2 PETRO 1 - WE NU GALE 1995

¹ Wi a mi Simɔ Petro, wi dɛa toe do wi nɛ toe 'da Yezu Kristo, mi kɔmɔ mbɛti gɛ hã nɛ, kɛ nɛ hɔa Owi kɔ̃a we, nɛ kɔ̃a we 'da nɛ dia wia kɔ̃ do kɛ 'da lɛ ni. Wi a Yezu Kristo kɛ a a Gale 'da lɛ, nɛ a 'bɔ a Wi kpasa lɛ ni, a hã ma hã lɛ do bɔlɔ zui 'da a.

² E kɔ Gale be dia zã 'da a hã nɛ, nɛ a dɛ na, nɛ ɔ do gɛ̃a sila fai, we duzu kɛ nɛ ĩ ti a, nɛ nɛ ĩ 'bɔ ti Nwa 'da lɛ Yezu ni.

Gale sa mɔ hã lɛ, nɛ a saka lɛ

³ Wi a Yezu Kristo hã a hũi zi li lɛ we ĩ ti Gale, kɛ a sa zi mɔ hã lɛ na, lɛ le kɔ dɔ̃lɔ̃ li do dia zã 'da a ni. Nɛ ngawi 'da Kristo hã zi dia mɛnɔ kɛ ma gala lɛ we ɔ do kpasi, nɛ ma 'dafa dungi 'da lɛ na, ma de li Gale ni hã lɛ.

⁴ Na mɛ ni, a hã odia mɔ do gã golenɔ kɛ a kpua zi mbulu nɛ ni hã lɛ. A dɛa na mɛ ni, takɔ nɛ yu 'dã mɛnɔ kɛ owinɔ nù gɛ wa dɛ wɔ nɛ, nɛ ma 'danga wa ni, nɛ nɛ ɔ sɛ nɛ Gale ni.

⁵ Kɔ we duzu ma, ma wia na, nɛ dɛ́ nganda wena na, kɔ̃a we 'da nɛ ma mba do dia dɛa mɔ, nɛ dia dɛa mɛnɔ 'da nɛ mba do ĩ ti mɔ,

⁶ nɛ ĩ ti mɛ 'da nɛ mba do zimi tɛ nɛ. Kɔ nɛ ma ngɔ zimi tɛ nɛ, nɛ nɛ kúnú sila nɛ. Nɛ nɛ mba kunu sila nɛ do ba tɛ nɛ hã Gale.

⁷ Nɛ nɛ mba ba tɛ nɛ hã Gale do dɛ 'bɔ dia mɔ hã ongba nɛ ɔ nɛ onya wi ni. Nɛ nɛ mba dia dɛa mɛ nɛ dɛ hã ongba nɛ ni do kɔ̃ gɛnɛ winɔ vɛ̃.

⁸ Nɛ zɔ́, dia dɛa mɛnɔ kɛ ma wia na, nɛ dɛ gɛ a ni. Kɔ fala kɛ nɛ dɛ ni fai, nɛ tonɔ 'da nɛ ma de sɛ dɛ dati, nɛ ma ko sɛ de mɔ, nɛ ma gbaka sɛ nɛ we ĩ ti Nwa 'da lɛ Yezu Kristo do ngbongbo nɛ.

⁹ Nɛ nde wi kɛ a dɛ́ mɛnɔ gɛ gɔ ni, a ɔ nɛ wi tandu ni. Ta zu a ila ngɔ kɛ na, Gale fɔlɔ zi 'dã mɛnɔ kɛ a dɛa zi dati ia ni do'do.

¹⁰ We duzu ki ni, onyae, nɛ dɛ́ nganda wena we 'dafa dungi 'da nɛ, takɔ nɛ be hã winɔ na, Gale sa mɔ hã nɛ, nɛ a saka nɛ gbãlã we. Kɔ nɛ dɛ ní, nɛ nde nɛ té sɛ 'bɔ li 'dã mɔ fala kpo gɔ.

¹¹ Na mɛ ni, nɛ Gale a hũi sɛ li wala hã nɛ a gã na, nɛ le kɔ le nwa 'da Yezu Kristo, kɛ a a Nwa, do Wi kpasa lɛ ni. Nɛ nɛ ɔ sɛ fala nɛ kpo do a fai.

¹² Gɛnɛ kɔ nɛ ĩ zi ti wenɔ ni belee, nɛ sila nɛ 'bana vɛ̃ dɛ ngɔ gbãlã wenɔ kɛ wa bia zi hã nɛ ni, nɛ nde mi kɔ̃a we gba ta zu nɛ ngɔ ma fai.

¹³ Mba gɔ, mi zɔa na, nɛ́ kɛ mi 'bana nza gɛ, ma wia na, mi gba ta zu nɛ ngɔ mɛnɔ ni, dɔ ta zu nɛ élé ngɔ nɛ gɔ, kɔ nɛ lengge do ma fai.

¹⁴ Mi ĩ na, tũ dungu nza 'da mi 'bànà wena gɔ. Mi fe sɛ ɔ nɛ kɛ Nwa 'da lɛ Yezu Kristo bia zi hã mi ni.

¹⁵ Ma kɛ mi dɛ nganda wena na, gɛnɛ kɔ mi fe, nɛ ta zu nɛ 'bana dɛ ngɔ bia wenɔ gɛ fai.

Le zɔa zi dɔ̃lɔ̃ li 'da Kristo

¹⁶ Zi dati, fala kɛ lɛ tɔ̃a zi we Nwa 'da lɛ Yezu Kristo hã nɛ na, a tɛ sɛ do ngawi 'da a ni, lɛ tɔ̃̀ zi a gba to kɛ ma yolo kɔ hã zã mɔ́ wele ni gɔ, nɛ nde lɛ zɔa zi dɔ̃lɔ̃ li 'da a do gbali lɛ ngboo.

¹⁷ 'Da fala Gale Baa hã zi dɔ̃lɔ̃ li do dɔngga wi hã a ni, nɛ nde lɛ zi boe. Lɛ zila zi wala gɛlɛ a, ma yula kɔ gã yele ngbala 'da a li nza i, tɛ tɔ̃ na: “Wele kɛ gɛ a Be 'da mi ngɔ sila mi, mi do yangga wena we a.”

¹⁸ Lɛ do tɛ lɛ, lɛ zi fala nɛ kpo do a tɛ ngɔ kala kɛ ma santo, nɛ lɛ zila zi wala gɛlɛ wi kɛ ma wila li nza i ni.

¹⁹ We duzu ma, lɛ ĩ na, toe kɛ owi gba do nu Gale wa tɔ̃a zi ni, mɛ a gbãlã we ngboo. Kɔ ma wia na, nɛ zele bia wenɔ ni, nɛ nɛ ba ma dɛ kɔ sila nɛ, we kɛ ma ɔ nɛ mwinda kɛ ma nyɛ kɔ gba tũ, gbaa we 'bɔ 'da sa fala, nɛ gbandolo titole yele kɔ sila nɛ ni.

²⁰ Nɛ nde dati ngboo, nɛ ĩ́ na, wenɔ kɛ owi gba do nu Gale wa kɔma zɛ́ ma kɔ 'Buki 'da Gale ni, wele kpo wè tɛ tɔ̃ gulu nɛ do hã zã ɛ iko gɔ.

²¹ Mba gɔ, wenɔ kɛ Owi gba olo nu Gale wa tɔ̃a zɛ́ ni, ma yòlò kɔ hã zã 'da wa wele nɛ gɔ. Nɛ nde Hi Wi Santo lia zi kɔ wa, nɛ wa gba olo nu Gale ngboo.