Owi Nɛ Tonɔ 20 - WE NU GALE 1995

Polo nɛa ngɔ nù Masedɔanɛ do Grɛsɛ

¹ Zu balia winɔ wa fi kɔ le ni nɛa we gbese nɛ, nɛ Polo mba li wi kɔ̃a wenɔ vɛ, nɛ a wele we hã wa. Nɛ a nganda sila wa, nɛ a fana wa vɛ, nɛ a la dɛ Masedɔanɛ.

² A 'bili do ngɔ nùi ni, nɛ a tɛ wele we hã owi Kristonɔ, tɛ hã kpã sila hã wa. Nɛ a la dɛ ngɔ nù Grɛsɛ,

³ nɛ a ɔ i mɔ zɛkɛ talɛ. Nɛ 'do nɛ, nɛ a kɔ̃a we nɛ Siri. Kɔ a nɛa we la nɛ, nɛ a zele na, Oyudanɔ wa ba zã zu a we dɛ a 'danga. Kɔ a zila ni, nɛ a kpolo linggamɛ 'da a, nɛ a gifi tɛ a dɛ olo a Masedɔanɛ i.

⁴ Nɛ Sopatɛrɛ, be 'da Pirusi, wi Bere, a nɛ do a, fala nɛ kpo do Aristarkɛ do Sɛkundusi, Owi Tɛsalonikɛ, do Gayusi, wi Dɛrbɛ do Tisikɛ, do Trofimɛ, Owi ngɔ nù Azi, do Timote.

⁵ Winɔ ni wa la dati, nɛ wa 'bɔ 'da lɛ tɛ Troasi.

⁶ Nɛ do 'do ɛngga kɛ wa nyɔngɔ do mapa kɛ wa à ina hana mapa tɛ nɛ gɔ ni, nɛ lɛ lia kɔ masua tɛ Filipɛ. Nɛ lɛ ɔa sanga tũ mɔlɔ, nɛ lɛ hɔ i mɔ, nɛ lɛ kpa ngba lɛ do wa, nɛ lɛ ɔa dɛ di ni pɔsɔ kpo.

Sɔkpɔ gɛnɛ 'da Polo tɛ Troasi

⁷ Ma hɔa li pɔsɔ do gɛ̃a wese, nɛ lɛ mba li ngba lɛ, we nyɔngɔ nyɔngɔmɔ fala nɛ kpo. Nɛ Polo wila we do winɔ kɛ lɛ mba li ngba lɛ do wa ni. A wila ni gbaa nɛ 'do tũ nyɛlɛ, we kɛ fala sa, nɛ a la sɛ.

⁸ Lɛ mba zi li ngba lɛ kɔ tɔa kɛ do ngɔ, nɛ mwinda dɛlɛ zi kɔ tɔa ni wena.

⁹ Nɛ mbe zagbãlã kpo, liaa Etisɛ, a dungu tɛ li holo tɔa, nɛ a ɔa yala, nɛ ma nɛ ngɔ a. We kɛ 'do bia we 'da Polo nyɛla zi nɛ ge nde ni. Nɛ Etisɛ zɔla do li yala tɛ li holo tɔa wa dɛa dɛ ngɔ ngbɛ ɛ talɛ ni, nɛ a te gbaa nù i. Kɔ wa nɛ 'be a dɛ ngɔ, nɛ nde a fia ia.

¹⁰ Nɛ Polo zĩlĩ, nɛ a gu dɛ ngɔ zagbãlã ni, nɛ a ba a dɛ tɛ a, nɛ a tɔ̃ na: “Nɛ tɛ dɛ̀ kifi gɔ, a fè gɔ!”

¹¹ Nɛ 'do nɛ, nɛ Polo kũ 'bɔ dɛ ngɔ i, nɛ a kɛa sanga mapa, nɛ a nyɔngɔ. Nɛ a wele 'bɔ we gbaa, nɛ wese ma ngɔ gba nɛ, nɛ a la.

¹² Mɛ ni nɛ nde be zagbãlã kpasa, nɛ wa si do a. Nɛ ma hã kpã sila hã winɔ wena.

Polo yula Troasi, nɛ a nɛ tɛ Milɛ

¹³ Le la dati, nɛ lɛ le kɔ masua, nɛ lɛ nɛ tɛ Asosi, we kpa Polo dɛ di ni. We kɛ a kɔ̃a zi we nɛ dɛ i mɔ do nyanga a.

¹⁴ Nɛ lɛ kpa ngba lɛ do a tɛ Asosi i, nɛ a le kɔ masua, nɛ lɛ la dɛ Mitilɛnɛ.

¹⁵ Nɛ fala nɛ sa nɛ, nɛ lɛ yolo 'bɔ di ni, nɛ lɛ la dɛ kɛ zã ngolo lì Kio. Nɛ fala sa 'do ki ni, nɛ lɛ hɔ tɛ Samosi. Nɛ fala sa 'bɔ mbé nɛ, nɛ lɛ hɔ tɛ Milɛ.

¹⁶ Nɛ Polo kɔ̃̀ zi we ɛlɛ tɛ Efɛzɛ gɔ, da dɛ kɔ a gbɛ́ 'da fala 'da a ngɔ nù Azi ni gɔ. A kɔ̃a na, ɛ wɛlɛ tɛ̃ ɛ, kɔ ma we, nɛ ɛ dungu ɛngga Pantɛkotɛ tɛ Yeruzalɛmɛ i.

Polo wila we hã owi zɔ mɔ tɛ eklezia tɛ Efɛzɛ

¹⁷ Polo hɔa tɛ Milɛ, nɛ a tombo wele Efɛzɛ, takɔ a sa mɔ hã Owi zɔ mɔ tɛ eklezia na, wa tɛ.

