Owi Nɛ Tonɔ 10 - WE NU GALE 1995

Petro nɛa 'da Kɔmɛyɛ

¹ Mbe wele zi kpo tɛ Sezare, li a a Kɔmɛyɛ. A zi a nwa ngɔ mbe ngɔ gili osoda Roma, kɛ wa sa li wa na: “Osoda Itali” ni.

² A zi a wi dɛ kili Gale, nɛ a do Owi nu fɛlɛ a vɛ, wa dɔnggɔ zi Gale. Nɛ a gala zi 'bɔ Oyudanɔ kɛ wa a Owi sã ni wena, nɛ a sambala Gale 'da fala fai.

³ Nɛ mbe ngba soe kpo, do sa talɛ 'do midi, nɛ mɔ dɛa li Kɔmɛyɛ nɛ́ yalɛ ni, nɛ a zɔ anzɛ 'da Gale tɛ le dɛ 'da a nga, nɛ a sa mɔ hã a na: “Kɔmɛyɛ!”

⁴ Nɛ Kɔmɛyɛ soko a, nɛ kili ba a, nɛ a aka a na: “Nwa, dɛa nɛ nde?” Nɛ anzɛ gese hã a na: “Gale kɔ̃a gɛnɛ sambala 'da mɔ, do mɛnɔ kɛ mɔ gala do Owi sãnɔ ni, nɛ a lingga do mɔ.

⁵ Kɔ mɔ tómbó Owele tɛ Yope, hã wa sa mɔ hã mbe wele kpo di ni, li a Simɔ Petro.

⁶ A ɔ 'da mbe wi dɛa to ndala kpo, li a a Simɔ, kɛ tɔa 'da a dɛ nu gba lì ni.”

⁷ 'Do nɛ, nɛ anzɛ ni la. Nɛ Kɔmɛyɛ sa mɔ hã Owi tonɔ 'da a bɔa, do mbe soda zɔ mɔ tɛ̃ a kpo. Soda ni zi 'bɔ a wi dɔnggɔ Gale.

⁸ Nɛ Kɔmɛyɛ tɔ̃a gulu yalɛ ni hã wa vɛ, nɛ a tombo wa tɛ Yope i.

⁹ Fala nɛa we sa nɛ, nɛ nde wa a li wala, nɛ wa kɔla we hɔ Yope ia. Kɔ ma hɔa midi, nɛ Petro kũ dɛ fala wa 'dafa ngɔ tɔa i ni, we sambala Gale.

¹⁰ Nɛ wɔ ba a, nɛ a kɔ̃a we nyɔngɔ mɔ. Kɔ wa ma ngɔ gi nyɔngɔmɛ hã a, nɛ mɔ dɛ zu a ɔ nɛ yalɛ ni.

¹¹ A nɛa we ka mɔ do kɔ yalɛ, nɛ nde li nza hũi, nɛ mɔ ɔ nɛ gã gbau tulu ni yula li nza i, nɛ ma zĩlĩ dɛ nù nga. Ma ɔ nɛ Owele wa 'bia nu zɔ̃ nɛ nalɛ nɛ 'bia ni.

¹² Kɔ a nɛ ka mɔ ngɔ nɛ, nɛ a zɔ ngɔ gili osa'de kpi do kpi, wanɔ wa do nyanga wa nalɛ nalɛ, do wanɔ wa hala do nù, do ngɔ gili nɔɛnɔ li ngɔ gɛ vɛ̃.

¹³ Nɛ a zele gɛlɛ wele tɛ tɔ̃ hã a na: “Petro, mɔ kúlú ngɔ, kɔ mɔ kálá sa'denɔ gɛ, kɔ mɔ gbɛ́ wa hã mɔ nyɔ́ngɔ́!”

¹⁴ Nɛ Petro gese hã a na: “Ɔ̃ ɔ̃, Nwa Gale, mi nyɔ̀ngɔ̀ mbe kuti mɔ ndi ɔ nɛ ki ni fala kpo gɔ.”

¹⁵ Nɛ wi ni tɔ̃ 'bɔ hã a na: “Mɛnɔ kɛ Gale zɔ na, ma a sa ni, mɔ tɛ zɔ̀ ma na, mɛ a mɔ ndi gɔ.”

¹⁶ Nɛ ma dɛa tɛ̃ ɛ na mɛ ni fala talɛ. Kɔ 'da nɛ kala be sĩ, nɛ mɛ ni kũ 'bɔ dɛ li nza i.

¹⁷ Nɛ Petro ma ngɔ fa gulu mɛnɔ a zɔa ni, nɛ a kpà gɔ. Kɔ a 'bana tɛ fa gulu nɛ iko, nɛ owinɔ kɛ Kɔmɛyɛ tumba wa ni, wa aka we tɔa 'da Simɔ, nɛ wa nɛ, nɛ wa yolo dɛ nu nɛ ni.

