Owi Nɛ Tonɔ 13 - WE NU GALE 1995

Hi Wi Santo saka Barnabasi do Saulo

¹ Kɔ eklezia tɛ Antiɔsɛ ni, ombe wi gba olo nu Gale do Owi be mɔ wa zi boe. Wi a Barnabasi, Simeoni (kɛ wa sa li a na Tũ wi ni), do Lusiusi (wi Sirɛnɛ), do Manaɛnɛ (kɛ wa dala zi a fala nɛ kpo do Herodɛ, wi fɔmɔ le ni), do Saulo.

² Nɛ ngba soe kpo, nɛ wa bɛa nyɔngɔmɔ, nɛ wa tɛ dɔnggɔ Nwa Gale. Nɛ Hi Wi Santo tɔ̃ hã wa na: “Nɛ lá Barnabasi do Saulo do tɛ ɛ, takɔ wa dɛ toe kɛ mi sa zi mɔ hã wa we nɛ ni.”

³ Nɛ wa bɛa nyɔngɔmɔ, nɛ wa sambala Gale, nɛ wa a kɔ̃ wa zu Barnabasi do Saulo, nɛ wa aka Gale we wa. Nɛ wa hã wala hã wa, nɛ wa la.

Barnabasi do Saulo wa hɔa tɛ Siprɛ

⁴ Nɛ Hi Wi Santo tumba Barnabasi do Saulo, nɛ wa hɔ nu lì tɛ Selesi. Nɛ wa kũ kɔ masua, nɛ wa la dɛ tɛ ngolo lì Siprɛ.

⁵ Wa hɔa tɛ mbe le kpo di ni, li nɛ a Salaminɛ, nɛ wa ma ngɔ be we nu Gale tɛ kɔ tɔa mbula 'da Yudanɔ. Wa zi fala nɛ kpo do Yoanɛ Marko tɛ gala wa.

⁶ Nɛ wa la do ngɔ ngolo lì ni gbaa, nɛ wa hɔ tɛ le Pafosi, nɛ wa kpa mbe be Yuda kpo, li a a Barɛ-Yezu. A a wi sɔ̃, nɛ a ba zi tɛ a ɔ nɛ wi gba olo nu Gale ni.

⁷ A zi a mbe kpo sanga oyali ngba Sɛrgiusi Polusi, wi fɔmɔ lenɔ ngɔ ngolo lì ni. Sɛrgiusi zi a wi hã zã. Nɛ a sa mɔ hã Barnabasi do Saulo, we duzu kɛ a kɔ̃a we zele we nu Gale.

⁸ Nɛ nde Elimasi, wi sɔ̃ɛ ni, a kɔ̃̀ we 'da Barnabasi do Saulo gɔ. Nɛ a fa we 'danga zu gã nwa ni na, a tɛ kɔ̃̀ bia we 'da wa gɔ. (Elimasi a kpo li Barɛ-Yezu do nu Grɛkɛ.)

⁹ Nɛ ngawi 'da Hi Wi Santo dunu kɔ Saulo, kɛ wa sa 'bɔ li a na Polo ni, nɛ a soko mɔ tɛ wi sɔ̃ɛ ni gbo gbo gbo,

¹⁰ nɛ a tɔ̃ hã a na: “Mɔ, wi ɔlɔ winɔ gɛ, mɔ a be 'da Satana, 'dã hã dunu zã mɔ ngurr, nɛ mɔ sɛna bɔlɔ zu dɛa mɔ wena! Mɔ la sɛ fala 'danga we nu Nwa Gale soe ki nge nde?

¹¹ Kɔ mɔ zélé! Ngangga ni, Gale a hã sɛ zɛlɛ hã mɔ. Li mɔ ma lɔ sɛ, nɛ 'do dɔa kɔ̃ tũ, mɔ zɔ́ sɛ wese gɔ.” Nɛ do ti, nɛ li Elimasi tũ mbĩi, nɛ a ma ngɔ tamba kɛ zã a we fa wi 'be nu kɔ̃ a.

¹² Kɔ wi fɔmɔ le nɛa we zɔ ni, nɛ a kɔ̃a zu li Nwa Yezu. Nɛ a ɔngbɔ do wenɔ kɛ a zila ngɔ Yezu ni wena.

