Owi Nɛ Tonɔ 17 - WE NU GALE 1995

Polo do Silasi wa hɔa tɛ Tɛsalonikɛ

¹ Nɛ wa la do kɛ Amfipolisi do Apoloni, nɛ wa hɔ Tɛsa-lonikɛ. Nɛ nde Oyudanɔ wa zi do tɔa mbula 'da wa di ni boe.

² Nɛ Polo nɛa kɔ tɔa mbula ni, ɔ nɛ kɛ a dɛ ma fai ni. Nɛ kɔ pɔsɔ talɛ dɛ 'do ngbɛ ɛ, do tũ ɔmɔ tɛ winɔ, nɛ a tɔ̃a lɛnggɛ ngɔ wenɔ kɔ 'Buki 'da Gale do winɔ di ni ni.

³ Nɛ yolo dɛ ngɔ wenɔ kɔ 'Buki ni, nɛ a be we 'da Mɛsiya hã wa na, a wia tɛ kpa zɛlɛ tɛ, nɛ a fe, nɛ 'do nɛ, nɛ a za'da nza kɔ fio ni. Nɛ a tɔ̃ hã wa na: “Mɛsiya ni, wi a Yezu, kɛ mi be we 'da a hã nɛ gɛ.”

⁴ Nɛ ombe sanga winɔ ni, wa kɔ̃a bia we 'da Polo do Silasi, nɛ wa mba do wa. Nɛ gili Ogrɛkɛnɔ kɛ wa dɔnggɔ Gale dɔngga ni, wa kɔ̃a tɛ mɛ 'bɔ zu li Yezu, mba do ombe gili wukonɔ kɛ wa a gã wi ni.

⁵ Kɔ Oyudanɔ wa nɛa we zɔ ni, nɛ wa dɛ sɛnɛmɔ. Nɛ wa ngɛmɛ o'dã zu wele kɛ wa yɛnggɛ do li wala iko ni, nɛ wa mu wa dɛ tɛ winɔ, nɛ wa ma ngɔ fi balia kɔ le. Nɛ wa hɔa nu tɔa 'da Yasoni we fa Polo do Silasi, takɔ wa kala wa, hã winɔ wa 'bili we 'da wa.

⁶ Nɛ nde wa kpà wa tɛ 'da Yasoni ni gɔ. Nɛ wa kala Yasoni do ombe wi Kristonɔ, nɛ wa nɛ do wa dɛ dati ogã winɔ ngɔ le ni. Nɛ wa he mɔ na: “Owinɔ gɛ wa 'danga lenɔ vɛ̃! Kɔ di dɔ̃ ni, wa hɔa le gɛ!

⁷ Nɛ Yasoni kpɔa kɔ̃ ɛ ti wa, nɛ wa ɔ 'da a! Kɔ winɔ gɛ vɛ̃ wa dɛ mɔ kɛ mbula 'da gã nwa ngɔ nù Roma bɛ̃a ni. We kɛ wa tɔ̃ na, mbé gele nwa boe, li a a Yezu.”

⁸ Nɛ we ni ma nɔ̃lɔ̃ zã ogili winɔ, do ogã winɔ ngɔ le ni.

⁹ Nɛ wa wia mbili hã Yasoni do ongba a, nɛ wa futa, nɛ wa da kɔ̃ wa tɛ wa.

Polo do Silasi wa hɔa tɛ Bere

¹⁰ Tũi nɛa we tũ nɛ, nɛ Owi Kristonɔ di ni ni, wa kã Polo do Silasi, nɛ wa la wa tɛ Bere. Wa nɛa we hɔ i mɔ, nɛ wa nɛ kɔ tɔa mbula 'da Yudanɔ.

¹¹ Nɛ nde Oyudanɔ di ni ni, wa zi do dia sila nɛa ngɔ wanɔ tɛ Tɛsalonikɛ i ni, nɛ wa zila we nu Gale do dia nɛ. Tũ kpo kpo, wa tɛ yambala 'Buki 'da Gale, takɔ wa ĩ na, wenɔ kɛ Polo be ni tabi a gbãlã we nde.

