2 PETRO 2 - WE NU GALE 1995

Li nɛ sɔ̃́ tɛ Owi be we bɛlɛnɔ

¹ Zɛ́ dati, Owi gba olo nu Gale do bɛlɛ wa zɛ́ sanga owinɔ 'da Gale boe. Na mɛ ni, ombe wi be we bɛlɛnɔ, wa hɔ sɛ 'bɔ sanga nɛ gɛ, nɛ wa be sɛ we bɛlɛ, kɛ ma wia tɛ 'danga kɔ̃a we 'da winɔ ni hã nɛ. Nɛ wa bɛ̃ sɛ 'bɔ gɛnɛ Nwa Yezu Kristo, kɛ a gɔnɔ zi zu wa ni. Nɛ nde 'da kala sɛ gɔ, nɛ gi'da 'dã mɛ wa dɛ ni, ma te sɛ zu wa wele nɛ.

² Gba gili Owele wa nɛ sɛ 'dɔkɔlɔ wa, nɛ wa mba sɛ do wa kɔ 'dã dɛa mɛnɔ 'da wa. Nɛ Owele wa 'danga sɛ gbãlã we 'da Gale tua do wa.

³ Owi 'bili bɛlɛnɔ ni, wa sɛ do wɔ mbili wena, nɛ wa ɔkɔlɔ sɛ nɛ do bɛlɛnɔ 'da wa we kpa mɔ kɔ̃ nɛ. Nɛ nde Gale 'bili zi we 'da wa belee ia, nɛ etumbu 'bɔ 'da wa 'bɔa iko.

⁴ Nɛ zɔ́, Gale dɛ̀ zi 'bako hã anzɛnɔ kɛ wa dɛa zɛ́ 'dã mɔ ni gɔ. A da zi wa kɔ gba 'du kɔ̃, nɛ wa 'bana kɔ tũ fala ni we 'bɔ 'da ngba soe kɛ a nɛ 'bili sɛ do we 'da winɔ ni.

⁵ Nɛ Gale dɛ̀ zi 'bɔ 'bako hã owinɔ zɛ́ dati, kɛ wa dɛa zi 'dã mɛnɔ ni gɔ, nɛ nde a bindi wa 'dɔ gba hɛ̃a lì. A kpasa zi tati a Nowe, kɛ a be zi bɔlɔ zu dɛa mɔ hã owinɔ ni. Gale kpasa zi a fala nɛ kpo do ombe gele wele sambo.

⁶ Nɛ a 'bili zi 'bɔ 'dã we dɛ ngɔ Owi kɔ le Sodɔmɛ do Gomɔrɛ, nɛ a dɔa lenɔ 'da wa, nɛ ma ngutu vɛ́. A dɛa ní we be do mɔ hã winɔ kɛ wa bɛa gɛnɛ a ni na, a dɛ sɛ 'bɔ do wa kpasaa na mɛ ni.

⁷ Nɛ nde a kpasa zi Lɔtɛ, we kɛ Lɔtɛ zi a wi bɔlɔ zu, nɛ sila a zɛlɛ zi we 'dã mɔ sapenɔ kɛ winɔ wa dɛ zi ni wena.

⁸ Lɔtɛ ɔ zi dɛ sanga o'dã winɔ ni, nɛ tũ kpo kpo a zɔ zi 'dã mɛnɔ wa dɛ ni, nɛ a zele 'bɔ 'dã wila wenɔ wa wele ni, nɛ ma hã zi ngamɔ kɔ sila a wena, we kɛ a a wi bɔlɔ zu.

⁹ Ki ni ma be hã lɛ na, Nwa Gale ĩ ti wala kɛ a nɛ kpasa sɛ do owinɔ 'da a 'da fala kɛ ngamɔ kpa wa ni. Nɛ ma be 'bɔ hã lɛ na, a ĩ 'bɔ ti fala kɛ a nɛ a do 'dã winɔ, we 'bɔ do 'da ngba soe a nɛ 'bili sɛ do we, nɛ a hã etumbu hã wa ni.

¹⁰ Nɛ nde dati ngboo, a hã sɛ gã etumbu hã owinɔ kɛ wa dɛ 'dã mɔ kɛ wɔ zã wa kɔ̃a, nɛ wa bɛ na, Gale a Nwa ngɔ lo gɔ ni. Owi be we bɛlɛnɔ kɛ mi tɔ̃a sɔ we 'da wa hã nɛ ni, wa do kili bina, nɛ zu wa nganda wena. Nɛ wa dɛ́ 'bɔ kili dã Owi dɔ̃lɔ̃ linɔ li nza i ni gɔ.

¹¹ Nɛ nde ĩ na, anzɛnɔ kɛ wa nganda nɛa ngɔ Owi be we do bɛlɛnɔ wena ni, wa tɔ̃́ mbe 'dã we tɛ Owi dɔ̃lɔ̃ linɔ ni dati Gale gɔ.

