Owi Nɛ Tonɔ 1 - WE NU GALE 1995

¹ Nwa Teofilɛ, kɔ mbɛti kɛ mi dɛa zi hã mɔ dati ni, mi tɔ̃a we mɛnɔ vɛ, kɛ Yezu dɛa zi, do wenɔ a bia ma ni, ndo do nyanga nɛ

² gbaa we hɔ tɛ ngba soe kɛ a kũ nɛ dɛ li nza i ni. Nɛ dati kɛ na, a kũ dɛ li nza i ni, nɛ a tɔ̃a zi mbulanɔ 'da a hã owi yambala mɛno, kɛ a saka zi wa ni. A tɔ̃a ma hã wa do ngawi 'da Hi Wi Santo.

³ 'Do kɛ a fia ni, nɛ a bia zi 'bo tɛ a hã wa do walanɔ vɛ we be na, ɛ do kpasi. Nɛ a bia tɛ a hã wa ní gbaa we 'bu tũ nalɛ, tɛ tɔ̃ gulu dɛa to nwa 'da Gale hã wa.

⁴ Nɛ mbe ngba soe kpo, a tɛ nyɔngɔ mɔ do wa, nɛ a tɔ̃ hã wa na: “Dɔ nɛ lá nyɛlɛ do Yeruzalɛmɛ gɔ. Nɛ nde nɛ 'bã 'da mɛ kɛ Baa mi kpua zi mbulu nɛ hã nɛ ni. Mi tɔ̃a zi 'bɔ we nɛ hã nɛ dati ia.

⁵ We kɛ nɛ ĩ́ na, Yoanɛ batisa zi winɔ do lì. Nɛ nde ma lã sɛ dɔa kɔ̃ tũ gɔ, nɛ Gale a batisa sɛ nɛ do Hi Wi Santo.”

Yezu kũ dɛ li nza i

⁶ Nɛ Owi nɛ tonɔ wa mba li ngba wa dɛ kɛ zã Yezu, nɛ wa aka a na: “Aa Nwa, mɔ nɛ fo lɛ obe Israɛlɛ ti mbula 'da ogele winɔ ngangga gɛ, nɛ mɔ gese dɛa to nwa dɛ kɔ̃ lɛ nde?”

⁷ Nɛ Yezu gese hã wa na: “Nɛ wè tɛ ĩ ti ngba soe do kɔ̃ tũi, kɛ Baa mi wia ma do ngawi 'da a zu a kpo ni gɔ.

⁸ Nɛ nde do 'da fala kɛ Hi Wi Santo a zĩlĩ sɛ dɛ ngɔ nɛ ni, nɛ a hã sɛ ngawi hã nɛ. Nɛ nɛ sɛ a otemɔɛnɔ 'da mi, nɛ nɛ tɔ̃ sɛ gulu mɛnɔ kɛ nɛ zɔa ni hã owinɔ tɛ Yeruzalɛmɛ, do ngɔ nù Yude, do Samaria, gbaa we hɔ gulu nù i vɛ̃.”

⁹ 'Do kɛ Yezu tɔ̃a we ni, nɛ a ma ngɔ kũ dɛ li nza i, nɛ wa tɛ ka mɔ 'do a gbaa, nɛ a bi tũ dɛ zã kuti dɛ li wa ni.

¹⁰ Kɔ wa 'bana tɛ soko mɔ dɛ li nza i, dɛ fala Yezu la nɛ ni, nɛ Owi wili bɔa, wa hi'da fɛ̃a tulu nde nde, wa hɔ dɛ kɛ zã wa ni do ti,

¹¹ nɛ wa tɔ̃ hã wa na: “Aa nɛ, Owi Galile, gulu kɛ nɛ yolo tɛ soko mɔ dɛ li nza i ni we ge nde? Yezu kɛ a yula dɛ sanga nɛ gɛ, nɛ a kũ dɛ li nza i dɛ li nɛ gɛ ni, a tɛ sɛ 'bɔ kpasaa ɔ nɛ kɛ nɛ zɔa do a tɛ kũ dɛ li nza i ni.”

Winɔ 'da Yezu wa si dɛ Yeruzalɛmɛ

¹² 'Do kɛ Yezu kũ dɛ li nza i ni, nɛ owi nɛ tonɔ 'da a wa yolo tɛ ngɔ kala Olivɛ, nɛ wa si dɛ Yeruzalɛmɛ nga. Kala Olivɛ ma nyɛ̀lɛ̀ do Yeruzalɛmɛ gɔ, ma hɔ kilomɛtrɛ kpo gɔ.

