Owi Nɛ Tonɔ 24 - WE NU GALE 1995

Oyudanɔ wa da Polo

¹ Olo nɛ la tũ mɔlɔ, nɛ gã nwa nganga Ananiasi, do okumu 'da Oyudanɔ, do mbe wi tɔ̃ we ngɔ wele 'da fala ngbangga, li a a Tɛrtilusi, wa nɛa tɛ Sezare i. Nɛ wa nɛ dati Feliksi we da Polo.

² Nɛ Feliksi sa mɔ hã Polo, nɛ Tɛrtilusi ma ngɔ tɔ̃ dɛ ngɔ a na: “Gã wi 'da mi, mi dɔ́nggɔ́ mɔ wena, we kɛ mɔ a mɔ dɛa na, le 'da lɛ kpa dungu fio. Nɛ mɔ 'dafa nùi 'da lɛ vɛ̃ do dia hã zã 'da mɔ.

³ Ma kɛ lɛ tɔ̃ de we 'da mɔ falanɔ vɛ, nɛ lɛ dɔnggɔ mɔ fai we dia mɛnɔ mɔ dɛa hã lɛ ni.

⁴ Nɛ nde mi kɔ̃̀ we 'danga sa 'da mɔ wena gɔ, ma kɛ mi aka mɔ na, mɔ be dia kɔ sila hã mi, kɔ mɔ zele mi bi sĩ sɛ.

⁵ Lɛ zɔa na, wi gɛ a sɔkpɔ 'dã wele ngboo. A 'danga zu Oyudanɔ ngɔ nù gɛ vɛ, nɛ a 'bɔ a mbe sanga onwa ngɔ winɔ, wa nɛ 'dɔkɔlɔ wi Nazarɛtɛ ni.

⁶ Nɛ a yamba 'bɔ we faka Tɛmpɛloe 'da lɛ. Ma kɛ lɛ ba a gɛ. [Nɛ lɛ kɔ̃a zi we 'bili we 'da a do 'da mbula 'da lɛ,

⁷ nɛ Liziasi, gã wi ngɔ sodanɔ bɛa, nɛ a amba zu a do nga nɛ, nɛ a ba a kɔ̃ lɛ.

⁸ Nɛ Liziasi ba nu ɛ hã owinɔ kɛ wa da a ni na, wa tɛ kɔ wa da a 'da mɔ nga.] Kɔ mɔ aka Liziasi ngboo, sɛ nɛ mɔ ĩ sɛ ti gbãlã we kɛ lɛ da do a ni de.”

⁹ Nɛ Oyudanɔ di ni ni, wa yula 'do we ni, nɛ wa tɔ̃ na, ma ngboo hã ni.

Polo tɔ̃a gulu we 'da a dati Feliksi

¹⁰ Nɛ Feliksi we kɔ̃ ɛ hã Polo na, a tɔ̃ kɛ 'da a. Nɛ Polo tɔ̃ hã a na: “Mi ĩ na, mɔ ɔa tɛ to 'bili we 'da winɔ gɛ sabɛlɛ dɛlɛ wena. Ma kɛ mi do yangga we tɔ̃ gulu we 'da mi hã mɔ.

¹¹ Mɔ wia we aka olo mi, nɛ mɔ ĩ sɛ na, mi hɔa zi Yeruzalɛmɛ i we dɔnggɔ Gale, nɛ 'do nɛ tɛ là tũ 'bu ngɔ nɛ bɔa gɔ.

¹² Nɛ wa kpà mbe mi fala kpo tɛ mɔ̃lɔ̃ do wele kɔ Tɛmpɛlo i gɔ. Mi mù mbe owinɔ kɔ tɔa mbula, tabi gele fala kɔ le gɛ na, wa dɛ balia gɔ.

¹³ Nɛ winɔ gɛ, wa wè tɛ be mɛ wa da mi we nɛ ni dɛ nza gɔ.

¹⁴ Nɛ nde mɛ a gbãlã we na, mi dɔnggɔ Gale 'da oyaa lɛ, do wala 'da Nwa Yezu kɛ wa tɔ̃a na, mɛ a yia wala iko ni. Nɛ wenɔ vɛ kɛ wa kɔma ma kɔ 'buku mbula 'da Mɔizɛ, do kɛnɔ 'da Owi gba olo nu Gale ni, mi kɔ̃a gɛnɛ nɛ.

