2 TIMOTE 2 - WE NU GALE 1995

Polo tɔ̃a mbula hã Timote

¹ Aa mɔ be 'daa, e kɔ dia zã kɛ Gale bia hã lɛ do wala 'da Yezu Kristo ni, ma hã ngawi hã mɔ.

² Nɛ wenɔ kɛ mi bia zi ma dɛ li ogba gili winɔ vɛ̃, nɛ mɔ zila ni, mɔ bé tɛ mɛ 'bɔ ma hã owinɔ kɛ mɔ ĩ na, wa a ogbãlã wele, nɛ wa wia tɛ be tɛ mɛ 'bɔ ma hã ogele wele ni.

³ Nɛ mɔ, mɔ mbá do mi kpo kɔ ngamɛ gɛ, ɔ nɛ dia soda 'da Yezu Kristo.

⁴ Soda kɛ a kɔ̃ we hã yangga hã nwa ngɔ a ni, a wè tɛ la dɛa to soda, nɛ a fi tɛ̃ a kɔ dɛa toe 'da Owi 'da lenɔ gɔ.

⁵ Nɛ wi dɛ sa yu, a wia tɛ kpa si mɔ olo yui 'da a, tati a fala kɛ a dɛ mbula yui ni.

⁶ Wi wia tɛ kpa nyɔngɔmɔ li fɔ dati, wi a wi wa fɔɛ, kɛ a kpa ngamɔ toe ni.

⁷ Mɔ lénggé do wenɔ mi tɔ̃a ni, we kɛ Nwa a hã sɛ hã zã hã mɔ, we ĩ gulu mɛnɔ ni vɛ̃.

⁸ Tɛ zu mɔ tɛ èlè ngɔ Yezu Kristo gɔ. A a wi nu fɛlɛ Davidi, nɛ a za'da zi nza kɔ fio. Ki ni a Dia Sakoe kɛ mi be gɛ a ni.

⁹ Nɛ we duzu Dia Sakoe ni, ma kɛ mi kpa zɛlɛ tɛ, nɛ wa ɛnzɛ mi do dɔkpɔ, nɛ wa fi mi bɔlɔkɔ ɔ nɛ wi dɛ 'dã mɔ ni. Nɛ nde wa ɛ̀nzɛ̀ we nu Gale gɔ.

¹⁰ We duzu ma, mi kunu sila mi kɔ ngamɛnɔ vɛ̃, we lengge do winɔ kɛ Gale saka wa ia ni, takɔ wa kpa tɛ mɛ 'bɔ kpasi kɛ ma kɔ Yezu Kristo, do dɔ̃lɔ̃ li kɛ ma é sɛ gɔ ni.

¹¹ Mɔ zɔ́ wenɔ gɛ mɛ a ngbongbo we na: “Fala kɛ lɛ fe do a, nɛ lɛ kpasa sɛ do a.

¹² Kɔ fala kɛ lɛ kpãlã sila lɛ kɔ ngamɔ, nɛ lɛ dungu sɛ nwa do a. Kɔ fala kɛ lɛ kafa a, nɛ a kafa sɛ tɛ mɛ 'bɔ lɛ.

¹³ Nɛ fala kɛ lɛ dɛ̀ olo nu lɛ gɔ, nɛ nde a dɛ olo nu a dɛa fai iko, we kɛ a wè tɛ kafa olo nu a gɔ.”

Wi dɛa toe kɛ Gale kɔ̃a gɛnɛ a ni

¹⁴ Mɔ gbá tɛ zu winɔ ngɔ we mi tɔ̃a gɛ, nɛ mɔ dala nu mɔ hã wa li Gale na, wa tɛ mɔ̃̀lɔ̃̀ dɛ sanga ngba wa ngɔ olɛnggɛ iko gɔ, we kɛ ma do gulu nɛ bina, nɛ ma 'danga 'bɔ kɔ̃a we 'da winɔ kɛ wa zele wa ni 'danga.

¹⁵ Mɔ dɛ́ nganda na, Gale kɔ̃ gɛnɛ toe 'da mɔ. Mɔ ɔ́ wi dɛa to kɛ sape bá li a we toe a dɛ ni gɔ, nɛ mɔ be gbãlã we 'da Gale do wala olo nɛ ngboo.

