Owi Nɛ Tonɔ 16 - WE NU GALE 1995

Timote yɛngga do Polo do Silasi

¹ Polo yɛnggɛ gbaa, nɛ a hɔ Dɛrbɛ, do Listrɛ, nɛ a kpa mbe wi kɔ̃a we di ni, li a a Timote. Naa a zi a wi Kristo, nɛ a a boko Yuda. Nɛ nde baa a zi a Grɛkɛ.

² Nɛ owi Kristonɔ tɛ Listrɛ, do wanɔ tɛ Ikoniumɛ ni, wa tɔ̃ zi dia we tɛ Timote wena.

³ Nɛ Polo kɔ̃a na, Timote kã ɛ li wala gɛnɛ 'dɛ ɛ. Nɛ a gɔnɔ a do gaza, we duzu Oyudanɔ di ni ni. We kɛ wa ĩ zi na, baa Timote a Grɛkɛ, nɛ wa gɔ̀nɔ̀ Timote gɔ.

⁴ Nɛ Polo do Silasi wa la do kɔ ole kpo do kpo we be mbulanɔ kɛ owi nɛ tonɔ, do owi zɔ mɔ tɛ eklezia tɛ Yeruzalɛmɛ i, wa ia ni hã wa na, wa dɛ ma.

⁵ Nɛ sila Owi Kristonɔ ma nɔa tɛ kɔ̃a we 'da wa. Nɛ tũ kpo kpo, wa dɛlɛ zi dɛ dati dɛla fai.

Polo zɔa wi Masedɔanɛ kɔ yalɛ

⁶ Nɛ Hi Wi Santo tɔ̃a hã Polo do Silasi na, wa tɛ bè we nu Gale tɛ ngɔ nù Azi gɔ, ma kɛ wa la do ngɔ nù Frizi, do Galati.

⁷ Kɔ wa nɛa we kɔlɔ do nù Mizi, nɛ wa kɔ̃a we la dɛ ngɔ nù Bitini, nɛ Hi Wi 'da Yezu kele wala ti wa na, wa tɛ nɛ̀ i mɔ gɔ.

⁸ Nɛ wa la do ngɔ nù Mizi, nɛ wa hɔ tɛ Troasi, kɛ ma dɛ nu gba lì ni.

⁹ Kɔ wa tɛ ɔ nù do tũi, nɛ Gale bia mɔ li Polo kɔ yalɛ, nɛ a zɔ mbe wi Masedɔanɛ kpo, a yula dɛ dati a, kɔ a tɔ̃ hã a na: “Mɔ ku lì dɛ Masedɔanɛ i, kɔ mɔ gálá lɛ!”

¹⁰ Nɛ 'do yalɛ ni, nɛ lɛ ma ngɔ fa wala we la dɛ ngɔ nù Masedɔanɛ i do ti, we kɛ lɛ ĩ ngboo na, wi a Gale a sa mɔ hã lɛ na, lɛ nɛ we be Dia Sakoe 'da a hã winɔ i mɔ ni.

Lidia, mbe wuko kɔ le Filipɛ kɔ̃a zu li Yezu

¹¹ Nɛ lɛ kũ kɔ masua tɛ Troasi ni, nɛ lɛ la dɛ Samɔtrasɛ. Nɛ lɛ ɔ di ni tũ kpo, nɛ fala nɛ sa nɛ, nɛ lɛ la dɛ Neapolisi.

¹² Nɛ lɛ yula di ni, nɛ lɛ la dɛ Filipɛ, gã le kɛ Oroma wa dɛa zi ma ngɔ nù Masedɔanɛ, nɛ wa ɔ kɔ nɛ ni. Nɛ lɛ ɔa di ni bi sĩ.

¹³ Nɛ do tũ ɔmɔ tɛ wi, nɛ lɛ yula kɔ le ni, nɛ lɛ nɛ dɛ ngu'du lì i, we kɛ lɛ lengge na, lɛ kpa sɛ fala Oyudanɔ wa dɔnggɔ do Gale ni di ni. Lɛ hɔa i mɔ, nɛ lɛ dungu nù, nɛ lɛ ma ngɔ wele we do owukonɔ kɛ wa mba zi li ngba wa di ni ni.