¹⁵ Nɛ mi gbini zã mi do Gale, kpasaa ɔ nɛ kɛ 'da winɔ gɛ. Lɛ do wa lɛ lengge na, Gale a dɛ sɛ na owinɔ vɛ, odia winɔ tabi o'dã winɔ wa za'da nza kɔ fio.

¹⁶ Ma kɛ mi dɛ nganda wena na, mi ɔ wi bɔlɔ zu dati Gale do dati owinɔ fai ni.

¹⁷ “Ma la zi sabɛlɛ dɛlɛ wena, mi hɔ́ zi 'bɔ Yeruzalɛmɛ i gɔ. Nɛ ngangga gɛ, mi nɛa i mɔ do mbili, takɔ ma gala owinɔ 'da mi Oyudanɔ, nɛ mi hã 'bɔ mbe do dɔnggamɔ hã Gale.

¹⁸ Gulu nɛ a wa kpa zi mi kɔ Tɛmpɛlo i ni. Mi nɛa zi na, wa fɔlɔ mi hã mi hɔ sa wi li Gale, ɔ nɛ kɛ mbula 'da lɛ tɔ̃a ni. Nɛ nde mi nɛ̀ zi do ogba gili wele gɔ, nɛ fo zi 'bɔ kpawe bina.

¹⁹ Nɛ ombe Yudanɔ kɛ wa yula ngɔ nù Azi i ni, wa zi boe. Kɔ mi dɛ sɔ 'dã mɔ nde, nɛ wi a wa hã wa nɛ da sɔ mi hã mɔ.

²⁰ Kɔ ni gɔ, nɛ winɔ gɛ wa wia zi we tɔ̃ gulu 'dã mɛ wa kpa do mi ni, 'da fala wa ia zi mi dati Owi 'bili wenɔ ni.

²¹ Tabi wa da mi we be lɛnggɛ kɛ mi yula zi dati wa, nɛ mi tɔ̃ dɛ ngɔ na: ‘Wa kũ we dɛ tɛ mi sɔɛ gɛ, we kɛ mi gbini zã mi do Gale na, a tunu sɛ ofionɔ kɔ fio ni.’ ”

²² Polo wila ni gbaa, kɔ a nɛa we fi nu a nù, nɛ Feliksi, kɛ a ĩ zi ti bia we 'da Yezu wena ni, a tili ngba soe 'bili we 'da Polo dɛ dati. Nɛ a tɔ̃ hã a na: “E kɔ Liziasi, gã wi ngɔ sodanɔ tɛ do'do, sɛ nɛ mi 'bili we 'da mɔ de.”

²³ Nɛ a tɔ̃ hã wi ngɔ sodanɔ, kɛ a zɔ mɔ tɛ Polo kɔ bɔlɔkɛ ni na, wa dá mbe li wa ngɔ a do'do, nɛ wa hã́ mbe wala hã ongba a na, wa tɛ we gala a.

Polo hɔa dati Feliksi do Druzilɛ

²⁴ Olo nɛ là tũ dɛlɛ gɔ, nɛ Feliksi tɛa, fala nɛ kpo do wuke 'da Druzilɛ, kɛ a zi a boko Yuda ni. Nɛ Feliksi tombo na, wa tɛ do Polo. Nɛ Polo tɛa, nɛ a tɔ̃ we kɛ wele wia do kɔ̃ zu li Yezu ni hã wa.

²⁵ Kɔ Polo nɛa we tɔ̃ tɛlɛ tɛ kɛ wele wia we dɛ bɔlɔ zu dɛa mɔ, nɛ a kunu sila a, do tɛlɛ tɛ kɛ Gale nɛ 'bili sɛ do ngbangga 'da winɔ ngɔ nù gɛ ni, nɛ kili ba Feliksi do'do. Nɛ a tɔ̃ hã Polo na: “Ma wia, mɔ sí! Mi kpa 'da fala, sɛ nɛ mi sa sɛ mbé mɔ hã mɔ de.”

²⁶ Nɛa gbini zi zã a na, Polo a hã sɛ mbili hɛ̃ ɛ. Ma kɛ a sa zi mɔ hã a 'do ngbɛ ɛ do 'do ngbɛ ɛ we wele we do a ni.

²⁷ Ma nɛa we la sabɛlɛ bɔa, nɛ Oroma wa saka Pɔrsiusi Fɛstusi olo Feliksi. Nɛ Feliksi nɛa we la nɛ, nɛ a la Polo dɛ kɔ bɔlɔkɛ ni, takɔ ma de tɛ Oyudanɔ.