¹⁶ Fala kɛ mɔ zele lɛnggɛnɔ kɛ fo gulu nɛ bina, nɛ ma 'danga kɔ̃a we 'da winɔ 'danga ni, nɛ mɔ tɛ fì nu mɔ kɔ nɛ gɔ. Mba gɔ, owinɔ wa tɔ̃ lɛnggɛnɔ ni, wa nyɛlɛ sɛ do Gale dɛ dati nyɛla fai.

¹⁷ Nɛ bia wenɔ 'da wa ɔ nɛ dani kɛ ma nyɔngɔ mulu tɛ wele, nɛ ma gã dɛ dati gã fai ni. Nɛ Himene do Filɛtɛ wa sanga winɔ kɛ wa be we ní ni.

¹⁸ Wa la li gbãlã we 'da Gale do'do, nɛ wa be hã winɔ na, lɛ winɔ lɛ tunu kɔ fio ia. Bia wenɔ ni, ma 'danga kɔ̃a we 'da winɔ 'danga.

¹⁹ Nɛ nde gbãlã we kɛ lɛ kɔ̃a gɛnɛ ma ni, ma ɔ nɛ nga tanɔ, kɛ Gale ia zɛ́ we dɛ tɔa dɛ ngɔ nɛ ni, nɛ ma 'bana nganda wena fai. Nɛ wa kɔma mbɛti dɛ ngɔ nɛ na: “Nwa ĩ ti winɔ 'da a.” Nɛ wa kɔma 'bɔ na: “Wi kɛ a tɔ̃ na ɛ a wi 'da Nwa, nɛ ma wia na a yu 'dã mɔ.”

²⁰ Tɛ kɔ gã tɔa, mɔ kpá sɛ tati a kpana kɛ wa dɛa do mɔ mbali, tabi do fɛ̃a mɔ bolo iko ni gɔ. Nɛ nde mɔ kpa sɛ 'bɔ kɛnɔ wa sɛa do te, do kɛnɔ wa 'bua do gili ni. Nɛ kɛnɔ wa dɛa do mɔ mbali, tabi do fɛ̃a mɔ bole ni, wa fɔmɔ ma we dɛ do to 'da fala mɔ dɔ. Nɛ nde kɛnɔ do te, tabi do gili ni, wa dɛ do to tũ kpo kpo iko.

²¹ Kɔ wi kɛ a yu 'dã mɛnɔ kɛ mi tɔ̃ we nɛ gɛ, nɛ a ɔ sɛ nɛ dia kpana kɛ Gale saka ma we a wele nɛ ni. Nɛ a wia mɔ dɛ to 'da wele a, nɛ a e sɛ a we dɛ do dia dɛa tonɔ 'da a vɛ.

²² Kɔ mɔ yú mɛnɔ vɛ kɛ ma ɔkɔlɔ sila ongba mɔ zagbãlãnɔ ni. Mɔ fá we ɔ do bɔlɔ zu, do kɔ̃a we, do kɔ̃ gɛnɛ ngba wi, nɛ mɔ ɔ́ do gɛa sila dɛ 'da owinɔ kɛ wa dɔnggɔ Nwa do sila wa kpo ni.

²³ Mɔ yú oyia lɛnggɛnɔ kɛ li zuma nɛ bina ni. Mba gɔ, ma fa kpawe iko.

²⁴ Nɛ ma wè na, wi dɛ toe 'da Nwa kpa we gɔ. Nɛ nde ma wia na, a ɔ do dia sila dɛ 'da winɔ vɛ, nɛ a ĩ ti be mɔ, nɛ a ĩ ti kunu sila a kɔ bia we ni.

²⁵ Nɛ a tɔ̃ mbula hã winɔ kɛ wa ba kafi nu a ni do gɛa sila, nɛ mbe gɔ, nɛ Gale a hũi sɛ wala hã wa na, wa kifi sila wa, nɛ wa ĩ ti gbãlã we.

²⁶ Na mɛ ni, nɛ gbãlã zã wa ma siki nɛ, nɛ wa hɔ sɛ nza li bili 'da Satana kɛ ma ba wa, takɔ wa dɛ mɛ kɛ zã a kɔ̃a ni.