nɛ wa e a dɛ tɛ nu tɔa Tɛmpɛlo, si fala wa sa li nɛ na: “Dia Nu Tɔa” ni, takɔ a gɔ mbili kɔ̃ owinɔ wa tɛ we le kɔ Tɛmpɛloe ni.

³ Kɔ a nɛa we zɔ Petro do Yoanɛ tɛ le nɛ, nɛ a gɔ mbili kɔ̃ wa.

⁴ Nɛ Petro do Yoanɛ wa soko mɔ tɛ̃ a gbo gbo gbo, nɛ Petro tɔ̃ hã a na: “Mɔ ká mɔ tɛ lɛ sɛ!”

⁵ Nɛ a ka mɔ tɛ wa fioo do linggamɔ na, wa hã sɛ mɔ hã ɛ.

⁶ Nɛ Petro tɔ̃ hã a na: “Mi do mbili kpo we hã ma hã mɔ bina. Nɛ nde mɛ kɛ mi do ma gɛ, ma a mi nɛ hã hã mɔ gɛ. Do zu li Yezu Kristo, wi Nazarɛtɛ, mɔ kúlú ngɔ, kɔ mɔ lá!”

⁷ Nɛ Petro 'be ngawili kɔ̃ a, nɛ a ba a dɛ ngɔ, nɛ a zĩ a do nyanga a. Nɛ gɛlɛ nyanga a, do tambala nyanga a ma nganda do ti.

⁸ Nɛ a bũlũ, nɛ a ĩ do nyanga a, nɛ a ma ngɔ nɛ nɛ. Nɛ a le do wa dɛ kɔ Tɛmpɛlo i, nɛ a la, nɛ a kpe'de dɛ ngɔ tɛ dɔnggɔ Gale.

⁹ Nɛ winɔ vɛ̃ wa zɔa a tɛ la nɛ, tɛ dɔnggɔ Gale.

¹⁰ Kɔ wa nɛa we ĩ ti a na, wi kɛ a dungu zi nu tɔa Tɛmpɛloe, tɛ fala li nɛ a: “Dia Nu Tɔa” tɛ gɔ mbili kɔ̃ winɔ gɛ a ni ni, nɛ ma kula wa kula, nɛ wa ɔngbɔ wena do kɛ Gale kpasa a ni.

Petro bia we kɔ Tɛmpɛlo

¹¹ Nɛ wi ni kɔ̃̀ we la Petro do Yoanɛ gɔ. Kɔ winɔ wa nɛa we zɔ mɛnɔ ma la ni, nɛ wa ɔngbɔ wena, nɛ wa yu, nɛ wa mba li ngba wa dɛ kɛ zã wa, dɛ ti da kɛ li nɛ a: “Mɔnggɔlɔ Tɔa 'da Salɔmɔ” ni.

¹² Kɔ Petro nɛa we zɔ ní, nɛ a tɔ̃ hã owinɔ na: “Nɛ, obe Israɛlɛ, gulu kɛ nɛ ɔngbɔ mɛ gɛ we ge nde? Gulu kɛ nɛ ka mɔ tɛ lɛ ɔ nɛ kɛ lɛ a lɛ kpasa wi gɛ do ngawi 'da lɛ, tabi we kɛ lɛ de li Gale wena ni we ge nde?

¹³ Gale kɛ oyaa lɛ Abrahama, do Izaka do Yakɔbɔ wa dɔnggɔ zɛ́ a ni, a hã dɔ̃lɔ̃ li hã wi dɛa toe 'da a, Yezu. Nɛ nde nɛ, nɛ 'dɔlɔ zi Yezu hã ogã winɔ, nɛ nɛ bɛ̃a zi gɛnɛ a dati Pilatɛ, kɛ a kɔ̃a zi we da kɔ̃ a tɛ̃ a ni.

¹⁴ A zi a wi 'da Gale ngboo, nɛ a a bɔlɔ zu wele, nɛ nde nɛ bɛa zi gɛnɛ a. Nɛ nɛ aka Pilatɛ na, a da kɔ̃ a tɛ wi gbɛ wi hã nɛ.