Polo do Barnabasi, wa hɔa Antiɔsɛ tɛ ngɔ nù Pizidi

¹³ Polo do winɔ 'da a, wa yula tɛ Pafosi, nɛ wa le masua, nɛ wa la dɛ Pɛrzɛ, tɛ ngɔ nù Pamfili. Wa hɔa i mɔ, nɛ Yoanɛ Marko la wa dɛ di ni, nɛ a kpolo tɛ̃ a dɛ Yeruzalɛmɛ i.

¹⁴ Nɛ wa yolo Pɛrzɛ ni, nɛ wa nɛ tɛ Antiɔsɛ, tɛ ngɔ nù Pizidi. Nɛ do tũ ɔmɔ tɛ wi, nɛ wa nɛa kɔ tɔa mbula, nɛ wa dungu nù.

¹⁵ Nɛ Owele wa tɔlɔ kɔ 'buku mbula, do 'buki 'da Owi gba olo nu Gale. 'Do nɛ, nɛ onwa ngɔ tɔa mbula wa tombo wele hã Polo do Silasi na: “Onyae, fala kɛ nɛ ɔ do lɛnggɛ kpã sila nu nɛ we tɔ̃ hã winɔ gɛ nde, nɛ nɛ tɔ̃́.”

¹⁶ Nɛ Polo kulu ngɔ, nɛ a we kɔ̃ a hã winɔ na, wa gɛ zala wa. Nɛ a tɔ̃ na: “Aa nɛ, onya mi be Israɛlɛ, do nɛ, ogele winɔ kɛ nɛ dɔnggɔ Gale ni, nɛ zélé mi sɛ!

¹⁷ Gale 'da lɛ obe Israɛlɛ, a saka zɛ́ oyaa lɛ. Nɛ 'da fala kɛ wa zɛ́ ngɔ gele nùi tɛ Ezipeto i ni, nɛ a dɛa na, wa sanza. Nɛ Gale fua wa ngɔ gele nùi ni dɛ nza do ngawi 'da a.

¹⁸ Nɛ a kunu sila a hã wa tɛ gala wa li gba zɔ̃ i, gbaa 'do 'bu sabɛlɛ nalɛ.

¹⁹ 'Do nɛ, nɛ a kumu onu fɛlɛ wele sambo tɛ ngɔ nù Kanana, nɛ a hã lenɔ olo winɔ ni hã owinɔ 'da a do mɔ́ wa.

²⁰ Nɛ wa ɔa dɛ di ni gbaa sabɛlɛ kama nalɛ do 'bu nɛ mɔlɔ. “'Do nɛ, nɛ Gale saka Owele we kpe dati wa, gbaa we hɔ 'da fala kɛ a tumba do Samuɛlɛ, wi gba olo nu a ni.

²¹ Nɛ wa aka Samuɛlɛ na, lo kɔ̃a we kpa nwa. Nɛ Gale saka Saulo, be 'da Kisi, tɛ kɔ nu kpala Bɛnzamɛ do nwa ngɔ wa. Nɛ a dɛa to nwa 'da a 'do 'bu sabɛlɛ nalɛ.

²² Nɛ 'do nɛ, nɛ Gale bɛ̃a gɛnɛ Saulo, nɛ a saka Davidi, we dungu nwa ngɔ owinɔ 'da a. Nɛ a tɔ̃ we ngɔ a na: ‘Mi kpa Davidi, be 'da Yɛse. A a wi kɛ mi kɔ̃a gɛnɛ a wena, nɛ a dɛ sɛ mɛnɔ vɛ̃ kɛ mi kɔ̃a na, a dɛ ni.’

²³ Ĩ na, Gale saka mbe wele kɔ obe zã Davidi kpo na, a kpasa Oyudanɔ, ɔ nɛ kɛ a kpua zɛ́ do mbulu nɛ ni. Nɛ wi ni, wi a Yezu.

²⁴ Nɛ dati kɛ na Yezu tɛ ni, nɛ nde Yoanɛ zi tɛ be we nu Gale, tɛ tɔ̃ hã Oyudanɔ na, wa kifi sila wa, kɔ wa kpa batisimɔ.

