Owi Nɛ Tonɔ 23 - WE NU GALE 1995

¹ Wa tɛa do Polo, nɛ a soko mɔ dɛ li Owi 'bili wenɔ ni gbo gbo gbo, nɛ a tɔ̃ hã wa na: “Onyae, kɔ dungi 'da mi ngɔ nùi gɛ vɛ, mi ba tɛ mi hã Gale, nɛ mi dɛ̀ mbe mɔ kpo kɛ ma wia we yɛkɛ sila mi ni gɔ.”

² Nɛ gã nwa nganga Ananiasi ba nu a hã winɔ kɛ zã Polo ni na, wa zɛ nu a.

³ Nɛ Polo siki tɛ a, nɛ a tɔ̃ hã a na: “Gale a zɛ sɛ mɔ olo kɛ mɔ zɛa mi ni. Mɔ ɔ nɛ ɛa tɔa kɛ wa zɛa mbu tɛ nɛ ni! Mɔ nɛ 'bili we 'da mi do 'da mbula, nɛ nde mɔ wele nɛ, mɔ gbini mbula, we kɛ mɔ ba nu mɔ hã winɔ na, wa zɛ mi.”

⁴ Nɛ winɔ kɛ zã Polo ni, wa tɔ̃ hã a na: “Mɔ dã gã nwa nganga 'da Gale nde?”

⁵ Nɛ Polo gese hã wa na: “Onyae, mi ĩ̀ sɔ na, a a gã nwa nganga gɔ. We kɛ wa kɔma kɔ 'Buki 'da Gale na: ‘Mɔ tɛ wèlè 'dã we hã nwa ngɔ winɔ 'da mɔ gɔ.’ ”

⁶ Polo ĩ zi na, Owi 'bili wenɔ wa gɔnɔ sanga tɛ ngba wa bɔa. Ombe nɛ wa a Osadisiɛ, nɛ ombe a Ofariziɛ. Ma kɛ a hia mɔ dɛ sanga wa ni na: “Onyae, nɛ zɔ́ mi gɛ a Fariziɛ̃, nɛ obaa mi wa zi a Ofariziɛ. Ma kɛ wa kũ we dɛ tɛ mi, we kɛ mi gbini zã mi do Gale na, a tunu sɛ ofionɔ kɔ fio ni!”

⁷ A nɛa we tɔ̃ na mɛ ni, nɛ Fariziɛnɔ do Sadisiɛnɔ wa ma ngɔ ba kafi nu ngba wa, nɛ sanga mba li ngba wi gɔna bɔa.

⁸ Mba gɔ, Ofariziɛnɔ wa gbini zã wa do Gale na, a tunu sɛ ofionɔ. Nɛ wa kɔ̃a 'bɔ na, oanzɛnɔ 'da Gale wa boe, do ohi wi wa boe. Nɛ nde Osadisiɛnɔ wa tɔ̃ na, fo mɛnɔ ni vɛ bina.

⁹ Nɛ wa ma ngɔ he mɔ gboo, nɛ ombe wi be mbulanɔ sanga Ofariziɛnɔ ni, wa kulu ngɔ, nɛ wa amba wa. Nɛ wa tɔ̃ do nga gɛlɛ na: “Lɛ zɔ̀ 'dã mɛ kɛ wi gɛ a dɛa ma ni gɔ. Mbe gɔ, nɛ nde hi wi tabi anzɛ tɔ̃a we hã a tɔ̃a!”

¹⁰ Nɛ wa mɔ̃lã nganda wena, nɛ kili ba gã wi ngɔ sodanɔ na, da dɛ kɔ wa ɛ̃́ sanga Polo gɔ. Ma kɛ a ba nu a hã sodanɔ 'da a na, wa le sanga winɔ, kɔ wa ba Polo, kɔ wa nɛ do a dɛ kɔ ngboe i.

¹¹ Nɛ tũi nɛa we tũ nɛ, nɛ Nwa Yezu hɔa 'da Polo, nɛ a tɔ̃ hã a na: “Mɔ ɔ́ do kpã sila! Ɔ nɛ kɛ mɔ bia we 'da mi tɛ Yeruzalɛmɛ gɛ, ma wia na, mɔ be 'bɔ tɛ Roma i.”

Oyudanɔ wa ba zã zu gbɛ Polo

¹² Kɔ fala nɛa we sa nɛ, nɛ ombe Yudanɔ wa ba zã zu gbɛ Polo. Nɛ wa kana tɛ wa na, lo nyɔ́ngɔ́ sɛ mɔ gɔ, nɛ lo nɔ́ sɛ lì gɔ gbaa na, lo gbɛ Polo do'do sɛ nɛ de.

¹³ Winɔ kɛ wa ba zi zã zu we ni, wa la ngɔ 'bu wele nalɛ.

¹⁴ Nɛ wa nɛa, nɛ wa kpa onwa nganganɔ do okumunɔ 'da Oyudanɔ, nɛ wa tɔ̃ hã wa na: “Lɛ kana tɛ lɛ na, lɛ nyɔ́ngɔ́ sɛ mɔ gɔ gbaa na, lɛ gbɛ Polo do'do sɛ nɛ de.

¹⁵ Kɔ ma wia na, nɛ, do Owi 'bili wenɔ, nɛ nɛ 'da gã wi ngɔ sodanɔ, nɛ nɛ ɔkɔlɔ a na, a tombo Polo hã nɛ, we kɛ nɛ kɔ̃a we zɔ 'bɔ we 'da a ngboo sɛ. Nɛ lɛ 'dafa sɛ we gbɛ a dɛ sanga wala i, dati kɛ na a hɔ i nga ni.”

