Owi Nɛ Tonɔ 12 - WE NU GALE 1995

Herodɛ gbɛa Zake, nɛ a fĩ Petro bɔlɔkɔ

¹ Do 'da fala ni, nɛ nwa Herodɛ ma ngɔ zɛlɛ tɛ ombe sanga Owi Kristonɔ.

² A ba nu a, nɛ wa gbɛ Zake, nya Yoanɛ do du kɔya.

³ Kɔ a nɛa we zɔ na, mɛ ɛ dɛa ni, ma dia tɛ Oyudanɔ ni, nɛ a tɔ̃ 'bɔ na, wa ba Petro, kɔ wa fí a bɔlɔkɔ. Nɛ wa ba a. (Ma zi do tũ ɔmɔ tɛ wi, kɛ wa nyɔngɔ do mapa kɛ wa à ina hana mapa tɛ nɛ gɔ ni.)

⁴ Herodɛ ba Petro do'do, nɛ a tombo osoda 'bu ngɔ wa gazɛlɛ, nɛ wa tɛ kpolo ngba wa nalɛ nalɛ dɛ 'do ngba wa, we zɔ mɔ tɛ a. Nɛ Herodɛ kɔ̃a na, 'do ɛngga, sɛ nɛ ɛ ĩ ti 'bili we 'da Petro dɛ dati winɔ de.

⁵ Nɛ 'da fala Petro kɔ bɔlɔkɔ i ni, nɛ nde Owi Kristonɔ wa tɛ sambala we a fai.

Petro hɔa nza kɔ bɔlɔkɛ

⁶ Ma 'bana zi tũ kpo na, Herodɛ e Petro dati winɔ, takɔ wa 'bili we 'da a. Nɛ do tũi ni, nɛ Petro ɔa dɛ sanga osoda bɔa. Wa ɛnza a do dɔkpɔ bɔa, nɛ ombe sodanɔ wa yolo dɛ 'do nu tɔa.

⁷ Nɛ anzɛ 'da Nwa Gale hɔa fala kpo, nɛ yele ngbala yila kɔ 'bili tɔa bɔlɔkɛ ni. Nɛ anzɛ yaka Petro, nɛ Petro tunu. Nɛ anzɛ tɔ̃ hã a na: “Mɔ kúlú ngɔ dɔ̃!” Nɛ dɔkpɛ gɔnɔ nu kɔ̃ a lɛndɛɛ, nɛ ma te.

⁸ Nɛ anzɛ tɔ̃ hã a na: “Mɔ kpó 'dɛ̃ 'da mɔ, nɛ mɔ hé'dé kpɔkpɔ nyanga mɔ!” Nɛ Petro dɛa na mɛ ni. Nɛ anzɛ na: “Mɔ gú gã tuli 'da mɔ dɛ tɛ mɔ, kɔ mɔ tɛ́ 'do mi!”

⁹ Nɛ Petro hɔa nza kɔ tɔa bɔlɔkɛ, nɛ a la 'dɔkɔlɔ anzɛ ni. Nɛ nde Petro zɔ́ ma ɔ nɛ gbãlã we mɔ gɔ ni. A lengge na, Gale be mɔ li ɛ kɔ yalɛ iko.

¹⁰ Nɛ wa la Okuti sodanɔ, nɛ wa la 'bɔ owanɔ 'do wa ni, nɛ wa hɔ tɛ nu tɔa kɛ wa dɛa do mɔ bole, nɛ ma hɔ dɛ kɔ gã le i ni. Nɛ nu tɔa ni ma hũi do tɛ ɛ, nɛ wa hɔ. Nɛ wa la nu wala kpo, kɔ wa nɛ hɔ nu mbé wala, nɛ anzɛ la Petro dɛ di ni.

¹¹ Nɛ li Petro gɛ̃lɛ̃ olo mɛ anzɛ dɛa ni, nɛ a tɔ̃ na: “Ngangga ni, mi ĩ wá na, mɛ a gbãlã we. Nwa Gale tumba anzɛ 'da a na, a fo mi ti kɔ̃ Herodɛ, nɛ a kpasa mi li 'dã mɛ Oyudanɔ wa 'dafa sɔ we dɛ do mi ni.”

¹² Nɛ Petro lingga mɔ ni gbaa, nɛ a la dɛ nu tɔa 'da Mana, naa Yoanɛ Marko. Nɛ nde ogba gili wele wa mba zi li ngba wa dɛ di ni, tɛ sambala Gale we duzu a.

