Owi Nɛ Tonɔ 19 - WE NU GALE 1995

Polo hɔa 'bɔ tɛ Efɛzɛ

¹ 'Da fala kɛ Apolosi zi a tɛ Konntɛ i ni, nɛ nde Polo la zi do ngɔ nù Azi, nɛ a hɔ tɛ Efɛzɛ, nɛ a kpa ombe wi kɔ̃a wenɔ di ni,

² nɛ a aka wa na: “'Da fala kɛ nɛ kɔ̃a zu li Yezu ni, nɛ nɛ kpa Hi Wi Santo nde?” Nɛ wa gese hã a na: “Lɛ zèlè mbe fala kpo na, Hi Wi Santo boe ni gɔ.”

³ Nɛ Polo aka 'bɔ na: “Ní a nɛ kpa batisimɔ ki nge nde?” Nɛ wa gese hã a na: “Lɛ kpa batisimɔ kɛ Yoanɛ hã zi hã winɔ ni.”

⁴ Nɛ Polo tɔ̃ hã wa na: “Yoanɛ hã zi batisimɔ hã winɔ kɛ wa kɔ̃a we kifi sila wa ni. Nɛ a tɔ̃ zi hã wa na, wa kɔ̃ zu li wi kɛ a nɛ tɛ 'do ɛ gɛ ni. Nɛ wi ni a Yezu.”

⁵ Kɔ Owi kɔ̃a wenɔ wa nɛa we zele ni, nɛ wa kpa batisimɔ do zu li Nwa Yezu.

⁶ Nɛ Polo a kɔ̃ ɛ ngɔ wa, nɛ wa kpa Hi Wi Santo. Nɛ wa ma ngɔ wele gele nu kɛ wa yàmbàlà ma dati gɔ ni, do gba olo nu Gale.

⁷ Winɔ ni wa zi vɛ̃ a Owi wili 'bu ngɔ wa bɔa.

⁸ Nɛ 'do zɛkɛ talɛ vɛ̃, Polo zi tɛ nɛ kɔ tɔa mbula, tɛ be we hã winɔ do sila a kpo. A be zi a we ngɔ dɛa to nwa 'da Gale, nɛ a dɛ nganda wena na, winɔ wa kɔ̃ gɛnɛ we ɛ be hã wa ni.

⁹ Nɛ ombe nɛ wa dɛa nga zu, nɛ wa bɛ̃ we nu Polo ni. Nɛ wa tɛ 'danga gulu we 'da Nwa Yezu dɛ li gili winɔ. Nɛ Polo la wa dɛ di ni, nɛ a kala wi kɔ̃a wenɔ dɛ tɛ̃ a, nɛ tũ kpo kpo, a zi tɛ be we hã wa tɛ kɔ tɔa kɛ Tiranusi be zi do mɛnɔ 'da a ni.

¹⁰ A dɛa na mɛ ni gbaa 'do sabɛlɛ bɔa. Nɛ owinɔ ngɔ nù Azi vɛ̃, Oyudanɔ do ogele winɔ wa zila we 'da Nwa Yezu.

Benɔ 'da Seva

¹¹ Do 'da fala ni, Gale dɛ zi gba sɔ̃ mɔ do wala 'da Polo wena.

¹² Ma kɛ ombe winɔ wa kala otulu dili do li wi, do oɛ̃a nu tulunɔ kɛ Polo dɛa zi do to ni, nɛ wa nɛ nɛ hã Owi zɛlɛnɔ, nɛ zɛlɛmɛnɔ 'da wa ma e, nɛ o'dã hi winɔ wa hɔ nza kɔ wa.

¹³ Nɛ ombe Yudanɔ, kɛ wa yɛnggɛ zi we fo o'dã hi winɔ kɔ Owi zɛlɛnɔ ni, wa yamba zi tɛ mɛ 'bɔ we sa li Yezu dɛ ngɔ Owi zɛlɛnɔ kɛ wa do 'dã hi wi kɔ wa ni. Nɛ wa tɔ̃ hã 'dã hi winɔ ni na: “Mi tɔ̃ hã mɔ do zu li Nwa Yezu, kɛ Polo be we 'da a gɛ na, mɔ hɔ́!”

