Owi Nɛ Tonɔ 22 - WE NU GALE 1995

¹ Nɛ Polo na: “Obaa mi, do onya mi, nɛ zélé mbe gulu we 'da mi sɛ!”

² Kɔ wa nɛa we zele kɛ a tɔ̃ do lɛnggɛ nu wa Aramenyɛ ni, nɛ ngɔ tɛ wa gɛ̃a kpi kpi. Nɛ Polo tɔ̃ na:

³ “Mi a be Yuda, wa kua mi kɔ le Tarsɛ tɛ ngɔ nù Silisi, nɛ wa dala mi dɛ Yeruzalɛmɛ gɛ. Nɛ Gamaliɛlɛ, wi be mbula, a bia mbula 'da oyaa lɛ hã mi vɛ̃. Nɛ mi dɛa zi toe 'da Gale do sila mi kpo, ɔ nɛ kɛ nɛ vɛ̃ nɛ tɛ dɛ ma sɔɛ gɛ ni.

⁴ Mi hã zi ngamɔ hã winɔ kɛ wa ba wala 'da Yezu ni wena, nɛ mi fa zi we gbɛ wa. Mi kala zi Owi wili do owuko, nɛ mi a wa bɔlɔkɔ.

⁵ Nɛ gã nwa nganga, do okumunɔ vɛ̃ wa ĩ na, we mi tɔ̃ gɛ a gbãlã we. Nɛ wa dɛa zi mbɛti hã mi na, mi nɛ do ma hã onya lɛ Oyudanɔ tɛ Damasi i. Nɛ mi nɛa zi i mɔ we kala Owi Kristonɔ, we tɛ do wa dɛ Yeruzalɛmɛ nga, takɔ wa kpa etumbu.

Polo tɔ̃a gulu kifi sila wi 'da a

⁶ “Kɔ mi zi li wala, tɛ nɛ dɛ Damasi i, nɛ mi nɛ kɔlɔ dɔ̃ɔ do le ni, nɛ nde wese dɔ̃ɔ do gbogbo zu lɛ. Nɛ fala kpo, nɛ li mi dɛa gbalala, nɛ gã yele ngbala yolo li nza i, nɛ ma yele zĩ mi takpa.

⁷ Nɛ mi tia, nɛ mi zele gɛlɛ wele tɛ sa mɔ hã mi na: ‘Saulo! Saulo! Gulu kɛ mɔ zɛlɛ tɛ mi we ge nde?’

⁸ Kɔ mi nɛ zele ni, nɛ mi aka na: ‘Nwa, mɔ a wio nde?’ Nɛ wi ni gese na: ‘Wi a mi Yezu, wi Nazarɛtɛ, kɛ mɔ zɛlɛ tɛ̃ a ni.’

⁹ Nɛ winɔ kɛ wa kã zi mi ni, wa zɔa yele ngbala ni, nɛ nde wa zèlè gɛlɛ wi tɔ̃ we hã mi ni gɔ.

¹⁰ Nɛ mi aka na: ‘Aa Nwa, mi nɛ dɛ nɛ nɛ nde?’ Nɛ a tɔ̃ hã mi na: ‘Mɔ kúlú ngɔ, hã mɔ le dɛ Damasi i, nɛ wa tɔ̃ sɛ we mɛ kɛ Gale kɔ̃a na, mɔ dɛ ni hã mɔ.’

¹¹ Nɛ nde yele ngbala ni fi zi tandu li mi, nɛ mi zɔ́ zi 'bɔ mɔ gɔ. Nɛ owinɔ lɛ zi do wa ni, wa 'bia nu kɔ̃ mi, nɛ wa kã mi dɛ Damasi i.

¹² “Nɛ mbe wele kpo zi i mɔ, li a a Ananiasi, a zi a bɔlɔ zu wele, a dɔnggɔ zi mbula 'da lɛ wena. Nɛ Oyudanɔ tɛ Damasi ni vɛ̃, wa tɔ̃ zi dia we tɛ̃ a wena.

¹³ Nɛ Ananiasi tɛa, nɛ a yolo dɛ kɛ zã mi, nɛ a tɔ̃ hã mi na: ‘Nyae Saulo, e kɔ li mɔ hũi!’ Nɛ do kpo fala ni, nɛ li mi hũi, nɛ mi ka mɔ tɛ̃ a.

¹⁴ Nɛ a tɔ̃ hã mi na: ‘Gale 'da obaa lɛ, a saka mɔ na, mɔ ĩ ti mɛ kɛ zã a kɔ̃a ni, nɛ mɔ zɔ Wi bɔlɔ zu do li mɔ, nɛ mɔ zele wala gɛlɛ a ngboo.

¹⁵ We kɛ mɔ sɛ a temɔɛ 'da a, mɔ tɔ̃ sɛ we mɛnɔ kɛ mɔ zila, nɛ mɔ zɔa ni hã winɔ vɛ̃.

