Owi Nɛ Tonɔ 21 - WE NU GALE 1995

Polo nɛa Yeruzalɛmɛ

¹ Lɛ nɛa we gɔnɔ sanga tɛ ngba lɛ do wa, nɛ lɛ kũ masua, nɛ lɛ la ndirr dɛ Kosi. Nɛ fala nɛ sa nɛ, nɛ lɛ hɔ tɛ Rodɛsi, nɛ yolo di ni, nɛ lɛ la dɛ Patara.

² Nɛ lɛ kpa masua i mɔ, ma nɛ Fenisi, nɛ lɛ kũ kɔ nɛ, nɛ lɛ la.

³ Kɔ lɛ kɔlɔ, nɛ lɛ ndua zɔ ngolo lì Siprɛ, nɛ lɛ ili ma dɛ ngɔ gale, nɛ lɛ la si Siri. Nɛ lɛ hɔa Tirɛ, nɛ lɛ zĩ nù di ni, takɔ wa a mbe tolenɔ kɔ masua ni nù.

⁴ Kɔ lɛ hɔa di ni, nɛ lɛ kpa 'bɔ ombe wi Kristonɔ, nɛ lɛ ɔa do wa pɔsɔ kpo. Nɛ Hi Wi Santo dɛa na, Owi Kristonɔ ni wa tɔ̃ hã Polo na, a tɛ nɛ̀ Yeruzalɛmɛ i gɔ.

⁵ Kɔ ma nɛa we hɔ ndɔti pɔsɛ, nɛ lɛ la gɛnɛ 'da lɛ dɛ dati. Nɛ wa, do owukonɔ, do benɔ 'da wa vɛ, wa kã lɛ gbaa, nɛ wa e lɛ 'do ngba i. Nɛ lɛ gu gba zugolo do wa vɛ dɛ nu lì ni, nɛ lɛ aka Gale we ngba lɛ.

⁶ 'Do nɛ, nɛ lɛ fana ngba lɛ vɛ, nɛ lɛ kũ masua, nɛ wa si tɛ mɛ 'bɔ.

⁷ Nɛ lɛ yula Tirɛ ni, nɛ lɛ hɔ Petolemaisi, nɛ lɛ zĩ nù we fana onya lɛ wi kɔ̃a wenɔ di ni ni. Nɛ lɛ ɔa tũ kpo.

⁸ Nɛ fala nɛ sa nɛ, nɛ lɛ la dɛ Sezare do nyanga lɛ. Lɛ hɔa i mɔ, nɛ lɛ nɛ 'da Filipɛ, mbe wi be Dia Sakoe 'da Yezu, nɛ lɛ ɔ di ni. Filipɛ zi a mbe kpo sanga winɔ sambo, kɛ wa saka zi wa kɔ eklezia tɛ Yeruzalɛmɛ i ni.

⁹ Nɛ a zi do obe zɔnga benɔ 'da a nalɛ, wa tɛ bà wili gɔ, nɛ wa gba zi olo nu Gale gba.

¹⁰ Tũ kɔ̃ lɛ nɛa we dɛlɛ di ni, nɛ mbe wi gba olo nu Gale kpo, li a a Agabusi, a yolo ngɔ nù Yude, nɛ a hɔ.

¹¹ Nɛ a tɛ 'da lɛ nga, nɛ a ba 'dɛ 'da Polo, nɛ a ɛnzɛ do nyanga a do kɔ̃ a wele nɛ, nɛ a tɔ̃ na: “Nɛ zɔ́, Hi Wi Santo tɔ̃a na, Oyudanɔ wa ba sɛ wele 'dɛ gɛ Yeruzalɛmɛ i, nɛ wa ɛnzɛ sɛ a na mɛ gɛ, nɛ wa 'dɔlɔ a hã ogele winɔ.”

¹² Kɔ lɛ nɛa we zele ní, nɛ lɛ mba do onya lɛ wi Kristonɔ Sezare ni, nɛ lɛ ala nu lɛ hã Polo na, a tɛ nɛ̀ tɛ Yeruzalɛmɛ i gɔ.

¹³ Nɛ a gese hã lɛ na: “Gulu kɛ nɛ he, nɛ nɛ gɛ tɛ mi ni we ge nde? Gɛnɛ kɔ wa ba mi Yeruzalɛmɛ i, kɔ wa ɛnzɛ mi, kɔ wa gbɛ mi we Nwa Yezu, nɛ mi kɔ̃ sɛ iko.”

¹⁴ Nɛ ɔ nɛ kɛ lɛ ga a zãa ni, nɛ lɛ la fala ala nu lɛ hã a, nɛ lɛ tɔ̃ na: “E kɔ Nwa dɛ kɛ zã a kɔ̃a ni!”