¹² Nɛ gba gili wele sanga wa ni, wa kɔ̃a zu li Yezu. Nɛ sanga Ogrɛkɛnɔ, mbe owukonɔ kɛ wa a gã wi ni, mba do wi wilinɔ wa kɔ̃a tɛ mɛ 'bɔ.

¹³ Kɔ Oyudanɔ tɛ Tɛsalonikɛ i wa nɛa we zele na, Polo tɛ be we nu Gale tɛ Bere ni, nɛ wa yolo i mɔ, nɛ wa tɛ, nɛ wa 'danga zu winɔ, tɛ mu wa.

¹⁴ Kɔ Owi kɔ̃a wenɔ tɛ Bere wa nɛa we zɔ ni, nɛ wa tombo mbe winɔ we kã Polo si nu gba lì i na, a la. Nɛ nde Silasi do Timote wa 'bana dɛ Bere ni.

¹⁵ Nɛ winɔ kɛ wa zi tɛ kã Polo ni, wa kã a ni gbaa, nɛ wa e a tɛ Atɛnɛ. Wa hɔa i mɔ, nɛ Polo gese wa. Nɛ a tombo wa hã Silasi do Timote na, wa tɛ́ dɔ̃, kɔ wa kpa ɛ sɛ.

Polo hɔa tɛ Atɛnɛ

¹⁶ 'Da fala kɛ Polo tɛ 'bɔ 'da Silasi do Timote tɛ Atɛnɛ i ni, nɛ a zɔa, nɛ nde okpikima wa dunu 'da le ni wena. A nɛa we zɔ ni, nɛ ma 'danga tɛ̃ a wena.

¹⁷ Nɛ a nɛa kɔ tɔa mbula i, takɔ a wele we do Oyudanɔ, do ogele winɔ kɛ wa dɔnggɔ Gale ni. Nɛ tũ kpo kpo, a nɛ 'bɔ tɛ li gba fanda we wele we do owinɔ vɛ̃ a kpa wa ni.

¹⁸ Nɛ ombe wi be we ngɔ linggamɛ 'da Oepikurinyɛ, do wanɔ 'da Ostoisinyɛ, wa wele tɛ mɛ 'bɔ we do a. Nɛ ombe wa tɛ tɔ̃ na: “Wi dɛ nu we gɛ kɔ̃a we tɔ̃ na ge nde?” Nɛ ombe wa na: “Ma ɔ nɛ kɛ a be we 'da ombe gele gale ni.” Wa tɔ̃ na mɛ ni, we kɛ Polo be zi we 'da Yezu, do we za'da nza kɔ fio 'da a ni.

¹⁹ Nɛ wa kpa a, nɛ wa nɛ do a kɔ mba li ngba wi kɛ li nɛ a Areopazɛ ni, nɛ wa aka a na: “Mɔ wia we tɔ̃ mbe lɛnggɛ ngɔ mbé bia we 'da mɔ, kɔ lɛ ĩ gulu nɛ nde?

²⁰ We kɛ zu lɛ ɔ tɛ wenɔ mɔ tɔ̃ gɛ yii iko, kɔ lɛ kɔ̃a we ĩ gulu nɛ.”

²¹ (Ĩ na, Owi Atɛnɛ do ogɛnɛnɔ kɔ le ni, wa nɛ zi di ni wena, nɛ wa dungu gbaa, tɛ zele mbé bia wenɔ ni, do wele we si ngɔ ma iko.)

²² Nɛ Polo kulu ngɔ tɛ sanga mba li ngba wi Areopazɛ ni, nɛ a tɔ̃ na: “Nɛ, owi Atɛnɛ, mi zɔa na, nɛ ba tɛ nɛ hã ogalenɔ wena.