¹⁸ Nɛ wa sa mɔ, nɛ wa aka na: “Simɔ, kɛ mbe li a a Petro ni, a ɔ dɛ nde?”

¹⁹ Petro 'bana zi tɛ lengge gulu mɛ Gale bia li a ni, nɛ Hi Wi Santo tɔ̃ hã a na: “Mɔ zélé! Owi wili talɛ, wa aka we mɔ.

²⁰ Kɔ mɔ zĩ́lĩ́ dɔ̃, nɛ mɔ la do wa, mɔ tɛ zĩ̀ zu mɔ gɔ. Mba gɔ, mi a mi tumba wa.”

²¹ Nɛ Petro zĩlĩ dɛ 'da wa nù i, nɛ a tɔ̃ hã wa na: “Mi kɛ! Wi nɛ fa a ni, wi a mi. Nɛ tɛa we ge nde?”

²² Nɛ wa gese hã a na: “Wi a Kɔmɛyɛ, kɛ a a nwa ngɔ osodanɔ ni hã a tumba lɛ. A a wi bɔlɔ zu, nɛ a dɔnggɔ 'bɔ Gale wena. Nɛ Oyudanɔ vɛ wa kɔ̃a gɛnɛ a wena. Nɛ anzɛ 'da Gale tɔ̃a hã a na, a sá mɔ hã mɔ, kɔ mɔ nɛ 'da a i, kɔ a zele wenɔ mɔ nɛ tɔ̃ hã a ni.”

²³ Nɛ Petro tɔ̃ hã wa na, wa le dɛ tɔa nga. Nɛ wa lia, nɛ wa ɔ do a dɛ di ni tũ kpo. Kɔ fala nɛa we sa nɛ, nɛ Petro kulu ngɔ, nɛ a la do winɔ ni. Nɛ ombe wi kɔ̃a wenɔ tɛ Yope, wa kã a.

²⁴ Nɛ wa ɔa sanga tũ kpo, nɛ wa hɔ tɛ Sezare. Mɛ ni, nɛ nde Kɔmɛyɛ sa mɔ hã onya a do oyali ngba a, kɔ wa 'bɔ 'da Petro 'bɔa iko.

²⁵ 'Da fala Petro hɔa, kɔ a nɛa we le dɛ nu tɔa i, nɛ Kɔmɛyɛ kulu ngɔ, nɛ a gɔnɔ dati a, nɛ a gu nù ti a.

²⁶ Nɛ Petro 'be a dɛ ngɔ, nɛ a tɔ̃ hã a na: “Mɔ kúlú ngɔ! Mi tɛ mɛ 'bɔ a wele nɛ́ mɔ gɛ iko.”

²⁷ Nɛ wa ma ngɔ wele we, nɛ wa le dɛ tɔa i. Nɛ wa hɔ dɛ ngɔ gili owinɔ, kɛ wa mba li ngba wa we 'bɔ 'da Petro ni.

²⁸ Nɛ Petro tɔ̃ hã wa na: “Nɛ ĩ vɛ na, mbula bɛa na, be Yuda wè tɛ yɛnggɛ do gele wele gɔ. Nɛ nde Gale bia hã mi na, da dɛ kɔ mi zɔ́ wele kpo li mi ɔ nɛ wi ndi ni gɔ.

²⁹ Ma kɛ 'da fala nɛ sa mɔ hã mi, nɛ mi bè gɔ, nɛ mi tɛa. Kɔ mi kɔ̃a we ĩ gulu kɛ nɛ sa mɔ hã mi ni.”

³⁰ Nɛ Kɔmɛyɛ gese hã a na: “Ma la di ni tũ talɛ, mi zi tɛ sambala Gale kɔ tɔa 'da mi, do sa talɛ 'do midi ɔ nɛ kɛ gɛ. Nɛ mi nɛ gbanga nɛ, nɛ mi zɔ anzɛ 'da Gale tɛ yolo dɛ dati mi, nɛ nde a hi'da fɛ̃a du tulu nde nde.

³¹ Nɛ a tɔ̃ hã mi na: ‘Kɔmɛyɛ, Gale kɔ̃a gɛnɛ sambala 'da mɔ, do mɛnɔ kɛ mɔ gala do Owi sãnɔ ni, kɔ a lingga do mɔ.

³² Kɔ mɔ tómbó Owele tɛ Yope, hã wa sa mɔ hã Simɔ Petro. A ɔ 'da mbe wi dɛa to ndala kpo, li a a Simɔ, kɛ tɔa 'da a dɛ nu gba lì ni.’