¹² Owi be we bɛlɛnɔ ni, wa do gbãlã zã wa bina, wa ɔ nɛ osa'de zamɔ kɛ Gale dɛa wa na, wele ndɔ bili hã wa, nɛ a gbɛ wa iko ni. Wa tɔ̃ 'dã we tɛ mɛnɔ kɛ wa ĩ̀ ti gulu nɛ gɔ ni. Nɛ nde Gale a kumu sɛ wa ɔ nɛ osa'de zamɔ ni.

¹³ Nɛ tɛ wa ma zɛlɛ sɛ olo ngamɛ wa hã zi hã ogele winɔ ni. Wa dɛ yangga wena we dɛ 'dã mɛnɔ 'da wa do gbo gba wese. Kɔ 'da fala kɛ wa mba li ngba wa fala nɛ kpo do nɛ we nyɔngɔ mɔ, nɛ wa 'danga sako li nɛ, nɛ wa hã sape hã nɛ. Nɛ 'da fala wa ma ngɔ ɔlɔ nɛ na mɛ ni, nɛ ma de tɛ wa wena.

¹⁴ Gbali wa kɛnggɛlɛ tati a owuko ndumbanɔ we fa wa, nɛ wɔ tɛ 'dã mɔ é kɔ sila wa fala kpo gɔ. Wa ɔkɔlɔ winɔ kɛ sila wa ngàndà gɔ ni, nɛ wa fi wa kɔ 'dã mɔ. Wɔ mbili gã kɔ sila wa wena. Nɛ nde Gale fɔmba wa ia.

¹⁵ Wa la li bɔlɔ wala do'do, nɛ wa ba wala do Balamɛ, be 'da Beɔrɛ, kɛ a dɛ zi yangga ɔlɔ winɔ we kpa mbili kɔ̃ wa ni.

¹⁶ Nɛ Gale dãlã zi dɛ tɛ Balamɛ we 'dã mɛ a dɛ ni. Mba gɔ, mbe ngba soe kpo, nɛ punda 'da Balamɛ wila we hã a ɔ nɛ kɛ wele wele do we ni, nɛ a ga Balamɛ na, dɔ a dɛ́ 'bɔ mɔ yɔnda ni gɔ.

¹⁷ Owi be we bɛlɛnɔ ni, wa ɔ nɛ 'de kɛ ma ɔ̃sã, tabi gba tũ kolo kɛ bũ kala ma do'do, nɛ kole tɛ̀ gɔ ni. Gale 'dafa fala hã wa kɔ gba tũ kpirr.

¹⁸ Wa tɔ̃ oyia lɛnggɛ we dɔnggɔ tɛ wa hã winɔ. Nɛ wa yamba we ɔlɔ winɔ kɛ wa hɔa nza kɔ Owi dɛ 'dã mɛnɔ, nɛ wa kifi sila wa 'da kala gɔ ni, nɛ wa fa na, winɔ ni wa dɛ 'dã mɛnɔ kɛ wɔ zã wa tombo wa we nɛ ni.

¹⁹ Nɛ wa tɔ̃ hã wa na: “Nɛ 'bɔ ti mbula bina!” Ĩ na, Owi be we bɛlɛnɔ ni, wa a ngbá 'da 'dã mɛnɔ kɛ ma kã wa dɛ li fio ni. Mba gɔ, fala kɛ wele hã tɛ ɛ vɛ we mɔ, nɛ a hɔ ngbá 'da mɛ ni.

²⁰ Ombe winɔ wa hɔa nza ti ngawi 'da 'dã mɛnɔ ngɔ nù gɛ, kɛ ma 'danga owinɔ ni, nɛ wa ĩ ti Yezu Kristo nɛ́ Nwa 'da wa, do Wi kpasa wa. Kɔ do 'do, hã wa kpolo 'bɔ tɛ wa dɛ kɔ kpo 'dã mɛnɔ ni, kɔ ma hɔ 'bɔ nwa ngɔ wa, nɛ ndɔti dungu 'da wa ma 'danga sɛ nɛ ngɔ kɛ zi dati ni.

²¹ Ma dia sɔ fɛ na, wa tɛ ĩ̀ ti bɔlɔ wala 'da Gale gɔ. Mba gɔ, wa ĩ ti nɛ, nɛ nde wa la 'bɔ fala dɛ mbula 'da Gale kɛ wa bia hã wa ni. Ki ni ma 'danga nɛa ngɔ kɛ na, wa tɛ ĩ̀ sɔ ti nɛ gɔ ni.

²² Mɛ wa dɛa ni, ma ɔ nɛ kɛ Owele wa tɔ̃ do gba we na: “Tolo ɔ̃lɔ̃, nɛ a nyɔngɔ.” Tabi: “Ngulu fɔlɔ tɛ a, nɛ a kindi 'bɔ tɛ a 'dɔ 'bɛ̃tɛ̃” ni.