Owi Nɛ Tonɔ 11 - WE NU GALE 1995

Petro tɔ̃a gulu toe 'da a hã owi kɔ̃a wenɔ tɛ Yeruzalɛmɛ

¹ Nɛ Owi nɛ tonɔ, do owi kɔ̃a wenɔ ngɔ nù Yude vɛ́, wa zila na, owinɔ kɛ wa a Oyuda gɔ ni, wa zila we nu Gale, kɔ wa kɔ̃a tɛ mɛ 'bɔ ma.

² Kɔ Petro nɛa we hɔ Yeruzalɛmɛ i, nɛ owi kɔ̃a wenɔ kɛ wa a Oyuda ni, wa kɔ'da a na:

³ “Gulu kɛ mɔ nɛa, nɛ mɔ le kɔ tɔa 'da owinɔ kɛ wa nɛ̀ gaza gɔ, nɛ mɔ nyɔngɔ mɔ do wa we ge nde?”

⁴ Nɛ Petro tɔ̃a gulu mɛnɔ kɛ ma dɛa tɛ ɛ i mɔ ni hã wa vɛ̃ na:

⁵ “Mi zi a kɔ le Yope, nɛ mi zi tɛ sambala Gale, nɛ do 'da fala ni, nɛ mɔ dɛa li mi ɔ nɛ yalɛ ni. Mi nɛa we ka mɔ, nɛ mi zɔ mɔ ɔ nɛ gã gbau tulu ni yula li nza i, nɛ ma zĩlĩ dɛ 'da mi nga. Ma ɔ nɛ Owele wa 'bia nu zɔ̃nɛ nalɛ nɛ 'bia ni.

⁶ Nɛ mi ka mɔ ngɔ̃ nɛ, nɛ mi zɔ osa'de kɛ wa do nyanga wa nalɛ nalɛ, do osa'de zamɔ, do wanɔ wa hala do nù, do onɔɛnɔ li ngɔ gɛ.

⁷ Nɛ mi zele gɛlɛ wele tɛ tɔ̃ hã mi na: ‘Petro, mɔ kúlú ngɔ, kɔ mɔ kálá sa'denɔ gɛ, kɔ mɔ gbɛ́ wa hã mɔ nyɔ́ngɔ́!’

⁸ Nɛ mi gisa hã a na: ‘Ɔ̃ ɔ̃ Nwa Gale, mi nyɔ̀ngɔ̀ mbe kuti mɔ ndi ɔ nɛ ki ni fala kpo gɔ.’

⁹ Nɛ wi ni tɔ̃ 'bɔ hã mi na: ‘Mɛnɔ kɛ Gale zɔ na, ma a sa ni, mɔ tɛ zɔ̀ na, mɛ a mɔ ndi gɔ.’

¹⁰ Nɛ ma dɛa tɛ̃ ɛ na mɛ ni fala talɛ. Kɔ 'da nɛ kala be sĩ, nɛ mɛ ni kũ 'bɔ dɛ li nza i.

¹¹ “Do 'da fala ni, ombe wi wili talɛ wa yula zi kɔ le Sezare, nɛ wa tumba wa hã mi. Wa hɔa nu tɔa mi ɔ nɛ ni,

¹² nɛ Hi Wi Santo tɔ̃ hã mi na, mi zĩlĩ dɔ̃, kɔ mi la do wa, mi tɛ zĩ̀ zu mi gɔ. Nɛ onya lɛ gazɛlɛ gɛ wa kã mi, nɛ lɛ la do wa. Nɛ lɛ lia kɔ tɔa 'da Kɔmɛyɛ.

¹³ Nɛ a tɔ̃a tɛlɛ tɛ kɛ a zɔa anzɛ 'da Gale kɛ a hɔa dati a dɛ kɔ tɔa 'da a ni. Anzɛ ni tɔ̃a hã a na: ‘Mɔ tómbó owele tɛ Yope, hã wa sa mɔ hã Simɔ Petro,

¹⁴ nɛ a tɔ̃ sɛ wenɔ kɛ ma wia we kpasa mɔ, do nu fɛlɛ mɔ vɛ ni hã mɔ.’

¹⁵ A tɔ̃a ni do'do, nɛ mi ma ngɔ be we hã wa, nɛ Hi Wi Santo zĩlĩ ngɔ wa, ɔ nɛ kɛ a zĩlĩ zi tɛ mɛ 'bɔ dɛ ngɔ lɛ dati ni.

¹⁶ Nɛ ta zu mi gba ngɔ we kɛ Nwa Yezu tɔ̃a zi na: ‘Yoanɛ batisa zi winɔ do lì, nɛ nde nɛ kpa sɛ batisimɔ do Hi Wi Santo’ ni.

