Owi Nɛ Tonɔ 18 - WE NU GALE 1995

Polo hɔa tɛ Korintɛ

¹ 'Do nɛ, nɛ Polo yula tɛ Atɛnɛ, nɛ a la dɛ Korintɛ.

² Nɛ a kpa ngba a do mbe be Yuda i mɔ, li a a Akilasi. Wa kua a ngɔ nù Pɔ̃, nɛ nde a yula Itali fala nɛ kpo do kɛnɛ a Prisilɛ. Wa la ngɔ nù Itali, we kɛ Klodɛ, gã nwa ngɔ nù Roma ba zi nu a na, Oyudanɔ vɛ wa fo tɛ wa Roma do'do. Nɛ Polo nɛa we zɔ wa.

³ Nɛ́ kɛ Polo zi a wi dɛ tulu tande ɔ nɛ wa ni, nɛ a ɔa dɛ 'da wa ni, nɛ a dɛa toe fala nɛ kpo do wa.

⁴ Nɛ pɔsɔ kpo kpo, do tũ ɔmɔ tɛ winɔ, nɛ Polo tɛ be we nu Gale kɔ tɔa mbula, takɔ Oyudanɔ do Ogrɛkɛnɔ wa kɔ̃ zu li Yezu.

⁵ Nɛ 'da fala Silasi do Timote wa yula tɛ Masedɔanɛ i, kɔ wa hɔa ni, nɛ Polo ba tɛ̃ a vɛ̃ tɛ be we hã Yudanɔ. Nɛ a tɛ be hã wa na, Yezu a Mɛsiya kɛ Gale tumba a.

⁶ Nɛ Yudanɔ wa bɛ̃a we nu a do'do, nɛ wa dã a. Ma kɛ a yaka tulu tɛ̃ a, nɛ a tɔ̃ a hã wa na: “Fala kɛ nɛ yɔ wala 'da Gale, nɛ nde ma zɔ̀ mi gɔ. Mɛ a we 'da nɛ zu nɛ kpo. Kɔ mi nɛ la kɛ 'da mi, we be we hã wanɔ kɛ wa a Oyuda gɔ ni.”

⁷ Nɛ a yula di ni, nɛ a nɛ, nɛ a ɔ 'da Titiusi Yustusi, kɛ a a wi dɔnggɔ Gale, nɛ tɔa 'da a dɛ kɛ zã tɔa mbula ni.

⁸ Nɛ Krispusi, nwa ngɔ tɔa mbula ni, do Owi nu fɛlɛ a vɛ, wa kɔ̃a zu li Nwa Yezu. Nɛ gba gili Owi Konntɛ, kɛ wa zila bia we 'da Polo ni, wa kɔ̃a, nɛ wa kpa batisimɔ.

⁹ Mbe tũ kpo, nɛ Nwa Yezu tɔ̃a hã Polo kɔ yalɛ na: “Mɔ tɛ dɛ̀ kili gɔ, nɛ mɔ tɛ kpè nu mɔ gɔ, mɔ wélé we fai.

¹⁰ Mba gɔ, mi sɛ do mɔ boe. Wele wé sɛ we dɛ mɔ 'danga gɔ. We kɛ gba gili winɔ kɔ le gɛ, wa a winɔ 'da mi.”

¹¹ Nɛ Polo ɔa dɛ Korintɛ ni sabɛlɛ kpo do zɛkɛ gazɛlɛ, tɛ be we nu Gale hã owinɔ.

¹² Nɛ do 'da fala wa ia Galioni do wi fɔmɔ nù Akai ni, nɛ Yudanɔ wa mba nu wa kpo, nɛ wa ba Polo, nɛ wa nɛ do a nu tɔa 'bili we i.

¹³ Nɛ wa tɔ̃ dɛ ngɔ a na: “Wi gɛ kɔ̃a we dɛ na, winɔ vɛ̃ wa dɔnggɔ Gale do tɛlɛ tɛ kɛ ma wè do mbula 'da lɛ gɔ ni.”

¹⁴ Kɔ Polo nɛa we gese nu nɛ, nɛ Galioni tɔ̃ hã Oyudanɔ na: “Aa nɛ, Oyudanɔ gɛ, ɔ do kɛ wi gɛ a dɛ sɔ 'dã mɔ, tabi a gbini sɔ mbula, nɛ mi zele sɔ nɛ.