²⁵ Nɛ 'da fala kɛ Yoanɛ hɔa ndɔti toe 'da a ni, nɛ a aka na: ‘Nɛ lengge na, mi a wio nde? Mi a wi kɛ nɛ 'bɔ 'da a ni gɔ. Nɛ nde nɛ zɔ́, wele a hɔ sɛ 'do mi gɛ, mi wè wi hɔlɔ mɔ nyanga wi 'da a gɔ.’

²⁶ “Onyae, obe zã Abrahama, do nɛ, ogele winɔ kɛ nɛ dɔnggɔ Gale dɔngga ni, owinɔ kɛ Gale tumba toe gɛ hã wa na, ɛ kpasa wa ni, wi a lɛ do nɛ vɛ̃.

²⁷ Nɛ nde Owi Yeruzalɛmɛ, do nwanɔ 'da wa, wa ĩ̀ zi na, Yezu a a wi kpasa winɔ ni gɔ. Nɛ wa zèlè zi 'bɔ gulu wenɔ 'da Owi gba olo nu Gale, kɛ winɔ wa tɔlɔ ma do tũ ɔmɔ tɛ wi fai ni gɔ. Nɛ nde 'da fala kɛ wa 'bili do we 'da Yezu na, a wia do fio ni, nɛ wenɔ kɛ wa zila zi kɔ 'Buku 'da Gale ni, ma dɛa tɛ ɛ.

²⁸ Gɛnɛ kɔ wa kpà zi mbe gulu kɛ na, wa 'bili we fio hã Yezu gɔ ni, nɛ wa aka Pilatɛ na, a gbɛ́ a.

²⁹ Nɛ 'do kɛ wa dɛa mɛnɔ vɛ kɛ 'Buki tɔ̃a ngɔ Yezu ni, nɛ wa ba a ngɔ finda te dɛ nù, nɛ wa mi a kɔ ta.

³⁰ Nɛ nde Gale tunu a kɔ fio.

³¹ Nɛ 'do kɛ Yezu za'da nza kɔ fie ni, nɛ a kpa ngba a do owinɔ kɛ a yɛnggɛ zi do wa ni fala dɛlɛ wena. Wi zi a winɔ kɛ wa zi do a, yolo do ndò nyanga toe 'da a tɛ Galile i, gbaa we hɔ tɛ Yeruzalɛmɛ ni. Nɛ ngangga gɛ, winɔ ni wa hɔa temɔɛnɔ 'da a dati winɔ.

³² Nɛ lɛ, lɛ tɛa do Dia Sakoe ni hã nɛ. Mbuli kɛ Gale kpua zi hã oyaa lɛ ni,

³³ a dɛa ma hã lɛ, obe zã wa. A dɛa ma 'da fala kɛ a tunu Yezu kɔ fie ni. Ma ɔ nɛ kɛ wa kɔma kɔ bɔa Zuma 'da Oyudanɔ na, Gale na: ‘Yolo do sɔɛ gɛ, mi a baa mɔ, nɛ mɔ a bulu be 'da mi.’

³⁴ Gale tɔ̃a zɛ́ na, ɛ tunu sɛ a kɔ fio, da dɛ kɔ a mbúlú gɔ. A tɔ̃a na: ‘Mi wele sɛ nu mi tɛ nɛ, nɛ mi dɛ sɛ dia mɔ hã nɛ ɔ nɛ kɛ mi kpua zi mbulu nɛ hã Davidi ni. Mi élé sɛ ma gɔ.’

³⁵ Ma kɛ wa kɔma 'bɔ kɔ gele mbɛti na: ‘Mɔ kɔ̃́ sɛ na, kili tɛ wi mɔ́ mɔ mbulu gɔ.’

³⁶ Davidi dɛa zi mɔ kɛ Gale kɔ̃a ni, nɛ a fia, nɛ wa mi a fala nɛ kpo do oyaa a, nɛ a mbulu.

³⁷ Nɛ nde Yezu, kɛ Gale tunu a kɔ fie ni, a mbùlù gɔ.

^38-39 “Onyae, nɛ ĩ́ na, Gale a fo sɛ 'dã mɛnɔ zu winɔ do wala 'da Yezu. Nɛ winɔ kɛ wa kɔa zu li Yezu ni, Gale kpasa wa kɔ 'dã mɛnɔ 'da wa vɛ́, kɛ mbula 'da Mɔizɛ wè zi tɛ kpasa wa kɔ nɛ gɔ ni.