¹⁵ Nɛ nɛ gbɛa zi Nwa wele kpasi, nɛ nde Gale tunu a kɔ fio, nɛ lɛ zɔa a, nɛ lɛ a otemɔɛ nɛ.

¹⁶ Kɔ we duzu kɛ lɛ kɔ̃a zu li Yezu ni, ma kɛ ngawi 'da Yezu ma kpasa wi kunda nɛ zɔ a, nɛ nɛ ĩ ti a gɛ. Kɔ̃a we 'da lɛ dɛ 'da Yezu, ma hã ma kpasa a dɛ li nɛ vɛ gɛ.

¹⁷ “Kɔ onyae, ngangga gɛ mi ĩ na, nɛ, do nwanɔ 'da nɛ, nɛ ĩ̀ zi ti gulu 'dã mɛ kɛ nɛ dɛa dɛ 'da Yezu ni gɔ.

¹⁸ Nɛ nde Gale kɔ̃a zi na mɛ ni, takɔ we a tɔ̃a zɛ́ do wala 'da owi gba olo nu a vɛ̃ na, Mɛsiya, kɛ a saka a ni, a kpa sɛ zɛlɛ tɛ ni, ma dɛ tɛ̃ ɛ.

¹⁹ Kɔ we duzu ki ni, nɛ kífí sila nɛ, nɛ nɛ kpolo tɛ nɛ dɛ 'da Gale, takɔ a fo ku'da 'dã mɛnɔ zu nɛ.

²⁰ Kɔ nɛ dɛ na mɛ ni, nɛ Nwa Gale a dɛ sɛ na sila nɛ gɛ̃, nɛ a tombo sɛ Yezu, kɛ a saka zɛ́ a ia ni hã nɛ.

²¹ Nɛ nde ngangga gɛ, ma wia na, Yezu 'bana dɛ ngɔ i, gbaa we hɔ 'da fala kɛ Gale a 'dafa sɛ 'bɔ mɛnɔ vɛ̃ do mbé nɛ, ɔ nɛ kɛ a tɔ̃a zɛ́ dati belee, do wala 'da Owi gba olo nu a kɛ a saka zɛ́ wa ni.

²² Mba gɔ, Mɔizɛ tɔ̃a zi na: ‘Nwa Gale 'da nɛ, a tombo sɛ wi gba olo nu a ɔ nɛ mi gɛ hã nɛ. Wi ni sɛ a be le 'da nɛ ngboo, nɛ ma wia na, nɛ zele wenɔ vɛ̃ kɛ a tɔ̃ sɛ hã nɛ ni.

²³ Kɔ wele kɛ a kɔ̃̀ we zele a gɔ, nɛ wa fo sɛ a kɔ winɔ 'da Gale do'do, nɛ wa gbɛ a.’

²⁴ Na mɛ ni, owi gba olo nu Gale, yolo ngɔ Samuɛlɛ do wanɔ 'do a ni vɛ̃, wa tɔ̃a we ngɔ ngba soe kɛ lɛ do ma gɛ.

²⁵ Nɛ nɛ, nɛ a onu fɛlɛ owi gba olo nu Gale. Nɛ nɛ 'bɔ a obe gba tɔkɔ kɛ Gale gba zɛ́ do oyaa nɛ, do 'da fala kɛ a tɔ̃a zɛ́ do we hã Abrahama na, ɛ wele sɛ nu ɛ tɛ gele nu fɛlɛ kulanɔ ngɔ nùi gɛ vɛ̃ do wala 'da obe zã mɔ ni.

²⁶ Na mɛ ni, Gale saka zi wi toe 'da a, nɛ a tombo a dati hã nɛ. A tumba ni, takɔ a wele nu a tɛ nɛ, nɛ a kifi li nɛ dɛ 'da a, nɛ wele do wele bɛ̃ gɛnɛ 'dã mɛ 'dɛ ɛ.”