¹⁵ Kɔ nɛ́ kɛ nɛ ba kafi ngɔ owila we, do ngɔ oli wele, do ngɔ gɛlɛ mbulanɔ 'da nɛ ni, mɛ a we 'da nɛ. Mi kɔ̃́ sɛ we fi tɛ mi kɔ ki ni gɔ.”

¹⁶ Nɛ Galioni ndaka wa nu tɔa 'bili we do'do.

¹⁷ Nɛ owinɔ ni wa ba Sostɛnɛ, nwa ngɔ tɔa mbula, nɛ wa zɛ a dɛ nu tɔa 'bili we ni, nɛ Galioni lènggè nɛ gɔ.

Polo kpula tɛ̃ ɛ dɛ Antiɔsɛ

¹⁸ Nɛ Polo ɔa dɛ Konntɛ ni 'do a nyɛlɛ wena. Nɛ 'do nɛ, nɛ wa do Prisilɛ, do Akilasi, wa kulu ngɔ sanga onya wa wi kɔ̃a wenɔ, we ba masua, we la dɛ Siri. Dati la mɔ́ wa, nɛ Polo nɛa tɛ Sankre, nɛ a kpolo mili zu a do'do, we kɛ a kpua mbulu hã Gale.

¹⁹ Nɛ wa la ni gbaa, nɛ wa hɔ Efɛzɛ, nɛ Polo la Akilasi do Pnsilɛ, nɛ a nɛ kɔ tɔa mbula, nɛ a wila we do Oyudanɔ.

²⁰ Nɛ wa aka a na, a ɔ mbe do lo gbaa sɛ. Nɛ nde a kɔ̃̀ gɔ,

²¹ nɛ a tɔ̃ hã wa na: “Gale kɔ̃, nɛ mi kpolo sɛ tɛ mi 'da nɛ nga.” Nɛ a la, nɛ a kũ masua tɛ Efɛzɛ we nɛ dɛ Sezare.

²² A hɔa Sezare i, nɛ a zĩ nù, nɛ a nɛ we fana Owi Kristonɔ tɛ Yeruzalɛmɛ. 'Do nɛ, nɛ a la dɛ Antiɔsɛ.

²³ A ɔa Antiɔsɛ i gbaa, nɛ a kulu ngɔ, nɛ a la. Nɛ a yɛnggɛ do kɔ lenɔ ngɔ nù Galati do Frizi, nɛ a nganda sila Owi Kristonɔ kɔ kɔ̃a we 'da wa.

Apolosi hɔa tɛ Efɛzɛ do Korintɛ

²⁴ Do 'da fala ni, nɛ mbe be Yuda kpo, li a a Apolosi, a hɔa tɛ Efɛzɛ. Wa kua zi a tɛ Alɛkzandri, nɛ a ĩ zi ti wele we do gulu nɛ, nɛ a ĩ 'bɔ ti 'Buki 'da Gale de wena.

²⁵ Wa bia zi wenɔ 'da Nwa Yezu hã a, nɛ a ĩ 'bɔ ti nɛ de wena, nɛ a gba zi nu nɛ do yangga vɛ̃. Nɛ a tɔ̃ zi we ngɔ Yezu do wala olo nɛ. Nɛ nde a ĩ zi tati a ti batisimɔ 'da Yoanɛ iko.

²⁶ Nɛ a ma ngɔ be we kɔ tɔa mbula do sila a kpo. Kɔ Pnsilɛ do Akilasi wa nɛa we zele bia we 'da a, nɛ wa kpa a si do a, nɛ wa be ngbongbo wala 'da Gale hã a.

²⁷ Nɛ 'do nɛ, nɛ Apolosi kɔ̃a we nɛ tɛ Akai. Nɛ onya a wi kɔ̃a wenɔ, wa kɔ̃a. Nɛ wa kɔmɔ mbɛti hã onya wa wi kɔ̃a wenɔ i mɔ ni, takɔ wa dɛ gɛnɛ a do dia nɛ. Apolosi hɔa tɛ Akai i, nɛ a kpa owinɔ kɛ Gale bia dia zã hã wa, nɛ wa kɔ̃a zu li Yezu ni, nɛ a gala wa wena.

²⁸ Mba gɔ, a bia dɛ gbali Yudanɔ vɛ̃ na, wa yɔa wala yɔa. Nɛ yolo dɛ ngɔ wenɔ kɔ 'Buki 'da Gale ni, nɛ a bia hã wa na, Yezu a Mɛsiya. Nɛ wele kpo bà 'bɔ kafi nu a gɔ.