²³ Mba gɔ, 'da fala mi yɛnggɛ zi kɔ le 'da nɛ gɛ, nɛ mi zɔa okpikimanɔ kɛ nɛ dɔnggɔ wa ni. Nɛ mi zɔa mbe gbagala, nɛ nde wa kɔma tɛ nɛ na: ‘Fala dɔnggɔ do gale, kɛ lɛ ĩ̀ ti a gɔ’ ni. Kɔ ɔ nɛ kɛ nɛ dɔnggɔ mɔ kɛ nɛ ĩ̀ ti ma gɔ ni,

²⁴ mi kɔ̃a we be gulu we 'da Gale, kɛ a dɛa nùi do mɛnɔ nyanga nza gɛ vɛ ni hã nɛ. A a Nwa ngɔ li nza, do nùi, nɛ a ɔ́ kɔ tɔa kɛ Owele wa dɛa do kɔ̃ wa ni gɔ.

²⁵ Nɛ a zɔ̀lɔ̀ mɔ kpo na, Owele wa hã mɔ hã a gɔ. A hã kpasi, do bũ a ama, do tala ogele mɛnɔ hã winɔ vɛ.

²⁶ Gale dɛa wele kpo, nɛ yolo dɛ ngɔ wi ni, nɛ a dɛa owinɔ vɛ na, wa yɛ'bɛ ngɔ nù gɛ. Nɛ a wia kɔ̃ tũ dungu nza 'da winɔ, nɛ a be falanɔ kɛ wa nɛ ɔ do ma ni.

²⁷ A dɛa na mɛ ni, takɔ wa fa we ĩ ti a. Nɛ wa fa a ɔ nɛ kɛ Owi ua linɔ wa tamba do mɔ ti wa ni. We kɛ do gbãlã we, Gale nyɛ̀lɛ̀ do lɛ gɔ.

²⁸ Ma ɔ nɛ kɛ mbe wele kpo tɔ̃a zi na: ‘Kpasi 'da lɛ, do ngawi 'da lɛ, do dungu nza 'da lɛ dɛ kɔ̃ a’ ni. Ma kɛ ombe kɔ Owi kɔmɔ zumanɔ 'da nɛ wa kɔma zi na: ‘Lɛ tɛ mɛ 'bɔ a benɔ 'da a.’

²⁹ Kɔ ɔ nɛ kɛ lɛ a benɔ 'da Gale ni, lɛ wè tɛ lengge na, a wia kɔ̃ do kpikima kɛ wele dɛa ma do mɔ mbali, tabi do mɔ bolo, tabi do ta ni gɔ. A wè kɔ̃ do mɔ kɛ wele dɛa ma do kɔ̃ ɛ, do hã zã mɔ́ ɛ ni gɔ.

³⁰ Gale lénggé 'bɔ do ngba soenɔ kɛ ta zu winɔ zɛ́ ngɔ a bina ni gɔ. Nɛ nde ngangga gɛ, a sa mɔ hã winɔ ngɔ nù gɛ vɛ́ na, wa kifi sila wa.

³¹ Nɛ a ia ngba soe kpo, takɔ a 'bili sɛ we 'da winɔ do bɔlɔ nɛ. Nɛ nde a saka wi kɛ a nɛ 'bili we 'da winɔ ni ia. Ma kɛ a bia hã winɔ vɛ na, wi ni sɛ a wi 'bili we 'da wa, we kɛ a tunu zi a kɔ fio.”

³² Kɔ wa nɛa we zele kɛ Polo tɛ tɔ̃ we za'da nza kɔ fie ni, nɛ ombe nɛ wa mɔmɔ a, nɛ ombe wa na: “Lɛ zele sɛ 'bɔ tala we nu mɔ gɛ do 'do.”

³³ Na mɛ ni, nɛ Polo la.

³⁴ Gɛnɛ kɔ na mɛ ni, nɛ nde ombe wele wa mba do a, nɛ wa kɔ̃a zu li Yezu. Nɛ sanga winɔ kɛ wa kɔ̃a zi ni, wi a Dɛni, mbe sanga owinɔ kɛ wa mba zi li ngba wa fai tɛ Areopazɛ ni, do mbe wuko kpo li a a Damarisi, do mbe ogele wele.