³³ Nɛ mi tumba Owele we sa mɔ hã mɔ. Hã dia nɛ a kɛ mɔ tɛa gɛ. Kɔ lɛ vɛ lɛ a dati mɔ gɛ, we zele wenɔ kɛ Gale tɔ̃a hã mɔ na, mɔ tɔ̃ hã lɛ ni.”

Petro bia we tɛ 'da Kɔmɛyɛ

³⁴ Nɛ Petro tɔ̃ hã wa na: “Mi ĩ wá ngboo na, Gale kɛ sanga wele gɔ.

³⁵ Gɛnɛ kɔ wele yolo kɔ nu fɛlɛ kula ki nge nde, kɔ a dɛ kili Gale, kɔ a dɛ bɔlɔ zu dɛa mɔ, nɛ Gale kɔ̃ gɛnɛ a iko.

³⁶ Gale tumba zi Dia Sako hã obe Israɛlɛ, nɛ Dia Sakoe ni, ma hã dungu fio do wala 'da Yezu Kristo, kɛ a a Nwa 'da winɔ vɛ ni.

³⁷ Nɛ ĩ ti mɛ kɛ ma dɛa zi tɛ ɛ ngɔ nù Yude vɛ ni. Ma ndua zi do Galile, do 'do kɛ Yoanɛ bia we hã winɔ na, wa kífí sila wa kɔ wa kpa batisimɔ ni.

³⁸ Nɛ nɛ ĩ tɛlɛ tɛ kɛ Gale hã zi ngawi, do Hi Wi Santo hã Yezu Kristo, wi Nazarɛtɛ ni. Nɛ a yɛnggɛ kɔ le do le tɛ dɛ odia mɔ. A kpasa owinɔ kɛ wa zi kɔ ngbá 'da Satana ni, we kɛ Gale fala nɛ kpo do a.

³⁹ Lɛ zɔa zi mɛnɔ ni, nɛ lɛ a otemɔɛ mɛnɔ vɛ kɛ a dɛa zi ma ngɔ nùi 'da Oyudanɔ, do kɔ le Yeruzalɛmɛ ni. Nɛ wa bɛlɛ zi a ngɔ finda te, nɛ wa gbɛ a.

⁴⁰ Nɛ nde 'do tũ talɛ, nɛ Gale tunu a kɔ fio, nɛ a hã wala hã a na, a be tɛ a hã owinɔ.

⁴¹ Nɛ nde a bè tɛ a hã owinɔ vɛ gɔ, a bia tɛ a tati nɛ hã lɛ winɔ kɛ Gale saka zi lɛ dati, nɛ a a lɛ do otemɔɛ we tɔ̃ sɛ gulu nɛ ni. Nɛ 'do kɛ Gale tunu a kɔ fie ni, lɛ nyɔngɔ zi mɔ, nɛ lɛ nɔ dɔ̃ fala nɛ kpo do a.

⁴² Nɛ a tumba lɛ na, lɛ bé we ni hã owinɔ, nɛ lɛ tɔ̃ hã wa na, ɛ a wi kɛ Gale ia ɛ do wi 'bili we 'da owinɔ kɛ wa 'bana nza, do wanɔ wa fia ia ni.

⁴³ Owi gba do nu Gale vɛ wa tɔ̃a zɛ́ we 'da a na, wi kɛ a kɔ̃ zu li a, nɛ Gale a fo sɛ ku'da 'dã mɛ zu wi ni.”

Owinɔ kɛ wa a Oyuda gɔ ni wa kpa Hi Wi Santo

⁴⁴ We ni 'bana dɛ nu Petro ni iko, nɛ Hi Wi Santo zĩlĩ dɛ ngɔ winɔ vɛ, kɛ wa zele we ni.

⁴⁵ Nɛ Owi kɔ̃a wenɔ kɛ wa a Oyuda, nɛ wa tɛa do Petro ni, wa ɔngba wena, tɛ kɛ Gale tumba tɛ mɛ 'bɔ Hi Wi Santo dɛ ngɔ ogele winɔ ni.

⁴⁶ Mba gɔ, wa zila winɔ ni tɛ wele gele nu kɛ wa yàmbàlà ma dati gɔ ni, nɛ wa tɛ dɔnggɔ gã wi 'da Gale.

⁴⁷ Nɛ Petro tɔ̃ na: “Nɛ́ kɛ winɔ gɛ wa kpa Hi Wi Santo 'da Gale ɔ nɛ lɛ gɛ ia ni, wi kɛ a wia we amba wa na, wa tɛ kpà batisimɔ gɔ ni a wio nde?”

⁴⁸ Nɛ a ba nu a na, wa batisa wa do zu li Yezu Kristo. Nɛ wa batisa wa. Nɛ 'do nɛ, nɛ wa aka a na, a ɔ mbe do lo sĩ, sɛ nɛ a si de.