Biblia Todo Logo
Bìoball air-loidhne

- Sanasan -

ABDIASI 1 - WE NU GALE 1995

1 Lɛnggɛnɔ kɔ mbɛti gɛ, mɛ a lɛnggɛ kɛ NWA Gale wila zi ma hã Abdiasi na, a dãlã do we dɛ tɛ Oedɔmɛ. NWA Gale tumba to hã ogele winɔ na: “Nɛ kúlú ngɔ, hã nɛ nɛ́ we ba nù Edɔmɛ.” Nɛ lɛ obe Israɛlɛ, lɛ zila toe ni.


NWA a 'danga sɛ nù Edɔmɛ

2 Nɛ NWA tɔ̃ na: “Nɛ, Oedɔmɛ, mi dɛ sɛ na, nɛ hɔ osulu wi sanga ongba nɛ. Na mɛ ni, owinɔ vɛ̃ wa zɔ sɛ nɛ li wa yala iko.

3 Nɛ dɛ gã zu wena, nɛ nɛ yɔa wala we duzu gã zui 'da nɛ. Nɛ dɛa le 'da nɛ ngɔ tanɔ do zu kala i, nɛ nɛ tɔ̃ na, Owele wa wè tɛ hɔ i mɔ, nɛ wa bi nɛ, nɛ wa ndaka nɛ gɔ.

4 Nɛ nde mi NWA, mi tɔ̃a na, gɛnɛ kɔ nɛ kũ sɔ gbaa dɛ ngɔ i ɔ nɛ ziki, hã nɛ dɛ sɔ tɔanɔ 'da nɛ do sanga sɔlanɔ li nza i, nɛ mi dɛ sɔ na, nɛ zĩlĩ.

5 Nɛ ĩ́ na, fala kɛ owi zũ wa le kɔ tɔa do tũ, nɛ wa kala tati a mɛ kɛ zã wa kɔ̃a ni iko. Nɛ owi 'bi wala te vinɔ, wa la tala wala nɛ ngɔ nɛ la.

6 Nɛ nde kɛ 'da nɛ, obe zã Ezau, owi sɛnɛ nɛ wa lá sɛ tala nɛ gɔ, wa kala sɛ mɛnɔ 'da nɛ vɛ̃. Gɛnɛ kɔ odia mɛnɔ nɛ usu ma ni, nɛ wa hɔ sɛ ngɔ nɛ.

7 Owinɔ nɛ gba zi tɔkɛ do wa ni, wa bɛ̃a gɛnɛ nɛ, nɛ wa ndaka nɛ ngɔ nùi 'da nɛ. Owinɔ nɛ dɛ zi na do wa ni, wa ia nɛ ti mbula 'da wa. Owinɔ nɛ nyɔngɔ zi mɛ do wa fala nɛ kpo ni, wa ɔkɔlɔ nɛ, nɛ wa mɔmɔ nɛ na: ‘Gbãlã zã nɛ bi do'do!’

8 Nɛ nde mi nwa, mi tɔ̃a na, do ngba soe kɛ zã mi nɔ̃lɔ̃, nɛ mi mbiti sɛ owi hã zãnɔ ngɔ nù Edɔmɛ vɛ̃. Mi lá sɛ wi hã kpo ngɔ kala Edɔmɛ gɔ.

9 Onwa bolonɔ kɔ le Temanɛ, wa tana sɛ kili. Nɛ osoda Edɔmɛ vɛ̃, wa fe sɛ li bolo.”


Oedɔmɛ wa bì ngɔ obe Israɛlɛ gɔ

10 “Aa nɛ, Oedɔmɛ, nɛ zɛla tɛ onya nɛ obe Israɛlɛ, kɛ wa a obe zã Yakɔbɔ ni. Kɔ nɛ ĩ na, mi hã sɛ sape hã nɛ, nɛ mi kumu sɛ nɛ do'do.

11 Do ngba soe kɛ Owi sɛnɛ obe Israɛlɛ, wa bi zi wa, nɛ wa ba le 'da wa ni, nɛ nde nɛ, Oedɔmɛ, nɛ zi boe, nɛ nɛ gàlà onya nɛ gɔ. Nɛ do 'da fala kɛ owinɔ ni, wa to zi zeke ngɔ okpamɛnɔ kɛ wa kala kɔ le Yeruzalɛmɛ ni, nɛ nɛ tɛ mɛ 'bɔ, nɛ dɛa zi mɔ tɛ nɛ ɔ nɛ wa ni.