¹³ Kɔ wa nɛa we hɔ tɛ Yeruzalɛmɛ nga, nɛ wa le kɔ tɔa, nɛ wa kũ dɛ kɔ mbe 'bili tɔa kpo, fala wa kpa zi do ngba wa fai ni. Wi zi a Petro, do Yoanɛ, Zake, Andre, Filipɛ, Toma, Bartelɛmi, Matie, do Zake, be 'da Alfe, do Simɔ (wele kɛ a bi zi ngɔ le 'da a na, ma hɔ ti ngbá ni), do Yuda, be 'da Zake.

¹⁴ Winɔ ni wa mba ngba wa vɛ̃ kpo, nɛ wa do sila wa kpo, tɛ sambala Gale 'do ngbɛ ɛ do 'do ngbɛ ɛ. Nɛ ombe wuko zi kɔ wa boe, ɔ nɛ Mana naa Yezu. Nɛ obulu nya Yezu wa zi 'bɔ boe.

Matiasi ba toe olo Yudasi

¹⁵ Nɛ do zã kɔ̃ tũnɔ ni, nɛ nde owi kɔ̃ zu li Yezu wa mba zi li ngba wa, ɔ nɛ Owele kama do 'bu wa bɔa ni, tɛ dɔnggɔ Gale. Nɛ Petro kulu ngɔ dɛ sanga wa ni, nɛ a tɔ̃ hã wa na:

¹⁶ “Onyae, ma wia na, mɛ kɛ Hi Wi Santo tɔa zé do wala 'da Davidi kɔ 'Buki ni, ma dɛ tɛ̃ ɛ. A tɔa zé we 'da Yudasi na, a sɛ a wi kpe dati Owele, takɔ wa ba Yezu.

¹⁷ Yudasi zi a mbe kpo sanga lɛ, Gale saka zi a we dɛ to do lɛ fala nɛ kpo.”

¹⁸ (Yudasi kala zi mbili wa usa do Yezu kɔ̃ a ni, nɛ a oso do fɔ. Nɛ a te do gɛlɛ a dɛ kɔ fɔɛ ni, nɛ zã a fũ, nɛ kala zã a gbala yɛndɛndɛ.

¹⁹ Nɛ owinɔ tɛ Yeruzalɛmɛ vɛ̃ wa zila sako nɛ, nɛ wa e li fɔɛ ni do lɛnggɛ nu wa na: “Hakɛldama,” gulu nɛ na: “Fɔ tɔkɔ.”)

²⁰ Nɛ Petro tɔ̃ 'bɔ na: “Gale tɔa zé kɔ 'Buku Zumanɔ na: ‘E kɔ nu tɔa 'da a kulu, nɛ wele tɛ ɔ 'bɔ fala ni gɔ.’ Nɛ a tɔ̃ 'bɔ na: ‘E kɔ mbé gele wele ba toe olo a.’

^21-22 Kɔ ma wia na, lɛ kpa gele wele olo a, takɔ a mba do lɛ we tɔ̃ gulu za'da nza kɔ fie 'da Yezu. Ma wia na, lɛ saka wi ni dɛ sanga owinɔ kɛ wa zi do lɛ fai, 'da fala kɛ lɛ zi tɛ yɛnggɛ do Nwa Yezu, yolo tɛ fala kɛ Yoanɛ batisa zi do a, gbaa we hɔ tɛ ngba soe kɛ a la lɛ, nɛ a kũ dɛ li nza i ni.”

²³ Nɛ wa lingga do Owele bɔa: Yozɛfu kɛ li a a Barsabasi, nɛ wa sa 'bɔ li a na Yustusi ni, wa do Matiasi.

²⁴ Nɛ wa vɛ̃ wa sambala Gale na: “Nwa, wi ĩ ti 'du kɔ sila wele vɛ̃, wi a mɔ. Kɔ mɔ bé kɔ̃ mɔ tɛ wi kɛ mɔ saka a sanga winɔ bɔa gɛ ni hã lɛ,

²⁵ takɔ a ba fala olo Yudasi, nɛ a hɔ wi nɛ toe 'da mɔ. We kɛ Yudasi la ma, nɛ a nɛa tɛ fala ma wia do a ni.”

²⁶ Nɛ wa tua zeke, takɔ wa saka sanga wa bɔa ni. Nɛ zeke tia ngɔ Matiasi, nɛ wa ia a sanga owi nɛ tonɔ 'bu ngɔ wa kpo ni.