2 TƐSALONIKƐ 2 - WE NU GALE 1995

Mɛnɔ kɛ ma hɔ sɛ dati tɛa 'da Yezu ni

¹ Onyae, di ngangga ni, mi kɔ̃a we tɔ̃ lɛnggɛ ngɔ tɛa 'da Nwa 'da lɛ Yezu Kristo, kɛ a hɔ sɛ, nɛ lɛ mba li ngba lɛ do a ni. Mi ala nu mi hã nɛ na,

² fala kɛ wele tɔ̃ hã nɛ na, ngba soe tɛa 'da Nwa hɔa ia nde, nɛ ma tɛ vĩ̀ zu nɛ gɔ, nɛ sila nɛ tɛ ɔ̀ ngɔ gɔ. Gɛnɛ kɔ mbe wele tɔ̃ na Hi Wi Santo bia hã ɛ ni, tabi owele wa be do we, tabi wa tɔ̃ na, lɛ a lɛ kɔma ma do mbɛti nde, nɛ nɛ tɛ kɔ̃̀ gɛnɛ nɛ gɔ.

³ Da dɛ kɔ wele ɔlɔ nɛ do gele we gɔ. Mba gɔ, dati kɛ na kɔ̃ tũi ni ma we, nɛ Owele wena wa bé sɛ gɛnɛ Gale, nɛ Wi 'danga mbula 'da Gale a be sɛ tɛ a nza. A a wi kɛ Gale a gbɛ sɛ a do ndɔti nɛ.

⁴ Wi sɛnɛ Gale ni a bɛ̃ sɛ gɛnɛ mɛnɔ vɛ kɛ owele wa sa li nɛ na gale ni, do mɛnɔ vɛ kɛ winɔ wa dɔnggɔ ma ni, nɛ a ba sɛ tɛ a na, ɛ nɛa ngɔ mɛnɔ ni vɛ. Nɛ a nɛ sɛ gbaa we dungu nù kɔ gã tɔa Gale we be tɛ̃ a hã winɔ na, ɛ a Gale ngboo.

⁵ Mi tɔ̃a zi we gɛ hã nɛ do 'da fala mi 'bana zi sanga nɛ i ni. Ta zu nɛ i ila nde?

⁶ Nɛ nde mbe mɔ kpo 'bana tɛ kpe wala ti wenɔ ni na, ma tɛ dè tɛ ɛ do ti gɔ, nɛ nɛ ĩ ti mɛ ni. Kɔ tũ nɛ ma we, nɛ Wi sɛnɛ Gale a hɔ sɛ.

⁷ Ngawi 'da Wi ni, ma ndua dɛ to sanga winɔ do usu nɛ ia. Nɛ nde mɛ ma nɛ hɔ nɛ ni, ma hɔ sɛ do ti gɔ gbaa, hã wi kpe wala nɛ fo tɛ ɛ do'do sɛ nɛ de.

⁸ Do 'da fala nɛ ni, nɛ Wi sɛnɛ Gale a be sɛ tɛ a nza. Kɔ fala kɛ Nwa Yezu hɔ, nɛ a gbɛ sɛ a do bũ nu a, nɛ a kumu sɛ a do dɔ̃lɔ̃ li kɛ a tɛ sɛ nɛ ni.

⁹ Wi sɛnɛ Gale a tɛ sɛ do ngawi 'da Satana, nɛ a dɛ sɛ ogba sɔ̃ mɔ, omɔ ɔ ɔngba, do mɔ hã kili kpi do kpi we ɔlɔ do owele.

¹⁰ Nɛ o'dã mɛnɔ a dɛ ma ni, ma ɔlɔ sɛ owinɔ kɛ wa ngɔ wala fio ni. Owinɔ ni wa ngɔ wala fio, we kɛ wa bɛa gɛnɛ gbãlã we 'da Gale kɛ ma wia sɔ we kpasa wa ni.

¹¹ Ma kɛ Gale 'danga hã zã 'da wa vɛ na, wa kɔ̃ tati a gɛnɛ bɛlɛ iko.

¹² Na mɛ ni, winɔ kɛ wa bɛa gɛnɛ gbãlã we, nɛ wa kɔ̃a gɛnɛ 'dã mɔ ni, wa te sɛ li ngbangga.

Gale saka zi nɛ na nɛ kpasa

¹³ Nɛ nde kɛ 'da lɛ, onyae, lɛ wia tɛ hã iɔ̃nae hã Gale 'da fala fai we duzu nɛ, kɛ Nwa kɔ̃a gɛnɛ nɛ ni. Mba gɔ, Gale saka zɛ́ nɛ do ndo nyanga dɛ mɛnɔ, takɔ a kpasa nɛ, nɛ a kifi nɛ do winɔ 'da a ngboo. A kpasa sɛ nɛ do ngawi 'da Hi Wi Santo, do ngawi 'da kɔ̃a we nɛ kɔ̃a do gɛnɛ gbãlã we ni.

¹⁴ Gale sa zi mɔ hã nɛ do wala Dia Sakoe kɛ lɛ bia zi hã nɛ ni, takɔ nɛ kpa dɔ̃lɔ̃ li fala nɛ kpo do Nwa 'da lɛ Yezu Kristo.

¹⁵ Na mɛ ni, onyae, nɛ yóló nganda, nɛ sila nɛ nɔ́ tɛ gbãlã wenɔ kɛ lɛ bia zi ma hã nɛ do nu lɛ, tabi lɛ kɔma ma do mbɛti ni vɛ̃.

^16-17 E kɔ Nwa 'da lɛ Yezu Kristo do tɛ̃ a, do Baa lɛ Gale kɛ a kɔ̃a zi gɛnɛ lɛ ni, wa kpãlã sila nɛ, nɛ wa hã ngawi hã nɛ we dɛ mɛnɔ do tɔ̃ wenɔ kɛ ma a dia ni. Gale bia dia zã hã lɛ, nɛ a dɛa na, lɛ ɔ do kpã sila kɛ ma é sɛ gɔ ni, nɛ lɛ gbini zã lɛ do a fai.