Owi Nɛ Tonɔ 2 - WE NU GALE 1995

Gale tumba Hi Wi Santo

¹ Gã ngba soe ɛngga Pantɛkotɛ nɛa we we nɛ, nɛ owi kɔ̃ zu li Yezu, wa mba zi li ngba wa vɛ̃ kpo.

² Kɔ wa nɛa we gbanga nɛ, nɛ wa zele giti mɔ wele nganda wena do li nza i. Nɛ ma wele ɔ nɛ giti gba bũ ni, nɛ ma dunu kɔ tɔa kɛ wa dungu nɛ ni vɛ̃.

³ Nɛ mɔ ma nyɛ ɔ nɛ dɛfɛ we ni, ma kɛ̃a sanga tɛ ngbɛ ɛ, nɛ ma dungu dɛ zu wele do wele.

⁴ Nɛ Hi Wi Santo lia kɔ wa vɛ̃, nɛ a dunu do wa, nɛ wa ma ngɔ wele we do ogele nu kɛ wa yàmbàlà ma dati gɔ ni, do tɛlɛ tɛ kɛ Hi Wi Santo ia dɛ nu wa ni.

⁵ Do ngba soe ni, nɛ nde Oyudanɔ kɛ wa dɔnggɔ Gale wena ni, wa yula ngɔ nùnɔ nyanga nza vɛ̃, kɔ wa tɛa dɛ Yeruzalɛmɛ.

⁶ Kɔ wa nɛa we zele giti mɛ ni, nɛ wa mba li ngba wa dɛlɛ wena. Nɛ wa ɔngba nɛ ge nde ni. Mba gɔ, wele do wele zila Owi nɛ tonɔ tɛ wele we do lɛnggɛ kɔ le 'da a ngboo.

⁷ Nɛ zu wa vĩ, nɛ wa ɔngbɔ wena, nɛ wa ma ngɔ tɔ̃ dɛ sanga wa na: “Owinɔ kɛ wa wele wenɔ gɛ, wa vɛ̃ a owi Galile gɔ nde?

⁸ Kɔ mɛ ma dɛa na, wele do wele zele wa tɛ wele we do lɛnggɛ kɔ le 'dɛ ɛ ni a ge nde?

⁹ We kɛ lɛ dɛ gɛ, mbe wa yula ngɔ nù Partɛ, do Medi, Elamɛ, Mezopotami, Yude, Kapadɔsɛ, Pɔ̃, Azi,

¹⁰ Frizi, Pamfili, Ezipeto, do mbe lenɔ tɛ Sirɛnɛ, tɛ ngɔ nù Libi ni. Nɛ ombe wa yolo tɛ Roma,

¹¹ ndo owinɔ ngɔ nù Krɛtɛ, do Arabi. Ombe sanga lɛ gɛ a Oyuda ngboo, nɛ ombe nɛ wa a ogele wi kɛ wa kifi sila wa dɛ 'da Gale 'da Oyudanɔ ni. Nɛ gɛnɛ kɔ na mɛ ni, nɛ nde lɛ vɛ̃ lɛ zele wa do lɛnggɛ kɔ lenɔ 'da lɛ kpo do kpo, tɛ tɔ̃ lɛnggɛ ɔngbamɛnɔ Gale dɛa ni!”

¹² Nɛ wa vɛ̃ wa ɔngbɔ wena, nɛ zu wa vĩ, nɛ wa ĩ̀ ti gulu mɛ kɛ ma dɛa tɛ̃ ɛ ni gɔ. Nɛ wa ma ngɔ tɔ̃ dɛ sanga wa ni na: “Gulu kɛ gɛ na ge nde?”

¹³ Nɛ ombe winɔ wa mɔma, nɛ wa tɔ̃ na: “Dɔ̃ ba wa ba!”

Petro bia we hã winɔ

¹⁴ Nɛ Petro kɛ a zi fala nɛ kpo do owi nɛ tonɔ 'bu ngɔ wa kpo ni, a kulu ngɔ, nɛ a tɔ̃ hã ogili winɔ dɛ ngɔ na: “Aa nɛ onya mi Yudanɔ, do nɛ owinɔ vɛ̃ tɛ Yeruzalɛmɛ gɛ, nɛ gɛ zala nɛ, hã nɛ zélé we mi nɛ tɔ̃ hã nɛ gɛ!

¹⁵ Nɛ tɛ lènggè na, dɔ ba owinɔ gɛ gɔ, we duzu kɛ mɛ a sanga titole iko.

