2 TIMOTE 4 - WE NU GALE 1995

¹ We mi nɛ tɔ̃ nɛ ni, mi tɔ̃ ma hã mɔ dɛ gbali Gale do Yezu Kristo, kɛ a tɛ sɛ we 'bili we 'da owinɔ kɛ wa 'bana nza, do wanɔ wa fia ni, nɛ mi tɔ̃ ma do zu li Kristo, kɛ a tɛ sɛ ni, do zu li dɛa to nwa 'da a. We ni ma kɛ:

² Mɔ bé we nu Gale hã owinɔ, nɛ mɔ dálá nu mɔ tɛ be ma. Gɛnɛ kɔ mɛ a dia ngba soe, tabi mɛ a 'dã ngba soe nde, nɛ mɔ tɛ mbɔ̀kɔ̀ tɛ be we hã wa gɔ, mɔ bé ma bia fai. Mɔ dã́lã́ dɛ tɛ wa, nɛ mɔ ha kpã sila hã wa, nɛ mɔ bé wenɔ hã wa do du sila ngboo.

³ Mba gɔ, do ngba soe kɛ ma hɔ sɛ 'do gɛ ni, owele wa kɔ̃́ sɛ 'bɔ we zele gbãlã we bia we gɔ. Nɛ nde wa gɛ sɛ zala wa tati a tɛ wenɔ kɛ ma de tɛ wa ni, nɛ wa ngɛmɛ sɛ gba gili owi be wenɔ dɛ tɛ wa na, winɔ ni wa be wenɔ kɛ wa kɔ̃a we zele nɛ ni hã wa.

⁴ Wa kɔ sɛ 'bɔ we zele gbãlã we 'da Gale gɔ, nɛ nde wa siki sɛ li wa we zele ogba to.

⁵ Kɔ we mɔ, mɔ ní sila mɔ kɔ mɛnɔ vɛ̃, dɔ ma kpóló linggamɛ 'da mɔ gɔ, nɛ mɔ kúnú sila mɔ kɔ ngamɛnɔ mɔ kpa ni. Mɔ bá tɛ mɔ we be Dia Sakoe, nɛ mɔ 'dáfá toe 'da mɔ na, ma ɔ dia.

⁶ Kɔ we mi, ngba soe kɛ na mi hã tɛ mi nɛ́ dɔnggamɔ hã Gale ni ma wia ia. Tũ fio 'da mi ma kɔla ia.

⁷ Mi bi zi dia bolo, nɛ mi yu gbaa, nɛ mi hɔa ndɔti yui 'da mi, nɛ mi là fala kɔ̃ we nu Gale gɔ.

⁸ Kɔ ngangga ni, mi 'bɔ 'da si mɔ olo bole 'da mi. Nɛ si mɔ olo bole ni, mɛ a kɛ na, Nwa a sa sɛ li mi na wi bɔlɔ zu do ngba soe 'bili ngbangga ni. Nwa, kɛ a 'bili we do bɔlɔ nɛ ni, a há sɛ ma hã mi zu mi kpo iko gɔ, nɛ nde a hã sɛ tɛ mɛ 'bɔ ma hã owanɔ vɛ kɛ wa 'bɔ 'da ngba soe tɛa 'da a do kɔ̃a zã ni.

Tala wenɔ

⁹ Mɔ dɛ́ nganda na, mɔ tɛ dɔ̃ we kpa mi i nga.

¹⁰ Mba gɔ, Demasi yu mi do'do, we kɛ wɔ tɛ mɛnɔ nù gɛ ma gã kɔ sila a wena, kɔ a la dɛ Tɛsalonikɛ. Nɛ Krɛsansɛ la dɛ Galati, nɛ Tito la dɛ Dalmati.

¹¹ Nɛ wi 'bana do mi tati a Luka zu a kpo. Mɔ tɔ̃̀ hã Marko, nɛ nɛ tɛ́ fala nɛ kpo do a. Mba gɔ, a wia sɛ tɛ gala mi li toe 'da mi i nga.

¹² Mi tumba Tisikɛ tɛ Efɛzɛ.

¹³ Kɔ 'da fala tɛ mɔ́ mɔ, nɛ mɔ bá gã tuli 'da mi kɛ mi la zi ma tɛ Troasi tɛ kɔ tɔa 'da Karpusi ni tɛ nɛ. Nɛ mɔ tɛ́ 'bɔ do kasa mbɛtinɔ hã mi, wena a kɛnɔ wa dɛa ma do ndala sa'de ni.

¹⁴ Alɛkzandrɛ, wi dɛ dula, a dɛ mi 'danga wena. Nwa a gese sɛ olo 'dã mɛnɔ a dɛa ni hã a.

¹⁵ Kɔ li mɔ sɔ tɛ̃ a, we kɛ a bɛ̃a wenɔ vɛ kɛ lɛ tɔ̃a zi ni nganda wena.

¹⁶ Kuti kɛ mi nɛa zi we tɔ̃ gulu we 'da mi dati Owi 'bili wenɔ ni, nɛ nde fo zi wi yolo 'do mi bina. Winɔ vɛ̃ wa yu zi mi. E kɔ Gale mbɔkɔ wa!

¹⁷ Nɛ nde Nwa zi fala nɛ kpo do mi, nɛ a hã zi ngawi hã mi. Nɛ we duzu ngawi ni, mi bia Dia Sakoe hã owinɔ kɛ wa zi a Oyuda gɔ ni ia vɛ̃, nɛ wa vɛ wa zila. Nɛ Nwa kpasa zi mi kɔ nu gbɔgbɔ.

¹⁸ Nɛ a kpasa sɛ 'bɔ mi kɔ 'dã mɛnɔ ni, nɛ a ba sɛ mi, nɛ a e mi do lɔa tɛ mi kɔ le nwa 'da a li nza i. E kɔ a kpa dɔ̃lɔ̃ li kɔ sabɛlɛ do sabɛlɛ! Amɛ.

Ndɔti balɛnɔ

¹⁹ Mɔ hã́ balɛ hã Prisilɛ, do Akilasi, do nu fɛlɛ kula 'da Onezifɔrɛ.

²⁰ Erastɛ 'bana tɛ Korintɛ i, nɛ mi la zi Trofimɛ tɛ Milɛ, we kɛ a zi do zɛlɛ.

²¹ Mɔ dɛ́ nganda we hɔ i nga dati a zɔlɔ gɛ̃ɛ. Ebulusi, do Pidɛnɛ, do Linusi, do Klodia, do tala onya lɛ vɛ̃, wa tumba balɛ hã nɛ.

²² E kɔ Nwa ɔ do mɔ! Nɛ dia zã 'da Gale ma 'bana do nɛ vɛ!