Owi Nɛ Tonɔ 14 - WE NU GALE 1995

Polo do Barnabasi wa hɔa tɛ ɛkoniumɛ

¹ Polo do Barnabasi wa hɔa Ikoniumɛ, nɛ wa nɛa kɔ tɔa mbula 'da Yudanɔ, nɛ wa be we. Nɛ kpo mɛ ma dɛa zi wa kɔ gele lenɔ dati ni, ma dɛa 'bɔ tɛ ɛ. Gba gili Yudanɔ, mba do ogele winɔ, wa kɔ̃a zu li Yezu.

² Nɛ Oyudanɔ kɛ wa kɔ̃̀ zi gɔ ni, wa tɔndɔ go'do ogele winɔ na, wa dɛ owi Kristonɔ 'danga.

³ Nɛ Polo do Barnabasi wa ɔ dɛ Ikoniumɛ ni wena. Nɛ wa bia zi we ngɔ dia zã 'da Nwa Gale hã winɔ do kpã sila vɛ. Nɛ wa zi do kɔ̃a we dɛ 'da Gale wena, nɛ Gale hã ngawi dɛ ogba sɔ̃ mɔ, do oɔngbamɔ hã wa we be na, wenɔ kɛ wa be ni, mɛ a gbãlã we.

⁴ Nɛ winɔ kɔ le ni, wa gɔnɔ zi sanga tɛ ngba wa bɔa, ombe wa si 'do Yudanɔ, nɛ ombe nɛ wa si 'do Polo do Barnabasi.

⁵ Nɛ Oyudanɔ ni, do ombe gele winɔ, do Onwanɔ 'da wa, wa fa zi we zɛlɛ tɛ Polo do Barnabasi, nɛ wa kɔ̃a we lo wa do ta, kɔ wa fe.

⁶ Kɔ Polo do Barnabasi wa nɛa we ĩ fala nɛ, nɛ wa yu dɛ ngɔ nù Likaoni, dɛ kɔ le Listrɛ do Dɛrbɛ, do be lenɔ kɛ zã nɛ ni.

⁷ Nɛ wa ma ngɔ be Dia Sakoe 'da Yezu dɛ di ni.

Polo do Barnabasi wa hɔa tɛ Listrɛ

⁸ Wa hɔa tɛ Listrɛ i, nɛ wa kpa mbe wi kala nyanga kpo, a dungu dɛ di ni. Kunda 'da a, mɛ a kunda kɔ zã, a nɛ̀ mbe nɔ fala kpo gɔ.

⁹ Nɛ a dungu tɛ zele wenɔ kɛ Polo tɔ̃ ni. Nɛ Polo soko mɔ tɛ a ni gbaa, nɛ a ĩ kɛ na, a do kɔ̃a we dɛ 'da Gale na, a wia we kpasa ɛ ni.

¹⁰ Nɛ a tɔ̃ hã a dɛ ngɔ na: “Mɔ kúlú ngɔ, kɔ mɔ yóló do nyanga mɔ!” Nɛ wi ni bũlũ dɛ ngɔ, nɛ a zĩ do nyanga a, nɛ a ma ngɔ nɛ nɛ.

¹¹ Kɔ gba gili winɔ wa nɛa we zɔ mɛ Polo dɛa ni, nɛ wa he mɔ do lɛnggɛ Likaoni na: “Ogalenɔ wa kifi Owele, kɔ wa zĩlĩ dɛ 'da lɛ nga!”

¹² Nɛ wa ia li Barnabasi na Zeusi, nɛ wa e li Polo na Hɛrmɛsi, wi nɛ to 'da galenɔ, we kɛ Polo zi a wi wele we.

¹³ Tɔa sambala 'da Gale Zeusi zi do 'do ngba le i. Na mɛ ni, nganga 'da Zeusi kala owili ngɔmbɔ do fulɛlɛ kɛ wa kasa ɔ nɛ kali ni, nɛ a nɛ nɛ dɛ nu ngba le i, nɛ wa do winɔ vɛ, wa kɔ̃a na, wa gbɛ sa'denɔ ni we dɔnggɔ do Barnabasi do Polo.

¹⁴ Kɔ Barnabasi do Polo wa nɛa we zɔ ni, nɛ wa ɛ̃ tulu tɛ wa, nɛ wa wɛlɛ tɛ wa dɛ sanga winɔ i, tɛ he mɔ na:

¹⁵ “Onyae, gulu kɛ nɛ dɛ ni we ge nde? Lɛ a Owele ɔ nɛ nɛ gɛ iko. Lɛ tɛa we be Dia Sakoe 'da Yezu hã nɛ, takɔ nɛ lá fala dɔnggɔ osɛa tenɔ, kɛ ma do gulu nɛ bina ni, kɔ nɛ siki li nɛ dɛ 'da Gale wele kpasi, kɛ a dɛa li nza, do nùi, do gba lì, do mɛnɔ 'dɔ lìnɔ vɛ̃ ni.

