2 TƐSALONIKƐ 3 - WE NU GALE 1995

Nwa dɛ olo nu a dɛa fai

¹ Onyae, do ndɔti nɛ, mi aka nɛ na, nɛ sámbálá Gale we duzu lɛ, takɔ we 'da Nwa yɛ'bɛ dɛ dati, nɛ sako nɛ yɛ'bɛ falanɔ vɛ̃, ɔ nɛ kɛ ma yɛ'ba zi 'da nɛ i ni.

² Nɛ nɛ sámbálá 'bɔ Gale we duzu lɛ na, a kpasa lɛ ti kɔ̃ o'dã winɔ do owi sɛnɛ lɛ, we kɛ winɔ wa kɔ̃̀ we 'da Gale kpa zu wa vɛ gɔ.

³ Nɛ nde Nwa dɛ olo nu a dɛa fai. A hã sɛ ngawi hã nɛ, nɛ a fɔmɔ sɛ nɛ na, dɔ Satana dɛ́ 'dã mɔ do nɛ gɔ.

⁴ Ɔ nɛ kɛ lɛ kɔ̃a zu li Nwa ni, lɛ gbini zã lɛ do nɛ na, wenɔ vɛ lɛ tɔ̃ hã nɛ ni, nɛ dɛ ma dɛa, nɛ nɛ dɛ sɛ ma fai.

⁵ E kɔ Nwa 'dafa sila nɛ na, nɛ kpa kɔ̃a zã 'da Gale, nɛ sila nɛ nganda ɔ nɛ kɛ 'da Kristo ni.

Ma wia na wele dɛ to

⁶ Onyae, lɛ tɔ̃ hã nɛ do zu li Nwa Yezu Kristo na, nɛ yú Owi Kristonɔ kɛ wa a osulu wi, nɛ wa kɔ̃̀ we dɛ mbula kɛ lɛ bia zi ma hã nɛ ni gɔ ni.

⁷ Nɛ do tɛ nɛ, nɛ ĩ ti tɛlɛ tɛ kɛ nɛ wia tɛ 'bã do olo kɔ̃ lɛ ni. Mba gɔ, lɛ dùngù zi sanga nɛ ɔ nɛ osulu wi gɔ.

⁸ Lɛ 'bɔ zi we nyɔngɔ mbɔkɔ mɔ mɔ́ wele iko gɔ, nɛ nde tũ do gba wese, lɛ gbɛa zi tɛ lɛ li dɛa to na, da dɛ kɔ lɛ hɔ́ dĩ tole we wele kpo sanga nɛ ni gɔ.

⁹ Lɛ wia zi tɛ gɔ mɔ kɔ̃ nɛ gbãlã we, nɛ nde lɛ dè ma gɔ, we kɛ lɛ kɔ̃a zi we be dia wala hã nɛ na, nɛ 'bã olo kɔ̃ lɛ.

¹⁰ Do 'da fala kɛ lɛ 'bana zi sanga nɛ i ni, lɛ tɔ̃a zi mbula hã nɛ na: “Wi kɛ a kɔ̃̀ we dɛ to gɔ, nɛ a tɛ nyɔ̀ngɔ̀ mɔ gɔ.”

¹¹ Lɛ tɔ̃ na mɛ ni, we kɛ lɛ zila na, ombe sanga nɛ wa dungu iko, wa kɔ̃̀ we dɛ to gɔ, nɛ wa yɛnggɛ tɛ fĩ nu wa kɔ toe 'da ngba wa iko.

¹² Owinɔ ni, lɛ ba nu lɛ hã wa do zu li Nwa Yezu Kristo, nɛ lɛ dala nu lɛ hã wa na, wa dɛ to do gɛa sila, nɛ wa nyɔngɔ mɔ olo dɛa toe 'da wa wele nɛ.

¹³ Kɔ we duzu nɛ, onyae, nɛ tɛ mbɔ́kɔ́ tɛ dɛ de mɔ gɔ.

¹⁴ 'Da fala kɛ wele kɔ̃̀ we zele mbulanɔ kɛ lɛ kɔma ma kɔ mbɛti gɛ gɔ, nɛ nɛ zɔ́ a do sɔ̃a li, nɛ nɛ lá fala yɛnggɛ do a, takɔ sape ba li a.

¹⁵ Nɛ nɛ tɛ sɛnɛ a sɛna gɔ, nɛ nde nɛ tɔ̃̀ mbula hã a ɔ nɛ kɛ wele tɔ̃ hã nya ɛ ni.

Ndɔti lɛnggɛ

¹⁶ E kɔ Nwa, wele gɛa sila, a hã gɛa sila hã nɛ 'da fala fai, do walanɔ vɛ. E kɔ Nwa 'bana do nɛ vɛ.

¹⁷ Wi a mi Polo, mi kɔmɔ balɛ gɛ hã nɛ do zu kɔ̃ mi wele nɛ. Nɛ zɔ́ tɛlɛ tɛ kɛ mi e do kɔ̃ mi ti mbɛtinɔ 'da mi vɛ gɛ a ni. Kɛ gɛ a mbɛti do kɔ̃ mi.

¹⁸ E kɔ dia zã 'da Nwa 'da lɛ Yezu Kristo 'bana do nɛ vɛ.