Owi Nɛ Tonɔ 26 - WE NU GALE 1995

Polo tɔ̃a gulu we 'da a dati Agripa

¹ Nɛ Agripa tɔ̃ hã Polo na: “Mi hã wala hã mɔ, mɔ tɔ̃ gulu we 'da mɔ.” Nɛ Polo we kɔ̃ ɛ hã winɔ, nɛ a tɔ̃ na:

² “Nwa Agripa, mi do yangga wena, tɛ kɛ mɔ hã wala hã mi na, mi hɔ dati mɔ, nɛ mi tɔ̃ gulu wenɔ kɛ Oyudanɔ wa da do mi ni hã mɔ ni.

³ Mba gɔ, mɔ ĩ ti gulu mɔ do yaa Oyudanɔ de wena, nɛ mɔ ĩ 'bɔ ti gulu ba kafinɔ 'da wa vɛ. Kɔ mi aka mɔ na, mɔ ɔ́ do du sila we zele mi.

⁴ “Oyudanɔ vɛ wa ĩ ti tɛlɛ tɛ dungi 'da mi yolo do be tɛ mi. Wa ĩ ti kɛ mi gã nɛ dɛ sanga owinɔ 'da mi, do tɛ Yeruzalɛmɛ ni.

⁵ Wa ĩ gulu mi de wena, nɛ wa wia we kɔ̃ na, mi zi sanga Ofariziɛnɔ, kɛ wa dɛ mbula 'da Mɔizɛ nɛ ngɔ tala Oyudanɔ vɛ ni.

⁶ Kɔ sɔɛ gɛ, wa ia mi li ngbangga, we kɛ mi ia sila mi ngɔ mbuli kɛ Gale kpua zi hã oyaa lɛ ni.

⁷ Nɛ mɛ a kpo kpo mbuli kɛ nu kpala lɛ 'bu ngɔ wa bɔa ni, wa ia sila wa ngɔ nɛ na, Gale a dɛ sɛ ma kpa li wa ni. Nɛ wa tɛ dɔnggɔ a we nɛ tũ do gba wese. Kɔ aa nwa, we kɛ mi tɛ e sila mi ngɔ wenɔ ni, ma kɛ Oyudanɔ wa da mi gɛ.

⁸ Kɔ gulu kɛ nɛ, Oyudanɔ gɛ, nɛ wè tɛ kɔ̃ na, Gale tunu owinɔ kɛ wa fia ni tunu gɔ we ge nde?

⁹ “We mi, mi kɔ̃a zi we dɛ do walanɔ vɛ na, winɔ wa tɛ kɔ̃̀ zu li Yezu, wi Nazarɛtɛ ni gɔ.

¹⁰ Nɛ mi ndua zi dɛ na mɛ ni tɛ Yeruzalɛmɛ i. Nɛ onwa nganganɔ wa hã wala hã mi, nɛ mi a owinɔ wa kɔ̃a zu li Yezu ni bɔlɔkɔ. Kɔ wa 'bili we 'da winɔ ni na, wa wia do fio nde, nɛ mi kɔ̃ iko.

¹¹ Mi nɛ zi kɔ tɔa mbulanɔ 'do ngbɛ ɛ do 'do ngbɛ ɛ, nɛ mi hã zi zɛlɛ tɛ hã wa, nɛ mi dɛ nganda wena na, wa kafa Yezu. Zã mi nɔ̃lɔ̃ zi dɛ tɛ wa wena, ma kɛ mi nɛ zi 'dɔkɔlɔ wa gbaa kɔ gele lenɔ, nɛ mi zɛlɛ tɛ wa.

Polo tɔ̃a tɛlɛ tɛ kɛ a kifi do sila a ni

¹² “Nɛ mi aka zi onwa nganganɔ, nɛ wa kɔma mbɛti, nɛ wa hã wala hã mi na, mi nɛ Damasi i.

¹³ Aa nwa, mi nɛa, nɛ mi 'bana dɛ li wala, nɛ nde wese hɔa gbogbo zu wi, nɛ mi zɔ yele ngbala ma yula li nza i, nɛ ma yele nganda nɛ ngɔ tua wese. Nɛ ma yila zĩ lɛ, do ongba mi kɛ lɛ do wa ni takpa.

¹⁴ Nɛ lɛ ala nù vɛ, nɛ mi zele gɛlɛ wele tɛ tɔ̃ hã mi do Aramenyɛ na: ‘Saulo! Saulo! Gulu kɛ mɔ zɛlɛ tɛ mi ní we ge nde? Mɔ ĩ́ na, mɔ dɛ dɛ tɛ mɔ wele nɛ, ɔ nɛ bata wa kpua fɛlɛ gɛlɛ a, nɛ a bɛ̃ we la do wele a, nɛ a kpa zɛlɛ tɛ ni.’

¹⁵ Nɛ mi aka na: ‘Nwa, mɔ a wio nde?’ Nɛ Nwa gese hã mi na: ‘Wi a mi Yezu, kɛ mɔ zɛlɛ tɛ a ni.

¹⁶ Kɔ mɔ kúlú ngɔ, hã mɔ yolo do nyanga mɔ. Mi bia tɛ mi hã mɔ, takɔ mi e mɔ do wi toe 'da mi. Mɔ sɛ a temɔɛ 'da mi sanga Owele we tɔ̃ tɛlɛ tɛ kɛ mɔ zɔa do mi sɔɛ gɛ ni hã wa. Nɛ mɔ tɔ̃ sɛ 'bɔ gulu mɛnɔ mi nɛ be sɛ hã mɔ do 'do ni hã wa.