¹⁵ Nɛ lɛ ɔ̀ 'bɔ di ni ngboo gɔ, nɛ lɛ 'dafa tole 'da lɛ, nɛ lɛ la Yeruzalɛmɛ i.

¹⁶ Nɛ ombe wi kɔ̃a wenɔ Sezare ni, wa kã lɛ, nɛ wa la lɛ i mɔ tɛ 'da Manasoni, wi Siprɛ, kɛ a zi a ã gbɛlɛ wi Kristoe ni. Nɛ lɛ ɔa dɛ 'da a ni.

Polo nɛa we zɔ Zake

¹⁷ Lɛ hɔa Yeruzalɛmɛ i, nɛ onya lɛ wa dɛ yangga do lɛ wena.

¹⁸ Kɔ fala sa olo nɛ, nɛ Polo nɛa do lɛ 'da Zake i. Nɛ owi zɔ mɔ tɛ eklezia wa mba 'bɔ li ngba wa di ni.

¹⁹ Nɛ Polo fana wa, nɛ a tɔ̃ gulu mɛnɔ vɛ̃ kɛ a dɛa ma sanga ogele winɔ do ngawi 'da Gale ni hã wa.

²⁰ Kɔ wa nɛa we zele ni, nɛ wa dɔnggɔ Gale wena. Nɛ wa tɔ̃ hã Polo na: “Nyae, mɔ zɔa nde? Oyudanɔ wena wa kɔ̃a zu li Yezu, nɛ nde wa 'bana dɛ mbula 'da Mɔizɛ do sila wa vɛ.

²¹ Nɛ wa zila na, mɔ be hã Oyudanɔ kɛ wa ɔ kɔ gele lenɔ ni na, wa lá fala dɛ mbula 'da Mɔizɛ do'do. Nɛ mɔ 'bɔ na, wa tɛ gɔ̀nɔ̀ benɔ 'da wa gɔ, nɛ wa tɛ dɛ̀ mɔ olo yaa wa gɔ.

²² Kɔ lɛ nɛ dɛ nɛ nɛ nde? We kɛ wa zele sɛ we hɔa 'da mɔ iko.

²³ Kɔ ma wia na, mɔ dɛ ɔ nɛ kɛ lɛ nɛ tɔ̃ hã mɔ ni. Lɛ do Owele nalɛ sanga lɛ gɛ, wa kpua mbulu hã Gale.

²⁴ Kɔ ma wia na, 'da fala kɛ wa nɛ fɔlɔ wa we hɔ sa wi li Gale, ɔ nɛ kɛ mbula tɔ̃a ni, nɛ mɔ mba do wa, nɛ mɔ gɔnɔ zu wa, sɛ nɛ wa ĩ ti kpolo zu wa de. Na mɛ ni, nɛ winɔ vɛ wa ĩ sɛ na, wenɔ kɛ lo zila dɛ ngɔ mɔ i ni, mɛ a bɛlɛ. Nɛ wa zɔ sɛ na, mɔ tɛ mɛ 'bɔ, mɔ dɛ mbula 'da Mɔizɛ dɛa.

²⁵ Nɛ we ogele winɔ kɛ wa hɔa winɔ 'da Yezu ni, lɛ kɔma zi mbɛti we tɔ̃ wenɔ kɛ lɛ kɔ̃a ni hã wa ia. Lɛ ba nu lɛ hã wa na, wa tɛ nyɔ̀ngɔ̀ mulu sa'denɔ kɛ wa a ma ti kpikimanɔ ni gɔ. Wa tɛ nyɔ̀ngɔ̀ tɔkɔ sa'de gɔ, wa tɛ nyɔ̀ngɔ̀ sa'de kɛ wa sa'ba gɛlɛ a sa'ba iko ni gɔ, nɛ wa tɛ yɛ̀nggɛ̀ vĩ zu yali gɔ.”

²⁶ Fala nɛa we sa nɛ, nɛ Polo kala winɔ nalɛ ni, nɛ a nɛ do wa fala fɔlɔ do winɔ ni, nɛ wa fɔlɔ wa. 'Do nɛ, nɛ a nɛa kɔ Tɛmpɛlo i, nɛ a we ngba soe kɛ tũ fɔlɔ tɛ wi ma e sɛ, nɛ wa hã sɛ do dɔnggamɛ we wa kpo kpo ni.

Wa ba Polo kɔ Tɛmpɛlo i

²⁷ Tũi sambo ni nɛa we e nɛ, nɛ Oyudanɔ kɛ wa yula ngɔ nù Azi ni, wa zɔa Polo kɔ Tɛmpɛlo i, nɛ wa tɔndɔ go'do gili winɔ dɛ tɛ a, nɛ wa ba a.

