Owi Nɛ Tonɔ 25 - WE NU GALE 1995

Polo kɔ̃a we tɔ̃ gulu we 'da a dati gã nwa ngɔ nù Roma

¹ Fɛstusi hɔa ngɔ nùi kɛ wa ia a do nwa ngɔ nɛ ni, nɛ olo nɛ la tũ talɛ, nɛ a yolo Sezare, nɛ a nɛ Yeruzalɛmɛ.

² A hɔa i mɔ, nɛ onwa nganganɔ do onwa Yudanɔ, wa tɛ dati a, nɛ wa da Polo. Nɛ wa aka Fɛstusi na,

³ a kɔ̃, nɛ a gese Polo dɛ Yeruzalɛmɛ nga. Wa aka a ni, we kɛ wa ba zi zã zu gbɛ Polo dɛ sanga wala.

⁴ Nɛ Fɛstusi gese hã wa na: “Tolo 'bana kɔ bɔlɔkɛ tɛ Sezare i. Kɔ ɔ nɛ kɛ mi nɛ kpolo tɛ mi kpula ni,

⁵ ma wia na lɛ nɛ do nwanɔ 'da nɛ Sezare i. Kɔ fala kɛ wi ni dɛa tabi 'dã mɔ nde, sɛ nɛ wa ĩ ti da a de.”

⁶ Nɛ Fɛstusi ɔa zi 'da wa ni ɔ nɛ tũ ngbɛ'dɛ'dɛ, tabi tũ 'bu ni, nɛ a kpolo tɛ a dɛ Sezare i. A hɔa i mɔ, nɛ fala sa, nɛ a nɛ kɔ tɔa 'bili we, nɛ a tombo na, wa tɛ do Polo.

⁷ Kɔ Polo hɔa, nɛ Oyudanɔ kɛ wa yula Yeruzalɛmɛ i ni, wa ngbolo dɛ kɛ zã a, nɛ wa ma ngɔ kala owe dɛ ngɔ a kpi do kpi. Nɛ nde fo zi mɔ kɛ ma be na, wenɔ ni a gbãlã we ni bina.

⁸ Nɛ Polo tɔ̃ tɛ mɛ 'bɔ kɛ 'da a na: “Mi gbìnì mbula 'da Yudanɔ kpo gɔ. Mi dɛ̀ 'dã mɔ kɔ Tɛmpɛlo gɔ. Nɛ mi gbìnì mbula 'da gã nwa ngɔ nù Roma gɔ.”

⁹ Nɛ we kɛ Fɛstusi kɔ̃a we de li Oyudanɔ ni, nɛ a aka Polo na: “Mɔ kɔ̃a na, mɔ nɛ Yeruzalɛmɛ i, kɔ wa 'bili we 'da mɔ dɛ li mi nde?”

¹⁰ Nɛ Polo gese hã a na: “Ngangga ni, mi a kɔ tɔa 'bili we 'da gã nwa ngɔ nù Roma. Kɔ ma wia na, wa 'bili we 'da mi do 'da mbula 'da Oroma. Mɔ ĩ de wena na, mi dɛ̀ 'dã mɔ dɛ 'da be Yuda kpo gɔ.

¹¹ Kɔ fala kɛ mi gbini mbula, tabi mi dɛa mɔ kɛ ma wia na, wa gbɛ mi we nɛ ni nde, nɛ nde mi bɛ̃́ sɛ gɔ. Kɔ fala kɛ Oyudanɔ wa da mi do bɛlɛ nde, nɛ nde wele wé sɛ we 'dɔlɔ mi hã wa gɔ. Nɛ mi kɔ̃ sɛ na, gã nwa ngɔ nù Roma 'bili we 'da mi.”

¹² Fɛstusi nɛa we zele ni, nɛ a wele we do owinɔ kɛ wa tɔ̃ mbula hã a ni, nɛ a gese hã Polo na: “Nɛ́ kɛ mɔ kɔ̃a na, gã nwa 'bili we 'da mɔ ni, mɔ nɛ sɛ dati a.”

Polo hɔa dati Agripa do Berenisɛ

¹³ Nɛ 'da fala mbe nɛ, nɛ nwa Agripa do boko nya a Berenisɛ, wa tɛa we fana Fɛstusi.

¹⁴ Nɛ 'do wa nyɛ̀lɛ̀ zi i mɔ tũ dɔ gɔ, nɛ Fɛstusi tɔ̃a we 'da Polo hã Agripa na: “Mɔ zélé mbe we gɛ! Feliksi la zi mbe wele dɛ tɔa bɔlɔkɔ gɛ.