¹⁴ Winɔ wa dɛ zi na mɛ ni, wi a obenɔ 'da Seva, kɛ a a mbe kpo sanga onwa nganganɔ 'da Oyudanɔ ni. Wa a obe sambo.

¹⁵ Nɛ 'dã hi wi gese hã wa na: “Mi ĩ ti Yezu, nɛ mi ĩ 'bɔ ti Polo, nɛ nde mi ĩ̀ ti nɛ gɔ. Nɛ a owio nde?”

¹⁶ Nɛ wi do 'dã hi wi kɔ ɛ ni, a te ngɔ wa do ngawi 'da a vɛ̃, nɛ a zɛ wa gbaa, nɛ a e dani tɛ wa, nɛ wa yu do wila tɛ wa.

¹⁷ Nɛ winɔ tɛ Efɛzɛ vɛ̃, Oyudanɔ, do ogele winɔ wa zila we nɛ, nɛ kili ba wa wena. Nɛ wa dɔngga zu li Nwa Yezu dɛ dati.

^18-19 Nɛ gili winɔ kɛ wa kɔ̃a zu li Yezu ni, wa gbala tɛ wa ngɔ mɔ sɔ̃nɔ wa dɛ zi ni. Nɛ wa tɛa do mbɛti mɔ sɔ̃nɔ 'da wa, nɛ wa dɔ ma dɛ li winɔ vɛ. Mbɛtinɔ ni zi a mbɛti olo 'bu koto mɔlɔ.

²⁰ Na mɛ ni, nɛ we 'da Nwa Yezu zi do ngawi, nɛ ma yɛ'ba.

Wa dɛa mbuma tɛ Efɛzɛ

²¹ 'Do mɛnɔ ni, nɛ Polo kɔ̃a zi na, ɛ 'bili do ngɔ nù Masedɔanɛ do Akai, nɛ ɛ la dɛ Yeruzalɛmɛ. Nɛ a tɔ̃ na, ɛ hɔ i mɔ do'do, nɛ ɛ hɔ sɛ 'bɔ tɛ Roma.

²² Nɛ a tumba Timote do Erastɛ kɛ wa gala a ni, tɛ Masedɔanɛ i dati. Nɛ a 'bana kɛ 'da a ngɔ nù Azi we 'do be kɔ̃ tũ sĩ.

²³ Nɛ do 'da fala ni, nɛ balia tia kɔ le Efɛzɛ, ngɔ we 'da Nwa Yezu.

²⁴ Mbe wi dɛ dula kpo, li a a Demetriusi, a dolo zi ohi tɔa sambala 'da wuko gale kɛ li a a Artemisi ni. Nɛ winɔ wa oso ma kɔ̃ a wena, nɛ mbili nɛ gala wi tonɔ 'da a.

²⁵ Nɛ a mba li wi tonɔ 'da a, do ongba a wi dɛ dulanɔ vɛ, nɛ a tɔ̃ hã wa na: “Aa mbaanɔ, nɛ ĩ na, lɛ kpasa we mbili toe gɛ.

²⁶ Kɔ nɛ zila lɛnggɛ mɛ kɛ wi li a a Polo, a dɛ gɛ, nɛ nɛ zɔa 'bɔ do li nɛ. A tɔ̃a na, galenɔ kɛ wele wa dɛ do kɔ̃ wa ni, wa a gbãlã we gale gɔ. Nɛ winɔ wena wa kɔ̃a we nu a ni. Nɛ a bè we ni dɛ Efɛzɛ gɛ iko gɔ, nɛ nde a bia ma ngɔ nù Azi vɛ.

²⁷ Nɛ ma fa we 'danga toe 'da lɛ, nɛ ma 'danga 'bɔ dɔ̃lɔ̃ li tɔa sambala 'da Artemisi, gale wuke kɛ winɔ ngɔ nù Azi, do wanɔ nyanga nza gɛ vɛ wa dɔnggɔ a ni. Nɛ gã gale 'da lɛ sɛ 'bɔ do dĩ li owinɔ bina.”

