2 TƐSALONIKƐ 1 - WE NU GALE 1995

¹ Wi a mi Polo, do Silasi, do Timote, lɛ kɔma mbɛti gɛ hã nɛ owi Kristonɔ kɔ le Tɛsalonikɛ, kɛ nɛ mba kpo do Baa lɛ Gale, do Nwa Yezu Kristo ni.

² E kɔ wa be dia zã hã nɛ, nɛ wa dɛ na, nɛ dungu do gɛ̃a sila.

Gale a 'bili sɛ we 'da owinɔ fala kɛ Yezu a tɛ sɛ ni

³ Onyae, ma wia na, lɛ hã iɔ̃nae hã Gale we duzu nɛ 'da fala fai. Lɛ wia tɛ dɛ na mɛ ni gbãlã we, mba gɔ, kɔ̃a we 'da nɛ dɛ 'da Gale, do kɔ̃ ngba wi 'da nɛ ma gã dɛ dati gã fai.

⁴ Ma kɛ lɛ dɔnggɔ tɛ lɛ do nɛ kɔ eklezianɔ 'da Gale, we duzu kɛ kɔ zɛlɛ tɛnɔ do ngamɛnɔ nɛ kpa ma ni, nɛ nde nɛ 'bana do kpã sila, do kɔ̃a we dɛ 'da Yezu.

⁵ Zɛlɛ tɛnɔ vɛ̃ nɛ kpa ni, ma 'dafa nɛ na, nɛ we owi kɔ le nwa 'da Gale, kɛ nɛ kpa zɛlɛ tɛ we nɛ ni. Nɛ lá ni ma be na, Gale 'bili we do bɔlɔ nɛ.

⁶ Gbãlã we, Gale dɛ mɔ do bɔlɔ nɛ: A gese sɛ zɛla tɛ hã owinɔ kɛ wa zɛla zi tɛ nɛ ni,

⁷ nɛ a hã sɛ fala kpe tɛ wi hã nɛ, winɔ kɛ nɛ zɔa ngamɛnɔ ni, a hã sɛ ma hã lɛ do nɛ fala nɛ kpo. A dɛ sɛ ni 'da fala kɛ Nwa Yezu a yolo sɛ ngɔ i, nɛ a zĩlĩ fala nɛ kpo do anzɛnɔ 'da a kɛ wa do ngawi wena ni.

⁸ Nwa 'da lɛ Yezu a zĩlĩ sɛ dɛ kɔ gba nyɛa we, takɔ a bili nu gbã hã owinɔ kɛ wa kɔ̃̀ we ĩ ti Gale gɔ, nɛ wa bɛa gɛnɛ Dia Sakoe ni.

⁹ Nɛ etumbui wa kpa sɛ olo 'dã mɛ 'da wa ni, mɛ a gã ngamɔ kɛ fo ndɔti nɛ bina ni. Nwa a ndaka sɛ wa ngɔ li a do'do, nɛ wa zɔ sɛ dɔ̃lɔ̃ li 'da a gɔ.

¹⁰ Mɛnɔ ni ma dɛ sɛ tɛ ɛ do kpo soe kɛ Yezu a tɛ sɛ nɛ, takɔ winɔ 'da a wa dɔnggɔ a, nɛ wanɔ vɛ kɛ wa kɔ̃a zu li a ni, wa ɔngbɔ a ni. Nɛ nɛ sɛ fala nɛ kpo do owi kɔ̃a wenɔ ni, we kɛ nɛ kɔ̃a gɛnɛ Dia Sakoe lɛ bia zi hã nɛ ni.

¹¹ Gulu nɛ a lɛ sambala Baa lɛ Gale we duzu nɛ fai na, a 'dáfá nɛ, kɔ nɛ we do kpasi kɛ a sa zi mɔ hã nɛ we nɛ ni. Nɛ lɛ aka a na, a hã ngawi 'da a hã nɛ, takɔ nɛ dɛ dia mɛnɔ vɛ kɛ nɛ kɔ̃a we dɛ nɛ ni, nɛ a dɛ 'bɔ na, to olo kɔ̃a we 'da nɛ we ngboo.

¹² Na mɛ ni, nɛ Nwa 'da lɛ Yezu a kpa sɛ dɔ̃lɔ̃ li kɔ̃ nɛ, nɛ a dɔnggɔ sɛ tɛ mɛ 'bɔ nɛ. Ma dɛ sɛ ní, we duzu dia zã 'da Gale 'da lɛ, do Nwa 'da lɛ Yezu Kristo.