¹⁴ Nɛ mbe kpo sanga wa ni, li a a Lidia, a yula Tiatirɛ, nɛ a zi a wi be gole fila tulu. A zi a wi dɔnggɔ Gale, nɛ Nwa Gale hũi linggamɛ 'da a, takɔ a zele bia we 'da Polo, nɛ a kɔ̃ gɛnɛ nɛ.

¹⁵ Nɛ lɛ hã batisimɔ hã a, do winɔ kɔ tɔa 'da a ni vɛ. Nɛ 'do nɛ, nɛ a tɔ̃ hã lɛ na: “Fala kɛ nɛ ĩ do gbãlã we na, mi kɔ̃a zu li Nwa ngboo nde, nɛ nɛ tɛ́, kɔ nɛ ɔ mbe dɛ 'da mi gɛ!” Nɛ a hɛ̃lɛ̃ lɛ gbaa, nɛ lɛ kɔ̃a.

Polo do Silasi wa lia bɔlɔkɔ

¹⁶ Ngba soe kpo, lɛ zi tɛ nɛ tɛ fala dɔnggɔ do Gale, nɛ lɛ kpa ngba lɛ do mbe boko be ngbá kpo. Nɛ nde a do 'dã hi wi, kɛ ma tɔ̃ gulu mɛnɔ kɛ ma hɔ sɛ 'do gɛ ni. Nɛ a kpa zi mbili hã owele a we nɛ wena.

¹⁷ Nɛ boko be ni tɛa 'dɔkɔlɔ lɛ do Polo, nɛ a tɛ he mɔ na: “Winɔ gɛ, wa a Owi dɛa tonɔ 'da Gale, kɛ a nɛa ngɔ mɛnɔ vɛ ni. Kɔ wa be wala kpasi hã lɛ!”

¹⁸ A dɛ zi na mɛ ni tũ kpo kpo fai, nɛ ma ngba Polo do'do, nɛ a siki tɛ́ a, nɛ a tɔ̃ hã 'dã hi wi kɔ a ni na: “Mi tɔ̃ hã mɔ do zu li Yezu na, mɔ hɔ́ nza kɔ boko be gɛ!” Nɛ 'dã hi wi hɔa nza kɔ boko be ni do ti.

¹⁹ Nɛ Owele boko be ni, wa nɛa we zɔ na, lo kpá sɛ 'bɔ mbé mbili do wala 'da be gɔ ni, nɛ wa ba Polo do Silasi, nɛ wa gbɔtɔ wa la do wa dɛ dati ogã winɔ, tɛ li gba fanda i.

²⁰ Nɛ wa tɔ̃ hã ogã wi 'bili wenɔ 'da Oroma na: “Winɔ nɛ zɔ wa gɛ, wa ndua 'danga zu winɔ kɔ le 'da lɛ ia. Wa a Oyuda,

²¹ nɛ wa be mbula olo yaa wa hã lɛ, kɛ lɛ a Oroma, nɛ lɛ wè tɛ kɔ̃ ma, tabi dɛ ma gɔ ni.”

²² Nɛ gba gili winɔ wa ngbula ngba wa dɛ di ni ni, wa siki li wa dɛ tɛ Polo do Silasi. Nɛ ogã winɔ ni wa ba nu wa na, wa hɔ́lɔ́ tulu tɛ Polo do Silasi, kɔ wa zɛ́ wa do zufa.

²³ Nɛ wa zɛa wa gbaa, nɛ wa a wa bɔlɔkɔ. Nɛ wa tɔ̃ hã wi nu tɔa bɔlɔkɛ ni na, a zɔ mɔ tɛ wa do dia nɛ.

²⁴ Wi ni zila ni, nɛ a a wa kɔ 'bili tɔa kɛ do kɔ nɛ i ni, nɛ a fĩ te nyanga wa.

²⁵ Ma hɔa sanga tũi, nɛ Polo do Silasi wa tɛ sambala Gale do ga zuma tɛ dɔnggɔ a. Nɛ ombe wi bɔlɔkɔnɔ, wa tɛ zele wa.

²⁶ Nɛ fala kpo, nɛ nùi ma tana gbirr nganda wena, nɛ dɛlɛ tɔa bɔlɔkɛ ni ma yaka. Nɛ onu tɔa bɔlɔkɔnɔ vɛ́ ma hũi do ti, nɛ dɔkpɔnɔ nu kɔ̃ Owi bɔlɔkɔnɔ ni ma gɔnɔ vɛ.