¹³ Nɛ Petro ngbolo 'do nu tɔa kɛ nza nga ni, ko ko ko! Nɛ mbe wuko dɛa to kpo, li a a Rodɛ tɛ we hũi ma.

¹⁴ Kɔ a nɛa we zele gɛlɛ Petro tɛ sa mɔ, nɛ a ĩ ti nɛ. Nɛ yangga ba a wena, nɛ a hũ̀i nu tɔa hũi gɔ, nɛ a kpolo tɛ́ a do yu dɛ kɔ tɔa i, we tɔ̃ we nɛ na, Petro hɔa 'do nu tɔa nza gɛ.

¹⁵ Nɛ owinɔ tɔa mɔ ni, wa gese hã a na: “Bɔ zu mɔ nde?” Nɛ a na: “Ngbongbo we!” Nɛ wa na: “Wi a anzɛ kɛ a zɔ mɔ tɛ Petro ni iko.”

¹⁶ Mɛ ni, nɛ nde Petro 'bana tɛ ngbolo nu tɔa ngbula fai iko. Nɛ wa hũi nu tɔa, kɔ wa nɛ ka mɔ, nɛ wa zɔ Petro, nɛ wa ɔngbɔ do ma wena.

¹⁷ Nɛ Petro ia kɔ̃ ɛ nu ɛ hã wa na, wa tɛ wèlè we gɔ. Nɛ a tɔ̃a tɛlɛ tɛ kɛ Nwa Gale fua do a kɔ bɔlɔkɛ dɛ nza ni. Nɛ a na, wa tɔ̃́ sɛ we nɛ hã Zake do tala onya ɛ. Nɛ a hɔa nza, nɛ a la dɛ gele fala.

¹⁸ Kɔ fala nɛa we sa nɛ, nɛ zu osodanɔ vĩ do'do, nɛ kili ba wa, nɛ wa aka ngba wa we mɛ ma dɛa Petro ni.

¹⁹ Nɛ Herodɛ ba nu ɛ na, wa fa Petro, kɔ wa ba a. Nɛ wa fa a ni gbaa, nɛ wa kpà a gɔ. Nɛ wa kula gɛlɛ sodanɔ wa ɔa zi 'do nu a ni ní gbaa, nɛ Herodɛ ba nu ɛ na, wa gbɛ wa. 'Do nɛ, nɛ Herodɛ kulu ngɔ Yude, nɛ a la dɛ Sezare, nɛ a ɔa di ni bi sĩ.

Herodɛ fia

²⁰ Do 'da fala ni, zã nwa Herodɛ nɔ̃lɔ̃ zi dɛ tɛ Owi kɔ le Tirɛ do Sidoni wena. Nɛ Owi kɔ lenɔ ni, wa ɔa ngɔ we kpo na, lo tombo Owele 'da Herodɛ i. Owi tonɔ ni wa nɛa, nɛ wa kpa mbe gã wi ngɔ toe kɔ tɔa 'da Herodɛ, li a a Blastusi, nɛ wa 'dafa do a na, a si 'do lo. 'Do nɛ, nɛ wa nɛa 'da Herodɛ we aka a na, a dɛ na do lo. Wa dɛa ni mba gɔ, nyɔngɔmɛnɔ 'da wa ma yolo zi ngɔ nùi 'da Herodɛ.

²¹ Kɔ ngba soe kpa ngba wa wia, nɛ Herodɛ hi'da tulu nwa, nɛ a dungu ngɔ kpongbo nwa 'da a, nɛ a wele we hã winɔ ni dɛ li gba dɔ.

²² Nɛ winɔ wa he mɔ na: “Kɛ gɛ a wala gɛlɛ gale, mɛ a wala gɛlɛ wele gɔ.”

²³ Nɛ do kpo fala ni, nɛ anzɛ 'da Nwa Gale tɛa, nɛ a hã zɛlɛ hã Herodɛ, we duzu kɛ a kɔ̃a zi na, winɔ wa dɔnggɔ ɛ do li Gale. Ma kɛ o'dangba wa nyɔnga zã a, nɛ a fe.

²⁴ Nɛ we nu Gale ma yɛ'bɛ zi dɛ dati yɛ'ba fai.

²⁵ Kɔ Barnabasi do Saulo wa dɛa toe 'da wa Yeruzalɛmɛ ia do'do, nɛ wa kpolo tɛ wa fala nɛ kpo do Yoanɛ Marko.