2 TIMOTE 3 - WE NU GALE 1995

Ngamɛnɔ kɛ ma hɔ sɛ do ndɔti nùi

¹ Ma wia na, mɔ ĩ ti we gɛ do dia nɛ! Ndɔti nùi kɔlɔ, nɛ ngamɔ ma hɔ sɛ wena.

² Mba gɔ, Owele wa lengge sɛ do kili tɛ wa wele nɛ iko, nɛ wa kɔ̃ sɛ gɛnɛ mbili wena. Wa ma sɛ ngɔ dɔnggɔ tɛ wa, nɛ zu wa ma gã sɛ wena. Wa dã sɛ zu li Gale, nɛ wa bɛ sɛ we nu owi ko wa. Wa dɔ́nggɔ́ sɛ wi dɛ de mɔ hã wa gɔ, nɛ wa dĩ́lĩ́ sɛ fala mɛnɔ 'da Gale gɔ.

³ Li wa ma kolo sɛ wena, nɛ wa dɛ́ sɛ 'bako hã ngba wa gɔ. Wa sɛ a wi tɔ̃ tɛ Owele, nɛ wa ĩ́ sɛ ti kunu sila wa gɔ. Wa zɛlɛ sɛ tɛ ngba wa wena, nɛ wa kɔ̃̀ sɛ 'bɔ gɛnɛ dia mɔ gɔ.

⁴ Wa vũ sɛ to tɛ ngba wa, nɛ wa dɛ sɛ nu we wena. Kɔ sila wa ma dunu sɛ do wali, nɛ wa kɔ̃ sɛ gɛnɛ odia mɛnɔ ngɔ nù gɛ nɛ ngɔ Gale.

⁵ Wa be sɛ tɛ wa ɔ nɛ kɛ wa kɔ̃a Gale kɔ̃a ni, nɛ nde do kɔ sila wa, wa bɛa ngawi kɛ wa wia sɔ we kpa kɔ kɔ̃a we ni. Kɔ mɔ yú owinɔ wa dɛ ní ni do'do.

⁶ Ombe sanga wa ni, wa le kɔ tɔanɔ 'da wukonɔ kɛ sila wa ngàndà gɔ ni, we vĩ zu linggamɛ 'da wa. Owukonɔ ni, tole 'dã mɛnɔ kɛ wa dɛa zi ni ma nɛa ngɔ wa do'do, nɛ wa 'bana do wɔ tɛ dɛ 'dã mɛnɔ kpi do kpi.

⁷ Wa fa we yambala mɔ dɛ dati fai, nɛ nde wa wé sɛ we ĩ ti gbãlã we 'da Gale wa yambala ni gɔ.

⁸ Owinɔ ni, wa bɛ̃a gɛnɛ gbãlã we 'da Gale ɔ nɛ kɛ zɛ́ dati Yanɛsi do Yambrɛsi wa bɛa zɛ́ we nu Mɔizɛ ni. Hã zã wa dè gɔ, nɛ kɔ̃a we 'da wa ma yala iko.

⁹ Nɛ wa nɛ́ sɛ nyɛlɛ gɔ, we kɛ winɔ vɛ̃ wa zɔ sɛ yɔnda 'da wa, ɔ nɛ kɛ wa ĩ zɛ́ do ti yɔnda 'da Yanɛsi do Yambrɛsi ni.

Tala mbula

¹⁰ Nɛ nde kɛ 'da mɔ, mɔ zila bia wenɔ 'da mi, nɛ mɔ dɛa mbula nɛ, nɛ mɔ 'bã olo kɔ̃ mi, nɛ mɔ dɛa linggamɔ zã mi. Mɔ ĩ ti kɔ̃a we 'da mi, do du sila 'da mi, do kɛ mi kɔ̃a do gɛnɛ ongba mi wena ni. Nɛ mɔ ĩ ti kɛ mi kunu do sila mi ni,

¹¹ nɛ mɔ ĩ 'bɔ ti zɛlɛ tɛnɔ do ngamɛnɔ 'da mi, ɔ nɛ kɛnɔ mi kpa zi tɛ Antiɔsɛ, do Ikoniumɛ, do Listrɛ ni. Ngamɛ kɛ mi zɔ̀ gɔ a ge nde? Nɛ nde Nwa kpasa zi mi kɔ nɛ vɛ̃.

¹² Ĩ na, winɔ vɛ kɛ wa kɔ̃ we ɔ winɔ 'da Gale do mba kpo do Yezu Kristo ni, wa kpa sɛ zɛlɛ tɛ.

¹³ Nɛ o'dã winɔ do Owi ɔlɔ winɔ, 'dã mɛ 'da wa ma gã sɛ dɛ dati fai. Wa ɔlɔ sɛ winɔ, nɛ Owele wa ɔlɔ sɛ tɛ mɛ 'bɔ wa.

¹⁴ Kɔ we mɔ, sila mɔ nɔ dɛ ngɔ wenɔ kɛ mɔ yambala zi, nɛ mɔ kɔ̃a gɛnɛ nɛ do sila mɔ kpo ni. Mba gɔ, mɔ ĩ ti owinɔ kɛ wa bia zi ma hã mɔ ni.

¹⁵ Yolo do be tɛ mɔ, mɔ ĩ ti mbɛtinɔ 'da Gale. Nɛ ma wia do hã hã zã hã mɔ, nɛ hã zã ni gala mɔ we kpasa do wala kɔ̃ zu li Yezu Kristo.

¹⁶ Mbɛti santonɔ ni vɛ, ma yula nu Gale. Nɛ ma gala lɛ we be gbãlã we hã winɔ, nɛ ma be 'dã we dɛ nza, nɛ ma bɔlɔ owanɔ wa yɔa ni, nɛ ma be mɔ hã wele na, a 'dafa dungu 'da a.

¹⁷ Na mɛ ni, ma gala wi 'da Gale na, a hɔ gbãlã wele ngboo, nɛ a we tɛ dɛ de dɛa mɛnɔ vɛ.