¹⁶ Mɛ nɛ zɔ gɛ, mɛ a we kɛ Yɔɛlɛ, wi gba olo nu Gale tɔa zé na:

¹⁷ ‘Gale tɔa na, do ndɔti nza, nɛ mi tombo sɛ Hi Wi 'da mi, nɛ a dunu sɛ kɔ owinɔ vɛ̃. Obulu benɔ, do oboko benɔ 'da nɛ, wa gba sɛ do nu mi. Mi be sɛ mɔ li ozagbãlã benɔ 'da nɛ. Nɛ mi tɔ sɛ yalɛ zu okpasa winɔ 'da nɛ.

¹⁸ Gbãlã we, do ngba soe ni, mi tombo sɛ 'bɔ Hi Wi 'da mi, nɛ a dunu sɛ kɔ owi dɛa tonɔ 'da mi, owi wili wanɔ, do owuko wanɔ, nɛ wa gba sɛ olo nu mi.

¹⁹ Nɛ mi dɛ sɛ ɔngba mɔ li nza i, do ogba sɔ mɔ ngɔ nù nga. Tɔkɔ ma a sɛ nù, lenɔ ma bɛlɛ sɛ, nɛ li nza ma kpe sɛ do zɛ̃ we kpã kpã.

²⁰ Li wese ma tũ sɛ mbĩi, nɛ li zɛkɛ ma fele ɔ nɛ tɔkɔ ni. Mɛnɔ ni vɛ̃ ma hɔ sɛ dati kɔ̃ tũi kɛ mi Nwa, mi nɛ gɔnɔ do ngbangga 'da owinɔ ni. Mɛ sɛ a gã ngba soe be dɔlɔ li 'da mi.

²¹ Na mɛ ni, winɔ vɛ̃ kɛ wa ala sɛ nu wa hã mi Nwa ni, nɛ mi kpasa sɛ wa.’ ”

²² Nɛ Petro tɔ̃ 'bɔ na: “Nɛ, obe Israɛlɛ, nɛ zélé we kɛ mi nɛ tɔ̃ hã nɛ gɛ. Yezu wi Nazarɛtɛ ni, a zi a wi kɛ Gale dɛa ogba sɔ̃ mɔ, do ɔngbamɔ, do gba gili bia mɛnɔ hã nɛ do wala 'da a, ɔ nɛ kɛ nɛ ngboo nɛ ĩ ni. A dɛa ni we be na, wi a ɛ a ɛ tumba a.

²³ Nɛ nɛ 'dɔlɔ zi Yezu hã o'dã winɔ, nɛ wa bɛ̃lɛ̃ a ngɔ finda te, nɛ wa gbɛ a, ɔ nɛ kɛ Gale 'dafa zɛ́ na, ma dɛ sɛ tɛ̃ ɛ ni.

²⁴ Nɛ nde Gale tunu a. A kpasa a kɔ ngamɛ 'da fio, we kɛ fio wè zi tɛ 'bana do ngawi ngɔ a fai gɔ.

²⁵ Nɛ Davidi tɔa zé we ngɔ a na: ‘Mi zɔ Nwa 'da mi dati mi 'da fala fai, a fala nɛ kpo do mi boe na, dɔ ngamɔ kpo kpá mi gɔ.

²⁶ Ma kɛ sila mi dunu do yangga, nɛ mi te salangga ni. Nɛ gɛnɛ kɔ kɛ mi a wele, nɛ mi wia tɛ fe nɛ ni, nɛ nde sila mi gɛ̃a, we duzu kɛ mi gbini zã mi do mɔ Gale ni.

²⁷ Mba gɔ, mɔ lá sɛ mi na, mi fe, hã mi le ti nù gɔ. Nɛ mɔ kɔ̃́ sɛ na, wi 'da mɔ fe, nɛ kili tɛ̃ a mbulu ti zunu gɔ.

²⁸ Mɔ bia wala kpasi hã mi, nɛ sila mi dunu do yangga, we kɛ mɔ do mi boe.’ ”

²⁹ Nɛ Petro tɔ̃ 'bɔ na: “Onyae, mi kɔ̃a we tɔ̃ we ngɔ yaa lɛ Davidi hã nɛ do dia nɛ ngboo. Davidi fia zé, nɛ wa mi a, nɛ zunu a 'bana dɛ kɔ le 'da lɛ tia do sɔɛ gɛ.

³⁰ A zé a wi gba olo nu Gale, nɛ a ĩ na, Gale kpua mbulu, nɛ a kana tɛ̃ a hã ɛ na, a hã sɛ kpongbo nwa olo ɛ ni hã mbe be zã ɛ kpo.

³¹ Davidi zɔa zé mɛnɔ kɛ ma dɛ sɛ tɛ̃ ɛ do 'do ni. Ma kɛ a tɔ̃a we ngɔ za'da nza kɔ fio 'da Mɛsiya na: ‘Gale lá sɛ a tɛ fala kɛ ofionɔ wa ɔ nɛ ni, kɔ kifi tɛ̃ a mbulu ti zunu gɔ.’

