2 PETRO 3 - WE NU GALE 1995

Yezu Kristo a tɛ sɛ 'bɔ

¹ Aa nɛ, oyali ngba mi, kɛ gɛ mɛ a bɔa mbɛti kɛ mi kɔmɔ ma hã nɛ. Kɔ mbɛtinɔ bɔa ni, mi gba ta zu nɛ ngɔ wenɔ kɛ nɛ yambala zi ni, takɔ nɛ 'dafa linggamɛnɔ 'da nɛ, kɔ ma ɔ bɔlɔ.

² Nɛ lénggé do wenɔ kɛ owi gba olo nu Gale wa tɔ̃a zi ni. Nɛ nɛ lénggé 'bɔ do mbula kɛ Nwa Yezu Kristo, Wi kpasa lɛ tɔ̃a zi ma hã lɛ do wala 'da Owi nɛ tonɔ 'da a ni.

³ Dati ngboo, nɛ ĩ́ na, do ndɔti tũnɔ, nɛ Owele wa hɔ sɛ, nɛ wa dɛ sɛ mɔ tɛ wa, ɔ nɛ kɛ zã wa kɔ̃a ni. Owinɔ ni wa mɔmɔ sɛ nɛ,

⁴ nɛ wa tɔ̃ sɛ na: “Yezu Kristo tɔ̃a zi hã nɛ na, ɛ tɛ sɛ 'bɔ, kɔ a a do nde? Mba gɔ, oyaa lɛ wa fia zɛ́ belee, nɛ nde mɔ kpo kìfì gɔ. Mɛnɔ 'bana nɛ́ kɛ Gale dɛa zɛ́ ma 'da fala a dɛa do nùi ni.”

⁵ Owinɔ kɛ wa wele wenɔ ɔ ní ni, ta zu wa ila na, zɛ́ dati belee, Gale dɛa li nza do nù. A wila we, nɛ nù yula tɛ lì, nɛ mɛnɔ ngɔ nù gɛ, ma kpasa we duzu lì.

⁶ Nɛ Gale 'danga zɛ́ 'bɔ nùi do lì. A fi zi gba kolo ngɔ nù gɛ, nɛ ma bindi winɔ vɛ̃.

⁷ Nɛ a wila zɛ́ 'bɔ we na, li nza do nùi sɔɛ gɛ, ɛ e ma 'bɔ do 'da ngba soe kɛ ɛ nɛ 'bili sɛ do we 'da winɔ ni. Ɛ fi sɛ we tɛ nɛ, nɛ ɛ gbɛ owi dɛ 'dã mɛnɔ vɛ̃.

⁸ Nɛ nde nɛ, oyali ngba mi, mɛ kɛ ma wè na ta zu nɛ ele ngɔ ma gɔ ni, ma kɛ: Nwa zɔ tũ kpo ɔ nɛ sabɛlɛ koto kpo ni, nɛ a zɔ sabɛlɛ koto kpo ɔ nɛ tũ kpo ni.

⁹ Mbe winɔ wa lengge na, Nwa kpo mbulu, nɛ nde a dɛ́ do nu a dɔ̃ gɔ. Nɛ nde ma a ni gɔ. A disi we dɛ do mbuli 'da a tati a we kɛ a kunu sila a we duzu nɛ. Mba gɔ, a kɔ̃̀ na, wele kpo fe kɔ 'dã mɔ gɔ. Nɛ nde a kɔ̃a na, winɔ vɛ̃ wa kifi sila wa.

¹⁰ Nɛ nde tũ kɛ Nwa nɛ tɛ sɛ nɛ ni, ma gbanga sɛ nɛ ɔ nɛ wi zũ ni. Do ngba soe ni, nɛ giti li nza ma dɔ̃lɔ̃ sɛ nganda wena, nɛ ma bisi. Nɛ omɛnɔ li nza i ni ma ngutu sɛ vɛ̃, nɛ nùi do mɛnɔ ngɔ nɛ vɛ ma 'danga sɛ.

¹¹ Nɛ́ kɛ mɛnɔ vɛ́ ma sɔkpɔ sɛ ní ni, ma wia na, nɛ ĩ ti tɛlɛ tɛ kɛ nɛ nɛ dungu nɛ ni. Nɛ 'dáfá dungu 'da nɛ, kɔ ma ɔ santo, nɛ nɛ ba tɛ nɛ vɛ hã Gale.

¹² Nɛ dɛ na mɛ ni gbaa we 'bɔ do 'da tũ hɔa 'da Gale, nɛ nɛ dɛ 'bɔ nganda na, kɔ̃ tũi ni ma hɔ dɔ̃. Mɛ sɛ a tũi kɛ li nza ma bɛlɛ sɛ, nɛ mɛnɔ li nza i ni ma ngutu sɛ vɛ.

¹³ Nɛ nde Gale kpua mbulu hã lɛ na, a dɛ sɛ mbé li nza do mbé nù. Nɛ owinɔ ngɔ mbé nùi ni sɛ tati a Owi dɛ bɔlɔ zu dɛa mɔ iko. Kɔ lɛ 'bɔ 'da mbé mɛnɔ a dɛ sɛ ni.

¹⁴ We duzu ma, oyali ngba mi, mi tɔ̃ hã nɛ na, 'da fala nɛ tɛ 'bɔ 'da tũ hɔa 'da Nwa 'da lɛ ni, ma wia na, nɛ dɛ nganda, dɔ nɛ hɔ́ li a do 'dã mɔ gɔ, kɔ nɛ ɔ do gɛ̃a sila dati a.

¹⁵ Nɛ ĩ́ na, Nwa 'da lɛ a do du sila, nɛ a hã wala hã nɛ na, nɛ kifi sila nɛ, nɛ nɛ kpasa. Nya lɛ Polo, kɔma zi 'bɔ mbɛti we be gulu mɛnɔ gɛ hã nɛ. A kɔma mbɛti ni do hã zã kɛ Gale hã zi ma hã a ni.

¹⁶ Nɛ kɔ mbɛtinɔ 'da a vɛ̃ kɛ a kɔma ngɔ hɔa 'da Nwa 'da lɛ ni, a tɔ̃a wenɔ gɛ. Nɛ nde mbe wenɔ kɛ a kɔma ma ni, ma ngandá wena. Gulu nɛ a ombe winɔ kɛ wa ĩ̀ ti mɔ ngboo gɔ, tabi sila wa ngàndà gɔ ni, wa kpula gulu wenɔ ni do'do, ɔ nɛ kɛ wa kpolo do mbe gele wenɔ kɔ 'Buki 'da Gale ni. Kɛ wa dɛ ni, wa fi ngbangga 'da Gale zu wa wele nɛ.

¹⁷ Aa nɛ oyali ngba mi, wa mbisa nɛ ia. Kɔ we duzu ki ni, ma wia na, li nɛ sɔ̃́, da dɛ kɔ o'dã wi wa vĩ zũ nɛ, kɔ nɛ la fala kɔ̃a we kɛ nɛ do ma ni gɔ.

¹⁸ Nɛ nde nɛ yɛ́nggɛ́ do li wala 'da Nwa 'da lɛ Yezu Kristo kɛ a a Wi kpasa lɛ ni fai, takɔ a be dia zã hã nɛ, nɛ nɛ ĩ ti a dɛ dati. E kɔ a kpa dɔ̃lɔ̃ li sɔɛ gɛ, do kɔ sabɛlɛ do sabɛlɛ! Amɛ.