¹⁸ Kɔ wa hɔa, nɛ a tɔ̃ hã wa na: “Nɛ ĩ ti tɛlɛ tɛ kɛ mi dungu sanga nɛ, ndo do kɛ mi hɔa nɛ gbaa tɛ ngɔ nù Azi ni.

¹⁹ Mi dɛa zi toe 'da Nwa Yezu, nɛ mi ba tɛ mi dɛ nù. Nɛ Oyudanɔ wa ba zã zu we dɛ ngɔ mi, nɛ wa hã ngamɔ hã mi, nɛ mi dungu zi do mili kɔ̃a li mi.

²⁰ Mi ùsù zi mbe we kɛ ma wia na, mi gala do nɛ ni gɔ. Mi bia zi wenɔ hã nɛ dɛ li gba dɔ, do kɔ tɔanɔ 'da nɛ vɛ.

²¹ Mi sa mɔ hã Yudanɔ do ogele winɔ na, wa kifi sila wa, kɔ wa siki li wa dɛ 'da Gale, nɛ wa kɔ̃ zu li Nwa Yezu Kristo.

²² Kɔ ngangga ni, mi nɛ la dɛ Yeruzalɛmɛ i, we kɛ Hi Wi Santo kɔ̃a ni. Nɛ nde mi ĩ̀ ti mɛ ma nɛ kpa sɛ mi i mɔ ni gɔ.

²³ Hi Wi Santo tɛ tɔ̃ kɔ sila mi na, wa zɛlɛ sɛ tɛ mi, nɛ wa fi sɛ mi bɔlɔkɔ kɔ le kpo kpo.

²⁴ Nɛ nde we duzu mi, mi lénggé do kpasi 'da mi gɔ. Mi kɔ̃a tati nɛ na, mi dɛ toe 'da mi gbaa, kɔ mi hɔ ndɔti nɛ. Mi kɔ̃a na, mi hɔ sɔkpɔ toe kɛ Nwa Yezu hã ma hã mi na, mi tɔ̃ sako dia zã 'da Gale hã winɔ ni.

²⁵ “Mi yɛngga zi sanga nɛ, tɛ be dɛa to nwa 'da Gale hã nɛ. Nɛ nde mi ĩ na, nɛ zɔ́ sɛ 'bɔ mbé tɛ mi gɔ.

²⁶ Ma kɛ sɔɛ gɛ, mi tɔ̃ hã nɛ na, mbe sanga nɛ yɔ wala, nɛ nde mɛ sɛ 'bɔ a we 'da mi gɔ.

²⁷ We kɛ mi ùsù zi we do nɛ gɔ. Mi bia mɛnɔ kɛ Gale 'dafa we dɛ nɛ ni hã nɛ̃ vɛ.

²⁸ Nɛ dĩ́lĩ́ fala tɛ nɛ, nɛ nɛ zɔ́ mɔ tɛ gili winɔ 'da Gale, kɛ Hi Wi Santo hã wa hã nɛ ni. Ma wia na, nɛ fɔmɔ ogili wi Kristonɔ, kɛ Gale kpa wa olo li fio Be 'da a ni.

²⁹ Mba gɔ, mi ĩ na, fala kɛ mi la do'do, nɛ o'dã wele wa hɔ sɛ, nɛ wa pɛsɛ sɛ sanga nɛ ɔ nɛ kɛ gɔ̃̀ pɛsɛ do sanga obata ni.

³⁰ Dɛ sanga nɛ ni ngboo, ombe wa 'bili sɛ bɛlɛ we kala wi kɔ̃a wenɔ, takɔ wa nɛ 'dɔkɔlɔ wa.

³¹ Kɔ li nɛ sɔ̃́, nɛ ta zu nɛ tɛ èlè ngɔ kɛ zi 'do sabɛlɛ talɛ, mi tɛ tɔ̃ mbula hã nɛ tũ do gba wese, do mili kɔ̃a li mi ni gɔ.

³² “Kɔ di dɔ̃ ni, mi la nɛ dɛ tambala kɔ̃ Gale. We nu a kɛ ma be dia zã 'da a ni, ma fɔmɔ sɛ nɛ. We kɛ a wia we hã ngawi hã nɛ, nɛ a wia 'bɔ we hã dia mɛnɔ kɛ a usu we winɔ 'da a ni hã nɛ.

³³ Mi 'bã̀ zi kpamɔ, tabi tulu mɔ́ wele gɔ.

³⁴ Nɛ ĩ na, mi dɛa zi to do kɔ̃ mi ngboo, we kpa mɔ kɛ ma wia zi tɛ gala mi do ongba mi ni.

³⁵ Mi bia zi hã nɛ do walanɔ vɛ na, nɛ dɛ to, sɛ nɛ nɛ we sɛ we gala wi 'bakonɔ de. Nɛ lɛ lénggé wenɔ kɛ Nwa Yezu ngboo tɔ̃a zi na: ‘'Dɔlɔ mɔ hã ngba wi, ma hã yangga nɛa ngɔ kpɔ kɔ̃ wi ti mɔ mɔ́ ngba wi ni!’ ”

³⁶ Polo nɛa we fi nu ɛ nù, nɛ a gu gba zugolo mba do wa vɛ, nɛ wa sambala Gale.

³⁷ Nɛ wa ba Polo dɛ tɛ wa tɛ fana a, nɛ wa ma ngɔ he nɛ.

³⁸ 'Bako ba zi li wa wena, we kɛ Polo tɔ̃a hã wa na, wa zɔ́ sɛ 'bɔ mbé tɛ ɛ gɔ ni. Nɛ wa kã a gbaa kɔ masua i.