2 SAMUƐLƐ 9 - WE NU GALE 1995

Davidi bia dia zã hã Mɛfibalɛ

¹ Mbe tũ kpo, nɛ Davidi aka na: “Wele kpo 'bànà mbe do tunu li a kɔ nu fɛlɛ Saulo gɔ nde? Mi kɔ̃a na mi be dia zã hã a, we duzu Yonatanɛ.”

² Ĩ na, nu fɛlɛ Saulo zi do mbe wi to kpo, li a a Siba. Ma wa sa mɔ hã a na, a tɛ. A hɔa dati Davidi, nɛ Davidi aka a na: “Wi a mɔ Siba nde?” Nɛ Siba gese na: “Ĩi nwa, wi a mi.”

³ Nɛ nwa Davidi aka 'bɔ na: “Wele kpo 'bànà mbe kɔ nu fɛlɛ Saulo na, mi dɛ de mɔ hã a, ɔ nɛ kɛ zã Gale kɔ̃a ni gɔ nde?” Nɛ Siba tɔ̃ hã a na: “Mbe be olo Yonatanɛ kpo 'bana. Nɛ nde nyanga a do bɔa nɛ kala do'do.”

⁴ Davidi aka na: “A a i do nde?” Nɛ Siba gese na: “A a tɛ 'da Makirɛ, be 'da Amiɛlɛ, tɛ kɔ le Lo-Dabarɛ.”

⁵ Nɛ Davidi tumba wele na, a nɛ tɛ Lo-Dabarɛ i, kɔ a kpa be 'da Yonatanɛ, Mɛfibalɛ, kɛ a a be yaa Saulo ni, kɔ a tɛ do a.

⁶ Nɛ Mɛfibalɛ nɛa we hɔ 'da nwa Davidi, nɛ a gu li a nu dati a. Nɛ Davidi aka na: “Wi a mɔ Mɛfibalɛ nde?” Nɛ a gese na: “Ĩi nwa, wi a mi.”

⁷ Nɛ Davidi tɔ̃ hã a na: “Mɔ tɛ dɛ̀ kili gɔ. Mi kɔ̃a we dɛ de mɔ hã mɔ, we lengge do baa mɔ Yonatanɛ. Mi nɛ gese nùnɔ vɛ̃ kɛ wele nɛ zi a mɔ́ yaa mɔ Saulo ni hã mɔ. Nɛ mi kɔ̃a 'bɔ na, mɔ nyɔngɔ sɛ mɔ nu mɛsa 'da mi fai.”

⁸ Mɛfibalɛ nɛa we zele ni, nɛ a bili zu a nù, nɛ a tɔ̃ na: “Aa nwa, gulu kɛ mɔ lengge do mi, kɛ mi a nga fia tolo iko gɛ we ge nde?”

⁹ Nɛ nwa Davidi sa mɔ hã Siba, wi toe 'da Saulo, nɛ a tɔ̃ hã a na: “Mi hã mɛnɔ vɛ̃ zi olo wele mɔ Saulo, do nu fɛlɛ a ni hã be yaa a Mɛfibalɛ.

¹⁰ Nɛ mɔ do obenɔ 'da mɔ, do owi tonɔ 'da mɔ, nɛ dɛ sɛ to fɔ hã nu fɛlɛ olo nwa 'da mɔ. Nɛ nɛ tɛ sɛ do nyɔngɔmɔ kɛ ma wia na, wa nyɔngɔ ni hã wa. Nɛ nde Mɛfibalɛ, a nyɔngɔ sɛ mɔ do mi fai.” (Siba zi do obulu be 'bu ngɔ wa mɔlɔ, do Owi to 'bu wa bɔa.)

¹¹ Nɛ a tɔ̃ hã nwa Davidi na: “Aa nwa, kɛ vɛ̃ mɔ ba nu mɔ na mi dɛ ni, nɛ mi dɛ sɛ.” Mɛfibalɛ nyɔngɔ zi mɔ fai nu mɛsa 'da Davidi ɔ nɛ kɛ a a be 'da nwa ni.

¹² Mɛfibalɛ zi do be zagbãlã be mɔ́ a, li a a Mika. Nɛ winɔ wa dɛ zi to hã a, wi a owinɔ vɛ̃ kɛ wa ɔ zi kɔ tɔa 'da Siba ni.

¹³ Yolo dɛ di ni, nɛ Mɛfibalɛ kɛ nyanga a kala zi bɔa nɛ ni, a kulu dɛ Yeruzalɛmɛ i, sɛ a a wia we nɛ we nyɔngɔ mɔ do nwa Davidi fala nɛ kpo fai de.