¹⁷ Mi kpasa sɛ mɔ tambala kɔ̃ Oyudanɔ do ogele winɔ, kɛ mi nɛ tombo mɔ hã wa ni.

¹⁸ Mi tombo mɔ, takɔ mɔ hũi li winɔ na, wa hɔ nza kɔ tũ fala, kɔ wa le kɔ sa fala. Mɔ fo sɛ winɔ kɔ ngawi 'da Satana, nɛ mɔ kã wa dɛ 'da Gale, nɛ wa kɔ̃ zu li mi Yezu. Nɛ Gale a fo sɛ ku'da 'dã mɛnɔ zu wa, nɛ a a wa sanga owinɔ 'da a.’

Polo tɔ̃a gulu dɛa toe 'da ɛ

¹⁹ “Na mɛ ni, nwa Agripa, mi bè gɔ. Mi nɛa we tɔ̃ gulu mɛnɔ kɛ Nwa bia hã mi, nɛ ma yula U nza i ni.

²⁰ Nɛ mi ndua be we nu Gale hã owinɔ tɛ Damasi, do Yeruzalɛmɛ. 'Do nɛ, mi bia 'bɔ ma hã Owi ngɔ nù Yude vɛ, do ogele winɔ vɛ. Mi tɔ̃a zi hã wa na, wa kifi sila wa, nɛ wa kpolo tɛ wa dɛ 'da Gale, nɛ wa dɛ́ de dɛa mɔ we be na, wa kifi sila wa gbãlã we ni.

²¹ Kɔ we duzu wenɔ mi bia ni, ma kɛ Oyudanɔ wa ba zi mi kɔ Tɛmpɛlo i, nɛ wa fa we gbɛ mi ni.

²² Nɛ nde Gale kpasa mi ti kɔ̃ wa gbaa tia do sɔɛ gɛ. Ma kɛ mi tɔ̃ gulu nɛ hã winɔ vɛ, Owi kpamɛnɔ do Owi sãnɔ ni. Nɛ we mi tɔ̃ gɛ, mɛ a kpo kpo wenɔ kɛ Mɔizɛ, do Owi gba olo nu Gale wa tɔ̃a zi na, ma hɔ sɛ ni.

²³ Wa tɔ̃a zi na, Mɛsiya a zɔ sɛ ngamɔ, nɛ a fe sɛ. Nɛ a sɛ a kuti wi kɛ Gale a tunu sɛ a kɔ fio, takɔ a tɔ̃ hã Oyudanɔ, do ogele winɔ na, sa fala sa kɔ tũ fala ia, kɔ Gale a kpasa wa.”

Polo kɔ̃a na Agripa kɔ̃ zu li Yezu

²⁴ Kɔ Polo tɛ tɔ̃ kɛ 'da a ni, nɛ Fɛstusi he mɔ zu a na: “Aa Polo! Bɔ zu mɔ nde? Mɔ yambala mbɛti fai, nɛ ma fi bɔ zu mɔ do'do!”

²⁵ Nɛ Polo gese hã a na: “Gã wi 'da mi, bɔ zu mi bina. Wenɔ kɛ mi tɔ̃ ma gɛ, mɛ a gbãlã we, mɛ a lɛnggɛ nu wi bɔ gɔ.

²⁶ Nwa Agripa a ĩ ti wenɔ ni de wena, nɛ mi wia we tɔ̃ hã a do kpã sila vɛ. Mba gɔ, mi ĩ na, a ĩ ti gulu wenɔ mi tɔ̃ gɛ vɛ, we kɛ ma dɛ̀zi tɛ ɛ do usu nɛ gɔ.

²⁷ Kɔ nwa Agripa, mi aka mɔ na, mɔ kɔ̃a gɛnɛ wenɔ kɛ Owi gba olo nu Gale wa tɔ̃a zɛ́ ni nde? Mi ĩ na mɔ kɔ̃ kɔ̃a!”

²⁸ Nɛ Agripa gese hã Polo na: “Mɔ lengge na, be lɛnggɛ mɔ tɔ̃a gɛ wia we kifi linggamɛ 'da mi, nɛ mi hɔ wi Kristo dɔ̃ iko nde?”

²⁹ Nɛ Polo gese hã a na: “Mi aka Gale we mɔ, do we owinɔ kɛ wa tɛ zele mi ni na, ngangga ni, tabi do 'do, nɛ nɛ ɔ sɛ nɛ mi ni. Nɛ nde mi tɔ̃̀ gɛ na, nɛ hɔ Owi bɔlɔkɔ nɛ́ mi ni gɔ!”

³⁰ Nɛ nwa Agripa do Fɛstusi, do Berenisɛ, do tala winɔ vɛ wa tɛa do wa ni, wa kulu ngɔ.

³¹ Nɛ wa ngbɔ tɛ wa dɛ 'do, nɛ wa tɔ̃ hã ngba wa na: “Wi gɛ a dɛ̀ mbe 'dã mɔ kpo kɛ ma wia na, wa fi a bɔlɔkɔ, tabi wa gbɛ a we nɛ ni gɔ.”

³² Nɛ Agripa tɔ̃ hã Fɛstusi na: “Ɔ do kɛ wi gɛ tɛ tɔ̃̀ sɔ na, ɛ kɔ̃a we hɔ dati gã nwa ngɔ nù Roma i gɔ, nɛ wa da sɔ kɔ̃ wa tɛ a iko.”