¹⁵ Nɛ 'da fala kɛ mi nɛa zi tɛ Yeruzalɛmɛ i ni, nɛ onwa nganganɔ do okumu 'da Oyudanɔ, wa da a, nɛ wa kala we dɛ ngɔ a wena, nɛ wa aka mi na, mi 'bili 'dã we hã a.

¹⁶ Nɛ mi gese hã wa na, mbula 'da Oroma tɔ̃a na, wa 'bílí we mɔ́ wele do olo a gɔ. Ma wia na, a ɔ boe, kɔ a wele tɛ mɛ 'bɔ kɛ 'da a vɛ, sɛ nɛ wa 'bili we de.

¹⁷ Nɛ wa tɛa do mi i nga. Nɛ fala nɛa we sa nɛ, nɛ mi dà'bà tɛ mi gɔ, mi nɛa kɔ tɔa 'bili we, nɛ mi tombo na, wa tɛ do wi ni.

¹⁸ Nɛ ongba a wi tɔ̃ ngbangganɔ wa hɔa, nɛ nde wa dà a do wenɔ kɛ mi lingga na, wa nɛ da do a ni gɔ.

¹⁹ Wa ba zi a kafi nu ngba wa do tɛlɛ tɛ kɛ wa dɔnggɔ do Gale 'da wa ni iko. Nɛ wa tɔ̃a ngɔ mbe wele kpo, li a a Yezu, kɛ a fia zi ia, kɔ Polo na, a do tunu li a ni.

²⁰ Kɔ mi ĩ̀ zi ti tɛlɛ tɛ kɛ mi nɛ gɔnɔ do we gɔ. Ma kɛ mi aka Polo na, fala kɛ a kɔ̃, nɛ a nɛ Yeruzalɛmɛ i, takɔ wa 'bili we 'da a i mɔ.

²¹ Nɛ nde Polo aka na, ɛ 'bana dɛ kɔ bɔlɔkɛ, kɔ gã nwa ngɔ nù Roma 'bili we 'dɛ ɛ. Nɛ mi ba nu mi na, a 'bana dɛ kɔ bɔlɔkɛ gbaa, hã mi kpa fala, nɛ mi tombo a hã gã nwa.”

²² Nɛ Agripa tɔ̃ hã Fɛstusi na: “Mi kɔ̃a tɛ mɛ 'bɔ na, mi zele mbe a sɛ.” Nɛ Fɛstusi na: “Bindɛ nɛ mɔ zele sɛ a.”

²³ Fala nɛa we sa nɛ, nɛ Agripa do Berenisɛ, wa 'dafa tɛ wa de wena, nɛ wa nɛa do dɔ̃lɔ̃ li gbaa dɛ kɔ tɔa 'bili we i. Wa zi fala nɛ kpo do onwa sodanɔ, do ogã winɔ kɔ le ni. Nɛ Fɛstusi tumba na, wa tɛ do Polo. Wa tɛa do a,

²⁴ nɛ Fɛstusi tɔ̃ na: “Nwa Agripa, do nɛ vɛ kɛ nɛ tɛa ni, nɛ zɔ́ wi gɛ! Oyudanɔ tɛ Yeruzalɛmɛ i vɛ, do wanɔ dɛ gɛ, wa da zi a dati mi, nɛ wa tɛ he mɔ na, a wia do fio.

²⁵ Nɛ nde mi kpà mɔ kɛ ma wia na a fe we nɛ ni gɔ. Kɔ ɔ nɛ kɛ a ngboo a aka na, gã nwa ngɔ nù Roma 'bili we 'dɛ ɛ ni, mi kɔ̃a we tombo a hã a.

²⁶ Nɛ nde mi tɛ kpà we ngboo mi nɛ kɔmɔ ngɔ a hã gã nwa ni gɔ. Ma kɛ mi ia a dati nɛ, nɛ nde wena dati mɔ nwa Agripa, takɔ mɔ aka a, sɛ nɛ mi kpa we mi nɛ kɔmɔ ma ni de.

²⁷ We kɛ mi lengge na, wa nɛ tombo wi bɔlɔkɔ hã gã nwa ngɔ nù Roma, nɛ wa be gulu we wa da do a ni sɛ. Kɔ wa dɛ̀ ni gɔ, nɛ nde ma wè gɔ.”