²⁸ Nɛ wa he mɔ na: “Obe Israɛlɛ, nɛ tɛ́! Nɛ zɔ́ wi gɛ, a yɛnggɛ falanɔ vɛ, tɛ tɔ̃ 'dã zu li Oyudanɔ, do mbula 'da Mɔizɛ, do Tɛmpɛloe gɛ. Kɔ nɛ zɔ́, a lia 'bɔ kɔ Tɛmpɛloe do owinɔ kɛ wa a Oyuda gɔ, kɔ a faka fala kɛ ma santo wena ni.”

²⁹ (Wa tɔ̃ zi na mɛ ni, we kɛ wa zɔa zi Trofimɛ, be Efɛzɛ ni, fala nɛ kpo do Polo tɛ yɛnggɛ kɔ le. Ma kɛ wa lengge na, Polo tɛa do a kɔ Tɛmpɛlo ni.)

³⁰ Nɛ wa fi balia kɔ le vɛ́, nɛ winɔ wa ngbolo li ngba wa dɛ nu tɔa Tɛmpɛlo, nɛ wa ba Polo, nɛ wa gbɔtɔ a kɔ Tɛmpɛloe dɛ nza, nɛ wa kpe nu nɛ.

³¹ Nɛ wa ma ngɔ fa we gbɛ a. Nɛ sako nɛ hɔa 'da gã wi ngɔ osoda Roma na, balia tia tɛ Yeruzalɛmɛ.

³² Nɛ a wɛlɛ tɛ̃ a, nɛ a kala Owi ngɔ osodanɔ, do tala osodanɔ, nɛ wa yu dɛ 'da gba gili winɔ i. Kɔ winɔ wa nɛa we zɔ gã wi ni, do sodanɔ 'da a ni, nɛ wa ɔmɔ tɛ zɛ Polo.

³³ Nɛ gã wi nɛa dɛ kɛ zã Polo, nɛ a tɔ̃ na, wa ba a, kɔ wa ɛnzɛ a do dɔkpɔ bɔa. Nɛ a aka winɔ na, wi gɛ a wio nde, nɛ mɛ ngboo a dɛa ni a ge nde?

³⁴ Nɛ ɔ nɛ kɛ mɛ a sanga gili winɔ ni, wele do wele tɛ tɔ̃ kɛ 'dɛ ɛ, nɛ nde wi zele ngbɛ ɛ bina. Nɛ fala do kɛ gã wi ni zele gulu nɛ ngboo ni bina. Nɛ a ba nu a na, wa nɛ do Polo dɛ kɔ ngboe 'da sodanɔ i.

³⁵ Kɔ wa ma ngɔ kũ do Polo dɛ ngɔ 'dinggili ni, nɛ sodanɔ wa ba a do ngɔ, we kɛ gili winɔ wa tɛ ili a nɛ ge nde ni.

³⁶ Nɛ wa zi vɛ tɛ nɛ 'dɔkɔlɔ a sululu tɛ he mɔ na: “Wa gbɛ́ a, wa gbɛ́ a!”

Polo tɔ̃a gulu we 'da a

³⁷ Osodanɔ wa nɛa we le do Polo dɛ kɔ ngboe 'da wa i, nɛ a aka gã wi ngɔ sodanɔ ni na: “Mɔ mbɔ́kɔ́ mi, kɔ mi wele mbe we hã mɔ sɛ.” Nɛ gã wi ni aka a na: “Mɔ ĩ ti tɔ̃ Grɛkɛ nde?

³⁸ Mɔ a wi Ezipetoe kɛ a fi zi dɛ balia kɔ le gɛ, nɛ a la do Owi gbɛ winɔ kote nalɛ dɛ li gba zɔ̃ i ni gɔ nde?”

³⁹ Nɛ Polo gese hã a na: “Wi a mi gɔ! Mi gɛ a be Yuda! Le 'da mi a Tarsɛ tɛ ngɔ nù Silisi. Sako li le 'da mi ma dɔ̃ dɔ̃lã. Kɔ mɔ kɔ̃, nɛ mɔ hã wala hã mi, hã mi wele we hã owinɔ sɛ.”

⁴⁰ Nɛ gã wi ni kɔ̃a, nɛ Polo kũ dɛ ngɔ 'dinggili, nɛ a fi kɔ̃ a hã winɔ na, ngɔ tɛ wa gɛ. Ngɔ tɛ wa nɛa we gɛ nɛ, nɛ a wila we hã wa do lɛnggɛ Aramenyɛ.