¹⁶ Zɛ́ dati, nɛ Gale la winɔ na, wa dɛ mɛnɔ ɔ nɛ kɛ zã wa kɔ̃a ni.

¹⁷ Gɛnɛ kɔ na mɛ ni, nɛ nde Gale zi tɛ be dia zã 'da a hã wa. A tombo kole 'da a dɛ ngɔ nù nga, nɛ a tombo 'bɔ zɔlɔ mi kpalɛ. A dɛ na, nɛ kpa nyɔngɔmɔ fai, nɛ nɛ ɔ do yangga.”

¹⁸ Nɛ nu Polo do Barnabasi gba tɛ bɛ̃ hã winɔ na, wa tɛ gbɛ̀ sa'denɔ ni hã lo gɔ. Nɛ nde wa zèlè wa dɔ̃ gɔ.

¹⁹ Nɛ ombe Oyudanɔ kɛ wa yula Antiɔsɛ tɛ ngɔ nù Pisidi, do tɛ Ikoniumɛ i ni, wa sɔ̃ɛ winɔ dɛ tɛ Polo do Barnabasi. Nɛ wa lua Polo do ta, nɛ wa gbɔtɔ a do nù, nɛ wa e a tɛ 'do ngba le i, we kɛ wa lengge na, a fia ia.

²⁰ Nɛ 'da fala Owi Kristonɔ wa tɛa, kɔ wa ngbula dɛ tɛ a ni, nɛ a kulu ngɔ, nɛ a si dɛ kɔ le i. Nɛ tũi do nɛ ni, nɛ wa kulu ngɔ do Barnabasi, nɛ wa la dɛ Dɛrbɛ.

Polo do Barnabasi wa si dɛ Antiɔsɛ

²¹ Polo do Barnabasi wa hɔa Dɛrbɛ, nɛ wa bia Dia Sakoe 'da Yezu tɛ kɔ le ni, nɛ Owele wena wa kɔ̃a zu U Yezu. Nɛ 'do nɛ, nɛ wa kpolo tɛ wa dɛ Listrɛ, do Ikoniumɛ do Antiɔsɛ tɛ ngɔ nù Pisidi.

²² Nɛ wa nganda sila Owi Kristonɔ di ni ni na, wa 'bana tɛ kɔ̃ zu li Yezu do sila wa kpo. Nɛ wa tɔ̃ hã wa na: “Ma wia na, lɛ winɔ kɛ lɛ kɔ̃a zu li Yezu ni, lɛ kpa ngamɔ ngɔ nùi gɛ gbaa, ndɔti nɛ a kɛ lɛ le sɛ nɛ kɔ le 'da Gale i ni.”

²³ Nɛ kɔ eklezia kpo kpo, wa zi tɛ saka Owi zɔ mɔ tɛ Owi kɔ̃a wenɔ. Nɛ 'do nɛ, nɛ wa bɛ nyɔngɔmɔ, nɛ wa sambala Gale ngɔ winɔ wa saka wa ni, nɛ wa a wa dɛ kɔ̃ Nwa Yezu, kɛ wa kɔ̃a zu li a ni.

²⁴ 'Do nɛ, nɛ wa la do ngɔ nù Pisidi, nɛ wa hɔ Pamfili.

²⁵ Nɛ wa be we nu Gale tɛ Pɛrzɛ. Nɛ wa la dɛ Atali.

²⁶ Wa hɔa i mɔ, nɛ wa kũ masua we si dɛ Antiɔsɛ, le kɛ wa yula zi kɔ nɛ, nɛ Owi Kristonɔ wa aka zi Gale we toe wa yula tɛ dɛ ma ni.

²⁷ Wa hɔa Antiɔsɛ i, nɛ wa mba li Owi Kristonɔ vɛ. Nɛ wa tɔ̃ gulu tonɔ vɛ kɛ Gale dɛa ma do wala 'da wa ni, do tɛlɛ tɛ kɛ a hũi li wala hã winɔ kɛ wa a Oyuda gɔ ni na, wa kɔ̃ tɛ mɛ 'bɔ zu li Yezu ni.

²⁸ Nɛ wa ɔa 'da Owi Kristonɔ di ni 'do nɛ nyɛla.