¹⁶ Ĩ na, zagbãlã be 'da nya Polo, a zila ba zã zu we ni, nɛ a nɛ kɔ ngbo i, nɛ a tɔ̃ gulu nɛ hã Polo vɛ.

¹⁷ Nɛ Polo sa mɔ hã mbe wi ngɔ sodanɔ kpo, nɛ a tɔ̃ hã a na: “Mɔ ka be zagbãlã gɛ hã gã wi ngɔ sodanɔ, we kɛ a do lɛnggɛ we tɔ̃ hã a.”

¹⁸ Nɛ wi ngɔ sodanɔ ni kã be hã gã wi 'da wa, nɛ a tɔ̃ hã a na: “Wi bɔlɔkɛ li a a Polo ni tɔ̃a hã mi na, mi tɛ do be gɛ hã mɔ, we kɛ a do lɛnggɛ we tɔ̃ hã mɔ.”

¹⁹ Nɛ gã wi ni 'be nu kɔ̃ zagbãlã ni, nɛ wa ngbɔ tɛ wa do a dɛ 'do, nɛ a aka a na: “We mɔ kɔ̃a we tɔ̃ hã mi gɛ a ge nde?”

²⁰ Nɛ be gese na: “Okumu Yudanɔ wa kɔ̃a na, wa aka mɔ, kɔ bindɛ nɛ mɔ tombo Polo hã owi 'bili wenɔ, takɔ wa zɔ we 'da a ngboo sɛ.

²¹ Kɔ dɔ mɔ kɔ̃́ gɔ! We kɛ Owele la ngɔ 'bu wa nalɛ, wa usu sɛ tɛ wa, takɔ wa ba a. Nɛ wa kana tɛ wa na, lo nyɔ́ngɔ́ sɛ mɔ gɔ, nɛ lo nɔ́ sɛ mbamba lì gɔ gbaa na, lo gbɛ a do'do sɛ nɛ de. Kɔ ngangga ni, wa 'dafa we nɛ ia, kɔ wa 'bɔ di ni a gisa nu we 'da mɔ iko.”

²² Nɛ gã wi ngɔ sodanɔ ni mbua nu be na, dɔ a tɔ̃́ we a mbisa do ɛ ni hã wele gɔ, nɛ a gese a.

Wa tumba Polo hã Feliksi

²³ 'Do nɛ, nɛ gã wi ngɔ sodanɔ sa mɔ hã Owi ti a bɔa, nɛ a tɔ̃ hã wa na: “Nɛ ngɛ́mɛ́ li osoda kama bɔa, do Owi kũ ngɔ mbalata 'bu wa sambo, do owi da sɛlɛ kama bɔa. Nɛ nɛ 'dáfá tɛ nɛ, takɔ tũi gɛ, do sa kusi, nɛ nɛ nɛ́ do wa Sezare.

²⁴ Nɛ nɛ 'dáfá tɛ mɛ 'bɔ mbalata, takɔ Polo kũ sɛ ngɔ a, kɔ nɛ kã a do lɔa tɛ̃ a hã Feliksi, wi fɔmɔ le.”

²⁵ Nɛ a kɔmɔ mbɛti hã Feliksi na:

²⁶ “Wi a mi Klodɛ Liziasi, mi tumba balɛ hã mɔ Feliksi, gã wi 'da mi.

²⁷ Oyudanɔ wa ba zi wi gɛ, nɛ wa kɔ̃a we gbɛ a. Kɔ mi nɛa we ĩ na, a a be Roma ni, nɛ mi nɛa do osodanɔ 'da mi, nɛ mi amba zu a, nɛ mi ba a kɔ̃ wa do'do.

²⁸ Nɛ 'do nɛ, nɛ mi tumba a dati Owi 'bili we 'da Oyudanɔ, takɔ mi ĩ gulu mɛ wa da a we nɛ ni.

²⁹ Nɛ mi kpa na, wa da zi a ngɔ mbula 'da wa, nɛ nde wa kpà mɔ kpo kɛ ma wia na, wa fi a bɔlɔkɔ, tabi wa gbɛ a we nɛ ni gɔ.

³⁰ Kɔ di dɔ̃ ni, mi zila 'bɔ na, ombe Yudanɔ wa ba zã zu gbɛ a, ma kɛ mi tumba a hã mɔ ni. Nɛ mi tɔ̃a hã winɔ wa da a ni na, wa nɛ́, kɔ wa da a ti mɔ.”

³¹ Nɛ sodanɔ wa dɛa ɔ nɛ kɛ gã wi ngɔ wa tɔ̃a hã wa ni. Wa ba Polo, nɛ wa kã a do tũi ni gbaa, nɛ wa hɔ tɛ Antipatrisi.

³² Kɔ fala nɛa we sa nɛ, nɛ sodanɔ kɛ wa zi do nyanga wa iko ni, wa kpolo tɛ wa dɛ kɔ ngboe i, nɛ Owi kũ mbalatanɔ wa la do Polo dɛ Sezare.

³³ Wa hɔa i mɔ, nɛ wa hã mbɛti hã wi fɔmɔ le, nɛ wa la Polo dɛ kɔ̃ a.

³⁴ Nɛ wi fɔmɔ le tɔlɔ mbɛti, nɛ a aka Polo na: “Mɔ a wi ngɔ nùi ki nge nde?” Kɔ a nɛa we zele na, Polo a wi Silisi ni,

³⁵ nɛ a tɔ̃ hã a na: “Owi da mɔ, wa hɔ do'do, sɛ nɛ mɔ tɔ̃ gulu we 'da mɔ hã mi de.” Nɛ a ba nu a na, wa fi Polo kɔ gã tɔa kɛ Herodɛ dɛa zi ni.