⁴⁰ Li nɛ sɔ̃́, da dɛ kɔ wenɔ Owi gba olo nu Gale wa tɔ̃a zɛ́ ni, ma dɛ́ nɛ gɔ. Wa tɔ̃a zɛ́ na:

⁴¹ ‘Nɛ, winɔ kɛ nɛ 'danga we nu Gale ni, nɛ zɔ́ mɛ na gɛ, nɛ nɛ ɔ́ngbɔ́, nɛ nɛ fó tɛ nɛ do'do! Mba gɔ, do ngba soe 'da nɛ, nɛ mi dɛ sɛ mɔ kpo. Wele tɔ̃́ sɔ lɛnggɛ mɛ ni hã nɛ, nɛ nde nɛ kɔ̃́ sɔ gɔ.’ ”

⁴² Polo do Barnabasi wa hɔa nza kɔ tɔa mbula ni, nɛ winɔ wa aka wa na, tũ ɔmɔ tɛ wi 'do ki ni, nɛ wa tɛ, kɔ wa tɔ̃ 'bɔ kpo lɛnggɛ ni hã lo.

⁴³ Kɔ winɔ wa ma ngɔ si nɛ, nɛ mbe gba gili Yudanɔ, do mbe ogele winɔ kɛ wa kifi zi sila wa we kɔ̃ Gale 'da Oyudanɔ ni, wa la do Polo do Barnabasi. Nɛ Polo do Barnabasi wa nganda sila winɔ ni na, wa tɛ là fala gbini zã wa do dia zã 'da Gale gɔ.

⁴⁴ Do kɔ̃ tũ ɔmɔ tɛ wi 'do ki ni, nɛ owinɔ kɔ gã le ni, wa mba li ngba wa dɛlɛ wena we zele we nu Gale.

⁴⁵ Kɔ ombe Yudanɔ wa zɔa gba gili winɔ ni, nɛ wa dɛa sɛnɛmɔ, nɛ wa 'danga wenɔ kɛ Polo be hã winɔ ni, nɛ wa dã a.

⁴⁶ Nɛ Polo do Barnabasi wa tɔ̃ hã wa do kpã sila vɛ̃ na: “Ma wia sɔ na, lɛ be we nu Gale hã nɛ dati. Nɛ nde nɛ bɛ́a ma, nɛ nɛ 'bili we 'da nɛ na, nɛ wè we kpa kpasi kɛ ma é gɔɛ ni gɔ, kɔ ma a dia. Kɔ lɛ la sɛ dɛ 'da owinɔ kɛ wa a Oyuda gɔ ni.

⁴⁷ We kɛ Nwa Gale tɔ̃a zi hã lɛ na: ‘Mi ia zi mɔ do nyɛa we, sanga onu kɔnggɔnɔ ngɔ nù gɛ, takɔ wa vɛ wa kpasa do wala 'da mɔ.’ ”

⁴⁸ Kɔ owinɔ kɛ wa a Oyuda gɔ ni, wa nɛa we zele ni, nɛ wa dɛa yangga, nɛ wa dɔnggɔ we nu Gale. Nɛ owanɔ kɛ Gale saka wa na, we kpa kpasi kɛ ma é sɛ gɔ ni, wa kɔ̃a zi zu li Yezu.

⁴⁹ Nɛ we 'da Nwa Yezu yɛ'bɛ ngɔ nùi ni vɛ.

⁵⁰ Nɛ nde Oyudanɔ wa tɔndɔ go'do wukonɔ kɛ wa a gã wi, nɛ wa dɔnggɔ Gale dɔngga ni, mba do ogã winɔ kɔ le ni, takɔ wa zɛlɛ tɛ Polo do Barnabasi. Nɛ winɔ ni wa ndaka wa tɛ ngɔ nùi 'da wa do'do.

⁵¹ Nɛ Polo do Barnabasi wa fɛla nù ti tambala nyanga wa hã winɔ ni, takɔ ma be na, wa dɛ̀ de gɔ, nɛ wa la dɛ Ikoniumɛ.

⁵² Nɛ winɔ kɛ wa kɔ̃a zi we 'da Yezu tɛ Antiɔsɛ i ni, wa dunu zi do ngawi 'da Hi Wi Santo, nɛ wa zi do yangga wena.