¹⁶ Kɔ mɔ tɛ dà'bà tɛ mɔ gɔ! Mɔ kúlú ngɔ, kɔ mɔ sá mɔ hã Nwa na, a kpasa mɔ, kɔ a fɔlɔ 'dã mɛnɔ 'da mɔ, hã mɔ kpá batisimɔ.’

Polo tɔ̃a gulu toe a dɛa 'da ogele winɔ ni

¹⁷ “Mi kpula tɛ mi dɛ Yeruzalɛmɛ nga, nɛ mi le kɔ Tɛmpɛloe. Kɔ mi tɛ sambala Gale, nɛ a be mɔ li mi.

¹⁸ Nɛ mi zɔa Nwa Yezu, nɛ a tɔ̃ hã mi na: ‘Mɔ kúlú ngɔ dɔ̃, kɔ mɔ la Yeruzalɛmɛ gɛ do'do! We kɛ owinɔ le gɛ, wa kɔ̃́ sɛ wenɔ 'da mi kɛ mɔ tɔ̃ sɛ ma ni gɔ.’

¹⁹ Nɛ mi gisa hã a na: ‘Nwa, wa ĩ de wena na, mi nɛ zi kɔ tɔa mbulanɔ, nɛ mi kala winɔ wa kɔ̃a zu li mɔ ni, nɛ wa zɛ wa, nɛ wa a wa kɔ bɔlɔkɔ.

²⁰ Nɛ 'da fala kɛ wa gbɛa zi temɔɛ 'da mɔ Etiɛnɛ ni, nɛ nde mi zi boe. Nɛ mi kɔ̃a zi gɛnɛ fie 'da a, nɛ mi fɔmɔ tulunɔ 'da winɔ kɛ wa gbɛa a ni.’

²¹ Nɛ Nwa Yezu tɔ̃a 'bɔ hã mi na: ‘Mɔ lá, we kɛ mi tombo sɛ mɔ ndũu dɛ sanga winɔ kɛ wa a Oyuda gɔ ni.’ ”

Polo do gã wi ngɔ osoda Roma

²² Gili winɔ wa zila we Polo tɔ̃ ni gbaa, kɔ ma hɔa fala ni, nɛ wa he mɔ fuu na: “Fó a do'do! A wia do fio! A wè tɛ 'bana nza gɔ!”

²³ Nɛ wa hia mɔ nganda wena, nɛ wa ɛ tulu tɛ wa, nɛ wa so fumbɛlɛ tɛ da dɛ ngɔ.

²⁴ Nɛ gã wi ngɔ sodanɔ ni ba nu ɛ na, wa le do Polo dɛ kɔ ngboe i, kɔ wa zɛ a do zufa ndala. Na mɛ ni, nɛ a wele sɛ we, nɛ ɛ ĩ sɛ gulu mɛ gili winɔ wa he do mɔ zu a ni.

²⁵ Nɛ wa ɛnzɛ a, takɔ wa zɛ a ni, nɛ Polo aka wi ngɔ sodanɔ kɛ a zi di ni ni na: “Wi hã wala hã mɔ na, mɔ zɛ be Roma dati kɛ na, wa tɛ 'bìlì we 'da a gɔ ni a wio nde?”

²⁶ Kɔ wi ngɔ sodanɔ nɛa we zele ni, nɛ a nɛ, nɛ a tɔ̃ hã gã wi ngɔ wa ni na: “Mɛ mɔ nɛ dɛ nɛ ni a ge nde? Wi gɛ a be Roma!”

²⁷ Nɛ gã wi ni tɛa, nɛ a aka Polo na: “Mɔ tɔ hã mi sɛ, mɔ a be Roma nde?” Nɛ Polo kɔ̃, nɛ a na: “Mi a be Roma.”

²⁸ Nɛ wi ni tɔ̃ hã a na: “Mi futa zi mbili gã wena, sɛ a mi ĩ ti hɔ be Roma de.” Nɛ Polo tɔ̃ tɛ mɛ 'bɔ hã a na: “Mi fùtà zi kɛ 'da mi futa gɔ, wa kua mi nɛ kua.”

²⁹ Nɛ winɔ wa nɛa sɔ we zɛ a, takɔ a tɔ̃ gulu we 'da a ni, wa fua tɛ wa kɛ zã a do ti. Nɛ kili ba 'bɔ gã wi ngɔ sodanɔ wena, tɛ kɛ a ɛnzɛ Polo do dɔkpɔ, ĩ na a a be Roma ni.

Polo hɔa dati onwa nganganɔ do owi 'bili wenɔ

³⁰ Kɔ fala nɛa we sa nɛ, nɛ gã wi ngɔ sodanɔ kɔ̃a we ĩ gulu we ngboo Oyudanɔ wa da do Polo ni. Ma kɛ a tumba hã onwa nganganɔ, do owi 'bili wenɔ na, wa mba li ngba wa. Nɛ a ba nu a na, wa yala dɔkpɛ tɛ Polo, kɔ wa tɛ do a, hã wa e a dati wa.