³² Wi ni, wi a Yezu kɛ Gale tunu a kɔ fie ni. Lɛ zɔa a, nɛ lɛ a otemɔɛ nɛ.

³³ Baa a Gale ia a ngɔ ngawili kɔ̃ ɛ. Nɛ a hã Hi Wi Santo kɛ a kpua zé mbulu nɛ ni hã a. Nɛ Yezu tumba Hi Wi ni dɛ ngɔ lɛ, ɔ nɛ kɛ nɛ tɛ zɔ ma, do zele ma ni.

³⁴ Mba gɔ, Davidi ngboo ni, a ku zi dɛ fi nza i, ɔ nɛ kɛ 'da Yezu ni gɔ. Nɛ nde a tɔa na: ‘Nwa Gale tɔa hã Nwa 'da mi na, mɔ té hã mɔ dúngú tɛ ngɔ ngawili kɔ̃ mi,

³⁵ gbaa na mi a owi sɛnɛ mɔ nù, nɛ mɔ ma wa ti tambala nyanga mɔ.’

³⁶ “Kɔ ma wia na, nɛ obe Israɛlɛ vɛ̃, nɛ ĩ́ ngboo na, Yezu kɛ nɛ bɛ̃lɛ̃ a ngɔ finda te ni, Gale ia a do Nwa, nɛ a a Mɛsiya.”

³⁷ Kɔ ogili winɔ wa nɛa we zele we ni, nɛ sila wa gbini do 'bako, nɛ wa aka Petro do tala owi nɛ tonɔ na: “Onyae, lɛ nɛ dɛ nɛ nɛ nde?”

³⁸ Nɛ Petro gese hã wa na: “Nɛ kífí sila nɛ, nɛ wele do wele kpá batisimɔ do zu li Yezu Kristo, takɔ Gale fo 'dã mɛnɔ zu nɛ, nɛ a hã Hi Wi Santo hã nɛ.

³⁹ Mba gɔ, Nwa Gale 'da lɛ kpua zɛ́ mbuli gɛ hã nɛ do benɔ 'da nɛ, nɛ a kpo 'bɔ ma hã winɔ kɛ wa ɔ ndũu ni. A kpua ma hã winɔ vɛ̃ kɛ a sa sɛ mɔ hã wa ni.”

⁴⁰ Nɛ Petro tɔ̃a 'bɔ ogele lɛnggɛ hã wa wena, we kpãlã sila wa, takɔ wa kɔ̃ zu li Yezu. A na: “Nɛ yú tɛ nɛ sanga owinɔ kɛ wa yɔa wala ia gɛ, kɔ nɛ kpasa!”

⁴¹ Nɛ gba gili owele wa zila we nu Petro, nɛ wa kɔ̃a, nɛ wa kpa batisimɔ. Do ngba soe ni, nɛ owele kɔlɔ do koto talɛ wa lia sanga owi kɔ̃a wenɔ.

⁴² Nɛ wa ba tɛ wa vɛ̃ we zele bia wenɔ kɛ owi nɛ tonɔ wa be ni. Nɛ wa tɛ mba li ngba wa do onya wa wi kɔ̃a wenɔ 'da fala fai. Nɛ wa nyɔngɔ mɔ do sambala Gale fala nɛ kpo.

Tɛlɛ tɛ dungu 'da owi kɔ̃a wenɔ do ngba wa

⁴³ Owi nɛ tonɔ wa dɛ zi ogba sɔ̃ mɔ do oɔngbamɔ wena, nɛ owinɔ vɛ̃ wa zi do kili.

⁴⁴ Nɛ owinɔ kɛ wa kɔ̃a zu li Yezu ni, wa zi vɛ̃ do sila wa kpo, nɛ wa mba li mɛnɔ 'da wa vɛ̃ kpo.

⁴⁵ Wa be gole mɛnɔ 'da wa, nɛ wa kala mbili nɛ, nɛ wa kɛ̃ ma dɛ kɔ̃ ngba wa, nɛ wele do wele kpa kɛ ma wia do a ni.

⁴⁶ Nɛ tũ kpo kpo, wa mba zi li ngba wa kɔ Tɛmpɛlo, we dɔnggɔ Gale. Nɛ wa mba 'bɔ li ngba wa kɔ tɔanɔ 'da wa, nɛ wa nyɔngɔ mɔ fala nɛ kpo do yangga, nɛ wa bá tɛ wa ngɔ ngba wa gɔ.

⁴⁷ Wa tɛ dɔnggɔ Gale, nɛ owinɔ vɛ̃ wa kɔ̃a gɛnɛ wa wena. Nɛ tũ kpo kpo Nwa Yezu dɛ na, owinɔ kɛ wa kɔ̃a, nɛ wa kpasa ni wa dɛlɛ dɛ dati fai.