Owi Nɛ Tonɔ 28 - WE NU GALE 1995

Polo hɔa tɛ ngolo lì Maltɛ

¹ Lɛ hɔa nza do lɔa tɛ lɛ, nɛ Owele lenɔ wa tɔ̃ hã lɛ na, li ngolo lì gɛ a Maltɛ.

² Nɛ wa dɛ zi lɛ de wena. Wa dã gã we na lɛ ɔ, we kɛ kolo tɛ zi tɛa, nɛ gɛɛ ba zi wena.

³ Nɛ Polo ngɛmɛ okula gua dɛ nu we. Kɔ we nɛa we te tɛ nɛ, nɛ gɔ̃ hɔ nza kɔ mbe gua ni, nɛ a gɔmɔ kɔ̃ Polo, nɛ nu a sanga dɛ tɛ nɛ.

⁴ Kɔ owinɔ kɔ le ni, wa nɛa we zɔ gɔ̃ɛ tɛ kɔ̃ Polo, nɛ wa tɔ̃ dɛ sanga wa na: “Wi gɛ a wi gbɛ wi! Mba gɔ, gɛnɛ kɔ a kpasa 'dɔ gba lì, nɛ nde gale bɔlɔ zu, kɔ̃̀ na, a kpasa gɔ.”

⁵ Nɛ Polo yaka gɔ̃ɛ ni, nɛ a te li we, nɛ dã gɔ̃ɛ bà a gɔ.

⁶ Nɛ winɔ wa 'bɔa we zɔ na, tabi gɔ̃ɛ ma ba sɛ a, tabi a te sɛ kpingbi, nɛ a fe iko nde. Nɛ wa 'bɔa zãa, nɛ mɔ kpo dɛ̀ a gɔ. Nɛ wa kpolo linggamɛ 'da wa, nɛ wa na: “Wi gɛ a gale!”

⁷ Mbe ngbo mɔ́ Publiusi, gã wi ngɔ ngolo lì ni zi dɔ̃ɔ do fala ni. Nɛ a hã fala hã lɛ kɔ tɔa 'da a, nɛ a dɛ lɛ de wena, nɛ lɛ ɔa dɛ 'da a ni tũ talɛ.

⁸ Nɛ nde baa Publiusi zi do zɛlɛ, bawe tɛ wi do yu zã wi fĩ a nù. Nɛ Polo nɛa, nɛ a zɔ a, nɛ a aka Gale we a, nɛ a a kɔ̃ a ngɔ a, nɛ a kpasa.

⁹ Kɔ ogele wi zɛlɛnɔ ngɔ ngolo lì ni, wa nɛa we zele ní, nɛ wa nɛ 'da Polo, nɛ a kpasa 'bɔ wa.

¹⁰ Nɛ wa hã dɔ̃lɔ̃ li hã lɛ wena. Nɛ 'da fala lɛ nɛa we kũ kɔ masua we la nɛ ni, nɛ wa hã omɛnɔ kɛ ma wia we gala lɛ li wala gɛnɛ 'da lɛ ni hã lɛ.

Polo hɔa tɛ Roma

¹¹ Lɛ ɔa tɛ Maltɛ zɛkɛ talɛ, nɛ lɛ la do mbe masua ma yula zi Alɛkzandn, nɛ ma ɔa tɛ ngolo lì ni we 'bɔ na zɔlɔ gɛɛ e. Wa sa zi li masua ni na: “Ogale be dã.”

¹² Nɛ lɛ nɛa, nɛ lɛ hɔ kɔ le Sirakuzɛ. Nɛ lɛ ɔa di ni tũ talɛ.

¹³ Nɛ lɛ yolo di ni, nɛ lɛ ngbɛlɛ do nu kolo lì, nɛ lɛ hɔ kɔ le Regio. Nɛ fala nɛa we sa nɛ, nɛ lɛ la. Nɛ bũ yula si ba gɔtɔ, nɛ ma fi, nɛ ma gala lɛ, nɛ lɛ ɔa sanga tũ bɔa iko, nɛ lɛ hɔ kɔ le Puzɔlɛ.

¹⁴ Nɛ lɛ kpa ngba lɛ do ombe wi Kristonɔ di ni ni, nɛ wa tɔ̃ hã lɛ na, lɛ ɔ mbe do lo pɔsɔ kpo sɛ. Tɛlɛ tɛ kɛ lɛ nɛa zi dɛ Roma i gɛ a ni.

¹⁵ Kɔ Owi Kristonɔ tɛ Roma, wa nɛa we zele sakoe 'da Polo na a tɛa ni, nɛ wa kulu ngɔ, nɛ wa gɔnɔ dati lɛ gbaa, nɛ wa kpa lɛ tɛ ngɔ zando Apiusi. Nɛ ombe wa kpa lɛ tɛ le li nɛ a “Talɛ Tɔa Gɛnɛ” ni. Kɔ Polo nɛa we zɔ wa li wala i, nɛ a hã iɔ̃nae hã Gale, nɛ tɛ a nganda.

Polo bia we tɛ Roma

¹⁶ Lɛ hɔa Roma i, nɛ wa hã wala hã Polo na, a ɔ dɛ fala kɛ zã a kɔ̃a ni. Nɛ wa ia soda kpo we zɔ mɔ tɛ a.