²⁸ Kɔ owinɔ wa nɛa we zele ni, nɛ zã wa nɔ̃lɔ̃ wena. Nɛ wa he mɔ na: “Dɔ̃lɔ̃ li ɔ do Artemisi, gã gale 'da Oefɛzɛ!”

²⁹ Nɛ wa fi balia, nɛ ma yɛ'ba kɔ le vɛ. Nɛ winɔ ni, wa kala Gayusi do Aristarkɛ, Omasedɔanɛnɔ kɛ Polo yɛnggɛ do wa ni, nɛ wa la do wa zununu dɛ li gba fanda dɛa sa i.

³⁰ Polo nɛa we zɔ ni, nɛ a nɛ we yolo ti gba gili winɔ ni, nɛ Owi kɔ̃a wenɔ wa bɛ na, a tɛ nɛ̀ gɔ.

³¹ Nɛ ombe gã wi ngɔ nù Azi, kɛ wa kɔ̃a zi gɛnɛ Polo kɔ̃a ni, wa tumba tɛ mɛ 'bɔ to hã a na, a tɛ hɔ̀ li gba fanda i gɔ.

³² Ĩ na, 'da fala ni, owinɔ wa mba zi li ngba wa ni, wa zélé zi ngba wa gɔ. Wele do wele he mɔ ɔ nɛ kɛ zã a kɔ̃a ni. We kɛ winɔ wena wa ĩ̀ zi ti gulu mba li ngba wi kɛ wa mba ni gɔ.

³³ Nɛ Oyudanɔ wa hɛ̃lɛ̃ mbe wele kpo, li a a Alɛkzandrɛ na, a hɔ dɛ dati winɔ, kɔ a be gulu we ni hã wa. Nɛ Alɛkzandrɛ wia kɔ̃ ɛ hã winɔ we tɔ̃ we hã wa.

³⁴ Kɔ gili winɔ ni wa nɛa we zɔ na, a a Yuda ni, nɛ wa mba kpo, nɛ wa he mɔ na: “Dɔ̃lɔ̃ li ɔ do Artemisi, gã gale 'da Oefɛzɛ!” Wa hia mɔ ní gbaa 'do sa bɔa.

³⁵ Nɛ 'do nɛ, nɛ wi kɔmɔ mbɛtinɔ kɔ le ni tɛa, nɛ a ga winɔ tɛ tɔ̃ na: “Nɛ, Oefɛzɛ, nɛ ĩ vɛ na, gã le Efɛzɛ a ma fɔmɔ tɔa sambala 'da gale Artemisi, do hi a kɛ ma yula ngɔ i, nɛ ma te dɛ nù nga ni.

³⁶ Wele wè tɛ kafa ma gɔ. Gɛnɛ kɔ na mɛ ni, ma wia na, ngɔ tɛ nɛ gɛ, nɛ nɛ tɛ dɛ̀ yia dɛa mɔ gɔ.

³⁷ Nɛ kala sɔ winɔ gɛ, nɛ nde wa 'dàngà mɔ kɔ tɔa galenɔ gɔ, nɛ wa tɔ̃̀ 'bɔ 'dã we hã gale 'da lɛ gɔ.

³⁸ Kɔ fala kɛ Demetriusi do wi dɛa tonɔ 'da a, wa kɔ̃ we da wele nde, nɛ wa ĩ na, kɔ̃ tũ da do wenɔ boe, nɛ Owi 'bili wenɔ wa 'bɔ boe.

³⁹ Kɔ fala kɛ nɛ ɔ do mbé we nde, nɛ nɛ wele sɛ ma do 'da fala kɛ lɛ mba do li ngba lɛ fai ni.

⁴⁰ Mba gɔ, balia lɛ fi kɔ le gɛ, Oroma wa wia we fi ngbangga zu lɛ we nɛ. We kɛ gulu mba li ngba wi gɛ sĩ bina. Wele aka lɛ we nɛ, nɛ nde lɛ wé sɛ we tɔ̃ gulu nɛ do dia nɛ gɔ.”

⁴¹ A tɔ̃a wenɔ ni do'do, nɛ a gese gba gili winɔ.