²⁷ Nɛ wi zɔ mɔ tɛ nu tɔa bɔlɔkɛ kulu ngɔ li yala. Kɔ a nɛ ka mɔ, nɛ nde nu tɔanɔ vɛ mɛ a hũi nɛ. Nɛ a lengge na, wi bɔlɔkɔnɔ wa yu wá vɛ ia. Nɛ a mana kɔya 'da a we gbɛ tɛ a.

²⁸ Nɛ Polo he mɔ kpu kpu kpu na: “Mɔ tɛ gbɛ̀ tɛ mɔ gɔ, lɛ vɛ boe!”

²⁹ Nɛ wi ni sa mɔ na, wa tɛ do tanda, nɛ a wɛlɛ tɛ̃ a dɛ kɔ tɔa bɔlɔkɔ i, nɛ a gu nù ti Polo do Silasi, nɛ tɛ a tana gbulu gbulu.

³⁰ Nɛ 'do nɛ, nɛ a fo wa dɛ nza, nɛ a aka wa na: “Obaa mi, mɛ mi nɛ dɛ nɛ, takɔ Gale kpasa mi ni a ge nde?”

³¹ Nɛ wa gese hã a na: “Mɔ kɔ̃́ zu li Nwa Yezu, nɛ a kpasa sɛ mɔ do nu fɛlɛ mɔ vɛ.”

³² Nɛ wa bia we 'da Nwa Yezu hã a do winɔ kɔ tɔa 'da a ni vɛ.

³³ Nɛ do kpo kpo tũi ni, wi zɔ mɔ tɛ tɔa bɔlɔkɛ ni kala Polo do Silasi, nɛ a fɔlɔ dani tɛ wa ni. Nɛ wa hã batisimɔ hã a fala nɛ kpo do winɔ kɔ tɔa 'da a ni vɛ.

³⁴ Nɛ a nɛa do Polo do Silasi dɛ kɔ tɔa 'da a i, nɛ a hã nyɔngɔmɔ hã wa. Nɛ wi ni do nu fɛlɛ a, wa dɛa yangga wena, we kɛ wa hɔa wi kɔ̃ Gale ni.

³⁵ Fala nɛa we sa nɛ, nɛ ogã wi Roma kɔ le ni, wa tombo osodanɔ we tɔ̃ hã wi zɔ mɔ nu tɔa bɔlɔkɛ ni na, a dá kɔ̃ a tɛ Polo do Silasi.

³⁶ Nɛ wi ni tɛa, nɛ a tɔ̃ hã Polo na: “Gã winɔ wa tumba na, mi a nɛ nza. Kɔ nɛ hɔ́, hã nɛ si do dia nɛ.”

³⁷ Nɛ Polo tɔ̃ hã winɔ ni na: “Lɛ gɛ, lɛ a obe Roma! Nɛ wa zɛa lɛ dɛ li owinɔ, nɛ wa da lɛ kɔ bɔlɔkɔ, nɛ nde wa 'bìlì we 'da lɛ dati gɔ! Nɛ di dɔ̃ ni, wa kɔ̃a we da kɔ̃ wa tɛ lɛ do usu nɛ nde? Lɛ bɛa! Ma wia na, wa tɛ do tɛ wa, kɔ wa á lɛ nza!”

³⁸ Nɛ osodanɔ wa nɛa, nɛ wa tɔ̃ do nu wa hã gã winɔ. Kɔ wa nɛa we zele na, Polo do Silasi wa a obe Roma ni, nɛ kili ba wa wena.

³⁹ Nɛ wa tɛa, nɛ wa gɔ mbɔkɔ wi kɔ̃ wa, nɛ wa fua wa kɔ tɔa bɔlɔkɛ dɛ nza. Nɛ wa ala nu wa hã wa na, wa la kɔ le 'da lo do'do.

⁴⁰ Polo do Silasi wa hɔa nza kɔ bɔlɔkɛ, nɛ wa la dɛ nu tɔa 'da Lidia, nɛ wa kpa mbe Owi kɔ̃a wenɔ di ni. Nɛ wa tɔ̃ lɛnggɛ we kpãlã sila winɔ ni. 'Do nɛ, nɛ wa la.