2 TIMOTE 1 - WE NU GALE 1995

¹ Wi a mi Polo, wi nɛ toe 'da Yezu Kristo, ɔ nɛ kɛ zã Gale kɔ̃a ni. Gale tumba mi na, mi be we mbulu kpasi kɛ a kpua hã lɛ, nɛ lɛ kpa ma kɔ Yezu Kristo ni hã winɔ.

² Mi kɔma mbɛti gɛ hã mɔ, be 'da mi Timote kɛ mɔ ngɔ sila mi ni. E kɔ Baa lɛ Gale do Nwa 'da lɛ Yezu Kristo, wa be dia zã 'da wa hã mɔ, nɛ wa ĩ 'bako hã mɔ, nɛ wa dɛ na, mɔ dungu do gɛa sila.

Polo hã iɔ̃nae hã Gale we duzu Timote

³ 'Da fala kɛ mi lengge do mɔ, nɛ mi hã iɔ̃nae hã Gale, kɛ mi dɛ toe hã a do dia linggamɔ, ɔ nɛ kɛ oyaa mi wa dɛa zɛ́ ni. Nɛ tũ do gba wese, mi sambala we mɔ fai.

⁴ Ta zu mi gba ngɔ kɔ̃a mɔ hia zi ni, nɛ mi fa wena na, lɛ kpa ngba lɛ do mɔ, kɔ sila mi dunu do yangga.

⁵ Mi 'bana lengge do ngbongbo kɔ̃a we 'da mɔ, kɛ ma do gele linggamɔ kɔ nɛ bina ni. Yaa mɔ wuko nɛ, Loisɛ, do naa mɔ Enisɛ, wa zi do kɔ̃a we na mɛ ni dati hã mɔ, nɛ mi ĩ na, mɔ 'bɔ do kpo kɔ̃a we ni boe.

⁶ We duzu ki ni, mi gba ta zu mɔ na, mɔ dɛ nganda na, dɔ ngawi dɛa toe kɛ Gale hã zi hã mɔ do 'da fala kɛ mi a do kɔ̃ mi zu mɔ ni, ma mbɔ́kɔ́ gɔ.

⁷ Mba gɔ, Gale hã̀ zi Hi Wi 'da a hã lɛ na, lɛ ɔ do kili gɔ, nɛ nde lɛ ɔ do ngawi, lɛ kɔ̃ gɛnɛ ngba lɛ, nɛ lɛ ɔ do kpã sila.

⁸ We duzu ma, mɔ tɛ dɛ̀ sape we tɔ̃ we 'da Nwa 'da lɛ hã Owele gɔ. Nɛ sape tɛ bà 'bɔ li mɔ we mi kɛ mi lia bɔlɔkɔ we duzu a ni gɔ. Nɛ nde mɔ mbá do mi kɔ ngamɛ kɛ mi kpa we duzu be Dia Sakoe ni, nɛ mɔ gbini zã mɔ do ngawi kɛ Gale hã ma hã mɔ ni.

⁹ Gale kpasa zi lɛ, nɛ a sa mɔ hã lɛ, we a lɛ do owinɔ 'da a. A dɛ̀ ní we duzu dia dɛa mɛnɔ 'da lɛ gɔ, nɛ nde we duzu dia sila 'da a ɔ nɛ kɛ a 'dafa ni. Mba gɔ, dati ndo nyanga dɛ mɛnɔ, Gale 'bili zɛ́ do kɔ sila a na, a be sɛ dia zã 'da a hã lɛ do wala 'da Yezu Kristo.

¹⁰ Kɔ a bia dia zã 'da a hã lɛ ngangga gɛ do wala hɔa 'da Wi kpasa lɛ Yezu Kristo. Mba gɔ, Yezu Kristo hɔa, nɛ a gbɛa ngawi 'da fio, nɛ a bia kpasi kɛ ma é sɛ gɔ ni hã lɛ do wala 'da Dia Sakoe.

¹¹ Nɛ Gale saka mi do wi be gulu Dia Sakoe ni hã winɔ, do wi nɛ to nɛ.

¹² Kɔ we duzu ki ni, ma kɛ mi kunu sila mi kɔ ngamɛnɔ mi kpa gɛ. Nɛ sape nɛ bá li mi gɔ, we kɛ mi ĩ ti wi kɛ mi gbini zã mi do a ni. Nɛ mi ĩ ngboo na, a do ngawi we fɔmɔ wenɔ kɛ a hã hã mi ni, gbaa we hɔ ngba soe tɛa 'da a.

¹³ Mɔ 'dáfá dɛa mɔ tɛ mɔ we kɔ̃ do wenɔ kɛ mɔ zila zi ma dɛ nu mi, nɛ mɔ ɔ́ do kɔ̃a zã do kɔ̃a we kɛ lɛ kpa ma kɔ mba li ngba wi 'da lɛ do Yezu Kristo ni.

¹⁴ Mɔ fɔ́mɔ́ gbãlã wenɔ 'da Gale kɛ mi a zi dɛ kɔ̃ mɔ, do wala 'da Hi Wi Santo kɛ a ɔ kɔ sila lɛ ni.

¹⁵ Mɔ ĩ na, Owi Azi wa yu mi vɛ̃ do'do. Ombe wi a Fizɛlɛ do Hɛrmɔgɛnɛ.

¹⁶ E kɔ Nwa be dia zã 'da ɛ hã nu fɛlɛ Onezifɔrɛ, we kɛ a hã zi kpã sila hã mi fala dɛlɛ wena, nɛ sape bà zi li a we bɔlɔkɛ mi lia ni gɔ.

¹⁷ 'Da fala a hɔa Roma gɛ, nɛ a ia sila a we fa mi gbaa, nɛ a kpa mi.

¹⁸ E kɔ Nwa ĩ 'bako hã a do ngba soe a tɛ sɛ ni. Mɔ ĩ ti ode dɛa mɛnɔ kɛ a dɛa zi do mi tɛ Efɛzɛ i ni de wena.