12 “Aa nɛ, Oedɔmɛ, ma wè zi na, nɛ dɛ yangga ngamɛ kɛ onya nɛ Oyuda wa kpa ni gɔ. Nɛ wè zi we dɛ yangga do ngba soe kɛ owi sɛnɛ Oyuda, wa ba le 'da wa, nɛ wa 'danga ma ni gɔ. Nɛ nɛ wè zi 'bɔ we dã wa do ngba soe 'bako 'da wa ni gɔ.

13 Do 'da fala kɛ owi sɛnɛ owinɔ 'da mi wa ba le 'da wa, nɛ wa 'danga ma ni, nɛ nɛ lia zi kɔ nɛ, nɛ nɛ dɛa yangga 'bakoe 'da wa, nɛ nɛ kala kpamɛnɔ 'da wa do mɔ nɛ. Nɛ nde nɛ dɛ̃ zi de gɔ.

14 Do ngba soe kɛ owinɔ 'da mi wa zi kɔ ngamɔ bole ni, ma wè zi na, nɛ yolo dɛ nu mba walanɔ we gbɛ owanɔ wa yu bole ni gɔ. Nɛ ma wè zi 'bɔ na, nɛ kala owanɔ wa kpasa li bole ni, nɛ nɛ 'dɔlɔ wa hã owi sɛnɛ wa gɔ.

15 Ngba soe kɛ mi NWA, mi gɔnɔ sɛ do ngbangganɔ 'da owinɔ vɛ̃ ni kɔla ia. Kɔ nɛ ĩ na, wa dɛ sɛ do nɛ, ɔ nɛ kɛ nɛ dɛa do ongba nɛ ni. 'Dã mɛ kɛ nɛ dɛa ni, ma si sɛ hã nɛ.”


Obe Israɛlɛ wa ba sɛ nù Edɔmɛ

16 “Aa nɛ, obe Israɛlɛ, mi hã zi etumbu hã nɛ tɛ ngɔ kala 'da mi kɛ ma santo ni, nɛ ma vĩ zu nɛ, ɔ nɛ mi isi dɔ̃ nɔ̃lɔ̃ zã 'da mi dɛ nu nɛ ni. Na mɛ ni, etumbu 'da mi ma kpa sɛ zu ogele winɔ, nɛ mi hã sɛ etumbui ni hã wa gbaa na, wa mbiti ngɔ nù gɛ vɛ̃ do'do sɛ nɛ de.

17 Nɛ nde owanɔ sanga nɛ kɛ wa kpasa li bole ni, wa kpa sɛ dia dungu ngɔ kala Sioni, we kɛ wele kala ni vɛ̃ sɛ 'bɔ a mɔ́ mi. Obe zã Yakɔbɔ, wa si sɛ ngɔ nùi 'da wa kɛ owinɔ wa ndaka zi wa ngɔ nɛ ni.

18 Obe zã Yakɔbɔ do Yozɛfu wa ɔ sɛ nɛ we ni. Wa dɔ sɛ obe zã Ezau, nɛ wa bɛlɛ ɔ nɛ zɔ̃ ni, nɛ wa mbiti vɛ̃, nɛ tala wele kpo 'báná sɛ nza gɔ. Mi NWA, mi tɔ̃a ni.”


Obe Israɛlɛ wa kala sɛ nùnɔ kɛ zã wa ni

19 Owi ngɔ nù Yuda wa ba sɛ mbɛ nù Edɔmɛ, kɛ si nyanga kala do si ba gɔtɔ i ni, nɛ wa ba 'bɔ mbɛ nùi 'da Ofilisti, do nù Samaria kɛ mɛ a nùi 'da obe zã Efraimɛ ni. Nɛ obe zã Bɛnzamɛ wa ba sɛ nù Galadɛ.

20-21 Onu kpala Israɛlɛ tɛ si gbãlã ngɔ, kɛ wa 'dɔlɔ zi wa ni, wa hɔ sɛ onga soda, nɛ wa kpolo sɛ tɛ wa, nɛ wa ba nù Fenisi gbaa we Sɔkpɔ do Sarɛpta. Owi Yeruzalɛmɛ kɛ wa 'dɔlɔ wa dɛ Sɛfaradɛ i ni, wa kpolo sɛ tɛ wa, nɛ wa bi Owi kɔ lenɔ si ba gɔtɔ, nɛ wa nɛ ngɔ wa, nɛ wa kala lenɔ ni. 'Do nɛ, nɛ wa kù sɛ dɛ ngɔ kala Sioni. Nɛ wa yolo sɛ do di ni, nɛ wa e mbula ngɔ nù Edɔmɛ. Nɛ NWA Gale a dungu sɛ nwa ngɔ owinɔ 'da a.

Ngbaka DC Bible (We Nu Gale) Version © Bible Society of the Democratic Republic of Congo, 1995.

Bible Society of the Democratic Republic of Congo
Lean sinn:



Sanasan