¹⁷ Nɛ mi zɔa na, Gale hã kpo kpo Hi Wi Santo hã wa, ɔ nɛ kɛ a hã zi a hã lɛ, 'da fala lɛ kɔ̃a zi do zu li Nwa Yezu Kristo ni. Kɔ mi a wio nde do kɛ na, mi amba Gale ni?”

¹⁸ Wa nɛa we zele wenɔ kɛ Petro tɔ̃a ni, nɛ ngɔ tɛ wa gɛ. Nɛ wa dɔnggɔ Gale, nɛ wa tɔ̃ na: “Ní a Gale hã tɛ mɛ 'bɔ wala hã ogele winɔ na, wa kifi sila wa, nɛ wa kpa kpasi kɛ ma é sɛ gɔ ni.”

Owi kɔ̃a wenɔ wa pɛsa falanɔ vɛ̃

¹⁹ 'Do kɛ wa gbɛa zi Etiɛnɛ ni, nɛ wa ma ngɔ zɛlɛ tɛ Owi kɔ̃a wenɔ. Nɛ Owi kɔ̃a wenɔ wa yu, nɛ wa pɛsɛ, nɛ ombe wa la gbaa dɛ ngɔ nù Fenisi, do Siprɛ, do Antiɔsɛ, nɛ wa be we 'da Yezu. Nɛ nde wa be tati nɛ hã Oyudanɔ iko.

²⁰ Nɛ do 'da fala ni, nɛ ombe wi kɔ̃a wenɔ kɛ wa zi tɛ ngɔ nù Siprɛ do Sirɛnɛ i ni, wa la dɛ Antiɔsɛ. Nɛ i mɔ ni, wa bia 'bɔ Dia Sakoe 'da Nwa Yezu hã owinɔ kɛ wa a Oyuda gɔ ni.

²¹ Nɛ Nwa Gale hã ngawi hã wa, nɛ Owele wena wa kifi sila wa, nɛ wa kɔ̃a zu li Yezu.

²² Nɛ owi kɔ̃a wenɔ tɛ Yeruzalɛmɛ nga ni, wa zila sako nɛ, nɛ wa tombo Barnabasi Antiɔsɛ i we zɔ ma.

²³ A hɔa i mɔ, nɛ a zɔ tɛlɛ tɛ kɛ Gale wila do nu ɛ tɛ Owi kɔ̃a wenɔ nɛ ge nde ni, nɛ a dɛ yangga wena. Nɛ a nganda sila wa na, wa dɛ olo nu Nwa Yezu do sila wa vɛ.

²⁴ Barnabasi ni zi a wi dia sila, nɛ a kɔ̃ Gale wena, nɛ a dunu do ngawi 'da Hi Wi Santo. Nɛ Owele wena wa kɔ̃a zu li Nwa Yezu do wala 'da a.

²⁵ 'Do nɛ, nɛ Barnabasi nɛa kɔ le Tarsɛ we fa Saulo.

²⁶ A kpa a, nɛ a tɛ do a dɛ Antiɔsɛ. Nɛ wa bɔa nɛ, wa ɔa dɛ di ni gbaa sabɛlɛ kpo, tɛ mba li ngba wa do Owi kɔ̃a wenɔ. Nɛ wa tɛ be wenɔ hã ogili winɔ. Owinɔ wa ndua zi sa li Owi kɔ̃a wenɔ dati gbàa na, Owi Kristo dɛ Antiɔsɛ ni.

²⁷ Nɛ do 'da fala ni, nɛ ombe wi gba do nu Gale wa yula Yeruzalɛmɛ, nɛ wa nɛ Antiɔsɛ i.

²⁸ Nɛ Hi Wi Santo fí li mbe kpo sanga wa ni, li a a Agabusi, nɛ a kulu ngɔ, nɛ a tɔ̃ na: “Gba wɔ ma te sɛ ngɔ nùi vɛ.” (Nɛ gba wɛ ni, ma tia zi do 'da fala Klodɛ zi a gã nwa ni.)

²⁹ Nɛ Owi kɔ̃a wenɔ wa 'bili na, wele do wele hã mɔ kɛ a wia we kpa ma ni, takɔ wa tombo ma ngɔ nù Yude i, we gala do onya wa wi kɔ̃a wenɔ.

³⁰ Wa dɛa na mɛ ni, nɛ wa tombo ma do Barnabasi, do Saulo hã Owi zɔ mɔ tɛ oeklezianɔ ngɔ nù Yude i.