¹⁷ Polo nɛa we ɔ tũ talɛ, nɛ a sa mɔ hã onwa Yudanɔ. Wa tɛa, nɛ a tɔ̃ hã wa na: “Onyae, mi dɛ̀ 'dã mɔ do owinɔ 'da lɛ gɔ, nɛ mi gbìnì 'bɔ mbula do oyaa lɛ gɔ. Gɛnɛ kɔ na mɛ ni, wa ba mi tɛ Yeruzalɛmɛ i, nɛ wa hã mi hã Oroma.

¹⁸ Nɛ Oroma wa aka mi, nɛ wa zila gulu we 'da mi vɛ. Nɛ wa kɔ̃a zi we da kɔ̃ wa tɛ mi, we kɛ wa kpà mi do 'dã mɔ kɛ wa wia we gbɛ mi we nɛ ni gɔ.

¹⁹ Nɛ nde Oyudanɔ wa bɛa. Nɛ mi zɔa na, fo mbé mɔ dɛ dɛa bina, ma kɛ mi kɔ̃a zi na, wa tombo mi gbaa i nga, kɔ mi tɔ̃ gulu we 'da mi dati gã nwa ngɔ nù Roma nga ni. Nɛ nde mi kɔ̃̀ we da onya mi be Yudanɔ gɔ.

²⁰ Ma kɛ mi sa mɔ hã nɛ na, mi tɔ̃ gulu nɛ hã nɛ ni. Mba gɔ, wa ɛnza nu kɔ̃ mi do dɔkpɔnɔ gɛ, we duzu wi kɛ obe Israɛlɛ wa gbini zã wa do a na, a tɛ sɛ ni.”

²¹ Nɛ wa gese hã a na: “Owinɔ Yude i wa tòmbò mbe mbɛti ngɔ we 'da mɔ hã lɛ gɔ. Nɛ mbe nya lɛ kpo yòlò i mɔ, kɔ a tɔ̃ we 'da mɔ, tabi we 'dã mɛ mɔ dɛa ni hã lɛ gɔ.

²² Kɔ lɛ kɔ̃a we zele mbe linggamɛ 'da mɔ! We kɛ lɛ ĩ na, tɛ falanɔ vɛ, owinɔ wa ba kafi sambala 'da nɛ wena.”

²³ Nɛ wa wia 'bɔ mbé kɔ̃ tũ hã Polo na, wa wele we do a. Nɛ do kɔ̃ tũi ni, owinɔ wa tɛa 'da Polo nga dɛlɛ la ngɔ wanɔ zi dati ni. Nɛ wa wila we yolo titole gbaa gɛa wese. Nɛ Polo tɔ̃a gulu dɛa to nwa 'da Gale hã wa. Nɛ a tɔlɔ 'buku mbula 'da Mɔizɛ, do 'bukunɔ 'da Owi gba olo nu Gale hã wa. Nɛ yolo dɛ ngɔ wenɔ kɔ 'bukunɔ ni, nɛ a fa na, wa kɔ̃ gɛnɛ we 'da Yezu na, a a Mɛsiya.

²⁴ Nɛ ombe wa kɔ̃a, nɛ ombe wa bɛ.

²⁵ Kɔ wa nɛa we kulu ngɔ we la nɛ, nɛ wa zèlè ngba wa gɔ. Nɛ Polo tɔ̃ 'bɔ hã wa na: “We kɛ Hi Wi Santo tɔ̃a zɛ́ hã oyaa nɛ do wala 'da Ezai, wi gba do nu Gale ni, mɛ a gbãlã we. A tɔ̃a zɛ́ na:

²⁶ ‘Mɔ nɛ́ 'da owinɔ gɛ, kɔ mɔ tɔ̃́ hã wa na: Gɛnɛ kɔ nɛ gɛ zala nɛ gbaa, nɛ nde nɛ zélé sɛ mɔ kpo gɔ. Gɛnɛ kɔ nɛ 'du li nɛ gbaa, nɛ nde nɛ zɔ́ sɛ mɔ gɔ.

²⁷ We duzu kɛ winɔ gɛ, wa nganda sila wa na, da dɛ kɔ lo ĩ́ ti gulu mɔ kpo gɔ. Nɛ wa kpia zala wa na, da dɛ kɔ lo zélé we gɔ. Wa umu li wa na, da dɛ kɔ lo zɔ́ mɔ gɔ. Wa dɛa na mɛ ni na, da dɛ kɔ lo síkí li lo dɛ 'da mi, kɔ mi kpasa lo gɔ. Gale tɔ̃a ní.’ ”

²⁸ Nɛ Polo tɔ̃a 'bɔ hã wa na: “Nɛ ĩ́ na, Gale tombo to we kpasa ogele nu fɛlɛ kulanɔ kɛ wa a Oyuda gɔ ni, nɛ winɔ ni wa zele sɛ.” [

²⁹ Polo tɔ̃a wenɔ ni hã wa do'do, nɛ wa kulu ngɔ, nɛ wa ma ngɔ si ma, tɛ ba kafi nu ngba wa nganda wena.]

³⁰ Polo ɔa zi dɛ Roma ni sabɛlɛ bɔa dɛ kɔ futa tɔa. Nɛ a kɔ̃a zi gɛnɛ winɔ vɛ́, kɛ wa tɛ zi 'da a we zɔ a ni.

³¹ A bia zi gulu dɛa to nwa 'da Gale, do gulu wenɔ 'da Nwa Yezu Kristo hã wa. Nɛ a dɛ zi ma do kɔ̃a zã vɛ, nɛ fo zi wi amba a bina.