3 YOANƐ 1 - WE NU GALE 1995

¹ Wi a mi, wi zɔ mɔ tɛ eklezia, mi kɔma mbɛti gɛ hã mɔ Gayusi, kɛ mi kɔ̃a gɛnɛ mɔ do sila mi kpo ni.

² Aa mɔ, yali ngba mi, mi aka Gale na, mɛnɔ 'da mɔ vɛ̃ ma la do dia nɛ, nɛ tɛ mɔ nganda ɔ nɛ kɛ kɔ̃a we 'da mɔ nganda nɛ ni.

³ 'Da fala kɛ ombe onya lɛ wa hɔa 'da lɛ nga, nɛ mi dɛa yangga wena we zele sakoe 'da mɔ na, mɔ 'bana tɛ kɔ̃ gɛnɛ gbãlã we 'da Gale, ɔ nɛ kɛ mɔ kɔ̃a zi do ma fai ni.

⁴ Fo mbé mɔ kɛ ma wia we de tɛ mi nɛ ngɔ zele na, obenɔ 'da mi wa dɛ gbãlã we dɛa mɔ ni bina.

Gayusi gala onya a wi Kristonɔ

⁵ Aa mɔ, yali ngba mi, mi zila na, mɔ gala onya mɔ wi Kristonɔ wena. Gɛnɛ kɔ wa a ogele wi, nɛ mɔ gala wa iko, ki ni ma wia ngboo.

⁶ Owinɔ mɔ gala wa ni wa tɛa i nga, nɛ wa tɔ̃a sako kɔ̃a zã 'da mɔ hã eklezianɔ i nga gɛ. Mi aka mɔ na, mɔ gálá wa li wala gɛnɛnɔ 'da wa, do tɛlɛ tɛ kɛ ma a dia li Gale ni.

⁷ Mba gɔ, wa nɛ gɛnɛnɔ ni do zu li Yezu Kristo, nɛ wa kɔ̃̀ we kpa mɔ kɔ̃ paganɔnɔ gɔ.

⁸ Kɔ we duzu ma, ma wia na lɛ owi Kristonɔ, lɛ gala owinɔ wa ɔ ní ni, takɔ lɛ mba do wa kpo kɔ dɛa toe 'da wa we be gbãlã we 'da Gale.

Dɛa mɔ tɛ Diotrɛfɛ do Demetriusi

⁹ Mi kɔma zi dɔ mbɛti hã eklezia 'da mɔ, nɛ nde Diotrɛfɛ kɛ a fa we hɔ gã wi ngɔ eklezia ni, a bɛa we zele we nu mi.

¹⁰ Kɔ 'da fala mi nɛ 'da nɛ i, nɛ mi tɔ̃ sɛ we ngɔ 'dã mɛnɔ 'da a vɛ̃. A 'danga zu li mi do bɛlɛ. Nɛ tati a ki ni iko gɔ, a bɛ̃a 'bɔ we dɛ gɛnɛ Owi Kristonɔ kɛ wa nɛ 'da a ni. Nɛ a bɛ̃a 'bɔ na, ogele ngba a wa tɛ dɛ̀ gɛnɛ wa gɔ. Kɔ wanɔ wa kɔ̃ we dɛ gɛnɛ wa ni, nɛ a fo wa kɔ eklezia do'do.

¹¹ Aa mɔ, yali ngba mi, mɔ tɛ 'bã̀ olo kɔ̃ o'dã winɔ gɔ, nɛ nde mɔ 'bã́ olo kɔ̃ odia wele. Wi kɛ a dɛ de mɔ fai ni, a a be 'da Gale, nɛ wi kɛ a dɛ 'dã mɔ fai ni, a ĩ̀ ti Gale gɔ.

¹² Nɛ nde kɛ 'da Demetriusi, owinɔ vɛ wa tɔ̃ dia we tɛ̃ a tɔ̃a. Gbãlã we kɔ dɛa mɔ tɛ̃ a boe, nɛ ma be 'bɔ na, a a dia wi. Nɛ lɛ tɔ̃a 'bɔ ní na, a dɛ de wena. Nɛ mɔ ĩ na, kɛ lɛ tɔ̃ ni, mɛ a ngbongbo we.

Balɛnɔ

¹³ Mi do we nu mi we tɔ̃ hã mɔ wena, nɛ nde mi kɔ̃̀ we kɔmɔ ma hã mɔ do mbɛti gɔ.

¹⁴ Mi kɔ̃a we nɛ 'da mɔ i ngangga gɛ, hã lɛ wele we nu ngba lɛ do mɔ.

¹⁵ E kɔ Gale dɛ na, mɔ ɔ do gɛa sila. Ongba mɔ i nga gɛ wa hã balɛ hã mɔ. Mɔ fáná ongba lɛ i mɔ ni kpo kpo vɛ̃.